Библием ит принципхэр къэвгъэсэбэпурэ, фи напэр вгъасэ

1, 2. 1) Иеговэ Іэдэмрэ Хьэуарэ сыт хуэдэ тыгъэ яритар? 2) А тыгъэр фІыщІэ зэращІыр дапхуэдэут абыхэм къызэрагъэлъэгъуэфынур?

ПСЭУЩХЬЭХЭР инстинктым тету мэпсэу. Машинэхэри зэрызэтраухуа программэм тету мэлажьэ. Ауэ цІыхур нэгъуэщІущ зэрызэхэлъыр. Дэ мыхьэнэшхуэ зиІэ тыгъэ Алыхьым къыдитащ. Ар дызыхуейр къыхэтхыныращ, нэгъуэщІу жыпІэмэ, ди щхьэ и унафэ тщІыжыну икІи дызрикІуэну гъащІэ гъуэгур къыхэтхыну. Библием щыжыІащ Алыхьым езым и хьэл-щэнхэм хуэдэ хэлъу япэ цІыху Іэдэм къызэригъэщІар (ЩІэдз. 1:26, 27). Іэдэмрэ Хьэуарэ я акъылыр къагъэсэбэпу, ящІэным теухуауэ езыхэм унафэ къащтэфынут.

² Иеговэ япэ цІыхуитІым хабзэ куэд къетхыхауэ яритакъым. Абы а тІум яжриІащ щІылъэм кІэлъыплъыну, я щІэблэр ягъэбэгъуэну икІи Іеймрэ фІымрэ теухуауэ Алыхьым унафэ ищІыну хуитыныгъэ зэриІэм пщІэ хуащІыну (ЩІэдз. 1:28; 2:16, 17). Іэдэмрэ Хьэуарэ я гум къыбгъэдэкІыу а унафэ тыншхэм едэІуэн хуей къудейуэ арат. Апхуэдэу абыхэм къагъэлъэгъуэфынут Иеговэ фІыуэ зэралъагъур, ягъэгуфІэну зэрыхуейр икІи къахуищІа псор фІыщІэ зэращІыр (Прит. 23:15).

3. Іэдэмрэ Хьэуарэ я хуитыныгъэр дапхуэдэу къызэрагъэсэбэпар?

³ Библием къызэригъэлъагъуэмкІэ, Іэдэмрэ Хьэуарэ Алыхьым къарита хуитыныгъэр акъыл хэмылъу къагъэсэбэпащ. Абыхэм унафэ ящІащ Алыхьым и жыІэм щІэкІыну. А унафэм лъабжьэ хуэхъуар лъагъуныгъэкъым, атІэ щхьэхуещагъэщ (ЩІэдз. 3:1—7). Абыхэм къащта унафэм къыпэкІуа Іейр дэтхэнэ зыми зыхыдощІэ (Рим 5:12).

4. 1) Махуэ къэс сыт дэ тщІэн хуей хъур? (Галатие 6:5). 2) Мы статьям сыт дэ щызэпкърытхынур?

⁴ Нобэ гъащІэр егъэлеяуэ гугъущ. Дэ махуэ къэс унафэ куэд къэтщтэн хуей мэхъу. (Къеджэ Галатие 6:5.) Языныкъуэ унафэхэр къэпщтэну тыншщ, ауэ языныкъуэхэр куэдкІэ нэхъ гугъущ. НтІэ, Иеговэ зыгъэгуфІэн унафэ дапхуэдэу къызэрытщтэнур? Псом япэрауэ дэ къыдгурыІуэн хуейщ Алыхьыр къыддэІэпыкъуным дызэрыхуэныкъуэр (Прит. 16:3, Гъэсэпэтхыдэхэр; Иер. 10:23). Уеблэмэ, цІыху дагъуэншэу щыта Хьиси къыгурыІуэт уафэм щыІэ и Адэр къыдэІэпыкъуным зэрыхуэныкъуэр (Евр. 5:7). Дэ, гуэныхьлыуэ щыт цІыхухэм, Иеговэ и унафэм куэдкІэ нэхъыбэу дыхуэныкъуэщ. Хуитыныгъэм нэмыщІ, дэ иджыри Иеговэ напэр тыгъэу къыдитащ. АдэкІэ дытепсэлъыхьынщ унафэ тэмэмхэр къэтщтэну напэр дапхуэдэу къыддэІэпыкъуми.

