Хьисэ и унафэхэр ягъэзэщІэну нэгъуэщІхэм фадэІэпыкъу

1. Маттэ 28:18—20 зэритымкІэ, Хьисэ и лъэужь ирикІуэхэм сыт хуэдэ унафэ яритар?

ЛІАХЭМ къахэтэджыкІыжа иужь Хьисэ Галилейм щызэхуэса и лъэужь ирикІуэхэм закъригъэлъэгъуащ. Хьисэ абыхэм мыхьэнэшхуэ зиІэ гуэр яжриІэну хуейт. Абы и псалъэхэр итщ Маттэ 28:18—20 (къеджэ).

2. Сыт хуэдэ упщІэхэр мы статьям щызэпкърытхыну?

² Нобэ Алыхьым и лэжьакІуэ дэтхэнэ зыми Хьисэ и унафэр игъэзэщІэн хуейщ. Хьисэ къытхуигъэна унафэм пыщІа упщІищ адэкІэ зэпкърытхынщ. Япэрауэ, едгъаджэ цІыхум Алыхьыр абы зэрыщыгугъыр къыгурыдгъаІуэ закъуэкІэ зэфІэкІрэ? ЕтІуанэрауэ, Библиер зыдж цІыхур Алыхьым гъунэгъу хуэхъуну зэхуэсым щыщ дэтхэнэ зыри дапхуэдэу дэІэпыкъуэгъу зэрыхъуфынур? Ещанэрауэ, хъыбарыфІыр зымыгъэІуж къуэш, шыпхъухэм дапхуэдэу дазэрыдэІэпыкъуфынур Хьисэ и унафэр ягъэзащІэу щІадзэжыну?b

ХЬИСЭ И УНАФЭХЭР ЯГЪЭЗЭЩІЭНУ АХЭР ЕВГЪАСЭ

3. Хьисэ и унафэм мыхьэнэшхуэ зиІэ сыт хуэдэ Іуэхугъуэ хэт?

³ Хьисэ дэ унафэ гурыІуэгъуэхэр къыдитащ. Дэ цІыхухэр абы и псалъэхэм хуедгъэджэн хуейщ. Ауэ мыхьэнэшхуэ зиІэ зы Іуэхугъуэ зыщыдгъэгъупщэ хъунукъым. Хьисэ жиІакъым: «Лъэпкъ псори си гъуэгу къытевгъыхьэ... Унафэу нывжесІа псори яжефІэ». АтІэ абы жиІар мыращ: «Лъэпкъ псори си гъуэгу къытевгъыхьэ... Унафэу нывжесІа псори ягъэзэщІэну яхуэвгъэув». Абы къыхэкІкІэ дэ ди къалэныр Библием едгъаджэ цІыхум Хьисэ и унафэхэр жетІэн закъуэкъым, атІэ дэ абы къыгурыдгъэІуэн хуейщ къищІэ щІэныгъэхэр и гъащІэм къызэрыщигъэсэбэпынур. Сыт абы мыхьэнэшхуэ щІиІэр?

4. Хьисэ и унафэхэр ягъэзащІэу цІыхухэр ебгъэсэным къикІыр къэзыгъэлъагъуэ щапхъэ къэфхь.

⁴ ГъэзэщІэн жиІэм — зэрыжаІа дыдэм хуэдэу щІэн жиІэу аращ къикІыр. Ауэ дауэ цІыхур Хьисэ и унафэхэр игъэзащІэу зэребгъэсэнур? Машинэ кърахуэкІыу цІыхухэр езыгъасэ инструкторым и щапхъэр къэтхьынщ. Машинэ къыщепхуэкІкІэ узытетын хуей хабзэхэр ягъэзэщІэну дапхуэдэу абы нэгъуэщІхэр зэригъасэр? ЯпэщІыкІэ, абы классым щІэсу иригъаджэхэм щІэныгъэ ярет. Ауэ цІыхум а хабзэхэр зэригъэзэщІэнур къыгурыІуэн щхьэкІэ щІэныгъэ зригъэгъуэтын закъуэр мащІэщ. Инструкторыр игъасэ цІыхухэм ябгъэдэсын хуейщ абыхэм машинэ къыщрахуэкІкІэ икІи щІэныгъэ зрагъэгъуэтахэр къызэрагъэсэбэпынур къагуригъэІуэн хуейщ. Мы щапхъэм дэ сытым дыхуигъасэрэ?

