ГурыщІэ хьэлъэхэм ехъулІэныгъэ уиІэу упэщІэтыфынущ

1, 2. Паул зэман-зэманкІэрэ сыт хуэдэ гурыщІэхэр иІэт икІи дэ тщыщ куэдым а гурыщІэхэр къащІыгурыІуэр сыт? (Рим 7:21—24).

АПОСТОЛ Паул ущегупсысым деж сыт уи акъылым къихьэр? Уэ уегупсысу къыщІэкІынщ абы лІыгъэ хэлъу хъыбарыфІыр зэригъэІуам, Іэзэу цІыхухэр пэжым зэрыхуригъэджам икІи Библием щыщ тхылъ зыбжанэ зэритхам. Ар дауикІ пэжщ. Ауэ Паули иныкъуэхэм деж зыгъэгузавэ гупсысэхэмрэ гурыщІэ хьэлъэхэмрэ ебэнын хуей хъут.

² Къеджэ Рим 7:21—24. Рим къалэм дэс къуэш, шыпхъухэм Паул письмо щахуитхам зи гугъу ищІа гурыщІэхэм хуэдэ дэ тщыщ куэдым зыхащІащ. Ар Алыхьым пэжу хуэлэжьами, и Іэпкълъэпкъым хэлъ гуэныхьым ебэнын хуей хъут. Абы иджыри иныкъуэхэм деж япэм ищІа щыуагъэхэм щхьэкІэ зигъэкъуэншэжт. Абы нэмыщІ Паул и гъащІэм кІэ зимыІэ гугъуехь гуэр хэтт икІи а гугъуехьым зэман-зэманкІэрэ и лъэр щІихт.

3. Мы статьям сыт щызэпкърытхынур? («Псалъэхэм къикІыр» жыхуиІэми феплъ.)

³ Паул зэзэмызэ гурыщІэ хьэлъэхэрa иІами, ахэр и гупсысэкІэм зэран хуигъэхъутэкъым. Мы статьям дэ мыпхуэдэ упщІэхэр щызэпкърытхынущ: Паул сытыт зэман-зэманкІэрэ цІыху тхьэмыщкІэу зыкъыщІилъытэжыр? ГурыщІэ хьэлъэхэр къыщытегуплІэм деж сытыт абы ищІэр? Сыт дэ къыддэІэпыкъунур ехъулІэныгъэ диІэу гурыщІэ хьэлъэхэм дыпэщІэтыну?

ПАУЛ ГУРЫЩІЭ ХЬЭЛЪЭХЭР ЩІИІЭР СЫТЫТ?

4. Паул гурыщІэ хьэлъэхэр сытыт щІиІэр?

⁴ Япэм ищІа щыуагъэхэр. Хьисэ и лъэужь иувэн ипэ, ЩаулкІэ зэджэу щыта Паул иужькІэ зыхущІегъуэжа Іуэху Іей куэд илэжьащ. Псалъэм папщІэ, Алыхьым хуэпэж Стефан мывэкІэ щаукІым, Щаул ар ифІэтэмэму, еплъу щытащ (Апост. 7:58; 8:1). Абы нэмыщІ Хьисэ и лъэужь ирикІуэхэр гущІэгъуншэу къезыхуэкІыу щытахэм ар я пашэт (Апост. 8:3; 26:9—11).

5. Паул япэм ищІа щыуагъэхэр дапхуэдэут зэран къызэрыхуэхъур?

