Ди къэкІуэным теухуа пэжыр

Алыхьым и Пащтыхьыгъуэр къызэрысам щыхьэт техъуэ Іуэхугъуэхэм Хьисэ и гугъу ищІат (Лука 21:31). Абы жиІат зауэшхуэхэр, гъаблэхэр, уз зэрыцІалэхэр зэрыщыІэнур икІи щІыр хуабжьу зэрыхъеинур. Аращ ди зэманым къэхъур (Лука 21:10—17).

«Мы дунейм и иужьрей махуэхэм» цІыхухэр зэрыщытынури Библием жиІат. Абы теухуауэ 2 Тимофей 3:1—5 укъыщеджэ хъунущ. Нобэ цІыхухэм я дуней тетыкІэр щыплъагъукІэ Библием жиІэр зэрыпэжыр наІуэщ.

Мы псалъэхэм сыт хуэдэ мыхьэнэ ди дежкІэ яІэр? Алыхьым и Пащтыхьыгъуэр щІылъэм щытепщэну зэманым цІыхухэм я гъащІэр нэхъыфІ зыщІыну зэхъуэкІыныгъэшхуэхэр къэхъунущ (Лука 21:36). Библием къыщыдощІэ щІылъэм щыпсэуну цІыхухэм папщІэ Алыхьым фІыгъуэ куэд зэригъэхьэзырар.

ПАЩТЫХЬЫГЪУЭХЭМ Я НЭХЪЫФІЫР

«[Хьисэ] тепщэныгъи, щІыхьи, пащтыхьыгъуи иратащ, лъэпкъ псори, сыт хуэдэ бзэкІэ псалъэхэри, цІыхуцІэ зиІэ псори къыхуэлэжьэн щхьэкІэ. Абы и тепщэныгъэр – тепщэныгъэ мыкІуэдыжщ, зэи кІэух иІэнукъым, и пащтыхьыгъуэри зэи къутэжынукъым» (ДАНИИЛ 7:14).

Сыт абы къикІыр? Пащтыхьыгъуэу щыІэм я нэхъыфІым и лъабжьэ ущІэту упсэунущ. Абы и Пащтыхьыр Хьисэщ икІи а Пащтыхьыгъуэр дуней псом щытепщэнущ.

УЗЫНШАГЪЭ БЫДЭ

«Зы цІыхуми жиІэнукъым: „Сэ сысымаджэщ“» (ИСАИЯ 33:24).

Сыт абы къикІыр? Уэ зэи усымэджэнукъым икІи уи Іэпкълъэпкъым дагъуэ лъэпкъ иІэнукъым. Уэ гъащІэ мыухыж уиІэу упсэуфынущ.

ДУНЕЙ ПСОМ МАМЫРЫГЪЭ ТЕТЫНУЩ

«[Алыхьым] зауэхэр щІы гъунэм нэс къегъэувыІэ» (ПСАЛОМ 46:9).

Сыт абы къикІыр? Зауэхэмрэ абыхэм къахьа насыпыншагъэхэмрэ зэи щыІэжынукъым.

ЩІЫЛЪЭМ ЩЫПСЭУНУР ЦІЫХУФІХЭРАЩ

«ЦІыху бзаджащІэр щыІэжынукъым... Ауэ Іэдэбхэм щІыр щІэину ялъысынущ» (ПСАЛОМ 37:10, 11).

Сыт абы къикІыр? ЦІыху бзаджэхэр афІэкІа щыІэжынукъым. ЩІылъэм щыпсэунур Алыхьым хуэІурыщІэу псэуну хуей закъуэхэращ.

ДУНЕЙ ПСОР ЖЭНЭТ ХЪУНУЩ

«ЦІыхухэм унэхэр яухуэнущ икІи абыхэм щыпсэунущ, жызум хадэхэри хасэнущ икІи абыхэм къыпыкІэхэри яшхынущ» (ИСАИЯ 65:21, 22).

Сыт абы къикІыр? ЩІыр зэрыщыту къэщІэрэщІэжынущ. Алыхьым ди тхьэлъэІухэм жэуап иритынурэ, и мурадыр щІылъэм щигъэзэщІэнущ (Маттэ 6:10).