5. 1) Иуан 14:15 икІи 1 Иуан 2:3 зэритымкІэ, Библием едгъаджэ цІыхухэр сытым едгъэсэн хуей? 2) Едгъаджэ цІыхухэм Библием ит принципхэр я гъащІэм къыщагъэсэбэпу зрагъэсэну дапхуэдэу дазэрыдэІэпыкъу хъунур?

⁵ ЦІыхур Библием щедгъаджэм деж дэ абы къыгурыдогъаІуэ Алыхьыр сыткІэ къыщыгугъми. Ауэ ар мащІэщ. КъащІа щІэныгъэхэр я гъащІэм къыщагъэсэбэпу дэ ахэр едгъэсэн хуейщ. (Къеджэ Иуан 14:15; 1 Иуан 2:3.) Едгъаджэ цІыхум дэ ди щапхъэмкІэ къыгурыдгъэІуэфынущ школым, лэжьапІэм е зыщигъэпсэхукІэ Библием ит принцип нэхъыщхьэхэр къызэригъэсэбэпынур. Абы жетІэж хъунущ Алыхьым и Псалъэм ит чэнджэщхэм зэран къытхуэхъуфыну Іуэхугъуэ гуэрым дызэрыщахъумар е унафэ пэж къэтщтэну ахэр къызэрыддэІэпыкъуар. Абы нэмыщІ евгъаджэ цІыхур щысу Иеговэ фелъэІу абы унафэ пэжхэр къищтэн щхьэкІэ и къару лъапІэмкІэ къыдэІэпыкъуну (Ин. 16:13).

6. Хьисэ и унафэхэр ягъэзащІэу цІыхухэр едгъэсэн щхьэкІэ сыт иджыри тщІэн хуейр?

⁶ Библием едгъаджэ цІыхухэм Хьисэ и унафэхэр ягъэзащІэу едгъэсэн щхьэкІэ сыт дэ иджыри тщІэн хуейр? Дэ абыхэм дадэІэпыкъун хуейщ цІыхухэр ирагъэджэну гукъыдэж яІэн щхьэкІэ. Языныкъуэхэр мэшынэ хъыбарыфІыр ягъэІуну. Абы къыхэкІкІэ дэ шыІэныгъэ тхэлъу абыхэм дадэІэпыкъун хуейщ Библием ит пэжхэр нэхъыфІу къагурыІуэн щхьэкІэ. Апхуэдэу тщІэмэ, а щІэныгъэхэр я гум нэсынущ икІи хъыбарыфІыр ягъэІуну гукъыдэж яІэ хъунущ. Ауэ сыт-тІэ дэ тщІэн хуейр едгъаджэ цІыхухэм хъыбарыфІыр ягъэІуну гукъыдэж яІэ хъун щхьэкІэ?

7. Едгъаджэ цІыхум хъыбарыфІыр игъэІуну гукъыдэж иІэ хъун щхьэкІэ дапхуэдэу дызэрыдэІэпыкъу хъунур?

