ЩІэныгъэ зэгъэгъуэтыным теухуауэ Іущагъ зыхэлъ унафэхэр къафщтэ

1, 2. 1) ЩІалэгъуалэм сыт хуэдэ унафэхэр къащтэн хуей? 2) Сыт мы статьям щызэпкърытхынур? («Псалъэхэм къикІыр» жыхуиІэм феплъ.)

БАЛИГЪХЭР сабийхэмрэ ныбжьыщІэхэмрэ щІэх-щІэхыурэ мыпхуэдэу йоупщІ: «Ин ухъуа иужь хэту ущытыну ухуей?» ЦІыхум и зэманыр псом нэхърэ нэхъыфІу къызэригъэсэбэпыфынур — ар Иеговэ полновременнэу хуэлэжьэныращ. Ауэ дэ дэтхэнэ зыми ди щхьэр тпІыжын хуейщ (2 Фес. 3:10). Абы къыхэкІкІэ уэ уегупсысу къыщІэкІынщ балигъ ухъуа иужь дэнэ ущылэжьэнуми.

² Языныкъуэ ныбжьыщІэхэм школыр къауха иужь, лэжьапІэ нэхъ тыншу къагъуэтыфын щхьэкІэ я адэ-анэм йочэнджэщри, зы ІэщІагъэ гуэрым хуеджэн щхьэкІэ, еджапІэa щІотІысхьэ. Уэ мыпхуэдэу уегупсысу къыщІэкІынщ: «Школыр къэзуха иужь, адэкІэ седжэн хуейуэ пІэрэ? Хуейуэ щытмэ, дэнэ сыщеджэнур?» Мы статьям щызэпкърытхыну принципхэр къыбдэІэпыкъунущ мыхьэнэшхуэ зиІэ а упщІэхэм теухуауэ Іущагъ зыхэлъ унафэхэр къэпщтэну. Мы статьяр псом япэрауэ зыхуэгъэзар ныбжьыщІэхэрами, ар иджыри сэбэп хуэхъунущ щІэныгъэ зэзыгъэгъуэтыну хуей дэтхэнэ зыми. Абы нэмыщІ мы статьям ит принципхэр адэ-анэхэм сэбэп яхуэхъунущ, абыхэм я сабийхэм Іущагъ зыхэлъ унафэ къащтэну ядэІэпыкъун щхьэкІэ.

ШКОЛЫР КЪЭБУХА ИУЖЬ, ИДЖЫРИ ЗЫЩІЫПІЭ УЩЕДЖЭН ХУЕЙУЭ ПІЭРЭ?

3. Языныкъуэ къуэш, шыпхъухэм школыр къауха иужь, нэгъуэщІ еджапІэ щІэтІысхьэну мурад щІащІыр сыт?

³ Языныкъуэ къэралхэм уи щхьэр ппІыжыфын щхьэкІэ, школым щызэбгъэгъуэта щІэныгъэм урокъу. Ауэ нэгъуэщІ къэралхэм узрикъун ахъшэ къыпхуэлэжьын икІи графикыр пхуэкІуэу лэжьапІэ къэбгъуэтын щхьэкІэ, иджыри зыщІыпІэ ущеджэн хуей мэхъу. ДауикІ, къуэшым е шыпхъум лэжьапІэфІ иІэу щытмэ, ар хъыбарыфІ гъэІуным е Алыхьым и лэжьыгъэм пыщІа нэгъуэщІ Іуэхухэм нэхъыбэу хэтыфынущ. Ауэ школыр къэбуха иужь нэгъуэщІ еджапІэ ущІэсын щхьэкІэ, зыгуэрым зыхуэбгъэныкъуэн хуей хъунущ икІи гугъуехь гуэрхэм упэщІэхуэфынущ.

4. ЩІэныгъэ зэгъэгъуэтыным теухуауэ хэт унафэ къэзыщтэн хуейр? (Сноскэми феплъ.)

⁴ Библием щыжыІащ «хэти и хьэлъэр езым и пщэм» зэрыдэлъыр (Гал. 6:5; «Учебная Библия» жыхуаІэм ит комментарием феплъ). Абы къыхэкІкІэ зи ныбжь нэса цІыхум щІэныгъэ зригъэгъуэтынрэ зримыгъэгъуэтынрэ езым унафэ ищІын хуейщb. Абы нэмыщІ адэ-анэхэми я къалэнщ щІэныгъэ зрагъэгъуэтыным теухуауэ я сабийхэр яунэтІыну (Еф. 6:1). Адэ-анэхэм я сабийхэр хуагъэхьэзырыфынущ, абыхэм къэкІуэну зэманым щІэныгъэ зэгъэгъуэтыным теухуауэ Іущагъ зыхэлъ унафэхэр къащтэн щхьэкІэ (Прит. 22:6).

