3 СТАТЬЯР
Иеговэ фІыуэ фелъагъу икІи лъапІэу фелъытэ!
«Иеговэ зи гур кІуэдахэм пэгъунэгъущ икІи зигу иудахэр абы кърегъэл» (ПС. 34:18).
33-НЭ УЭРЭДЫР Уи хьэлъэр Иеговэ ІэщІэлъхьэ
МЫ СТАТЬЯР ЗЫТЕПСЭЛЪЫХЬЫРa
1, 2. Иеговэ и Щыхьэт куэдыр сыт хуэдэ гугъуехьхэм пэщІэхуэрэ икІи а гугъуехьхэр дапхуэдэу зэран къазэрыхуэхъур?
ІУЭХУГЪУИЩ зэпкърытхынщ: ди къуэш ныбжьыщІэм узыфэ гуэр иІэу къагъуэт; илъэс 50 хъу унагъуэм и нэхъыжьым и лэжьапІэр фІокІуэд икІи дапхуэдиз къару иримыхьэлІэми нэгъуэщІ лэжьапІэ игъуэткъым; Иеговэ пэжу хуэлажьэ ди шыпхъум и ныбжьыр зэрыхэкІуэтам икІи и узыншагъэр нэхъ Іей зэрыхъум къыхэкІкІэ кІуэ пэтми Иеговэ и Іуэхум зэрыхэтыр нэхъ мащІэ мэхъу.
2 Зи гугъу тщІа гугъуехьхэм хуэдэ гуэр фэри фиІэу щытмэ, зыкІи сэбэп фымыхъуу зыкъыфщыхъужынкІэ хъунущ. Апхуэдэ Іуэхугъуэхэм фи гуфІэгъуэр ффІагъэкІуэдынкІэ хъунущ икІи фи щхьэм пщІэ хуэвмыщІыжу фащІынкІэ хъунущ, абы нэмыщІ нэгъуэщІхэм фазэрыхущытым зэран хуэхъуфынущ.
3. ШейтІанымрэ абы и лъабжьэ щІэтхэмрэ цІыхум и гъащІэм дауэ зэрыхущытыр?
3 ЦІыхум и гъащІэм ШейтІаныр зэрыхущытым хуэдэущ мы дунейри зэрыхущытыр. Абы цІыхур зэи зыми хибжакъым. ШейтІаным гущІэгъу лъэпкъ хэмылъу Хьэуа жриІащ Алыхьым жиІэм ебакъуэу щытмэ, хуитыныгъэ иІэну, а лъэбакъуэм лІэныгъэм зэрыхуишэнур ищІэу щытми. ШейтІаным сыт щыгъуи коммерциер, политикэр икІи дин нэпцІыр здыхуеймкІэ иунэтІу щытащ. Аращи, гъэщІэгъуэнкъым бизнесменхэм, политикхэм икІи дин пашэхэм цІыхухэм я гъащІэр лъапІэу зырамылъытэр.
4. Мы статьям сыт щызэпкърытхынур?
4 Иеговэ хуейщ ди щхьэм еплъыкІэ тэмэм худиІэну икІи зыри дримыщІысу дезыгъэгупсыс Іуэхугъуэ дыщихуэм деж ар къыддоІэпыкъу (Пс. 136:23; Рим 12:3). Мы статьям щызэпкърытхынущ Иеговэ дапхуэдэу къыддэІэпыкъуми: 1) дыщысымаджэм деж, 2) ахъшэм пыщІа гугъуехь дыщиІэм деж, 3) ныбжьыр зэрыхэкІуэтам къыхэкІкІэ Иеговэ и Іуэхум сэбэп дымыхъуну къыщытщыхъум деж. Ауэ япэщІыкІэ дытепсэлъыхьынщ Иеговэ дэтхэнэ зыри лъапІэу зэрилъытэм шэч къытетхьэн щІыхуэмейр сытми.
ИЕГОВЭ ЛЪАПІЭУ ДЕЛЪЫТЭ
5. Иеговэ цІыхухэр лъапІэу зэрилъытэм сыт фэ шэч къыщІытевмыхьэр?