НАПЭР ДАПХУЭДЭУ КЪЫЗЭРЫДДЭІЭПЫКЪУР?

5. Напэр дапхуэдэу къызэрыддэІэпыкъур? (Рим 2:14, 15).

⁵ Алыхьым къытхилъхьа напэр къыддоІэпыкъу фІымрэ Іеймрэ зэхэдгъэкІыфу дыщытыну. Уеблэмэ, ар Алыхьым и хабзэхэм хэзмыщІыкІхэми яІэщ (2 Кор. 4:2). Дэ ди гупсысэхэм икІи ди ІуэхущІафэхэм щхьэкІэ напэм хьэкумыщІэм хуэдэу е дегъэкъуаншэ е дегъэзахуэ. (Къеджэ Рим 2:14, 15.) Абы дыхуигъэушыфынущ мыхъумыщІагъэм зыщытхъумэну е ІуэхуфІ гуэр тщІэну (1 Сам. 26:8—11). Дэ хуитыныгъэ дызэриІэм къикІкъым къатщтэ унафэу хъуам Иеговэ игъэгуфІэну. АбыкІэ напэр къыддэІэпыкъун хуейщ. Напэм и фІыгъэкІэ унафэ тэмэмымрэ унафэ Іеймрэ зэрызэщхьэщыкІыр долъагъу.

6. Ди напэр зэрылэжьэн хуейм хуэдэу иныкъуэхэм деж щІэмылажьэр сыт?

⁶ Ди жагъуэ зэрыхъунщи, ди напэр зэрылэжьэн хуейм хуэдэу иныкъуэхэм деж лажьэкъым. Абы и щхьэусыгъуэр дэ гуэныхь тхэлъщи аращ. Ди напэм иджыри зэран хуэхъуфынущ дызэрагъэса щІыкІэр, дызыщІапІыкІа хабзэр икІи дэ езым диІэ хъуэпсэныгъэ мыхъумыщІэхэр. Библием щыжыІащ напэр махэ, уцІэпІа икІи «гъущІ дамыгъэ тедзэ плъамкІэ хагъэсыкІам хуэдэу», зыри зыхимыщІэжу зэрыхъуфынур (1 Тим. 4:2; 1 Кор. 8:12; Тит 1:15; Евр. 10:22). Апхуэдэ напэм чэнджэщэгъу тэмэмкІэ уеджэфынукъым. Ар иджыри ебгъэщхь хъунущ зэтеухуэжын хуей тэрэзэм. Напэр узыщыгугъ хъун дэІэпыкъуэгъуу щытын щхьэкІэ, абы сыт щыгъуи укІэлъыплъын хуейщ (1 Пет. 3:16). Дауэ ар зэрытщІ хъунур?

НАПЭР ДАПХУЭДЭУ ЗЭРЫДГЪЭСЭНУР?

7, 8. 1) Ди напэр дгъэсэну сыт къыддэІэпыкъунур? 2) Библием ит принципхэр ди гъащІэм дапхуэдэу сэбэп къызэрытхуэхъур? Щапхъэ къэфхь. (Сурэтми феплъ.)

⁷ Ди напэр дапхуэдэу зэрыдгъэсэнур? Абы щхьэкІэ Библием зэпымыууэ деджэу, Иеговэ и еплъыкІэкІэ сытыр Іейми, сытыр фІыми къэтщІэн хуейщ. Алыхьым и хабзэхэр куууэ зэрызэпкърытхыр къыддэІэпыкъунущ абы и гупсысэкІэр къэтщІэну. Ауэ мыбы ипэ ита статьям зэрыхэтащи, дэтхэнэ зы Іуэхугъуэми теухуауэ Иеговэ хабзэ тхуигъэувакъым. Абы къыхэкІкІэ дэ принципхэри къэтлъыхъуэн хуейщ, сыт щхьэкІэ жыпІэмэ Иеговэ и гупсысэхэмрэ и гурыщІэхэмрэ теухуауэ абыхэм нэхъыбэ къыдагъащІэ (Ис. 55:9).