5. Школыр къэбуха иужь еджапІэ гуэр ущІэтІысхьэнрэ ущІэмытІысхьэнрэ дапщэщ ущегупсысын хуейр икІи сыт щхьэкІэ? (Сурэтми феплъ.)

⁵ И нэхъыбэм деж ныбжьыщІэхэм школыр къамыух щІыкІэ унафэ ящІын хуейщ еджапІэ гуэр щІэтІысхьэнрэ щІэмытІысхьэнрэ. НыбжьыщІэхэр а мыхьэнэшхуэ зиІэ упщІэм я адэ-анэм я гъусэу тепсэлъыхьыным, дауикІ, Іущагъ хэлъщ. Апхуэдэу абыхэм зэман яІэнущ сыт хуэдэ еджапІэ щІэтІысхьэнуми фІыуэ егупсысыну. Адэ-анэр я сабийм дэІэпыкъуфынущ школым щадж сыт хуэдэ предметхэр иужькІэ сэбэп къыхуэхъужынуми къыгурыІуэну, псалъэм папщІэ, еджапІэ щыщІэтІысхьэкІэ е лэжьапІэ щыувкІэ. Ауэ школыр къомыух щІыкІэ зыщІыпІэ ущІэтІысхьэным теухуауэ Іэмал имыІэу унафэ къэпщтэн хуейуэ щыт? Хьэуэ, щыткъым (Прит. 21:5, Гъэс.). Языныкъуэ ныбжьыщІэхэм япэщІыкІэ школыр къаух, лэжьапІэ къагъуэтри, пионеру лэжьэн щІадзэ икІи адэкІэ зыгуэрым хуеджэнрэ хуемыджэнрэ щегупсысыр иужькІэщ. ЩІэныгъэ зэгъэгъуэтыным теухуа упщІэм иужькІэ къытебгъэзэж хъунущ.

6. ЩІэныгъэ зэгъэгъуэтыным теухуауэ Іущагъ зыхэлъ унафэ къэпщтэну сыт къыбдэІэпыкъунур?

⁶ ЩІэныгъэ зэгъэгъуэтыным теухуауэ Іущагъ зыхэлъ унафэ къэпщтэну сыт къыбдэІэпыкъунур? А Іуэхум щхьэкІэ Іэмал имыІэу Алыхьым тхьэлъэІукІэ зыхуэгъазэ (Екъуб 1:5). Сыт иджыри пщІэ хъунур? Япэрауэ, зыщІыпІэ ущІэтІысхьэну ущІыхуейм и щхьэусыгъуэр, уи щхьэр къомыгъэпцІэжу, зэхэгъэкІ (Пс. 26:2). ЕтІуанэрауэ, зэбгъэгъуэтыну узыхуей щІэныгъэм и лъэныкъуэфІхэмрэ и лъэныкъуэ Іейхэмрэ зэпэшэч (Прит. 14:15, Гъэс.). АдэкІэ а лъэбакъуэхэм нэхъ убгъуауэ дытепсэлъыхьынщ.

ЕДЖАПІЭ ГУЭР УЩІЭТІЫСХЬЭНУ УЩІЫХУЕЙМ И ЩХЬЭУСЫГЪУЭР ЗЭХЭГЪЭКІ

7. ЕджапІэ щІэтІысхьэну хуей Иеговэ и лэжьакІуэр сытым егупсысыным мыхьэнэшхуэ иІэ?