5 Дэ сабэм дыкъыхэщІыкІами, Алыхьым и дежкІэ налкъутналмэс лъапІэм дыхуэдэщ (ЩІэдз. 2:7). Иеговэ лъапІэу дыщІилъытэм и щхьэусыгъуэ зыбжанэ зэпкърытхынщ. Езым хэлъ хьэл-щэнхэм хуэдэ дгъэлъэгъуэфу дыкъигъэщІащ (ЩІэдз. 1:27). Абы къыхэкІкІэ Алыхьым и дежкІэ дэ куэдкІэ дынэхъ лъапІэщ щІылъэм щыпсэуну къигъэщІа псом нэхърэ. Абы нэмыщІ Иеговэ хуитыныгъэ къыдитащ щІылъэми псэущхьэхэми я «тепщэу» дыщытыну (Пс. 8:4—8).
6. Гуэныхь зыхэлъ цІыхухэр Иеговэ лъапІэу зэрилъытэр сыт дэ иджыри ди фІэщ зыщІыр?
6 Іэдэм гуэныхь къихьа иужьи Иеговэ цІыхухэр лъапІэу илъытэн къигъэнакъым. АпхуэдизкІэ абы фІыуэ делъагъури дыкъищэхужын щхьэкІэ фІыуэ илъагъу и къуэ Хьисэ къурмэныпхъэу итащ (1 Ин. 4:9, 10). Иеговэ Хьисэ и щхьэщэхуж къурмэныпхъэр къигъэсэбэпу, Іэдэм и гуэныхьым и зэранкІэ лІахэр къигъэтэджыжынущ — «щыпкъагъэ зиІи зимыІи» (Апост. 24:15). Библием къызэрыхэщымкІэ ди ныбжьым, узыншагъэм, мылъку диІэм емылъытауэ дэ Иеговэ и дежкІэ дылъапІэщ (Апост. 10:34, 35).
7. Иеговэ лъапІэу дызэрилъытэр къэзыгъэлъагъуэ нэгъуэщІ Іуэхугъуэхэри къыжыфІэ.
7 Иеговэ лъапІэу дызэрилъытэм щыхьэт техъуэ куэд иджыри щыІэщ. Абы хъыбарыфІым дызэредаІуэм гу лъитащ икІи дызыбгъэдишащ (Ин. 6:44). Иеговэ гъунэгъу зыхуэтщІу щыщІэддзам езыми гъунэгъу зыкъытхуищІащ (Екъуб 4:8). Абы нэмыщІ Иеговэ къаруми зэманми щымысхьу щІэныгъэ къызэрыдитымкІэ къегъэлъагъуэ абы и дежкІэ лъапІэу дызэрыщытыр. Алыхьым ещІэ иджыпсту дапхуэдэу дыщытми икІи сыт хуэдэ цІыху къытхэкІынуми. Абы нэмыщІ Иеговэ фІыуэ делъагъури ди щыуагъэхэр къыдгурегъэІуэж (Прит. 3:11, 12). А псом ІупщІу къыдгурагъаІуэ абы и дежкІэ дэ налкъутналмэс лъапІэу дызэрыщытыр!
8. Псалом 18:27—29 итыр гугъуехьхэм еплъыкІэ тэмэм худиІэну дауэ къызэрыддэІэпыкъур?
8 Языныкъуэ цІыхухэм пащтыхь Даут зыри иримыщІысыу икІи бзаджэнаджэу ябжт. Ауэ абы ищІэт Иеговэ фІыуэ къызэрилъагъур икІи къызэрыдэІэпыкъур. Ар зэрищІэр сэбэп къыхуэхъуащ Іуэхугъуэ зэрыхуахэм еплъыкІэ тэмэм хуиІэну (2 Сам. 16:5—7). Ди лъэр щыщІэхуам икІи гугъуехьхэм дыщыпэщІэтым деж Иеговэ хьэзырщ дэІэпыкъуэгъу къытхуэхъуну. Абы и фІыгъэкІэ ди Іуэхум нэгъуэщІ нэкІэ деплъу, сыт хуэдэ гугъуехьми дыпэлъэщыфынущ. (Къеджэ Псалом 18:27—29b.) Иеговэ ди дэІэпыкъуэгъуу щыщыткІэ, гуфІэгъуэ диІэу абы дыхуэлэжьэну зыгуэр зэран къытхуэхъуфыну? (Рим 8:31). Аращи, Иеговэ фІыуэ дызэрилъагъур икІи лъапІэу дызэрилъытэр дигу идгъэлъыным мыхьэнэшхуэ щиІэ Іуэхугъуищ адэкІэ зэпкърытхынщ.
