Ди лэжьыгъэм текІуадэ ахъшэр дэнэ къыздикІыр?

Илъэс къэс ди организацэм мелуан бжыгъэкІэ къыдегъэкІ икІи егуэш Библиемрэ абы тегъэщІа публикациехэмрэ. Дэ дыщызэхуэс Унэхэмрэ филиалхэмрэ доухуэ икІи ахэр зыхуей худогъазэ; мин бжыгъэ хъу миссионерхэмрэ Вефилым и лэжьакІуэхэмрэ ахъшэкІэ дадоІэпыкъу; гузэвэгъуэшхуэ къызылъэІэсахэм зыхуэныкъуэр яхудощІэ. Абы ипкъ иткІэ упщІэ къоув: «А псом текІуадэ ахъшэр дэнэ къыздикІыр?»

Іыхьэ пщІанэ ттыкъым икІи ахъшэ къыхэтхкъым. ХъыбарыфІ гъэІуным ахъшэ куэд текІуадэми, дэ спонсор къэтлъыхъуэкъым. Илъэсищэ нэхърэ нэхъыбэкІэ узэІэбэкІыжмэ, етІуанэу къыдэкІа «ХъумакІуэ чэщанэ» журналым щыжыІат дэ быдэу ди фІэщ зэрыхъур Иеговэ къызэрыддэІэпыкъунур икІи дэІэпыкъуэгъу щхьэкІэ дылъаІуэу зэи дызэрыдэмытынур. Иджыри къыздэсым дэ ди псалъэр доІыгъыж! (Маттэ 10:8).

Ди лэжьыгъэр арэзыуэ къат ахъшэмкІэ идохьэкІ. Библием цІыхухэр зэредгъаджэр куэдым фІыщІэ ящІри, арэзыуэ ахъшэ къат. Иеговэ и Щыхьэтхэми Алыхьым и мурадыр ягъэзэщІэн щхьэкІэ, я гум къыбгъэдэкІыу ахъшэ, къару икІи нэгъуэщІ яІэр а лэжьыгъэм халъхьэ (1 Летопись 29:9). Дыщызэхуэс Унэхэмрэ конгрессхэр щедгъэкІуэкІ Унэхэмрэ арэзыуэ къат ахъшэм щхьэкІэ ашыкхэр щІэтщ. Абы нэмыщІ арэзыуэ ахъшэ птыну ухуеймэ, jw.org сайтымкІэ ебгъэхь хъунущ. Ахъшэм и нэхъыбэр къэзытхэр къулейуэ псэукъым. Абыхэм Хьисэ зи гугъу ищІа фызабэм щапхъэ трах. А фызабэм ахъшэ жьгъеитІ фІэкІа пхъуантэм димылъхьами, Хьисэ абы щытхъуащ (Лука 21:1—4). Апхуэдэу, «хэти и гум пыкІым хуэдизкІэ иретэ, и гум къыщІимытхъыу, зыми химыгъэзыхьауэ иретэ» жыхуиІэ псалъэхэм тету дэтхэнэ зыми мазэ къэс ахъшэ гуэр игъэтІылъ хъунущ (2 Коринф 9:7; 1 Коринф 16:2).

Дэ быдэу ди фІэщ мэхъу: зигу къабзэ цІыхухэм адэкІи нэхъ лъапІэ дыдэу яІэмкІэ Иеговэ ягъэлъэпІэнущ, Пащтыхьыгъуэм и Іуэхур даІыгъын щхьэкІэ (Притчи 3:9).

• Ди организацэр адрей динхэм сыткІэ къащхьэщыкІрэ?

• Арэзыуэ къат ахъшэр дауэ къызэрагъэсэбэпыр?