«Уи цІэр цІыхухэм ирегъэлъапІэ»

1, 2. Иеговэ и Щыхьэтхэм сыт хуэдэ упщІэхэр зэпкърахыну ягу ирихьрэ?

ИЕГОВЭ И ЩЫХЬЭТХЭМ хуабжьу ягу ирохь Иеговэ и тепщэныгъэмрэ абы и цІэр гъэлъэпІэнымрэ теухуа упщІэхэр зэпкърахыну. Ауэ дегупсысын хуейкъым а упщІитІыр зыкІи зэмыпхауэ.

² Алыхьым пцІы зэрытралъхьам къыхэкІкІэ, дэ къыдгуроІуэ абы и цІэр зэрыгъэкъэбзэжын хуейр. Абы нэмыщІ дэ къыдгуроІуэ Иеговэ и тепщэныгъэр псом нэхърэ зэрынэхъыфІыр къэдгъэлъэгъуэн зэрыхуейр. Мы гупсыситІми гулъытэ хуэтщІыным мыхьэнэшхуэ иІэщ.

3. Иеговэ и цІэм сыт пыщІар?

³ Пэжыр жыпІэмэ, Иеговэ и цІэм пыщІащ абы теухуа псори, абы хохьэ и тепщэныгъэри. Абы къыхэкІкІэ Алыхьым и цІэр гъэкъэбзэжынымрэ Иеговэ и тепщэныгъэр псом нэхърэ зэрынэхъыфІыр къэгъэлъэгъуэнымрэ зэпыщІащ. («Алыхьым и цІэр гъэкъэбзэжыным пыщІа упщІэхэр» жыхуиІэ рамкэм феплъ.)

4. Алыхьым и цІэм теухуауэ Псалом 135:13 сыт итыр? Мы статьям сыт хуэдэ упщІэхэр щызэпкърытхыну?

⁴ Алыхьым и цІэм хуэдэ щыІэкъым. (Къеджэ Псалом 135:13b.) Сыт абы мыхьэнэшхуэ щІиІэр? Дапщэщ абы япэ дыдэу пцІы щытралъхьар? Сыт Алыхьым ищІэр и цІэр гъэлъэпІа хъун щхьэкІэ? ИкІи сыт дэ тщІэ хъунур Алыхьым и цІэм дыкъыщхьэщыжын щхьэкІэ? Мы упщІэхэм я жэуапхэр адэкІэ къэтщІэнщ.

ЦІЭМ МЫХЬЭНЭ ИІЭР

5. Алыхьым и цІэр гъэлъэпІэным теухуауэ сыт хуэдэ упщІэ къэхъеинкІэ хъунур?

⁵ Алыхьым лъэІукІэ зэрызыхуэдгъэзэнум теухуауэ Хьисэ щапхъэ къытхуигъэнам къыдгурегъаІуэ ди лъэІум сыт япэ идгъэщын хуейми. Абы жиІащ: «Тхьэм мыпхуэдэу фелъэІу: „Уэ ди Адэ лъапІэу уафэм щыІэ! Уи цІэр цІыхухэм ирегъэлъапІэ“» (Мт. 6:9). Сыт мы псалъэхэм къикІыр? «ГъэлъэпІэн» псалъэм къикІыр зыгуэр лъапІэ, къабзэ щІын жиІэу аращ. Ауэ зыгуэрым упщІэ иІэнкІэ хъунущ: «Армырами лъапІэ цІэр сыт гъэлъэпІэн щІыхуейр?» Мы упщІэм и жэуапыр къэдгъуэтын щхьэкІэ зыгуэрым и цІэр къыщитІуэм деж ди нэгу къыщІэдгъэхьэр сытми зэхэдгъэкІынщ.

6. ЦІэм сыт апхуэдэу мыхьэнэшхуэ щІиІэр?