⁸ Гъуэгуи, уздрикІуэн хуейр уэзыгъэлъагъу знак лъэпкъи здэщымыІэ пшахъуэщІым урикІуэным дэ ди гъащІэр ебгъэщхь хъунущ. Дыгъэмрэ вагъуэхэмрэ я фІыгъэкІэ уздэкІуэн хуей лъэныкъуэр къыбгурыІуэфынущ. Ауэ гъуэгур къызэрыпцІыхуфын гуэрхэр зытет картэр пІыгъмэ нэхъыфІыжщ. Абы и фІыгъэкІэ уэ къэплъэгъунущ пэжу узэрыкІуэр. Ауэ зыгуэркІэ угъуащэу щытмэ, ар игъуэу къэплъэгъуну картэр къыбдэІэпыкъунущ. Дэ ди мурадыр Иеговэ дгъэгуфІэну аращ. Библиер дызрикІуэн хуей гъуэгур дэзыгъэлъагъу картэм ебгъэщхь хъунущ. Принципхэр картэм тет гъуэгур къозыгъэцІыхуфыну знакхэм ебгъэщхь хъунущ. А принципхэм дытету щытмэ, дэ ди мурадыр къыдэхъулІэнущ.

9. Ди напэр дгъэсэну сыт иджыри къыддэІэпыкъунур? (Рим 9:1).

⁹ Дэ ди напэр тэмэму тхуэгъэсэн щхьэкІэ, Алыхьым и къару лъапІэм дыхуэныкъуэщ. (Къеджэ Рим 9:1.) Ар къыддэІэпыкъунущ Іуэхугъуэ зэмылІэужьыгъуэхэм теухуауэ Иеговэ и еплъыкІэр къыдгурыІуэну. Абы иджыри дыхуигъэушыфынущ Алыхьым и Іэмырым техуэу унафэхэр къэтщтэну икІи абы щхьэкІэ дызыхуэныкъуэ къару къыдитынущ (Флп. 2:13). Ауэ Иеговэ и къару лъапІэр къыдитын щхьэкІэ, сыт тщІэн хуейр?

10. Иеговэ и къару лъапІэр къыдитын щхьэкІэ, сыт тщІэн хуейр? (Лк. 11:10, 13).

¹⁰ Иеговэ и къару лъапІэр къывитыну фелъэІу. (Къеджэ Лк. 11:10, 13.) Дэ шэч къытедмыхьэми хъунущ Иеговэ и къару лъапІэр щымысхьу къызэрыдитынум (Ин. 3:34). Алыхьым хуэжыІэдаІуэхэм и къару лъапІэр куэду ярет (Прит. 1:23; Екъуб 1:5). НтІэ, сыт дэ иджыри ди напэр дгъэсэну къыддэІэпыкъунур?

11. 1) Сыт дэ ди гъащІэм псом нэхърэ нэхъ мыхьэнэ зиІэу щытын хуейр? 2) Ди напэр гъэсауэ щытыным икІи ар тэмэму лэжьэным мыхьэнэшхуэ щІиІэр сыт?

¹¹ Иеговэ арэзы зэрыфщІыным сыт щыгъуи фыхущІэкъу (Прит. 8:34, 35, Гъэс.). Абы ди гъащІэм псом нэхърэ нэхъ мыхьэнэ иІэу щытын хуейщ. Иеговэ арэзы зэрытщІыным сыт щыгъуи дегупсысу щытмэ, ди напэр тыншу тхуэгъэсэнущ. Дэ Иеговэ зэрыгупсысэм хуэдэу дыгупсысэмэ икІи абы и гурыщІэхэм мыхьэнэ еттмэ, ди напэр тэмэму лажьэу жыпІэ хъунущ. Нобэ гъащІэр хуабжьу гугъущ, абы къыхэкІкІэ апхуэдэ напэ диІэным мыхьэнэшхуэ иІэщ. Дэ щІэх-щІэхыурэ Библием пыухыкІауэ зи гугъу имыщІ Іуэхугъуэхэм дрохьэлІэ. Ахэр епхауэ щытыфынущ нэгу зегъэужьыным, лэжьыгъэм, щІэныгъэ зэгъэгъуэтыным е ныбжьэгъу къыхэхыным. Апхуэдэ Іуэхугъуэхэм деж дэ къатщтэ унафэм Иеговэ игъэгуфІэрэ имыгъэгуфІэрэ дапхуэдэу зэрызэхэдгъэкІынур? (2 Кор. 1:12).