⁵ Паул япэм Хьисэ и лъэужь ирикІуэхэр гущІэгъуншэу къызэрырихуэкІар зэман-зэманкІэрэ и гум хьэлъэу телът. ИкІи зэманыр кІуэху а гурыщІэр нэхъ хьэлъэ хъууэ къыщІэкІынт. Хуэгъэфэщауэ ди эрэм 55 гъэм, Коринф дэс къуэш, шыпхъухэм абы мыпхуэдэу яхуитхат: «Апостолхэм ящыщу нэхъ цІыкІур сэращ, апостол къызжаІэнуи схуэфащэкъым: Тхьэм и члисэ зэхуэсым щыщхэр исхуэкІыу щытащ» (1 Кор. 15:9). Илъэситху дэкІауэ Ефес дэс къуэш, шыпхъухэм письмо щахуитхам, абы езым щхьэкІэ «Тхьэм и цІыху лъапІэхэм нэхърэ сынэхъ цІыкІущ» жиІэри итхауэ щытащ (Еф. 3:8). Абы нэмыщІ Тимофей письмо щыхуитхым Паул къыхигъэщащ Алыхьым пэщІэувэу, абы и цІыхухэр кърихуэкІыу икІи напэншэу зэрыщытар (1 Тим. 1:13). Уи нэгу къыщІэгъэхьэт Паул сыт хуэдэ гурыщІэхэр иІами, зэхуэсхэм щыкІуэм деж абы кърихуэкІыу щытахэм е абыхэм я Іыхьлыхэм щахуэзэм щыгъуэ.

6. Паул иджыри сыт хуэдэ гугъуехь иІэт? (Сноскэми феплъ.)

⁶ КІэ зимыІэ гугъуехь гуэр. Паул а гугъуехьыр пкъым къыхэуэ банэм иригъэщхьащ (2 Кор. 12:7). А гугъуехьыр зищІыс дыдэр абы жиІакъым. Ауэ Паул къигъэсэбэпа псалъэхэм къыдгурагъаІуэ ар узыфэ гуэру е нэгъуэщІ гугъуехь гуэру зэрыщытар икІи абы гурыщІэ хьэлъэхэр къриттb.

7. Паул сыт щыгъуи Алыхьыр игъэгуфІэну щІыхузэфІэмыкІыр сытыт? (Рим 7:18, 19).

⁷ Абы иІэ ныкъусанхэр. Паул и Іэпкълъэпкъым хэлъ гуэныхьым ебэнт. (Къеджэ Рим 7:18, 19.) Абы и ІуэхущІафэхэмкІэ Алыхьыр игъэгуфІэну хуейт, ауэ ар щыхузэфІэмыкІи къэхъут. Паул арэзы техъуэт и Іэпкълъэпкъым хэлъ гуэныхьымрэ Алыхьыр игъэгуфІэну иІэ гукъыдэжымрэ сыт щыгъуи зэрызэпэщІэтыр. Абы и хьэл-щэныжьхэр зыхинэн щхьэкІэ къаруушхуэ ирихьэлІэт (1 Кор. 9:27). ДауикІ, Паул игъэнэщхъейуэ къыщІэкІынт а хьэл-щэн Іейхэм къыщытрагъэзэжым деж.

ПАУЛ И ГУРЫЩІЭ ХЬЭЛЪЭХЭМ ДАПХУЭДЭУ ЗЭРЕБЭНАР?

8. Паул итха письмохэм тепщІыхьмэ, зихъуэжыну сытыт абы къыдэІэпыкъур?

⁸ Паул куууэ егупсысу щытащ цІыхум и гуэныхьыщІэ щэныжьым ебэнын икІи пэлъэщын щхьэкІэ, Алыхьым и къару лъапІэр дапхуэдэу къыдэІэпыкъуми. Ар абы итхыжа письмохэм къыхощ (Рим 8:13; Гал. 5:16, 17). Абы щІэх-щІэхыурэ итхыу щытащ Иеговэ ягъэгуфІэн щхьэкІэ къуэш, шыпхъухэм сыт хуэдэ щытыкІэмрэ сыт хуэдэ хъуэпсэныгъэхэмрэ пэІэщІэ зыхуащІын хуейми (Гал. 5:19—21, 26). Абы къокІ Паул езыми сыт хуэдэ лъэныкъуэкІэ зихъуэжын хуейми егупсысу зэрыщытар. Ар зэрищІыну щІыкІэр къыгурыІуэн щхьэкІэ абы Тхыгъэ ЛъапІэр куууэ зэпкърихыу щытауэ къыщІэкІынущ. Шэч хэмылъу, Паул нэгъуэщІхэм ярит чэнджэщхэм езыри тетт.

9, 10. Паул и гурыщІэ хьэлъэхэм ебэныну сытыт къыдэІэпыкъуар? (Ефес 1:7). (Сурэтми феплъ.)