⁷ Евгъаджэм мыпхуэдэ упщІэхэр ефт: «Уи гъащІэр фІыкІэ пхъуэжыну Библием ит щІэныгъэхэр дапхуэдэу къызэрыбдэІэпыкъуар? А щІэныгъэхэм нэгъуэщІ цІыхухэр хуэныкъуэу пІэрэ? Дауэ уэ абыхэм уазэрыдэІэпыкъу хъунур?» (Прит. 3:27, Гъэсэпэтхыдэхэр; Мт. 9:37, 38). ХъыбарыфІыр щыдгъэІукІэ къэдгъэсэбэп буклетхэр ебгъаджэм егъэлъагъу икІи абы и Іыхьлыхэм, и ныбжьэгъухэм е къыдэлажьэхэм ягу ирихьыну буклетхэр къыхихыну хуэгъэуш. Абы къыхиха буклетхэм щыщ зыбжанэ ет икІи ахэр цІыхум зэрепт хъунур зэпкърыфхи, ар зэгъусэу къэвгъэлъагъуэ. ДауикІ, едгъаджэ цІыхум зэхуэсым и гъусэу хъыбарыфІыр игъэІун щІидза иужь, дэ абы дыдэІэпыкъун щхьэкІэ хъыбарыфІыр дгъэІуну и гъусэу дыкІуэнущ (Эккл. 4:9, 10; Лк. 6:40).

БИБЛИЕР ЗЫДЖ ЦІЫХУМ ЗЭХУЭСЫР ДАПХУЭДЭУ ЗЭРЫДЭІЭПЫКЪУР?

8. Едгъаджэ цІыхум Алыхьымрэ цІыхухэмрэ гурэ псэкІэ фІыуэ илъагъуу зригъэсэным сыт мыхьэнэшхуэ щІиІэр? (Абы нэмыщІ «Алыхьым хуиІэ лъагъуныгъэр нэхъ куу ищІыну едгъаджэм дапхуэдэу дызэрыдэІэпыкъу хъунур?» жыхуиІэ рамкэм феплъ.)

⁸ Гу лъыфтэт: Хьисэ дэ къалэн къытхуищІащ абы унафэу къыджиІа псори ягъэзэщІэну нэгъуэщІхэр едгъэсэну. ДауикІ, абы хохьэ нэхъ мыхьэнэшхуэ зиІэ унафитІри — Алыхьыр фІыуэ плъагъунымрэ цІыхухэр фІыуэ плъагъунымрэ (Мт. 22:37—39). А унафитІри пыщІащ хъыбарыфІ гъэІунымрэ цІыхухэр егъэджэнымрэ. Сыт щхьэкІэ жыпІэмэ, хъыбарыфІ гъэІун лэжьыгъэм дыхэтыну псом хуэмыдэу дэ дыхуэзыгъэушыр лагъуныгъэращ — Иеговэрэ цІыхухэмрэ худиІэ лъагъуныгъэм. ДауикІ, Библием еджэ языныкъуэхэр мэшынэ ямыцІыху цІыхухэм хъыбарыфІыр жраІэну. Ауэ дэ абыхэм къагурыдгъэІуэфынущ цІыхухэм щымышынэу хуэм-хуэмурэ зрагъэсэну Иеговэ абыхэм къазэрыдэІэпыкъуфынур (Пс. 18:1—3; Прит. 29:25, Гъэс.). Мы статьям хуэхьа рамкэр топсэлъыхь едгъаджэм Иеговэ хуиІэ лъагъуныгъэр нэхъ куу ищІын щхьэкІэ дапхуэдэу дыдэІэпыкъу хъунуми. Ауэ зэхуэсым щыщ дэтхэнэ зыми сыт ищІэ хъунур Библиер зыджхэм Алыхьымрэ цІыхухэмрэ фІыуэ ялъагъуу зрагъэсэну дэІэпыкъун щхьэкІэ?

9. Машинэ къехуэкІыкІэ зезыгъасэ цІыхум сыт къыдэІэпыкъур гъуэгум дапхуэдэу тетын хуейми къыгурыІуэну?