⁷ Школыр къэбуха иужь зыщІыпІэ ущІэтІысхьэну ухуеймэ, «мы щІэныгъэр зэзгъэгъуэтыну сыщІыхуейр сыт?» жыпІэу узэупщІыжыным мыхьэнэшхуэ иІэщ. Куэдыр адэкІи еджэну щІыхуейр ягу ирихь лэжьапІэ къагъуэтын е ахъшэ куэд къалэжьын щхьэкІэщ. НтІэ, абы Іей гуэр хэлъ? Хьэуэ (1 Тим. 5:8). Ауэ Библием къыдгурегъаІуэ ахъшэм ди гъащІэр къихъумэну дыщыгугъ икІи абы япэ увыпІэ етт зэрымыхъунур (Прит. 23:4, 5; 1 Тим. 6:8—10; 1 Ин. 2:17). Уэ еджапІэ ущІэтІысхьэну ущІыхуейр абы цІэрыІуэ е къулей урихъуну ухуейуэ щытмэ, икІэм-икІэжым насыпыншагъэ зыхэпщІэфынущ, уеблэмэ, Иеговэ пэжыжьэ ухуэхъуфынущ.

8, 9. 1) Иеговэ и лэжьакІуэхэр щІэныгъэ зэгъэгъуэтыным дапхуэдэу хущытын зэрыхуейр? (Маттэ 6:33, ДЩІ). 2) Хосефинэ, Морин, Ирис сымэ я псалъэхэм сытым фыхуагъасэрэ?

⁸ Дапхуэдэу дэ щІэныгъэ зэгъэгъуэтыным дыхущытын зэрыхуейр? Алыхьым дызэрыхуэлажьэр ди гъащІэм псом нэхърэ нэхъапэу щытын хуейщ (Мт. 22:37, 38; Флп. 3:8). Аращи, дэ щІэныгъэ зэгъэгъуэтыным дызэрыхущытын хуейр Иеговэ дыхуэлэжьэн щхьэкІэ, ди щхьэр тпІыжыну къыддэІэпыкъу Іэмалущ. (Къеджэ Маттэ 6:33, ДЩІ.)

⁹ Иеговэ и лэжьакІуэ языныкъуэхэм щІэныгъэ зэгъэгъуэтыным еплъыкІэ тэмэм хуаІэну сыт къадэІэпыкъуар? Чили къэралым щыщ ди шыпхъу Хосефи́нэ къыддогуашэ: «Си щІэныгъэм зэрыхэзгъэхъуам и фІыгъэкІэ сэ Иеговэ и Іуэхум нэхъыбэу сыхэтыну Іэмал къызэзыт лэжьапІэ къэзгъуэтыфащ. Сэ къыхэсха программэр къыздэІэпыкъуащ Алыхьым и лэжьыгъэм пыщІа си мурадхэр къызэхъулІэну». Ди шыпхъу Мори́н илъэскІэ парикмахерым хуеджащ. Абы жеІэ: «Сэ мурад згъэуват хъыбарыфІыр зыгъэІухэр мащІэу здэщыІэ щІыпІэм сыкІуэну. Абы къыхэкІкІэ а мурадыр къызэхъулІэну къыздэІэпыкъун курсхэр къэслъыхъуэт. ИужькІэ сэ парикмахеру сылэжьащ икІи нэгъуэщІ щІыпІэ сызэрыІэпхъуэн ахъшэ зыхуэсхьэсащ. Зэзгъэгъуэта ІэщІагъэр сыздэІэпхъуа щІыпІэми лэжьапІэ къыщызгъуэтыну къыздэІэпыкъуащ». Стоматологыу еджа ди шыпхъу И́рис къыддогуашэ: «ЩІэныгъэ нэхъыбэ зэгъэгъуэтыным Іэмал гуэрхэр къыпхузэІуихыфынущ, ауэ насып пэжыр абы елъытакъым. Иеговэ и лэжьыгъэр уи гъащІэм япэ ибгъэщмэ, абы Іэмал имыІэу насыпыфІэ уищІынущ». Пэжщ, Иеговэ худиІэ ныбжьэгъугъэр ди дежкІэ псом нэхърэ нэхъ лъапІэу щытмэ, игъащІэкІэ насыпыфІэ дызыщІын унафэхэр къэтщтэфынущ.

ЗЭБГЪЭГЪУЭТЫНУ УЗЫХУЕЙ ЩІЭНЫГЪЭМ И ЛЪЭНЫКЪУЭФІХЭМРЭ И ЛЪЭНЫКЪУЭ ІЕЙХЭМРЭ ЗЭПЭШЭЧ

10. Второзаконие 32:29 ит принципыр дапхуэдэу къызэрыддэІэпыкъур щІэныгъэ зэгъэгъуэтыным дыщегупсысым деж?