12. Унафэ тэмэм къэтщтэну ди напэм дыхуигъэушрэ дыхуимыгъэушрэ къыдгурыІуэну сыт къыддэІэпыкъунур? (Ефес 5:10, ДЩІ).

¹² Алыхьым и Псалъэм фыщеджэкІэ, абы куууэ фегупсыс (Пс. 49:3). Дэ Библием дыщеджэкІэ, Иеговэ и гупсысэкІэр къыдгурыІуэну къыддэІэпыкъу принципхэм дылъыхъуэн хуейщ. (Къеджэ Ефес 5:10, ДЩІ.) Абы щыгъуэ Іуэхугъуэ гугъу дихуа иужь, унафэ тэмэм къэтщтэну ди напэм дыхуигъэушрэ дыхуимыгъэушрэ дэ къэтлъэгъунущ (Прит. 2:4—9, 11—13). Библием ит принципхэр къыддэІэпыкъунущ ди напэр дгъэсэну икІи гъуэгу пэжым дытемыкІын щхьэкІэ, ди гъащІэм зэхъуэкІыныгъэхэр хэтлъхьэну (Евр. 5:14).

13. Унафэ гуэр къэтщтэн ипэ, сыт дэ тщІэн хуейр? Щапхъэ къэфхь.

¹³ Иеговэ и еплъыкІэр къэвмыщІауэ унафэ къэвмыщтэ. Ди эрэм ипэ 607 гъэм, Ерусалим зэтракъута иужь, Иудэ щІыналъэм къыщына израил цІыхухэм ещхьу дэ дыщытыну дыхуейкъым. Абыхэм Иеремие бегъымбарым мыпхуэдэу жраІат: «Сыт хуэдэ гъуэгу дрикІуэнуми икІи сыт тщІэнуми уи Алыхь Иеговэ къыджыреІэ» (Иер. 42:3—6). Ауэ, пэжыр жыпІэмэ, ящІэну зыхуейм теухуауэ абыхэм унафэ ящІакІэт. Иеговэ къарита жэуапыр абыхэм ягу ирихьакъым икІи зэрыхуеям хуэдэу ящІащ (Иер. 42:19—22; 43:1, 2, 4). Мы щапхъэм къегъэлъагъуэ унафэ гуэр къэтщтэн ипэ, Иеговэ и еплъыкІэр къыдгурызыгъаІуэ Библием ит принципхэр къэдгъуэту, абы дытетын зэрыхуейр.

14. Дэ къатщтэ унафэхэр Библием ит принципхэм тегъэщІауэ щытын щІыхуейр сыт?

¹⁴ Библием ит принципхэм фытету унафэ къафщтэ (Мт. 7:24—29, ДЩІ; Екъуб 1:23—25). Унафэ гуэрхэр къыщытщтэм деж, Библием ит принципхэр къэдгъэсэбэпмэ, дэ Алыхьым и къару лъапІэм диунэтІыну хуит тщІыуэ жыпІэ хъунущ. Абы щыгъуэ Иеговэ адэкІи и къару лъапІэр къыдитынущ (Апост. 5:32). Ауэ Алыхьым и къару лъапІэр зыдэдмыгъэІэпыкъуу щытмэ, абы дыпэщІэувэу жыпІэ хъунущ (Ис. 63:10; Апост. 7:51; Еф. 4:30). Уеблэмэ, Иеговэ и къару лъапІэр къыдимытыжу хъуфынущ (Пс. 51:11; 1 Фес. 5:19). Апхуэдэу къыпщыщІыну сыту шынагъуэ, сыт щхьэкІэ жыпІэмэ дэ Иеговэ и къару лъапІэм хуабжьу дыхуэныкъуэщ (Еф. 3:16, ДЩІ).

ДИ ІУЭХУМ ХУЭКІУЭ БИБЛИЕМ ИТ ПРИНЦИПХЭР ДАПХУЭДЭУ КЪЫЗЭРЫДГЪУЭТЫНУР?

15, 16. 1) Ди Іуэхум хуэкІуэ Библием ит принципхэр дапхуэдэу къызэрыдгъуэтынур? 2) Библие ебгъаджэ цІыхум тутын ефэныр хыфІидзэну сыт хуэдэ принципхэр къыдэІэпыкъуну?