⁹ Машинэ къехуэкІыкІэ зезыгъасэ цІыхум и щапхъэм дгъэзэжынщ. Рулым щыдэсым деж инструкторым жиІэм едаІуэурэ зэрызигъасэм нэмыщІ, нэгъуэщІ машинэм дэсхэм кІэлъыплъурэ абы зегъасэ. Инструкторым абы нэгъуэщІ машинэм дэсхэм я къехуэкІыкІэм гу лърегъатэ, псалъэм папщІэ зым адрей машинэхэм дэсхэм я нэр иримыщІын щхьэкІэ ину къаблэ фарэр игъэункІыфІри, нэхъ мащІэу блэ фарэр щІигъэнащ; адрейм нэгъуэщІ машинэр блигъэкІащ. Машинэ къехуэкІыкІэ зезыгъасэ цІыхум а псор къыдоІэпыкъу гъуэгум дапхуэдэу тетын хуейми къыгурыІуэну.

10. Библиер зыдж цІыхум Алыхьым гъунэгъу зыхуищІыну сыт къыдэІэпыкъунур?

¹⁰ Абы ещхьу, гъащІэ мыухыжым ухуэзышэ гъуэгум теува, Библием едгъаджэ цІыхум дэ къыдэдаІуэурэ зэрызигъасэм нэмыщІ, Алыхьым и лэжьакІуэ нэгъуэщІхэм якІэлъыплъурэ зегъасэ. Абы къыхэкІкІэ Библием едгъаджэм сыт къыдэІэпыкъунур Алыхьым нэхъ гъунэгъу хуэхъуну? ЗэІущІэхэм зэрыкІуэр. ЗэІущІэхэм щызригъэгъуэт щІэныгъэхэм я фІыгъэкІэ абы Библиер нэхъыфІу къицІыхунущ, и фІэщхъуныгъэр нэхъ быдэ хъунущ икІи Алыхьым хуиІэ лъагъуныгъэр нэхъ куу хъунущ (Апост. 15:30—32). Абы нэмыщІ едгъаджэ цІыхур зэхуэсым щыщ къуэш, шыпхъухэм едгъэцІыхуфынущ икІи езыр зэрыт Іуэхугъуэм хуэдэ ит къуэш, шыпхъухэр абы къыдэІэпыкъуфынущ. ЗэІущІэхэм абы щилъэгъуфынущ Иеговэ и лэжьакІуэхэм лъагъуныгъэ пэж зэрагъэлъагъуэр. Іуэхугъуэ зыбжанэ адэкІэ зэпкърытхынщ.

11. Библиер зыдж цІыхум ди зэІущІэхэм хэт щызригъэцІыхуфынур икІи ар абы сыткІэ сэбэп къыхуэхъуфыну?

¹¹ Псалъэм папщІэ, и сабийр зи закъуэу зыпІ цІыхубзым Библиер джын щІедзэ. Ди зэІущІэхэм къэкІуа иужь абы апхуэдэ дыдэ Іуэхугъуэ ит шыпхъу щызрегъэцІыху. ЦІыхубзым елъагъу а шыпхъум и сабий цІыкІухэм и гъусэу зэІущІэхэм кІуэн щхьэкІэ къару куэд зэрырихьэлІэр икІи ар абы и гум нос. НэгъуэщІ зы Іуэхугъуи ди нэгу къыщІэдгъэхьэнщ. Библиер зыдж цІыхухъум тутын ефэныр хухыфІэдзэкъым, аращи абы зэІущІэм апхуэдэ гугъуехь зиІа къуэш щызрегъэцІыху. Ди къуэшым а цІыхухъум жреІэж Иеговэ хуиІэ лъагъуныгъэр хэхъуэху абы и хабзэхэм тетыну нэхъ гукъыдэж иІэу зэрыхъуар (2 Кор. 4:7; 7:1). Абы иужькІэ абы жреІэ: «Сэ тутын ефэныр щыхыфІэздзэфакІэ, уэри ар пхузэфІэкІынущ». Ди къуэшым и псалъэхэм цІыхухъум тегушхуэныгъэ кърет. Иджыри зэ Іуэхугъуэ зэпкърытхынщ. Библиер зыдж хъыджэбзым езым и ныбжь ди шыпхъу зэІущІэм щелъагъу икІи Иеговэ хуэлэжьэным гуфІэгъуэшхуэ къызэрыхуихьым гу лъетэ. Хъыджэбзым къищІэну хуейщ ди шыпхъур насыпыфІэу сыт щыгъуи щІыщытым и щхьэусыгъуэр.