¹⁰ Уэ зы ІэщІагъэ гуэрым зыхуебгъэсэну тебухуауэ щытыфынущ. Ар тэмэмщ, ауэ нэгъуэщІ ІэщІагъэ гуэрхэми ухэплъэным акъыл хэлъщ. (Евгъапщэ Притчи 18:17, Гъэс.) Нобэ щІэныгъэ зэбгъэгъуэтыну нэхъ тынш хъуащ, псалъэм папщІэ, интернеткІэ уеджэ мэхъу. Ауэ иджыри егупсыс: школыр къэбуха иужь, нэгъуэщІ щІэныгъэ зомыгъэгъуэту, уи щхьэ зэрыппІыжын лэжьапІэ къомыгъуэтыфыну пІэрэ? Финляндие щыщ Йоха́ннэ зи цІэ ди шыпхъур къыддогуашэ: «Школыр къэзуха иужь сэ махуэ псокІэ сыщылэжьэн хуэмей лэжьапІэ къэзгъуэтри, пионеру сылэжьэн щІэздзащ. Сэ лэжьапІэ куэд зэсхъуэкІащ икІи къэслъэгъуащ Иеговэ и лэжьакІуэхэм сыт щыгъуи зэрыдэІэпыкъур». Дэ сыт хуэдэ щІэныгъэ зэдмыгъэгъуэтами, абы лъэныкъуэфІи лъэныкъуэ Іеи зэриІэфынур зыщыдмыгъэгъупщэным мыхьэнэшхуэ иІэщ. Абы къыхэкІкІэ дызэупщІыж хъунущ: сыт хуэдэра нэхъыбэр лъэныкъуэфІхэра хьэмэрэ лъэныкъуэ Іейхэра? (къеджэ Второзаконие 32:29; 1 Кор. 10:23). Мы упщІэм жэуап еттыну къыддэІэпыкъуну Іуэхугъуэ зыбжанэм адэкІэ дыхэплъэнщ.

11. Еджэным тебгъэкІуэдэну зэманым мыхьэнэ щІептын хуейр сыт? (Сурэтхэми феплъ.)

¹¹ График. Егупсыс, уи еджапІэм икІи абы къыуат унэ лэжьыгъэхэр пщІыжыным тхьэмахуэм и кІуэцІым дапхуэдиз зэман текІуэдэнуми. Алыхьым и Іуэхум пыщІа лэжьыгъэм икІи уи унагъуэм щыбгъэзэщІэн хуей къалэнхэм щхьэкІэ зэман къыпхудэхуэну пІэрэ? (Флп. 1:10). Библиер куууэ бджыну икІи зэІущІэхэм зыхуэбгъэхьэзырыну уэ зэман къыпхуэнэжыну? Индием щыщ ди къуэш Дже́роз апхуэдэу къыщыщІащ. Абы игу къегъэкІыж: «Сэ Алыхьым и Іуэхум си акъылыр тезухуэну къызэгугъуэкІт икІи зэІущІэр иныкъуэхэм деж блэзгъэкІт. СызэплъэкІыжмэ, сэ къызгуроІуэ мыхьэнэ зимыІэм къарурэ зэман куэдрэ зэрытезгъэкІуэдар». Ауэ нэгъуэщІ лъэныкъуэкІи, щІэныгъэ зэбгъэгъуэтын щхьэкІэ, зэман куэд зытемыкІуадэ программэхэри щыІэщ. Языныкъуэ еджапІэхэм махуэ псокІэ ущыІэкъым икІи задание куэди къыуаткъым. Псалъэм папщІэ, Мозамбик щыщ Рабе́кэ зригъэгъуэта щІэныгъэмкІэ арэзыщ. Абы жеІэ: «Еджэным сыхьэтитІ къудей тезгъэкІуадэу арати, адэкІи пионер лэжьыгъэр схуэгъэзащІэт».

12. НыбжьыщІэхэм я зэманыр псом нэхърэ нэхъыфІу дапхуэдэу къызэрагъэсэбэпыфынур? (Экклезиаст 12:1).