ДЫЩЫСЫМАДЖЭМ ДЕЖ
Иеговэ къыбгъэдэкІ псалъэхэм дызэреджэр къыддоІэпыкъу дызэрысымаджэм къыдит гурыщІэ Іейхэм дыпэлъэщыну. (9—12-нэ абзацхэм феплъ.)
9. Дызэрысымаджэр ди щхьэм дызэрыхущытыжым дапхуэдэу зэран зэрыхуэхъуфынур?
9 Иныкъуэхэм деж узым къару куэд тщІех икІи зыри дримыщІысу дрегъэгупсыс. Дызэрысымаджэм нэгъуэщІхэм гу щылъатэм деж е ди узыншагъэр зэрымыхьэнэншэм щхьэкІэ нэгъуэщІхэр зыдэдгъэІэпыкъун хуей щыхъухэм деж, гукъыдэж димыІэу дыщыхъу щыІэщ. Ди узыфэм теухуауэ зыми имыщІэми, япэм тщІэуэ щытам хуэдиз зэрытхуэмыщІэжым щхьэкІэ ди напэм дигъэкъуэншэнкІэ хъунущ. Апхуэдэ зэман гугъухэм деж Иеговэ къару къыдет. Дапхуэдэу?
10. Притчи 12:25 зэритымкІэ, дыщысымаджэм деж сыт къару къытхэзылъхьэжыфынур?
10 Дыщысымаджэм деж «псалъэ гуапэм» къару къытхелъхьэж. (Къеджэ Притчи 12:25c.) Иеговэ Библием псалъэ гуапэ куэд ирыригъэтхащ, абыхэм ди фІэщ ящІ зыгуэр тхузэфІэмыкІыу щытми, Иеговэ лъапІэу дызэрилъытэр (Пс. 31:19; 41:3). Алыхьым къыбгъэдэкІа Тхыгъэ ЛъапІэм итым деджэмэ, уеблэмэ, дызэджам къытедгъэзэжурэ деджэмэ, узым къытхуихьа гурыщІэ хьэлъэхэм дыпэлъэщыну Иеговэ къыддэІэпыкъунущ.
11. Дапхуэдэу Иеговэ ди зы къуэшым зэрыдэІэпыкъуар?
11 Ди къуэш Хо́рхе и щапхъэр зэпкърытхынщ. Ар иджыри щІалэу и къарур щІэзых икІи псынщІэу хэтІасэ уз къеуэлІащ. Абы къыхэкІкІэ ди къуэшым зыри иримыщІысу зыкъыщыхъужт. Ар къыддогуашэ: «Си узым къызитыну гурыщІэхэм сыхуэхьэзыртэкъым икІи си узым щхьэкІэ нэгъуэщІхэм гулъытэ нэхъыбэу къысхуащІу зэрыхъуам сриукІытэт. КІуэ пэтми си узыншагъэр нэхъ Іей хъути, си гъащІэр адэкІэ дапхуэдэу хъунуми сегупсысу щІэздзащ. Сэ хэкІыпІэ слъагъутэкъым икІи Иеговэ къыздэІэпыкъуну лъэІу гуащІэкІэ зыхуэзгъазэт». Дауэ Иеговэ абы зэрыдэІэпыкъуар? Хорхе игу къегъэкІыж: «Сызэджэм си акъылыр схутеухуэтэкъым. Абы къыхэкІкІэ чэнджэщ къызатащ Иеговэ и лэжьакІуэхэр фІыуэ зэрилъагъур къызыхэщ Псалом тхылъым ит пычыгъуэ кІэщІхэм седжэну. Сэ махуэ къэс а едзыгъуэхэм къытезгъэзэжурэ седжэт — абыхэм гупсэхугъуэ къызатт. Зэман дэкІри нэгъуэщІхэм гу лъатэу щІадзащ сэ нэхъыбэрэ сыгуфІэу сызэрыхъуар. Сэ къызжаІэт еплъыкІэфІ сызэриІэм щхьэкІэ ахэр згъэгушхуэу. Сэ къызгурыІуащ Иеговэ си лъэІухэм жэуап къызэрыритар! Си Іуэхум теухуауэ сиІэ еплъыкІэр схъуэжыну ар къыздэІэпыкъуащ. Библием и фІыгъэкІэ сэ къызгурыІуащ си узыфэм емылъытауэ Иеговэ дапхуэдэу къысхущытми».