⁶ ЦІэр хьэрф зэхэт е макъ закъуэу щыткъым. Библием щыжыІащ: «Дуней мылъку нэхърэ нэхъыфІщ уи цІэ фІыкІэ къраІуэныр» (Прит. 22:1, Гъэсэпэтхыдэхэр; Эккл. 7:1). ЦІэм сыт апхуэдэу мыхьэнэшхуэ щІиІэр? Зыгуэрым и цІэр къыщыраІуэм деж цІыхухэр а цІэракъым зэгупсысыр, атІэ ар зезыхьэр сыт хуэдэ цІыхуу щытми я нэгу къызэрыщІагъэхьэращ. Абы къыхэкІкІэ псом нэхъапэр цІэр зэратхыракъым е къызэрапсэлъыракъым, атІэ а цІэр щыжаІэм деж цІыхухэр зэгупсысыращ.

7. ЦІыхухэм дапхуэдэу Алыхьым и цІэр зэрагъэулъийр?

⁷ ЦІыхухэм Иеговэ теухуауэ пцІы щыжаІэм деж, ар Алыхь Іейуэ нэгъуэщІхэр егупсысыну хуагъэуш. Иеговэ Алыхь Іейуэ щыжаІэм деж, абы и цІэр ягъэулъий. Япэ дыдэу апхуэдэ къыщыхъуар, илъэс мин бжыгъэкІэ узэІэбэкІыжмэ, Іэдэн жыг хадэращ. АдэкІэ деплъынщ дэ абы сытым дыхуигъэсэфынуми.

ДАПХУЭДЭУ АЛЫХЬЫМ ЯПЭ ДЫДЭУ ПЦІЫ ЗЭРЫТРАЛЪХЬАР?

8. Іэдэмрэ Хьэуарэ сытыт ящІэр икІи сыт хуэдэ упщІэхэр къэхъейрэ?

⁸ Іэдэмрэ Хьэуарэ ящІэт Алыхьым Иеговэ и цІэу зэрыщытыр икІи абы теухуауэ нэгъуэщІ куэди ящІэт. Абыхэм ящІэт псори абы къызэригъэщІар — гъащІэр, ныкъусан зыхэмылъ Іэпкълъэпкъыр, жэнэт унэ дахащэр, щхьэгъусэфІыр Алыхьым къазэрыритар (ЩІэдз. 1:26—28; 2:18). Ауэ абыхэм Иеговэ яхуищІа псор лъапІэу ялъытэрэт? Иеговэ нэгъэсауэ фІыуэ ялъагъурэт икІи фІыщІэ хуащІрэт? Ар гурыІуэгъуэ хъуащ Алыхьым и бийр абыхэм щепсэлъам щыгъуэ.

9. ЩІэдзапІэ 2:16, 17; 3:1—5 зэритымкІэ, Иеговэ сыт Іэдэмрэ Хьэуарэ яжриІар икІи ШейтІаным дапхуэдэу пэжыр пцІыкІэ зэрызрихъуэкІар?

⁹ Къеджэ ЩІэдзапІэ 2:16, 17; 3:1—5. ШейтІаным блэр къигъэсэбэпри Хьэуа еупщІащ: «Пэж дыдэу жиІа Тхьэм, „Жэнэтым щыкІ жыгхэм ящыщу зым и пхъэщхьэмыщхьи фымышх“, жиІэу?» ШейтІаным упщІэ итам Алыхьым теухуа пцІы хэтт, икІи ар Хьэуа и гупсысэкІэм зэран хуэхъуащ. Ауэ пэжыр жыпІэмэ, зы жыгым пыт пхъэщхьэмыщхьэрат Іэдэмрэ Хьэуарэ яшх мыхъуну Алыхьым яжриІар, абыхэм жыг хадэм ит адрей жыгхэм къапыкІэр яшх хъунут. ИкІи жэнэтым жыг зэмылІэужьыгъуэ куэд итт (ЩІэдз. 2:9). Иеговэ хьэлэлагъ хэлъу Іэдэмрэ Хьэуарэ куэд яхуищІат. Абы зы жыг закъуэм пыт пхъэщхьэмыщхьэрат яшх мыхъуну яжриІар. Апхуэдэу ШейтІаным а упщІэмкІэ пэжыр пцІыкІэ зэрихъуэкІащ. Алыхьым цІыхухэм фІы гуэр ящибзыщІу къащигъэхъун щхьэкІэ ШейтІаным а псалъэхэр жиІащ. Хьэуа мыпхуэдэу егупсысауэ къыщІэкІынщ: «Ар пэжмэ-щэ?»