¹⁵ Библиер зэрыддж Іэмэпсымэхэр къэвгъэсэбэп. Ахэр къыбдэІэпыкъунущ уи Іуэхум хуэкІуэ Библием ит принципхэр къэбгъуэтыну. Ди нэгу къыщІэдгъэхьэнщ Библие ебгъаджэ цІыхум тутын ефэныр хухыфІэмыдзэу. Ар мыпхуэдэу егупсысыфынущ: «Тутын ефэным теухуауэ Библием зыри иткъым. Сыт-тІэ абы Іейуэ хэлъыр?» Абы и Іуэхум хуэкІуэ принципхэр къигъуэту, абыхэм егупсысыну дапхуэдэу узэрыдэІэпыкъу хъунур? «Путеводитель по публикациям Свидетелей Иеговы» жыхуаІэр къэбгъэсэбэп хъунущ. Библие ебгъаджэм «Табак и курение» жыхуиІэ псалъащхьэм гу лъегъатэ. Абы къыщилъэгъунущ 2014 гъэм, июным и 1 къыдэкІа «ХъумакІуэ чэщанэм» ит «Как Бог относится к курению?» жыхуиІэ статьям и ссылкэр. А статьям къыщеджэкІэ, абы сыт хуэдэ едзыгъуэхэмрэ принципхэмрэ къигъуэтыну?

¹⁶ Мис абыхэм ящыщ принципитху. 1) Дэ лІэныгъэм дыхуэзышэ Іуэхугъуэ гуэрым и пщылІу дыщытын хуейкъым (Рим 6:16). 2) Ди Іэпкълъэпкъым зэран хуэхъун псоми дэ пэІэщІэ зыхуэтщІын хуейщ (2 Кор. 7:1). 3) Иеговэ хуейщ дэ абы фІэкІа зыми дыхуэмылэжьэну икІи гурэ псэкІэ абы хуэпэжу дыщытыну (Мт. 22:37). 4) Дэ ди зэран нэгъуэщІхэм едгъэкІын хуейкъым (Мт. 22:39; 1 Кор. 10:24). 5) Иеговэ зэрыхуейм хуэдэу дыпсэун щхьэкІэ, абы къару къыдитыфынущ (Флп. 4:13, ДЩІ). Тутын ефэным теухуауэ Библием зыри щыжымыІами, абы ит принципхэр цІыхум къыдэІэпыкъунущ Иеговэ а Іуэхум дапхуэдэу еплъми къыгурыІуэну.

17. ХьэгъуэлІыгъуэр екІуу екІуэкІын щхьэкІэ, щауэмрэ нысащІэмрэ Библием ит сыт хуэдэ принципхэр къадэІэпыкъуну?

¹⁷ Иеговэ хуэлажьэ щауэмрэ нысащІэмрэ хьэгъуэлІыгъуэ ящІыну мурад яІэмэ-щэ? Ар екІуу екІуэкІын щхьэкІэ, абыхэм Библием ит сыт хуэдэ принципхэр къадэІэпыкъуну? Абы щыгъуи «Путеводитель» жыхуаІэр къэбгъэсэбэп хъунущ. «Регистрация брака и свадьба» жыхуиІэ псалъащхьэм принципхэр зэрыт статья гуп къыщыхьащ. Зэрышэнухэр абы ит мыпхуэдэ принципхэм егупсыс хъунущ. 1) ХьэгъуэлІыгъуэм къыщыхъу псоми Иеговэ игъэлъэпІэн хуейщ (1 Кор. 10:31, 32). 2) Щауэмрэ нысащІэмрэ я щыгъыныр а Іуэхугъуэм хуэкІуэу, екІуу икІи гулъытэ лей къыхуамыщІын хуэдэу щытын хуейщ (1 Тим. 2:9; 1 Пет. 3:3, 4). 3) Мы дунейм зэращІ хабзэм хуэдэу, нэгъуэщІхэм ягъэщІэгъуэн щхьэкІэ, абыхэм я мылъкур ягъэлъэгъуэн хуейкъым (Ин. 17:14; Екъуб 1:27; 1 Ин. 2:15, 16). 4) Псори фІыуэ зэтеухуауэ щытын хуейщ (1 Кор. 14:40). 5) ХьэгъуэлІыгъуэр щхьэрутІыпщу екІуэкІын икІи хьэщІэхэм фадэкІэ ирагъэлеин хуейкъым (Гал. 5:21). 6) Щауэмрэ нысащІэмрэ зыгуэрым елъэІун хуейщ псори тэмэму зэрекІуэкІынум кІэлъыплъыну (Ин. 2:8, 9).