12. Фыщысымаджэм деж Иеговэ дэІэпыкъуэгъу къыфхуэхъун щхьэкІэ сыт фщІэн хуейр?
12 Фысымаджэу щытмэ, шэч къытевмыхьэ фызыпэщІэхуэ гугъуехьхэр Иеговэ зэрищІэм. Фи Іуэхум еплъыкІэ тэмэм хувиІэну къывдэІэпыкъун щхьэкІэ лъэІу гуащІэкІэ абы зыхуэвгъазэ. ИтІанэ фызыгъэгушхуэфын Иеговэ къыбгъэдэкІ псалъэ гуапэхэр Библием къыщыфлъыхъуэ. Иеговэ и лэжьакІуэхэр лъапІэу зэрилъытэр къызыхэщ едзыгъуэхэм гу лъыфтэ. Апхуэдэу фщІэмэ, фэ флъэгъунущ пэжу къыхуэлажьэ дэтхэнэ зыми Иеговэ гуапэу зэрыхущытыр (Пс. 84:11).
АХЪШЭМ ПЫЩІА ГУГЪУЕХЬ ДЫЩИІЭМ ДЕЖ
Иеговэ къыддэІэпыкъуну дыкъызэригъэгугъэр зэрытщІэжыр къыддоІэпыкъу лэжьапІэр щытфІэкІуэдам деж. (13—15-нэ абзацхэм феплъ.)
13. Унагъуэм и нэхъыжьым лэжьапІэр зэрыфІэкІуэдам сыт хуэдэ гурыщІэхэр къритыфыну?
13 Унагъуэм и нэхъыжь дэтхэнэ зыри хуейщ и унагъуэм щІэсхэр зыми хуимыгъэныкъуэну. Ауэ, псалъэм папщІэ къуэшым езым емылъыта Іуэхугъуэм къыхэкІкІэ и лэжьапІэр фІокІуэд. ЛэжьапІэ къигъуэтыну ар иужь итщ, ауэ зыри хъукъым, абы къыхэкІкІэ зыри иримыщІысу абы зыкъыщохъуж. Иеговэ дыкъызэригъэгугъэм и акъылыр триухуэмэ, ар дауэ сэбэп къызэрыхуэхъунур?
14. Сыт Иеговэ и псалъэр сыт щыгъуи щІиІыгъыжыр?
14 Иеговэ и псалъэр сыт щыгъуи иІыгъыжщ (Иис. Н. 21:45; 23:14). Сыт щхьэкІэ? Япэрауэ, абы елъытащ и цІэр гъэлъэпІа хъунрэ мыхъунрэ. Иеговэ дыкъигъэгугъащ и лэжьакІуэ пэжхэм зыхуэныкъуэр яритыну икІи абы и псалъэр иІыгъыжыну и къалэну елъытэ (Пс. 31:1—3). ЕтІуанэрауэ, Иеговэ ещІэ гузэрыдзэ зэрытщІынур, ар и лэжьакІуэхэм дэмыІэпыкъуу щытмэ. Иеговэ дыкъегъэгугъэ езым дыхуэлэжьэн щхьэкІэ икІи ди щхьэр тхуэпІыжын щхьэкІэ дызыхуэныкъуэр къыдитыну. Апхуэдэу ищІэну абы зыри зэран къыхуэхъуфынукъым! (Мт. 6:30—33; 24:45).
15. 1) Япэ лІэщІыгъуэм псэуа Хьисэ и лъэужь ирикІуэхэр сыт хуэдэ гугъуехьхэм пэщІэхуа? 2) Псалом 37:18, 19 итым сыт ди фІэщ ищІыр?