⁹ Паул зэман-зэманкІэрэ нэщхъейуэ щытами, абы гуфІэгъуэр зыфІимыгъэкІуэдыну къыдэІэпыкъу Іуэхугъуэ куэд и гъащІэм хэтащ. Псалъэм папщІэ, зэхуэсхэм теухуауэ хъыбарыфІхэр щызэхихым деж ар гуфІэт (2 Кор. 7:6, 7). Иджыри къуэш, шыпхъухэмрэ абырэ я зэхуаку дэлъ ныбжьэгъугъэм абы гуфІэгъуэ къыхуихьт (2 Тим. 1:4). Абы нэмыщІ Паул ищІэт Иеговэ къызэрыхуэарэзыр икІи напэ къабзэ иІэу абы хуэлэжьэну Іэмал зэриІэр (2 Тим. 1:3). Унэм къыщІэкІыну хуитыныгъэ имыІэу Рим къалэм щыщыІам щыгъуи абы къуэш, шыпхъухэр мыпхуэдэу хуигъэушт: «Фэ, Зиусхьэныр зи псэм щыщхэр, сыт щыгъуи фыгуфІэ» (Флп. 4:4). Уи нэгу къыщІэбгъэхьэну гугъущ апхуэдэ псалъэхэр зытха цІыхур езым и гугъуехьхэмрэ и ныкъусанхэмрэ фІэкІа емыгупсысу щытауэ. КъызэрыщІэкІымкІэ, гурыщІэ хьэлъэхэр къыщытегуплІэм деж Паул занщІэу и акъылыр гупсысэфІхэм зэрытриухуэным хущІэкъут икІи абы и фІыгъэкІэ гуфІэгъуэр зыфІигъэкІуэдтэкъым.

¹⁰ Паул и гурыщІэ хьэлъэхэм ебэныну сытыт иджыри къыдэІэпыкъур? Абы быдэу и фІэщ хъут щхьэщэхуж къурмэныпхъэр езым щхьэкІи Иеговэ итауэ зэрыщытыр (Гал. 2:20; къеджэ Ефес 1:7). Абы къыхэкІкІэ, Паул шэч лъэпкъ къытрихьэтэкъым а къурмэныпхъэм ипкъ иткІэ Иеговэ абы и гуэныхьхэр къызэрыхуигъэгъум (Рим 7:24, 25). Паул и ныкъусанхэмрэ япэм ищІа щыуагъэхэмрэ емылъытауэ, гуфІэгъуэ иІэу Алыхьым хуэлэжьэфт (Евр. 9:12—14).

11. Паул и щапхъэм сыт гупсэхугъуэ къыщІыдитыр?

¹¹ Дэри, Паул хуэдэу, зыхэтщІэфынущ Алыхьыр дгъэгуфІэну дызэрыхуеймрэ ди гуэныхьыщІэ щэныжьымрэ сыт щыгъуи зэрызэпэщІэтыр. Дэ ди гупсысэхэмкІи, ди псалъэхэмкІи, ди ІуэхухэмкІи Иеговэ и жагъуэ дымыщІын щхьэкІэ къару куэд етхьэлІэн хуей хъууэ къыщІэкІынщ. Иныкъуэхэм деж «Сыту сыцІыху тхьэмыщкІэ!» жытІэну дыхуейуэ къыщІэкІынщ. Илъэс 26 хъу ди шыпхъу Эли́зэc къыддогуашэ: «Паул и щапхъэм сэ хуабжьу сегъэгушхуэ. ГуэныхьыщІэ щэныжьым си закъуэ сызэремыбэныр зэрысщІэм гупсэхугъуэ къызет. Абы иджыри зэ дигу къегъэкІыж дэ сыт хуэдэ гугъуехь дыпэщІэхуэми Иеговэ фІы дыдэу къызэрыгурыІуэр». Ди гурыщІэ хьэлъэхэм емылъытауэ напэ къабзэрэ гуфІэгъуэрэ диІэу Иеговэ дыхуэлэжьэн щхьэкІэ сыт дэ тщІэ хъунур?