¹² ТекІуэдэну зэманыр. ЩІэныгъэ зэбгъэгъуэтын щхьэкІэ мазэ дапщэ е илъэс дапщэ тебгъэкІуэдэн хуейми егупсыс. Апхуэдэу уэ уи зэманыр псом нэхърэ нэхъыфІу къэбгъэсэбэпу жыпІэ хъуну? (Еф. 5:15—17). Уэ уеджэну мурад пщІамэ, уиІэм щыщу псом нэхърэ нэхъыфІыр Иеговэ ептыфыну, псалъэм папщІэ, уи щІалэгъуэм полновременнэу улэжьэфыну? (Къеджэ Экклезиаст 12:1.) Уэ ІэщІагъэ зэбгъэгъуэтыну узыхуейм зэман нэхъ мащІэ тебгъэкІуэдэн щхьэкІэ, программэ гуэрхэр къыхомыхыфыну пІэрэ? Псалъэм папщІэ, университетым нэхърэ училищем е техникумым нэхъ пуду ущеджэфынущ, ІэщІагъэ тэмэми нэхъ псынщІэу щызэбгъэгъуэтыфынущ. Чили къэралым щыщ ди къуэш Ма́рио жеІэ: «Сэ илъэситІкІэ ІэщІагъэ тэмэм щызэзгъэгъуэтыфыну еджапІэ къыхэсхащ икІи ар университетым ущеджэным нэхърэ куэдкІэ нэхъ пудт. А еджапІэм махуиплІ фІэкІа дызэремыджэм и фІыгъэкІэ, сэ пионер лэжьыгъэр схуэгъэзащІэт».

13. Алыхьым и лэжьакІуэ ныбжьыщІэм щІэныгъэ зригъэгъуэтын щхьэкІэ, и унагъуэм пэжыжьэу псэумэ, сыт къыщыщІынкІэ хъунур?

¹³ ЩІыпІэр. Уэ уи унэм пэмыжыжьэу ущеджэну къыщІэкІынщ. Ауэ уеджэн щхьэкІэ нэгъуэщІ къалэ уІэпхъуэн е студентхэр здыщІэс общежитие ущІэсын хуей хъумэ-щэ? Зыщомыгъэгъупщэ, уи унагъуэм пэжыжьэу упсэуныр, Алыхьымрэ уэрэ фи зэхущытыкІэм зэранышхуэ хуэхъуфынущ, псом хуэмыдэу зи гъусэу упсэуну цІыхухэр Иеговэ хуэмылажьэу щытмэ (Прит. 22:3; 1 Кор. 15:33). Мозамбик щыщ ди къуэш Мати́аш ахъшэ куэд зытемыкІуадэ курс илъэсым и кІуэцІкІэ къиухащ. Ауэ абы къыхихамкІэ хущІегъуэжащ. Сыт щхьэкІэ? Ар къыддогуашэ: «Сэ интернатым сыщыпсэуащ икІи сыдэзыхьэх мыхъумыщІагъэ гуэрхэм махуэ къэс себэнт. Сэ зыми чэнджэщ естынтэкъым, щІэныгъэ зригъэгъуэтын щхьэкІэ, и унагъуэм пэжыжьэу псэуну». Урысейм щыщ ди шыпхъури къыддогуашэ: «Сэ сыщеджэ зэманым общежитием сыщымыпсэууэ, си адэ-анэм я гъусэу сыпсэуащ. Абы и фІыгъэкІэ сэ шынагъуэ куэдым икІи гъэунэхуапІэхэм зыщысхъумэфащ». Уеблэмэ, уэ дистанционну уеджэну мурад пщІынкІэ хъунущ.

14. Лука 14:28 ит принципыр щІэныгъэ зэгъэгъуэтыным теухуауэ Іущагъ зыхэлъ унафэ къэтщтэну дапхуэдэу къызэрыддэІэпыкъур?