10. Дапхуэдэу ШейтІаным и бзаджагъэр щІимыхъумэу, Алыхьым и цІэр игъэулъийуэ зэрыщІидзар?

¹⁰ Абы щыгъуэ Хьэуа иджыри и фІэщ хъут сытыр Іейми сытыр фІыми къыжриІэну Иеговэ фІэкІа зыми хуитыныгъэ зэримыІэр. Хьэуа ШейтІаным жэуап щритыжым щыгъуэ Иеговэ а цІыхуитІым унафэ къахуищІар ІупщІу жриІэжат. Абы иджыри щІигъуащ езымрэ Іэдэмрэ фІымрэ Іеймрэ зэхэзыгъэкІ жыгым еІуси зэрымыхъунур икІи а унафэм емыдаІуэмэ зэрылІэнур — ар езы Алыхьым къажриІат. Абы иужь ШейтІаным жиІащ: «Хьэуэ, фылІэнукъым» (ЩІэдз. 3:2—4). Иджы ШейтІаным и бзаджагъэр щІимыхъумэу, Алыхьым и цІэр игъэулъийуэ щІидзащ, къапщтэу щытмэ абы Хьэуа жриІащ Иеговэ пцІы иупсу. Апхуэдэу ШейтІаныр Иблис хъуащ, абы къикІыр адрейхэм пцІы тезылъхьэ жиІэу аращ. Хьэуа ШейтІаным и пцІым зыдригъэхьэхащ икІи Иеговэ жиІэр и фІэщ имыщІу, ШейтІаным жиІэр и фІэщ ищІащ (1 Тим. 2:14). Абы къыхэкІкІэ Хьэуа унафэ нэхъ мыхъун дыдэр къищтащ — и Адэм и унафэм ебэкъуащ. Иеговэ фымышх жыхуиІа пхъэщхьэмыщхьэм ар едзэкъащ, иужькІэ Іэдэми иритащ (ЩІэдз. 3:6).

11. Іэдэмрэ Хьэуарэ сыт ящІэн хуеяр?

¹¹ Сытыт-тІэ Хьэуа ШейтІаным жриІэн хуеяр? ШейтІаным и пцІыр зэхиха иужь Хьэуа мыпхуэдэу жиІэфынут: «Сэ уэ усцІыхукъым, ауэ сэ си Адэ Иеговэ соцІыху икІи ар фІыуэ солъагъу, дзыхьи хузощІ. Сэрэ Іэдэмрэ диІэ псор аращ къыдэзытар. Уэ абы теухуауэ сыт Іей щІыжыпІэр? Мыбдеж ІукІ!» Иеговэ хуабжьу и гуапэ хъунут фІыуэ илъагъу и пхъум мы псалъэхэр жиІауэ щытамэ! (Прит. 27:11, Гъэс.). Ауэ Іэдэми Хьэуаи Иеговэ лъагъуныгъэ хуаІэтэкъым икІи хуэпэжтэкъым. Я Адэм и цІэ лъапІэм къыщхьэщыжын щхьэкІэ абыхэм зы псалъи жаІакъым, ШейтІаным жиІа пцІыми пэщІэувакъым.

12. Дауэ ШейтІаныр Хьэуа и гупсысэкІэм зэран зэрыхуэхъуар икІи Іэдэмрэ Хьэуарэ сыт ямыщІар?