ГУРЫЩІЭ ХЬЭЛЪЭХЭМ ДАПХУЭДЭУ ДЫЗЭРЫПЭЩІЭТЫНУР?

12. Алыхьым гъунэгъу дыхуэзыщІ Іуэхухэм дызэрыхэтыр гурыщІэ хьэлъэхэм дыпэщІэтыну дапхуэдэу къызэрыддэІэпыкъур?

¹² Алыхьым гъунэгъу дыхуэзыщІ Іуэхухэм зэпымыууэ хэт. Апхуэдэ Іуэхухэм сыт щыгъуи дыщыхэтым деж, ар дэ хьэл тхуохъури, ди акъылыр гупсысэфІхэм тедгъэтыну нэхъ тынш мэхъу. Ар ебгъэщхь хъунущ цІыхум и узыншагъэм кІэлъыплъыну хьэл зэрыхуэхъуам. Дэ тшхым дыкІэлъыплъмэ, ди Іэпкълъэпкъыр зедгъакІуэмэ, жеинкІэ дрикъумэ нэхъ къарууфІэу дыщытынущ. Абы ещхьу Библием махуэ къэс деджэну, хъыбарыфІыр дгъэІуну, зэІущІэхэм зыхуэдгъэхьэзыру, абыхэм дыхэтыну хьэл тхуэхъуамэ, ар къыддэІэпыкъунущ дызыгъэгузавэ гупсысэхэм ди акъылыр куэдрэ тедмыгъэтыну (Рим 12:11, 12).

13, 14. Алыхьым гъунэгъу дыхуэзыщІ Іуэхухэр сэбэп къызэрытхуэхъум теухуауэ языныкъуэ къуэш, шыпхъухэм сыт жаІэр?

¹³ Ди къуэш Джон и щапхъэм деплъынщ. Ар илъэс 39 щыхъум щыгъуэ, лышх уз иІэу къагъуэтащ. Абы щыгъуэ абы и къуэр илъэсищ хъууэ арат. ЯпэщІыкІэ Джон гурыщІэ хьэлъэхэм зэщІаубыдат. Ар егупсыст: «Ар дауэ? Сэ иджыри сыщІалэщ». Сыт а зэман гугъухэм абы къыдэІэпыкъуар? Джон жеІэ: «Сэ къарууншэу сыщытами, си унагъуэм и гъусэу Алыхьым гъунэгъу дыхуэзыщІ Іуэхухэм дызэрыхэтыным сыхущІэкъут. Щымытыншым дежи, дэ зэІущІэхэм псоми дыкІуэт, тхьэмахуэ къэс хъыбарыфІыр дгъэІут икІи ди унагъуэм Библиер зэгъусэу дджыт». БлэкІа зэманыр игу къигъэкІыжурэ, Джон жеІэ: «Сэ япэщІыкІэ си узым сигъэгужьеями, иужькІэ зыхэсщІащ Иеговэ фІыуэ сыкъызэрилъагъур икІи сызыхуэныкъуэ къару къызэрызитыр. Быдэу фи фІэщ фщІы: Иеговэ сэ къызэрыздэІэпыкъуам хуэдэу фэри къывдэІэпыкъунущ!»

¹⁴ ИпэкІэ зи гугъу тщІа Элизэ къыддогуашэ: «ЗэІущІэм сыщыкІуэм икІи Библием сыщеджэм деж, абы сигу къегъэкІыж Иеговэ сызэрызэхихыр, фІыщэуи сыкъызэрилъагъур. Сэ абы зыкІэ сегъэгуфІэри!» Африкэм щыщ ди къуэш Но́лан районым и нэхъыжьу мэлажьэ. Абырэ и щхьэгъусэ Диа́нрэ къадэІэпыкъум теухуауэ ар къыддогуашэ: «Дэ гукъыдэж дыщимыІэм дежи, Алыхьым гъунэгъу дыхуэзыщІ Іуэхухэм дыхэтщ. Апхуэдэм деж дэ наІуэу долъагъу ди акъылыр гупсысэфІхэм тедухуэну Иеговэ къызэрыддэІэпыкъур. Гугъуехь дыщыпэщІэхуэм деж Иеговэ щІэгъэкъуэн къызэрытхуэхъунур икІи и нэфІ къызэрытщыхуэнур дигу къыдогъэкІыж. Ар зэрищІыну щІыкІэр дэ тщІэкъым, ауэ дэ абы шэч лъэпкъ къытетхьэкъым».