¹⁴ Уасэр. Языныкъуэ курсхэр апхуэдэуи лъапІэкъым икІи абыхэм я уасэр къэралым щрит къохъу. Апхуэдэхэм деж ар ІэмалыфІ мэхъу лэжьапІэ къэбгъуэтыну къыбдэІэпыкъун щІэныгъэ зэбгъэгъуэтыну. Ауэ и нэхъыбэм деж щІэныгъэ зэбгъэгъуэтын щхьэкІэ ахъшэфІ щІэптын хуейщ. Абы нэмыщІ еджапІэм ухуэзыгъэхьэзыр курсхэри репетиторхэри ахъшэ и уасэщ. Иныкъуэхэм деж цІыхум еджапІэр къиуха иужь, къытехуа щІыхуэр илъэс куэдкІэ ипшыныжын хуей мэхъу. Мозамбик щыщ ди къуэш Ади́лсон къыхиха еджапІэм хущІегъуэжащ. Абы жеІэ: «ИлъэсиплІкІэ сызэреджам и уасэр иратын щхьэкІэ, си унагъуэм щыщхэм ерыскъыми нэгъуэщІ куэдми зыхуагъэныкъуэн хуей хъуащ». УздыщІэтІысхьэну еджапІэр къыщыхэпхкІэ, мыпхуэдэу зэупщІыж: «ЕджапІэм сызэрыщІэсынум сыт и уасэнур? Абы и уасэр е сэ е си унагъуэм тхуетыну? Нэхъ пуду нэгъуэщІ зыгуэр къэзмыгъуэтыфыну пІэрэ? Кредит къэтщтэн хуей хъумэ, дапхуэдизрэ ар зэрытпшыныжын хуеинур? ЛэжьапІэ сыува иужь къэзлэжьыну ахъшэр ирикъуну, си щхьэр спІыжыфын икІи щІыхуэр сыпшыныжын щхьэкІэ?» (къеджэ Лука 14:28; Прит. 22:7, Гъэс.).

15. ЕджапІэ къыщыхэпхкІэ, иужькІэ лэжьапІэ къызэрыбгъуэтынми ущІегупсысын хуейр сыт?

¹⁵ ЛэжьапІэ къэгъуэтын. Ущыпсэу е уздэІэпхъуэну узыхуей щІыпІэм сыт хуэдэ ІэщІагъэхэм нэхъ хуэныкъуэми къащІэ. Уэ зэбгъэгъуэтыну узыхуей щІэныгъэр лэжьапІэ къэбгъуэтыну къыбдэІэпыкъуну? Языныкъуэ программэхэр нэхъыбэу зытеухуар философие джынымрэ гъащІэм къыщыпхуэмысэбэпыну щІэныгъэхэмрэщ (Кол. 2:8). Индием щыщ ди зы шыпхъур къыддогуашэ: «Сэ зэзгъэгъуэта щІэныгъэм ІэщІагъэ гуэрым сыхуригъэсакъым икІи абы къыхэкІкІэ сызыхуеджам теухуауэ лэжьапІэ къысхуэгъуэтакъым». Иджыри зыщыбгъэгъупщэн хуейкъым языныкъуэ ІэщІагъэхэм епха лэжьапІэ къэбгъуэтыну гугъуу зэрыщытыр. Псалъэм папщІэ, «Центральноафриканская Республика» жыхуаІэм щыщ Сюбли́м кондиционерхэр ищІыжу хуеджащ. Ар къыддогуашэ: «Сэ сыздэпсэу щІыпІэм цІыхухэм я нэхъыбэм я унэм щІэт Іэмэпсымэхэр езыхэм ящІыж. Абы къыхэкІкІэ лэжьапІэ къэбгъуэтыну егъэлеяуэ гугъущ».

16. ЕджапІэр къэбуха иужь сыт хуэдэ лэжьыгъэ бгъэзэщІэнуми ущІегупсысын хуейр сыт?

¹⁶ ЕджапІэр къэбуха иужь сыт хуэдэ лэжьыгъэ бгъэзэщІэнуми егупсыс. А лэжьыгъэр уигу ирихьыну? (Эккл. 3:12, 13). ЛэжьапІэм сыт хуэдэ цІыхухэм уахэтын хуей хъуну? А лэжьыгъэм шынагъуэ гуэрхэр пыщІауэ щыт? Стрессым ухэту къыбдэлажьэхэм уапеуэн хуей хъуну пІэрэ? И нэхъыбэм деж а лэжьыгъэм сыт хуэдэ лэжьапщІэ пэкІуэр? Уи щхьэр ппІыжыфын щхьэкІэ а ахъшэр пхурикъуну? Уи лэжьыгъэр пфІэмыкІуэдын щхьэкІэ уи ІэщІагъэм сыт щыгъуи хэбгъэхъуэн хуей мыхъуну пІэрэ? ИкІи псом нэхърэ нэхъ мыхьэнэ зиІэращи, а лэжьыгъэм Іэмал къыуитыну пІэрэ Иеговэ и Іуэхур уи гъащІэм япэ ибгъэщыну? (Эккл. 12:13). ДауикІ, лэжьыгъэ куэд щымыІэмэ, а щыІэм ухэдэн хуей хъунущ. Ауэ уэ къыхэпхыным елъытауэ щытынущ къэкІуэну зэманым сыт хуэдэ лэжьапІэ къэбгъуэтыфынуми. Индием щыщ ди шыпхъу Та́битэ илъэс ныкъуэкІэ дэрбзэрым хуеджащ. Абы жеІэ: «Сэ сегупсысащ дэрбзэру сылажьэмэ, пионеруи сызэрылэжьэфынур. Дэрбзэрым цІыхухэр сыт щыгъуи хуэныкъуэщ икІи узэрылэжьэн Іэмэпсымэхэр апхуэдэуи лъапІэкъым. Абы нэмыщІ сыщылэжьэну зэманыр сэ езым схузэтеухуэжыфынущ». Абы зэрыхуеджам и фІыгъэкІэ Табитэ пионеру лэжьэну къыдэІэпыкъу лэжьыгъэ къигъуэтыфащ.