¹² ЗэрыжытІащи, япэщІыкІэ ШейтІаныр Хьэуа и гупсысэкІэм зэран хуэхъуну иужь ихьащ. Иеговэ АдэфІу зэрыщытым цІыхубзым шэч къытрихьэн щхьэкІэ абы къару ирихьэлІащ. Іэдэмрэ Хьэуарэ ШейтІаным жиІа пцІыр зэхаха иужь Алыхьым и цІэ лъапІэм къыщхьэщыжакъым. Абы къыхэкІкІэ ШейтІаным жиІам ахэр занщІэу арэзы техъуэри, я Адэм пэщІэуващ. Ноби ШейтІаным апхуэдэ бгъэдыхьэкІэ иІэщ. Абы Алыхьым и цІэр егъэулъий. А пцІыр зи фІэщ хъухэм Иеговэ я тепщэу щытын хуейуэ къалъытэкъым, абы къыхэкІкІэ абы и хабзэ пэжхэр ІэщІыб ящІ.

ИЕГОВЭ И ЦІЭР ЕГЪЭЛЪАПІЭ

13. Иезекииль 36:23 Библием и темэ нэхъыщхьэр дауэ къызэрыхэщыр?

¹³ Иеговэ ШейтІаным пцІы къытрилъхьам дапхуэдэу зэрыхущытыр? Зыри имыщІэу щыт? Хьэуэ! ШейтІаным Алыхьым теухуауэ Іэдэн жыг хадэм щыжиІахэр зэрыпцІыр къыщІигъэщын щхьэкІэ Иеговэ ищІэм Библие псор топсэлъыхь (ЩІэдз. 3:15). Библием и темэ нэхъыщхьэр мыпхуэдэу жыпІэ хъунущ: Иеговэ и Пащтыхьыгъуэр къигъэсэбэпу и цІэр егъэлъапІэ икІи мамырыгъэмрэ захуагъэмрэ щІылъэм щызэтрегъэувэж. А Пащтыхьыгъуэм и Пащтыхьу и Къуэ Хьисэ тригъэуващ. Библием дэ къыщыдощІэ Иеговэ и цІэр игъэлъэпІэн щхьэкІэ сыт ищІэми. (Къеджэ Иезекииль 36:23c.)

14. Іэдэн жыг хадэм къыщыхъуа Іуэхур зэхигъэкІын щхьэкІэ Иеговэ ищІэу щІидзам и цІэр дапхуэдэу зэригъэлъапІэр?

¹⁴ Иеговэ и мурадыр гъэзэщІа мыхъун щхьэкІэ ШейтІаным хузэфІэкІыу хъуар ещІэ, ауэ абы зыри къехъулІэкъым. Библием дэ къыщыдощІэ Иеговэ сыт ищІэми икІи ар щыхьэт тохъуэ абы хуэдэ зыри зэрыщымыІэм. ДауикІ, Иеговэ хуабжьу и жагъуэ хъуащ ШейтІанымрэ абы и лъэныкъуэр зыубыдахэмрэ къыщыпэщІэувам щыгъуэ (Пс. 78:40). Ауэ а Іуэхур Иеговэ Іущагъ, шыІэныгъэ икІи захуагъэ хэлъу зэхегъэкІ. Абы нэмыщІ Иеговэ и къару лъэщыр куэдрэ игъэлъэгъуащ. Ауэ псом нэхъапэращи, Иеговэ ищІэу хъуам и лъагъуныгъэр къыхощ (1 Ин. 4:8). Иеговэ и цІэр гъэлъэпІа хъун щхьэкІэ емызэшу къару ирехьэлІэ.

15. Дауэ нобэ ШейтІаным Алыхьым и цІэр зэригъэулъийр икІи абы сыт хуэдэ ехъулІэныгъэ иІэр?