15. Сыт иджыри тщІэ хъунур гупсысэ Іейхэм дыпэщІэтын щхьэкІэ? Щапхъэ къэфхь.

¹⁵ Сыт иджыри пщІэ хъунур гупсысэ Іейхэр къыщыптегуплІэм деж? Щапхъэ къэтхьынщ. Уи бгыр зэпымыууэ къоузу уи нэгу къыщІэгъэхьэт. А узым упэлъэщын щхьэкІэ махуэ къэс къэпкІухьыныр мащІэщ. Ар щІэузым и щхьэусыгъуэри къэбгъуэтыным мыхьэнэшхуэ иІэщ. Абы щхьэкІэ дохутырым зыхуэбгъазэмэ икІи а узым теухуауэ нэхъыбэ къапщІэмэ нэхъыфІщ. Абы хуэдэ дыдэу къытрагъэзэжурэ гугъу уезыгъэхь гупсысэ Іейхэм упэлъэщын щхьэкІэ Библием икІи ди тхыгъэхэм абы теухуауэ ит гупсысэхэр къэплъыхъуэн, уеблэмэ, Алыхьым и еплъыкІэ зиІэ къуэш, е шыпхъу гуэрым уепсэлъэн хуейщ. АдэкІэ иджыри сэбэп къыпхуэхъун чэнджэщ зыбжанэм дыхэплъэнщ.

16. Гупсысэ Іейхэр къыздикІыр зэхэбгъэкІыну сыт къыбдэІэпыкъунур? (Псалом 139:1—4, 23, 24).

¹⁶ Гупсысэ Іейхэр къыздикІыр зэхэбгъэкІын щхьэкІэ, Иеговэ къыбдэІэпыкъуну елъэІу. Пащтыхь Даут Иеговэ фІыуэ къызэрицІыхум шэч лъэпкъ къытрихьэтэкъым. Абы къыхэкІкІэ, ар Алыхьым елъэІут зыгъэгузавэ гупсысэхэр къыздикІыр зэхигъэкІыну къыдэІэпыкъун щхьэкІэ. (Къеджэ Псалом 139:1—4, 23, 24.) Уэри уи гупсысэ Іейхэр къыздикІыр къыбгурыІуэу, абыхэм упэлъэщын щхьэкІэ, Иеговэ къыбдэІэпыкъуну уелъэІу хъунущ. Иджыри мыпхуэдэ упщІэхэр зэптыж хъунущ: «Си гупсысэ Іейхэм сыт я щхьэусыгъуэр? Сыт абыхэм къежьапІэ яхуэхъур? Гупсысэ Іей гуэр сыщиІэм деж, си акъылыр абы тезмыгъэкІыу тезгъэтыну си хьэл?»

17. Уи акъылыр гупсысэфІхэм тебгъэтыну сыт хуэдэ темэхэр къыбдэІэпыкъуну? (Сурэтми феплъ.)

¹⁷ Библиер щыбджым деж, уи Іуэхум хуэкІуэ темэхэр къыхэх. Уэ зэман-зэманкІэрэ Иеговэ и хьэл-щэнхэм теухуауэ нэхъыбэ къапщІэ хъунущ. Псалъэм папщІэ, апостол Паул къыдэІэпыкъут Алыхьым игъэгъуну хьэзыру зэрыщытымрэ щхьэщэхуж къурмэныпхъэмрэ зэрегупсысыр. Уэри ар дыдэр къыбдэІэпыкъуфынущ. Алыхьым и гущІэгъум, зэригъэгъум икІи пэжагъ зыхэлъ и лъагъуныгъэм теухуауэ куууэ зэпкърыпх хъунущ. АбыкІэ уэ къыбдэІэпыкъунущ «Путеводитель по публикациям Свидетелей Иеговы» икІи «Индекс публикаций Сторожевой башни» жыхуаІэхэр. Абы нэмыщІ уи бзэмкІэ щыІэ Библие зэрыбдж хъуну нэгъуэщІ Іэмэпсымэхэри къэбгъэсэбэп хъунущ. Уи Іуэхум хуэкІуэ статьяхэр къетхыхауэ зигъэІэ икІи ар здэплъэгъуну щІыпІэм деж щыгъэлъ. Гупсысэ Іейхэр къыптегуплІэу щызыхэпщІэм деж, а статьяхэр щІэрыщІэу зэпкърыхи, абыхэм итыр уи гъащІэм къызэрыщыбгъэсэбэпыным хущІэкъу (Флп. 4:8).