12. Библиер зыдж цІыхур Алыхьым гъунэгъу хуэхъун щхьэкІэ зэхуэсым щыщ дэтхэнэ зыри дэІэпыкъуэгъу хъуфыну сыт жыпІэ щІэхъунур?

¹² Библиер зыдж цІыхум къуэш, шыпхъу куэд зригъэцІыхумэ, нэхъыфІу къыгурыІуэнущ Алыхьымрэ цІыхухэмрэ фІыуэ тлъагъуну Хьисэ къыдита унафэр зэригъэзэщІэнур дапхуэдэуми (Ин. 13:35; 1 Тим. 4:12). Абы нэмыщІ ипэкІэ зэрыжытІам хуэдэу, езыр зыпэщІэхуа гугъуехьхэм хуэдэ пэщІэхуа къуэш, шыпхъухэм зэрепсалъэр абы къыдэІэпыкъунущ зэхъуэкІыныгъэхэр и гъащІэм хилъхьэну икІи Хьисэ и лъэужь иувэну зэрыхузэфІэкІынур быдэу и фІэщ хъуну (Втор. 30:11). Библиер зыджыр Алыхьым гъунэгъу хуэхъуну зэхуэсым щыщ дэтхэнэ зыри дэІэпыкъуэгъу хъуфынущ (Мт. 5:16). Зэхуэсым къекІуалІэ, Библиер зыдж цІыхум удэІэпыкъун щхьэкІэ сыт уэ пщІэр?

ХЪЫБАРЫФІЫР ЗЫМЫГЪЭІУЖ ДИ КЪУЭШ, ДИ ШЫПХЪУХЭМ А ЛЭЖЬЫГЪЭР ЩІАДЗЭЖЫНУ ФАДЭІЭПЫКЪУ

13, 14. Зи лъэр щІэхуа апостолхэм Хьисэ дапхуэдэу зэрахущытар?

¹³ Дэ дыхуейщ хъыбарыфІыр зымыгъэІуж къуэш, шыпхъухэм дадэІэпыкъуну, Хьисэ къыдита а лэжьыгъэр ягъэзащІэу щІадзэжын щхьэкІэ. АбыкІэ дэ Хьисэ щапхъэ тетх хъунущ. АдэкІэ зэпкърытхынщ зэман гуэркІэ зи лъэр щІэхуа апостолхэм Хьисэ зэрадэІэпыкъуар.

¹⁴ Хьисэ щІылъэм щигъэзащІэ лэжьыгъэр щиухым икІи щаукІыну зэманыр къыщысым апостолхэм ар «утыкум къранэри, щІэпхъуэжащ» (Мк. 14:50; Ин. 16:32). Дауэ Хьисэ абыхэм зэрахущытар? ЛІахэм къахэтэджыкІыжа иужь куэд дэмыкІыу абы и лъэужь ирикІуэу щыта цІыхубз зыбжанэм мыпхуэдэу яжриІащ: «Фымышынэ. ФыкІуи, си къуэшхэм Галилейм кІуэну яжефІэ. Абдеж сыщалъагъунущ» (Мт. 28:10). Хьисэ и апостолхэм дзыхь яхуимыщІыжу хъуакъым. Къызэрагъэнам емылъытауэ, абы ахэр и къуэшу илъытэт. И Адэм хуэдэу, Хьисэ хьэзырт абыхэм къахуигъэгъуну икІи гущІэгъу яхуищІыну (2 Цар. 13:23).

15. ХъыбарыфІ гъэІуным хэмытыжхэм дэ дапхуэдэу дазэрыхущытыр?