¹⁵ ШейтІаным Алыхьым и цІэр адэкІи зэригъэулъииным иужь итщ. Нобэ абы цІыхухэр къегъапцІэ икІи Алыхьым псори хузэфІэкІыу, захуагъэ, Іущагъ икІи лъагъуныгъэ хэлъу зэрыщытым шэч къытрахьэу ищІыну хущІокъу. Псалъэм папщІэ, абы цІыхухэм я фІэщ ищІыну хэтщ дуней псор Иеговэ къимыгъэщІауэ. Абы нэмыщІ Алыхьыр зи фІэщ хъухэр иригъэгупсысыну хэтщ Алыхьым и хабзэхэр ткІийуэ икІи захуагъэ хэмылъу. ИкІи ШейтІаным цІыхухэм я фІэщ ищІыну хущІокъу Иеговэ гущІэгъуншэу, жыхьэнмэ мафІэм цІыхухэм хьэзаб щаригъэшэчу. А пцІыр я фІэщ хъуа иужь цІыхухэр хьэзырщ Иеговэ я щІыб хуагъэзэну. ШейтІаныр щыІэху, ар иужь итынущ Алыхьым пцІы трилъхьэну икІи зэрыхъукІэ цІыху нэхъыбэ абы къыбгъэдишыну, фэри абы фыхэту. Абы ар хузэфІэкІыну пІэрэ?

ШЕЙТІАНЫМ КЪИІЭТА УПЩІЭМ ФЭРИ ЖЭУАП ЕФТЫФЫНУЩ

16. Іэдэмрэ Хьэуарэ елъытауэ фэ сыт фхуэщІэнур?

¹⁶ Иеговэ гуэныхь зыхэлъ цІыхухэм Іэмал яритащ и цІэр ягъэлъэпІэну. Іэдэмрэ Хьэуарэ ямыщІар фэ фхуэщІэнущ. Нобэ мы дунейм тет цІыхухэм Алыхьым и цІэр ягъэулъийуэ щытми, фэ Іэмал фиІэщ Алыхьым и цІэм фыкъыщхьэщыжу, псоми пэжыр яжефІэну: Иеговэ Алыхь лъапІэщ, пэжагъ, гуапагъэ икІи лъагъуныгъэ хэлъщ (Ис. 29:23). Иеговэ и тепщэныгъэр къызэрыхэфхыр фэ къэвгъэлъэгъуэфынущ. ИкІи фэ цІыхухэм къагурывгъэІуэфынущ Алыхьым и тепщэныгъэр псом нэхърэ зэрынэхъыфІыр икІи абы фІэкІа нэгъуэщІым зыми мамырыгъэрэ насыпрэ дунейм щыІэу зэрыхуэмыщІынур (Пс. 37:9, 37; 146:5, 6, 10).

17. Алыхьым и цІэр цІыхухэм къахузэІуихын щхьэкІэ сытыт Хьисэ ищІэр?

¹⁷ Иеговэ и цІэм дыкъыщхьэщыжу щытмэ, дэ Хьисэ щапхъэ тыдох (Ин. 17:26). Хьисэ и Адэм и цІэр цІыхухэм къахузэІуихащ. Дапхуэдэу? Абы и цІэр езым къызэригъэсэбэпам нэмыщІ, Иеговэ теухуа пэжыр цІыхухэм яжриІэу щытащ. Фарисейхэм цІыхухэр пцІым хурагъаджэт: Иеговэ ткІийуэ, куэд къытхуигъэуву, дыкъыфІэмыІуэхуу икІи гущІэгъуншэу жаІэт. Ауэ Хьисэ цІыхухэм къагуригъаІуэт и Адэм дыкъыгурыІуэу, шыІэныгъэ хэлъу, фІыуэ дыкъилъагъуу икІи къытхуигъэгъуну хьэзыру зэрыщытыр. Абы нэмыщІ Хьисэ махуэ къэс и Адэм хьэл-щэн хэлъхэр нэгъэсауэ езым зэригъэлъагъуэу щытамкІэ цІыхухэм Іэмал яритт Иеговэ нэхъыфІу къацІыхуну (Ин. 14:9).

