Сыт зищІысыр фІэщхъуныгъэ пэжыр?

ФІЭЩХЪУНЫГЪЭ пэжым къикІыр Алыхьыр зэрыщыІэр уи фІэщ хъун закъуэракъым. ЦІыху мелуан куэдым Алыхьыр я фІэщ мэхъу, ауэ абы щхьэкІэ къэмынэу мыхъумыщІагъэ куэд ящІэу мэпсэу. Апхуэдэ фІэщхъуныгъэр ахъшэ нэпцІым ебгъэщхь хъунущ. Ар пэжу къыпщыхъункІэри хъунущ, ауэ абы сэбэп къыпхуихькъым. Сыт-тІэ фІэщхъуныгъэ пэжыр зищІысыр?

ФІэщхъуныгъэ пэжым лъабжьэ хуэхъур Тхыгъэ ЛъапІэм ит щІэныгъэ пэжхэращ. А тхыгъэхэр Алыхьым теухуа пэжыгъэм топсэлъыхь, дэ ар нэхъыфІу къэтцІыхуфын папщІэ. Абыхэм дэ къытхузэІуах Алыхьым и хабзэхэр, мурадхэр, щІэныгъэ пэжхэр. Псалъэм папщІэ:

• Алыхьыр закъуэщ. Абы хуэбгъадэ хъун щыІэкъым;

• Хьисэ — ЛъэкІыныгъэшхуэ зиІэ Алыхькъым. Ар Алыхьым и бегъымбарщ;

• Алыхьым тхьэ нэпцІхэм хуэлэжьэныр къищтэкъым;

• Алыхьым хьэкум щищІыну махуэр цІыхухэм къапэщылъщ;

• бжыгъэ зимыІэ лІа куэд къэтэджыжынущ Жэнэтым щыпсэуну.

ФІэщхъуныгъэ пэжым ІуэхуфІхэм ухуегъэуш. Апхуэдэ Іуэхухэм Алыхьыр ягъэлъапІэ икІи дэри нэгъуэщІхэми сэбэпынагъ къытхуахь. ІуэхуфІхэм хеубыдэ:

• Алыхьым хуэлэжьэныр;

• Алыхьым фІэфІ хьэл-щэнхэр зыхэлъхьэныр, псом хуэмыдэу лъагъуныгъэр;

• гупсысэ Іейхэмрэ мыхъумыщІэ хъуэпсэныгъэхэмрэ зыпыІудзыныр;

• гъэунэхуапІэхэм ущихуэм деж фІэщхъуныгъэр хъумэныр;

• Алыхьым теухуа щІэныгъэмкІэ цІыхухэм уадэгуэшэныр.

ФІэщхъуныгъэ пэжыр дауэ зэдгъэгъуэта хъуну?

Алыхьыр къыбдэІэпыкъуну елъэІу. Мусэ бегъымбар Алыхьым зыхуигъэзащ: «СынолъэІу, уи гъуэгухэр къысхузэІупхыну, усцІыхун щхьэкІэ икІи адэкІи уи нэфІ къысщыхуэн щхьэкІэ»a. Алыхьым абы и лъэІур зэхихри, жэуап иритащ. Мусэ фІэщхъуныгъэ иІамкІэ щапхъэфІ дигъэлъэгъуащ. Уэри фІэщхъуныгъэ пэж зэбгъэгъуэтынымкІэ Алыхьыр къыбдэІэпыкъунущ.

Тхыгъэ ЛъапІэр джыным зэман хухэх. Алыхьым къыбгъэдэкІ тхыгъэхэу Торэтыр, Забурыр, Инджылыр щыбгъуэтынущ Библием — псом нэхърэ нэхъыбэу къыдэкІ икІи бзэ нэхъыбэ дыдэкІэ зэдзэкІа тхылъым. А тхыгъэхэр уиІэу пІэрэ?

Тхыгъэ ЛъапІэм ит чэнджэщхэр уи гъащІэм къыщыгъэсэбэп. ФІэщхъуныгъэр Іэпкълъэпкъым ебгъэщхь хъунущ, уелэжьыхукІэ нэхъ быдэ мэхъу. ФІэщхъуныгъэр ІуэхукІэ къэбгъэлъагъуэмэ, ар хэхъуэнущ. Уэ уи гъащІэм щыплъэгъунущ Алыхьым и чэнджэщхэм лъэкІыныгъэшхуэ зэриІэр. Тхыгъэм ит чэнджэщхэм цІыху куэдым я гъащІэр нэхъыфІ ящІащ. Мы брошюрэм ущеджэкІэ, апхуэдэ щапхъэ зыбжанэм урихьэлІэнущ.