¹⁵ ХъыбарыфІыр зымыгъэІужхэм дэри Хьисэ иІа гурыщІэхэм хуэдэ худиІэщ икІи абыхэм щхьэкІэ догузавэ. Ахэр дэ ди къуэш, ди шыпхъущ икІи дэ ахэр фІыуэ долъагъу! Дэ дощІэж ахэр я гум къыбгъэдэкІыу хъыбарыфІ гъэІуным зэрыхэтар — языныкъуэхэр илъэс куэдкІэ (Евр. 6:10). Дэ абыхэм хуабжьу дахуозэш! (Лк. 15:4—7). Дауэ-тІэ Хьисэ щапхъэ тетхыу абыхэм дазэрыдэІэпыкъуфынур?

16. ХъыбарыфІыр зымыгъэІуж къуэш, шыпхъухэм дауэ дэ дазэрыдэІэпыкъуфынур?

¹⁶ Ахэр гуапэу зэІущІэхэм къевгъэблагъэ. Зи лъэр щІэхуа апостолхэр игъэгушхуэн щхьэкІэ, Хьисэ ахэр мыхьэнэшхуэ зиІэ зэІущІэм къригъэблэгъащ (Мт. 28:10, етІуанэ Іыхьэр; 1 Кор. 15:6). Дэри хъыбарыфІыр зымыгъэІуж къуэш, шыпхъухэр ди зэІущІэхэм къедгъэблагъэ хъунущ. Дэ къыдгурыІуэн хуейщ ахэр ди зэІущІэхэм къэкІуэн ипэ мызэ-мытІэу къедгъэблэгъэн зэрыхуеинкІэ хъунур. Хьисэ шэч хэмылъу гуфІат и лъэужь ирикІуэхэр зэІущІэм къызэрыкІуам щхьэкІэ, дэри апхуэдэ гуфІэгъуэ зыхэтщІэфынущ (Мт. 28:16; евгъапщэ Лука 15:6).

17. ХъыбарыфІыр зымыгъэІуж къуэш е шыпхъу зэІущІэм къыщыкІуэм деж, дапхуэдэу абы дызэрыхущытын хуейр?

¹⁷ Фи лъагъуныгъэр зыхевгъащІэ. Хьисэ и лъэужь ирикІуэхэм зэрыщыгуфІыкІар яригъэлъэгъуащ: ахэр къыбгъэдыхьэным пэмыплъэу, ар езыр абыхэм ябгъэдыхьэри, епсэлъэн щІидзащ (Мт. 28:18). ХъыбарыфІыр зымыгъэІуж къуэш е шыпхъу зэхуэсым къыщыкІуэм деж, дэ дапхуэдэу абы дызэрыхущытын хуейр? Дэ езыр абыхэм дабгъэдыхьэу, гуапэу къедгъэблэгъэн хуейщ? Абыхэм яжетІэну псалъэр къытхуэмыгъуэтыну дыгузэвэнкІэ хъунущ. Апхуэдэу щытмэ, абыхэм дабгъэдыхьэу тлъэгъуну ди гуапэу зэрыщытыр яжетІэ хъунущ, апхуэдэу тщІэмэ ахэр Іэнкун тщІынукъым.

18. ХъыбарыфІыр зымыгъэІуж къуэш, шыпхъухэм сыткІэ сэбэп дахуэхъуфыну?

