Гузэвэгъуэхэр щІыщыІэм и щхьэусыгъуэр сыт?

Гузэвэгъуэхэр Алыхьым къыбгъэдэмыкІмэ, гъаблэр, тхьэмыщкІагъэр, зауэхэр, узыфэхэр, гузэвэгъуэшхуэхэр дэнэ къыздикІыр? Ахэр щІыщыІэм и щхьэусыгъуищым Библиер топсэлъыхь.

1. Щхьэхуещагъэ, нэпсеягъэ, лъагъу мыхъуныгъэ. Экклезиаст 8:9 щыжыІащ: «ЦІыхум адрей цІыхум зэран хуэхъуу унафэ хуещІ». ЦІыху щхьэхуещэхэмрэ гущІэгъуншэхэмрэ адрейхэр гугъу ирагъэхь.

2. ЦІыхум емылъыта Іуэхугъуэхэр. Гузэвэгъуэ къыщІытлъэІэсым иджыри щхьэусыгъуэ хуэхъуфынущ имызэману дэ дэмылъыта Іуэхугъуэ гуэр дызэрырихьэлІэр (Экклезиаст 9:11). Зыгуэрым и лэжьыгъэр Іэпэдэгъэлэлу зэригъэзащІэм е зэрыщыуэм и ягъэкІэ нэгъуэщІ цІыхум лей къытехьэнкІэ хъунущ.

3. Мы дунейм и тепщэр. ЦІыхухэр гугъу зэрехьымкІэ япэ дыдэу хэт къуаншэми Библием къыщІегъэщ. Абы щыжыІащ: «Дуней псори шейтІаным и ІэмыщІэ [илъщ]» (1 Иуан 5:19). ШейтІаныр япэм Алыхьым и мелыІыч пэжхэм ящыщ зыуэ щытащ, ауэ иужькІэ ар гъуэгу пэжым текІащ (Иуан 8:44). Адрей мелыІычхэм щыщу языныкъуэхэри я щхьэхуещагъэм къыхэкІыу Иблисым гъусэ хуэхъури Алыхьым пэщІэувахэщ. Абыхэм жин бзаджэкІэ йоджэ (ЩІэдзапІэ 6:1—5). Абы лъандэрэ къару зыбгъэдэлъ икІи гущІэгъуншэ Иблисымрэ абы и жин бзаджэхэмрэ дуней псор я ІэмыщІэм илъщ. Псом хуэмыдэу ар ди зэманым зыхыдощІэ. Нобэ ШейтІаныр хуабжьу губжьащ. Абы «щІылъэм тет цІыху псори» къегъапцІэ икІи абыхэм гуауэ куэд къахуехь (Апокалипсис 12:9, 12). Иблисым гущІэгъу лъэпкъ хэлъкъым. ЦІыхухэм хьэзаб зэрашэчым еплъыну абы и фІэфІщ. Аращи, гузэвэгъуэхэмрэ гуауэхэмрэ къыщІэхъумкІэ къуаншэр ШейтІаныращ, атІэ Алыхьыракъым.

ЕГУПСЫСЫТ: гущІэгъуншэращ лажьэ зимыІэ цІыхухэр гугъу езыгъэхьыфынур. Ауэ Библием зэрыжиІэмкІэ, «Тхьэр езыр фІылъагъуныгъэщ» (1 Иуан 4:8). Лъагъуныгъэр Иеговэ и хьэл-щэн нэхъыщхьэщ. Абы къыхэкІкІэ, «Алыхь пэжым зэи хабзэншагъэ хуэщІэнукъым икІи лъэкІыныгъэшхуэ зиІэм лей зэрихьэнукъым»! (Иов 34:10).

Ауэ уэ мыпхуэдэ упщІэ уиІэнкІэ хъунущ: «ШейтІаным и тепщэгъуэ зэманыр Алыхьым куэдрэ иджыри ишэчыну?» Дэ къызэрытщІащи, Алыхьым Іейр илъагъу хъукъым икІи ди гугъуехьхэр щилъагъум деж, и гур къытщІоуз. Абы нэмыщІ Библием щыжыІащ: «Фи гуныкъуэгъуэ псори Тхьэм ефхьэлІэ, абы и нэІэ къыфтригъэтщи» (1 Петр 5:7). Иеговэ фІыуэ дыкъелъагъу! ДызыІущІэ гугъуехьхэмрэ мы дунейм къыщекІуэкІ хабзэншагъэ псомрэ кІэ иритын щхьэкІэ, гъунэ зимыІэ къарурэ тепщэныгъэрэ Алыхьым иІэщ. Абы теухуауэ нэхъыбэ къыкІэлъыкІуэ статьям къыщыпщІэфынущa.