18. Алыхьым и цІэм теухуауэ мы дунейм иІэ еплъыкІэр зэрыпцІыр дапхуэдэу къызэрыщІэдгъэщыр?

¹⁸ Дэри Хьисэ хуэдэу цІыхухэм яжетІэ хъунущ Иеговэ лъагъуныгъэ хэлъу икІи гуапэу къызэрытхущытыр. Апхуэдэу щытщІэм деж Алыхьым и цІэм теухуауэ мы дунейм иІэ еплъыкІэр зэрыпцІыр къыщІыдогъэщ. ЦІыхухэм Алыхьым и цІэр лъапІэу ялъытэну дащыдэІэпыкъум деж, дэ Иеговэ и цІэр догъэлъапІэ. Абы нэмыщІ гуэныхь зэрытхэлъым емылъытауэ, Иеговэ хьэл-щэн хэлъхэм хуэдэ дэри тхуэгъэлъэгъуэнущ (Еф. 5:1, 2). Ди псалъэхэм икІи ди ІуэхущІафэхэм я фІыгъэкІэ цІыхухэм къагуроІуэ Иеговэ дапхуэдэ Алыхьу щытми. Апхуэдэу дэ Иеговэ и цІэр догъэлъапІэ. Дэ абы и цІэм дыкъыщхьэщож, цІыхухэм Алыхьым теухуауэ еплъыкІэ нэпцІ яІэхэр къагъэнэну дащыдэІэпыкъум дежd. ИкІи ди щапхъэмкІэ догъэлъагъуэ гуэныхь зыхэлъ цІыхур Алыхьым хуэпэжу къызэрынэфынур (Иов 27:5).

19. Исаия 63:7 итыр дапхуэдэу къызэрыддэІэпыкъур нэгъуэщІхэр щедгъаджэм деж ди къалэн нэхъыщхьэр къыдгурыІуэну?

¹⁹ Дапхуэдэу иджыри Иеговэ и цІэр зэрыдгъэлъэпІэфынур? ЦІыхухэр Библием ит пэжхэм щыхуедгъаджэм деж, дэ щІэх-щІэхыурэ абыхэм гу лъыдогъатэ Алыхьым и тепщэныгъэм — Дуней псом хабзэхэр щигъэувыну Иеговэ фІэкІ нэгъуэщІым зыми хуитыныгъэ зэримыІэм. ИкІи ар пэжщ. Ауэ цІыхухэм Алыхьым и хабзэхэр къащІэн хуейми, дэ ди къалэн нэхъыщхьэр — абыхэм Иеговэ фІыуэ ялъагъуу зрагъэсэну икІи хуэпэжу щытыну дадэІэпыкъуныращ. Абы щхьэкІэ Алыхьым и хьэл-щэн дахэхэм гу лъедгъэтэн хуейщ, Иеговэ цІэр зезыхьэр хэтми къедгъэцІыхуу. (Къеджэ Исаия 63:7e.) Апхуэдэу тщІэмэ, абыхэм Иеговэ фІыуэ ялъагъуну дадэІэпыкъуфынущ икІи жиІэм едэІуэну хуэдгъэушыфынущ.

20. КъыкІэлъыкІуэ статьям сыт щызэпкърытхынур?

²⁰ Дэ ди щытыкІэмкІэ икІи нэгъуэщІхэр зэредгъаджэ щІыкІэмкІэ Иеговэ и цІэр дгъэлъэпІэн икІи ар цІыхухэм фІыуэ ялъагъуну дадэІэпыкъун хуейщ. Ауэ апхуэдэу дыщытрэ дыщымытрэ дапхуэдэу зэрызэхэдгъэкІынур? Мы упщІэр къыкІэлъыкІуэ статьям щызэпкърытхынщ.