¹⁸ Ахэр фэ къыфщыгугъ зэрыхъунур яжефІэ. Пащтыхьыгъуэм теухуа хъыбарыр дуней псом щагъэІуну Хьисэ къарита лэжьыгъэр абы и лъэужь ирикІуэхэм яхуэмыгъэзэщІэну я гугъэу къыщІэкІынт. Ауэ Хьисэ абыхэм яжриІащ: «Дунейм и кІэухым нэсыху сыт щыгъуи сывигъусэнущ сэ» (Мт. 28:20). Хьисэ и псалъэхэр абыхэм, дауикІ, къадэІэпыкъуащ. Абы иужь куэд дэмыкІыу хъыбарыфІыр «цІыхухэм хуаІуатэ зэпытт махуэ къэс» (Апост. 5:42). ХъыбарыфІыр зымыгъэІуж къуэш, шыпхъухэр ди дэІэпыкъуэгъум хуэныкъуэщ. Ахэр шынэу къыщІэкІынщ хъыбарыфІыр ягъэІун щІадзэжыну. Ауэ а лэжьыгъэр я закъуэу зэрамыгъэзэщІэнур дэ абыхэм яжетІэ хъунущ. А лэжьыгъэр щІадзэжыну хьэзыр хъуа иужь, ди гъусэу хъыбарыфІыр ягъэІуну къедгъэблагъэ хъунущ. ИкІи, шэч хэмылъу, абыхэм дазэрыдэІэпыкъуар фІыщІэ ящІынущ. ХъыбарыфІыр зымыгъэІужхэм ди къуэш, ди шыпхъухэм хуэдэу дахущытмэ, абыхэм хъыбарыфІ гъэІуныр щІадзэжыну къыщІэкІынщ икІи абы зэхуэсым гуфІэгъуэ къыхуихьынущ.

ДЗЫХЬ КЪЫТХУАЩІА ЛЭЖЬЫГЪЭР ИКІЭМ НЭС ДГЪЭЗЭЩІЭНУ ДЫХУЕЙЩ

19. Сыт дэ хуабжьу дызыхуейр икІи сыт щхьэкІэ?

¹⁹ Хьисэ къыдита лэжьыгъэм дапхуэдизрэ иджыри дызэрыхэтынур? Хьисэ жиІауэ щытащ: «Дунейм и кІэухым нэсыху» (Мт. 28:20). А къалэныр и кІэм нэсыху тхуэгъэзэщІэну пІэрэ? Дэ абы хуабжьу дыхущІокъу икІи ди къарури, зэманри, мылъкури «гъащІэ мыухыжыр къозыт пэжыр къэзыщІэну хуей» цІыхухэр къэдгъуэтыным тыдогъэкІуадэ икІи ар тщІэну ди гуапэщ (Апост. 13:48, ДЩІ). Апхуэдэу дэ Хьисэ щапхъэ тыдох, абы жиІауэ щытащ: «Сэ си шхыныгъуэр сыкъэзыгъэкІуар зыхуейр злэжьыну, абы и Іуэхур нэзгъэсыну аращ» (Ин. 4:34; 17:4). Дэри дзыхь къытхуащІа лэжьыгъэр и кІэм нэдгъэсыну хуабжьу дыхуейщ (Ин. 20:21). ИкІи а лэжьыгъэр щыдгъэзащІэкІэ дэ нэгъуэщІхэри ди гъусэну ди гуапэщ, хъыбарыфІыр зымыгъэІуж къуэш, шыпхъухэри абыхэм хэту (Мт. 24:13).

20. 2 Коринф 4:7 тепщІыхьмэ, Хьисэ къыдита лэжьыгъэр тхуэгъэзэщІэну сыт жыпІэ щІэхъунур?

²⁰ Хьисэ къыдита лэжьыгъэр бгъэзэщІэну, дауикІ, тыншкъым. Ауэ дэ ди закъуэкъым. Хьисэ къыддэІэпыкъуну дыкъигъэгугъащ. Абы нэмыщІ дэ Иеговэ къыддоІэпыкъу, сыт щхьэкІэ жыпІэмэ Тхыгъэ ЛъапІэм зэритымкІэ, «дэ Алыхьым дыдолажьэ» (1 Кор. 3:9, ДЩІ). Аращи, Хьисэ къыдита къалэныр дэ тхуэгъэзэщІэнущ икІи абыкІэ нэгъуэщІхэм дадэІэпыкъуфынущ. Сыту ар пщІэшхуэ икІи гуфІэгъуэшхуэ! (Къеджэ 2 Коринф 4:7.)