Ди тхыгъэхэр зэратхымрэ зэрызэрадзэкІымрэ

«Тхьэм и хъыбарыфІыр» «лъэпкъ псоми, унагъуэ лъэпкъ псоми, бзэ псоми, къэрал псоми» ялъэдгъэІэсын щхьэкІэ ди тхыгъэхэр бзэ 850-м нэскІэ къыдыдогъэкІ (Апокалипсис 14:6). Хэт абыкІэ къыддэІэпыкъур? Дэ тхакІуэхэмрэ абыхэм ятхар зэзыдзэкІхэмрэ дуней псом щыдиІэщ. Ахэр псори Иеговэ и Щыхьэтхэщ.

ЯпэщІыкІэ тхыгъэр английскэбзэкІэ ятх. Ди публикациехэр ятхыным кІэлъыплъ отделыр дунейпсо ІуэхузехьэпІэм щыІэщ икІи ар УнафэщІ гупым и лъабжьэ щІэту мэлажьэ. А отделыр кІэлъоплъ дунейпсо ІуэхузехьэпІэмрэ филиалхэмрэ щыІэ ди тхакІуэхэм ирахьэкІ лэжьыгъэм. Ди тхакІуэхэр къэрал зэмылІэужьыгъуэхэм зэрыщыпсэум и фІыгъэкІэ, цІыху куэдым яфІэгъэщІэгъуэн темэ зэмылІэужьыгъуэхэр ди тхыгъэхэм къыщытрадзэ.

Текстыр ар зэзыдзэкІынухэм хурагъэхь. Материалыр зэпэщ хъуа иужь, электроннэ пощткІэ ар зэзыдзэкІынухэм хурагъэхь. Абыхэм текстыр зэрадзэкІ, английскэбзэкІэ тхам ирагъапщэ икІи зыхуэныкъуэ зэхъуэкІыныгъэхэр халъхьэ. Ахэр хущІокъу «псалъэ пэжхэм» и купщІэм къикІ дыдэр я бзэкІэ зэрадзэкІыну (Экклезиаст 12:10).

Компьютерхэм лэжьыгъэр нэхъ псынщІэ ящІ. Компьютерыр тхакІуэхэмрэ ди тхыгъэхэр зэзыдзэкІхэмрэ я пІэм иувэфынукъым. Ауэ компьютерым илъ программэхэм, псалъалъэхэм икІи энциклопедиехэм я фІыгъэкІэ лэжьыгъэр нэхъ псынщІэу мэкІуатэ. «Многоязычная электронная издательская система» (MEPS) жыхуаІэр Иеговэ и Щыхьэтхэм къагупсысащ икІи абы и фІыгъэкІэ текстымрэ сурэтхэмрэ ягъэхьэзыр, ди публикациехэр бзэ куэдыкІейкІэ традзэн щхьэкІэ.

Библием тегъэщІа ди тхыгъэхэр апхуэдиз бзэкІэ, цІыху мин бжыгъэ фІэкІа зэрымыпсалъэ бзэхэри хэту, щІызэддзэкІыр сыт? Иеговэ «цІыху псори мыкІуэду къригъэлыну икІи щыпкъагъэр ящІэну хуейщи» аращ (1 Тимофей 2:3, 4).

• Дауэ ди публикациехэр зэратхыр?

• Ди тхыгъэхэр апхуэдиз бзэкІэ щІызэддзэкІыр сыт?