17. 1) ЩІэныгъэ зэгъэгъуэтыным теухуауэ Іущагъ зыхэлъ унафэ къэтщтэн щхьэкІэ къыддэІэпыкъуну информацие дапхуэдэу къызэрыдгъуэтынур? 2) Библием ит сыт хуэдэ принципхэр абыкІэ къыддэІэпыкъуну? («Узыхэплъэн хуей Библием ит принципхэр» жыхуиІэ рамкэм феплъ.)

¹⁷ ЩІэныгъэ зэгъэгъуэтыным теухуауэ дызэгупсысын хуей ІуэхугъуитІ дэ зэпкърытхащ. Ауэ Іущагъ зыхэлъ унафэ къэтщтэну къыддэІэпыкъун информацие дэнэ къыщыдгъуэтыфынур? Зызыхуебгъэсэну узыхуей ІэщІагъэм теухуауэ нэхъыбэ къэпщІэн щхьэкІэ, абы хуезыгъаджэ еджапІэм кІуэ е я сайтым ихьэ. А ІэщІагъэм теухуауэ дапхуэдиз лэжьыгъэ щыІэми къащІэ икІи абы хуеджа е ирилэжьа гуэрхэм ечэнджэщ (Прит. 13:10). Иджыри абыхэм уеупщІ хъунущ а ІэщІагъэм зэрыхурагъаджэ щІыкІэм е а лэжьыгъэм и лъэныкъуэфІхэми и лъэныкъуэ Іейхэми теухуауэ. А псом нэмыщІ Иеговэ зэрыхуэлажьэм гуфІэгъуэ къыхуэзыхь къуэшым е шыпхъум ечэнджэщ (Прит. 15:22). Абыхэм уэ узэмыгупсыса ІэщІагъэ е лэжьыгъэ гуэрым теухуауэ чэнджэщ къыуатынкІэ хъунущ.

18. Сыт дэ зыщыдгъэгъупщэн хуэмейр?

¹⁸ ИпэкІэ дызэрытепсэлъыхьащи, щІэныгъэ зэбгъэгъуэтыным лъэныкъуэфІхэри лъэныкъуэ Іейхэри иІэщ. Аращи, зэбгъэгъуэтыну узыхуей ІэщІагъэхэм ущегупсыскІэ, дэтхэнэ зыми теухуауэ Иеговэ тхьэлъэІукІэ зыхуэгъазэ. Зыщомыгъэгъупщэ: щІэныгъэ зэгъэгъуэтыныр уэ къыбдэІэпыкъунущ уи щхьэ зыхуей хуэбгъэзэжыфын щхьэкІэ лэжьыгъэ къэбгъуэтыну, ауэ уэ нэгъэсауэ насыпыфІэ ущыхъунур Иеговэрэ уэрэ фи зэхуаку зэхущытыкІэфІ дэлъмэщ (Пс. 16:9, 11). Иеговэ и лэжьакІуэхэм сыт щыгъуи и нэІэ ятригъэтщ, абыхэм сыт хуэдэ ІэщІагъэ ямыІэми (Евр. 13:5). НтІэ, щІэныгъэ зэбгъэгъуэтыну тебухуамэ-щэ? ЕджапІэ ущІэсыху Иеговэрэ уэрэ фи зэхуаку дэлъ зэхущытыкІэфІыр пхъумэну сыт къыбдэІэпыкъунур? Абы теухуауэ къыкІэлъыкІуэ статьям дытепсэлъыхьынщ.