18, 19. 1) Сэбэп къытхуэхъу сыт хуэдэ Іэмэпсымэ дэ иджыри диІэ? 2) Махуэшхуэ гуэрым дыхэтынрэ дыхэмытынрэ къыдгурыІуэн щхьэкІэ, а Іэмэпсымэр дапхуэдэу къызэрыддэІэпыкъур? («Библием ит принципхэр къэбгъуэтыфрэ?» жыхуиІэ рамкэм феплъ.)

¹⁸ Иджыри зы Іэмэпсымэр — ар «Библейские стихи в помощь христианину» жыхуаІэ тхылъыращ. Абы Іуэхугъуэ зэмылІэужьыгъуэхэм хуэкІуэ едзыгъуэхэр къыщыхьащ. Темэр къыхэпха иужь уэ къэплъэгъунущ принципхэр къэбгъуэтыну къыбдэІэпыкъун упщІэхэмрэ едзыгъуэхэмрэ. Псалъэм папщІэ, къуэшым зы махуэшхуэ гуэрым кІуэ хъунрэ мыхъунрэ ищІэкъым. «Праздники» жыхуиІэ темэр къызэІуихмэ, абы къилъэгъунущ «Праздники, в которых христиане не принимают участия» жыхуиІэ псалъащхьэр.

¹⁹ «Почему неправильно участвовать в праздниках, которые связаны с ложной религией? (1 Кор. 10:21; 2 Кор. 6:14—18; Еф. 5:10, 11)» жыхуиІэ упщІэм иужь къыщыхьа материалым деплъ хъунущ. ИужькІэ а тхылъым Иеговэ и лэжьакІуэхэм ягъэлъапІэ мыхъуну махуэшхуэхэм я щапхъэхэр къыщыхьащ. «Патриотические праздники» жыхуиІэ псалъащхьэм и щІагъым къуэш, шыпхъухэр зэгупсыс хъуну принципхэр итщ. А принципхэр къыддоІэпыкъу политикэм, зауэхэм, цІыху гуэрхэр гъэлъэпІэным пыщІа махуэшхуэхэм дыхэт хъунрэ мыхъунрэ къыдгурыІуэну. Дэ Иеговэ и организацэм фІыщІэшхуэ худощІ, ди напэр дгъэсэну къыддэІэпыкъу Іэмэпсымэхэр къызэрыдитам щхьэкІэ!

УИ НАПЭР ТЭМЭМУ ГЪЭСАРЭ МЫГЪЭСАРЭ ЗЭХЭГЪЭКІ

20. Ди напэр тэмэму зэрыдгъэсар къыдгурыІуэну сыт къыддэІэпыкъунур?

²⁰ Дэ езым унафэ тщІыну Иеговэ къыдита хуитыныгъэр ди дежкІэ лъапІэщ. Ауэ дэ къыдгуроІуэ а хуитыныгъэр тэмэму къэдгъэсэбэпын щхьэкІэ, ди напэр дгъэсэн зэрыхуейр. ФІыуэ гъэса напэр къыддэІэпыкъунущ Иеговэ зыгъэлъэпІэн икІи ар зыгъэгуфІэн унафэхэр къэтщтэну. Апхуэдэу дыщытын щхьэкІэ Алыхьым и къару лъапІэр къыддэІэпыкъуным дыхуэныкъуэщ. Абы къыхэкІкІэ дэ адэкІи Алыхьым делъэІун хуейщ и къару лъапІэр къыдитыну икІи ди тхьэлъэІум дытетыжын хуейщ. Ди напэр дгъэсэну дэ иджыри Библием ит принципхэр къыддоІэпыкъу. Аращи, Иеговэ къыдита а тыгъэхэр адэкІи къэдвгъэгъэсэбэп. Абы щыгъуэ дэ къэтлъэгъунущ Алыхьым и Псалъэм къаруушхуэ зэрыщІэлъыр! (2 Тим. 3:16, 17; Евр. 4:12).