18. Языныкъуэ къуэш, шыпхъухэм сыт хуэдэ темэхэр зэпкърахрэ икІи ар дапхуэдэу къазэрыдэІэпыкъур?

¹⁸ ИпэкІэ зи гугъу тщІа Элизэ мурад ищІащ Библиер щиджкІэ Іэиуб теухуауэ нэхъыбэ къищІэну. Абы жеІэ: «Сэ ар зыкІэ къызгуроІуэри! Іэиуб гугъуехь куэд къытегуплІат, зыр адрейм иужь иту. Ауэ абы щыхуэмыхьыжми Иеговэ щыгугъын къигъэнакъым, гугъу щІехьым и щхьэусыгъуэр имыщІа пэтми» (Иов 42:1—6). Нолан и щхьэгъусэ Диан жеІэ: «Си щхьэгъусэмрэ сэрэ „Приближайся к Иегове“ жыхуиІэ тхылъым доджэ. Абы ит мы гупсысэр дэ дигу ирохь: кхъуэщыныщІыр ятІагъуэм зэрелэжьым хуэдэу Иеговэ къыдолэжь. Зыгуэр щытхузэфІэмыкІым деж дыщынэщхъей къохъу. Абы щыгъуэ дэ ди нэгу къыщІыдогъэхьэ нэхъыфІ дищІын щхьэкІэ Иеговэ къызэрыдэлэжьыр» (Ис. 64:8).

ГЪАЩІЭ ДАХЭ ДИІЭНЫМ ШЭЧ КЪЫТЕВМЫХЬЭУ ФЫПЭПЛЪЭ

19. Дэ сытым шэч къытедмыхьэми хъуну?

¹⁹ Мы статьям ит чэнджэщ псори къэдгъэсэбэпми, гурыщІэ хьэлъэхэмрэ гупсысэ Іейхэмрэ кІуэдыпэну дыщыгугъ хъунукъым. Иныкъуэхэм деж дынасыпыншэ дыдэу дыщыту къытщыхъункІэ хъунущ. Ауэ Иеговэ къызэрыддэІэпыкъум и фІыгъэкІэ гупсысэ Іейхэм дыпэлъэщыфынущ. Дэ шэч лъэпкъ къытедмыхьэми хъунущ гуфІэгъуэ къыдэзытыр ди гъащІэм нэхъыбэу зэрыхэтыным. Сыт щхьэкІэ жыпІэмэ напэ къабзэ диІэу Алыхьым дыхуолажьэ икІи дощІэ: абы хуэтщІэмкІэ ар арэзыщ.

20. Сыт дэ псоми ди гур зытедухуэн хуейр?

²⁰ Аращи, дызыпэщІэхуэ гугъуехьхэм, ди щыуагъэхэм е япэм тщІа Іуэхугъуэхэм щхьэкІэ ди гуфІэгъуэр зыфІэдгъэкІуэдынкъым. Иеговэ къызэрыддэІэпыкъум и фІыгъэкІэ, дэ ди гурыщІэ хьэлъэхэм дыпэщІэтыфынущ (Пс. 143:10). Апхуэдэ гурыщІэхэр дыщимыІэжыну зэманым дэ зыкІэ дыпоплъэри! Дэ пщэдджыжь къэс дыкъэушынущ дыщІэгузэвэн щхьэусыгъуэ димыІэу икІи гуфІэгъуэ зыхэтщІэу, фІыуэ дыкъэзылъагъу ди Алыхь Иеговэ дыхуэлэжьэнущ.