Ди тхыгъэхэм еджэхэм я упщІэхэр

Левит 19:16 ит «фи гъунэгъум и гъащІэм зэран хуэхъун гуэр фымыщІэ» жыхуиІэ унафэм къикІыр сыт икІи ди зэманым псэу Алыхьым и лэжьакІуэхэм сыткІэ ар сэбэп яхуэхъурэ?

Иеговэ израил лъэпкъым яхуигъэувт ахэр лъапІэу щытын хуейуэ. Аращ абыхэм мыпхуэдэ псалъэхэр щІажриІар: «Фи лъэпкъым щыщ зыми пцІы тевмылъхьэ. Фи гъунэгъум и гъащІэм зэран хуэхъун гуэр фымыщІэ. Фи Алыхь Иеговэр сэращ» (Лев. 19:2, 16).

АдыгэбзэкІэ зэдзэкІа «фи гъунэгъум и гъащІэм зэран хуэхъун гуэр фымыщІэ» жыхуиІэ псалъэхэм журтыбзэкІэ уеджэмэ, «цІыхум и лъым фытемыт» жиІэу аращ. Ауэ сыт абы къикІыр?

Языныкъуэ щІэныгъэлІхэм я гугъэщ мы псалъэхэр абы ипэ ит едзыгъуэм епхауэ щыту. Абы щыжыІащ: «Хьэкум щыфщІкІэ захуагъэм фытемыкІ. НэфІ-ней зевмыхьэ: тхьэмыщкІэми къулейми зэхуэдэу фыхущыт. Захуагъэ хэлъу фи гъунэгъум хьэкум тефщІыхь» (Лев. 19:15). Апхуэдэу щытмэ, «фи гъунэгъум и гъащІэм зэран хуэхъун гуэр фымыщІэ» жыхуиІэ псалъэхэм къокІ Алыхьым и лэжьакІуэхэм езыхэм я фейдэ къикІын щхьэкІэ пэжыр зэблашын зэрыхуэмейр, псалъэм папщІэ, хьэкум щащІкІэ, лэжьыгъэмрэ унагъуэмрэ пыщІа Іуэхухэм щыхэткІэ. ДауикІ, апхуэдэ щытыкІэр тэмэмкъым, ауэ Левит 19:16 итыр къыдгурыІуэн щхьэкІэ нэгъуэщІ Іэмали щыІэщ.

Едзыгъуэм и япэ Іыхьэм гу лъыттэнщ. Иеговэ и лъэпкъым мыпхуэдэу жреІэ: «Зыми пцІы тевмылъхьэ». Бзэгу зепхьэным зэранышхуэ пылъщ, ауэ зыгуэрым пцІы теплъхьэныр абы нэхърэ нэхъ Іейщ (Прит. 10:19; Эккл. 10:12—14; 1 Тим. 5:13—15; Екъуб 3:6). НэгъуэщІым пцІы тезылъхьэм и мурадыр а цІыхум и цІэр игъэулъииныращ. Хьэкум щащІкІэ ар щыхьэт нэпцІу къэувыну хьэзырщ, цІыхум и гъащІэр фІэкІуэдыну шынагъэ щыІэми. Аращ Навот къыщыщІар: цІыху напэншэхэм пцІы къызэрытралъхьам къыхэкІкІэ абы и гъащІэр фІэкІуэдащ (1 Цар. 21:8—13). Зэрытлъагъущи, нэгъуэщІым пцІы тезылъхьэр пэж дыдэу цІыхум и гъащІэм зэран хуэхъуфынущ.

ЦІыхум гурыщІэ Іей узэрыхуиІэм ухуигъэушынкІэ хъунущ абы пцІы теплъхьэну. Абы теухуауэ 1 Иуан 3:15 мыпхуэдэу итщ: «Зи къуэшыр жагъуэу зылъагъу дэтхэнэри цІыхуукІщ. ЦІыхуукІым и гум мыкІуэдыжын гъащІэ зэримылъыр фэ фощІэ». Аращи, гъэщІэгъуэнкъым, Левит 19:16 ит унафэм иужькІэ мыпхуэдэ псалъэхэр къызэрыкІэлъыкІуэр: «Уи къуэшыр плъагъу мыхъуу ущымыт» (Лев. 19:17).

Аращи, «фи гъунэгъум и гъащІэм зэран хуэхъун гуэр фымыщІэ» жыхуиІэ унафэр ди зэманым псэу Алыхьым и лэжьакІуэхэми яхуэгъэзащ. Ди гъунэгъум ІейкІэ дызэремыгупсысыным икІи пцІы зэрытедмылъхьэным дыхущІэкъун хуейщ. НэгъуэщІым пцІы тезылъхьэм и гум илъыр фыгъуэнрэ лъагъумыхъуныгъэрэщ. Апхуэдэ цІыхур пцІы зытрилъхьэм и гъащІэм зэран хуэхъуу жыпІэ хъунущ. Алыхьым и лэжьакІуэр апхуэдэу щытыну, дауикІ, къезэгъкъым (Мт. 12:36, 37).