15 Иеговэ и псалъэр сыт щыгъуи щІигъэзэщІэжым и щхьэусыгъуэр зыщыдмыгъэгъупщэмэ, ахъшэм пыщІа гугъуехьхэм дыпэлъэщыну къызэрыддэІэпыкъунум шэч къытетхьэнукъым. Япэ лІэщІыгъуэм псэуа Хьисэ и лъэужь ирикІуэхэр дигу къэдгъэкІыжынщ. Ерусалим щыІэ зэхуэсыр кърахуэкІыу щыщІадзам щыгъуэ, «апостолхэм нэмыщІ, фІэщхъуныгъэ зиІэ псори Иудей, Самарие хэкухэм щызэбгрыкІащ» (Апост. 8:1). Абы къыхэкІкІэ къуэш, шыпхъухэм ахъшэм пыщІа гугъуехь яІэ хъуащ. Абыхэм я унэри лэжьыгъэри яфІэкІуэдауэ къыщІэкІынщ. Ауэ Иеговэ ахэр къигъэнакъым икІи гуфІэгъуэ яІэр абыхэм яфІэкІуэдакъым (Апост. 8:4; Евр. 13:5, 6; Екъуб 1:2, 3). Иеговэ и лэжьакІуэ пэжхэм абы щыгъуэ дэІэпыкъуащ, дэри Іэмал имыІэу ар къыддэІэпыкъунущ. (Къеджэ Псалом 37:18, 19d.)
ДИ НЫБЖЬЫР ЩЫХЭКІУАТЭМ ДЕЖ
ТхузэфІэкІым ди акъылыр теухуауэ щыщытым деж, дэ шэч къытетхьэкъым: Иеговэ дэ лъапІэу делъытэ, абы пэжу дызэрыхуэлажьэри лъапІэу елъытэ. (16—18-нэ абзацхэм феплъ.)
16. Иеговэ лъапІэу дызэрилъытэм сыт шэч къытетхьэу дызыщІынкІэ хъунур?
16 Ди ныбжьыр щыхэкІуатэм деж Иеговэ и Іуэхум дыкъыщымысэбэпыфыну къытщыхъункІэ хъунущ. Даути и ныбжьыр хэкІуэтэху апхуэдэ гурыщІэхэр иІэ хъууэ къыщІэкІынт (Пс. 71:9). Иеговэ дапхуэдэу къызэрыддэІэпыкъуфынур?
17. Джери и щапхъэм сытым дыхуигъасэрэ?
17 Ди шыпхъу Дже́ри и щапхъэм деплъынщ. Иеговэ и Щыхьэтхэр щызэхуэс Унэм зэрыкІэлъыплъыным хурагъэджэну ар кърагъэблэгъат, ауэ ди шыпхъур абы кІуэну хуейтэкъым. Джери жиІащ: «Сэ жьы сыхъуащ икІи сыфызабэщ. А лэжьыгъэм къыщысэбэпын зэфІэкІи ІэщІагъи сиІэкъым. Сыт сэ сызэрыфщІынур?» Ирагъэджэну щыщІадзэну махуэм ипэ къихуэ пщыхьэщхьэм ди шыпхъум и гурыщІэхэр Иеговэ лъэІукІэ зыхуигъазэри хуиІуэтащ. ЕтІуанэ махуэм Иеговэ и Щыхьэтхэр щызэхуэс унэм ар щыкІуам иджыри къыгурыІуэтэкъым къыщІраджам и щхьэусыгъуэр. Ахэр щрагъаджэм, езыгъаджэ къуэшхэм ящыщ зым къыхигъэщащ: зэфІэкІ диІэхэм нэхъ мыхьэнэшхуэ зиІэр — Иеговэ и деж дыщеджэну дызэрыхьэзырыращ. Джери жеІэж: «СощІэж сызэрегупсысар: „Апхуэдэ зэфІэкІ сэ сиІэщ — сэ седжэну сыхьэзырщ!“ Сэ сыкъыщиудри сыгъащ Иеговэ си лъэІум жэуап къызэрыритар къыщызгурыІуам щыгъуэ. Иеговэ си фІэщ ищІащ и лэжьыгъэм зыгуэркІэ сэбэп сызэрыщыхъуфынур икІи абы сригъэджэну зэрыхуейр!» БлэкІар игу къигъэкІыжу Джери жеІэ: «Сэ а зэІущІэм гукъыдэж симыІэу, си лъэр щІэхуауэ сыкІуащ, ауэ сыкъыщыкІуэжым дамэ къыстекІам хуэдэт, сыт щхьэкІэ жыпІэмэ лъапІэу сызэралъытэр къызгурыІуащ!»
18. Дауэ Библием къызэригъэлъагъуэр ди ныбжьыр хэкІуатэми Иеговэ лъапІэу дызэрилъытэр?
18 Дэ шэч къытедмыхьэми хъунущ илъэс дапщэ дымыхъуми, Иеговэ дэр щхьэкІэ сыт щыгъуи лэжьыгъэ зэриІэнур (Пс. 92:12—15). Хьисэ къыдгуригъэІуауэ щытащ: тхузэфІэкІыр мащІэу икІи къару етхьэлІэр мащІэ дыдэу къытщыхъуми, и лэжьыгъэм щхьэкІэ тщІэ псор Иеговэ лъапІэу елъытэ (Лк. 21:2—4). Аращи, япэ дыдэу фызэгупсысын хуейр фхузэфІэкІыращ. Фэ, псалъэм папщІэ Иеговэ теухуауэ нэгъуэщІхэм яжефІэ хъунущ, къуэш, шыпхъухэм щхьэкІэ Алыхьым лъэІукІэ зыхуэвгъазэ хъунущ икІи ахэр хуэвгъэуш хъунущ Алыхьым пэжу къыхуэнэну. Дэ Иеговэ дыщІыздигъэлажьэр абы зыгуэр зэрыхуэтщІэфынуракъым, атІэ абы дедэІуэну дызэрыхьэзырыращ (1 Кор. 3:5—9).
19. Рим 8:38, 39 ит псалъэхэм сыт ди фІэщ ящІыр?
19 Пэжу къыхуэлажьэхэр лъапІэу зылъытэ Алыхь Иеговэ ухуэлэжьэну сыту насыпышхуэ! Абы дыкъыщІигъэщІар и мурадыр дгъэзэщІэн щхьэкІэщ икІи абы дызэрыхуэлажьэм ди гъащІэм мыхьэнэ иІэу ещІ (Апок. 4:11). Мы дунейм дэ зыри дримыщІысу, пщІэ тхуэмыфащэу далъытэу щытми, Иеговэ дэ къыттеукІытыхькъым (Евр. 11:16, 38). Дызэрысымаджэм, ди ныбжьыр зэрыхэкІуатэм е ахъшэм пыщІа гугъуехь дызэриІэм щхьэкІэ ди гуфІэгъуэр тфІэкІуэдмэ, зыщыдгъэгъупщэнкъым: уафэм щыІэ ди Адэм и лъагъуныгъэм дыбгъэдишын зыми лъэкІынукъым! (Къеджэ Рим 8:38, 39.)
a Зыри фримыщІысу икІи зыкІи сэбэп фымыхъуу фыщегупсыса къэхъуа? Мы статьям фигу къигъэкІыжынущ Иеговэ лъапІэу фызэрилъытэр. Дэ дытепсэлъыхьынущ гугъуехь дызыпэщІэхуэхэм емылъытауэ ди щхьэм еплъыкІэ тэмэм худиІэн щхьэкІэ сыт къыддэІэпыкъунуми.
b Псалом 18:27—29: «Ираудых цІыхухэр уэ къебгъэлынущ, ауэ пагэхэр бгъэпудынущ. Си уэздыгъэр щІэбгъэнэнущ, Иеговэ. Си Алыхьым си кІыфІыгъэр нэху ищІынущ. Уэ узигъусэмэ, хъунщІакІуэ гупым сапэувыфынущ, си Алыхьым и гъусэу блыным сыдэпщеифынущ».
c Притчи 12:25: «Гузэвэгъуэм цІыхум и гур хегъэщІ, псалъэ гуапэм и гум гуфІэгъуэ ирелъхьэ».
d Псалом 37:18, 19: «Иеговэ нэгъэсауэ къыхуэпэжхэм я махуэхэр ещІэ, икІи абыхэм я щІэиныр зэи кІуэдыжынукъым. Гузэвэгъуэм деж ахэр укІытэнукъым икІи гъаблэм и махуэхэми мэжэлІэнукъым».
30-НЭ УЭРЭДЫР Си Алыхь, си Адэ, си ныбжьэгъу!