Иеговэрэ уэрэ фи зэхуаку дэлъ ныбжьэгъугъэр адэкІи гъэбыдэ

1. ЦІыхухэм Іэмал имыІэу сыт яІэн хуейр? (Маттэ 5:3, ДЩІ).

ИЕГОВЭ цІыхухэр къигъэщІащ ерыскъы, щыгъын икІи зыщІэсын унэ Іэмал имыІэу яІэн хуейуэ. Абыхэм языхэз гуэр зэман кІэщІкІи тфІэкІуэду щытмэ, ди гъащІэр егъэлеяуэ гугъу хъунущ. Ауэ ди Іэпкълъэпкъыр зыхуэныкъуэм нэмыщІ дэ иджыри Алыхьым къыбгъэдэкІ щІэныгъэм дыхуэныкъуэщ. (Къеджэ Маттэ 5:3, ДЩІ) Дэ нэгъэсауэ насыпыфІэу дыщытыну дыхуеймэ, Алыхьым дызэрыхуэныкъуэр къыдгурыІуэн икІи ар къэтлъыхъуэн хуейщ.

2. «Алыхьыр... къэзылъыхъуэхэр» сыт хуэдэ цІыхум ебгъэщхь хъуну? Щапхъэ къэфхь.

² «Алыхьым зэрыхуэныкъуэр къызыгурыІуэхэр икІи ар къэзылъыхъуэхэр», жаІэу зэрадзэкІа псалъэхэм къикІыр «гурэ псэкІэ тхьэмыщкІэхэр» жиІэу аращ. Мы псалъэхэм уи нэгу къыщІагъэхьэ унэ зимыІэ, уэрамым тес цІыху тхьэмыщкІэр. ЦІыхухэм ар Іумпэм ящІу къыпакІухь. А тхьэмыщкІэр зэрымэжалІэм щхьэкІэ къарууншэ дыдэ хъуащ. Махуэм абы хуабэр къытохьэлъэ, жэщым ар щІыІэм ес. А цІыхум къыгуроІуэ псэууэ къэнэн щхьэкІэ, дэІэпыкъуэгъу зэрыхуэныкъуэр. Абы ещхьу «гурэ псэкІэ тхьэмыщкІэхэм» къагуроІуэ Алыхьым и дэІэпыкъуэгъум зэрыхуэныкъуэр икІи ар къаІэрыхьэн щхьэкІэ къарууэ яІэр ирахьэлІэ. Езы Иегови фІыуэ къэзылъагъухэм сыт щыгъуи ядэІэпыкъуну хьэзырщ.

3. Мы статьям сыт щызэпкърытхынур?

³ Мы статьям дэ япэщІыкІэ дыщытепсэлъыхьынущ Хьисэ къыдэІэпыкъуну хуабжьу къелъэІуа Ханаан хэкум щыщ цІыхубзым. Абы и щапхъэм къегъэлъагъуэ Алыхьыр дэІэпыкъуэгъу зыщІыну хуей цІыхухэм сыт хуэдэ хьэл-щэнищ зыхалъхьэн хуейми. Абы иужькІэ дэ дытепсэлъыхьынущ Иеговэ и унафэр къэзылъыхъуэу щыта Петр, Паул, Даут сымэ я щапхъэм.

МЫХЬЭНЭШХУЭ ЗИІЭ ХЬЭЛ-ЩЭНИЩЫР

4. Ханаан хэкум щыщ цІыхубзыр Хьисэ деж къыщІэкІуар сытыт?

⁴ Зэгуэр Хьисэ деж Ханаан хэкум щыщ цІыхубз къэкІуащ. Абы и пхъур жин бзаджэхэм хуабжьу гугъу ирагъэхьт (Мт. 15:21—28). А цІыхубзыр лъэгуажьэмыщхьэу тІысри, Хьисэ къыдэІэпыкъуну хуабжьу елъэІуат. Абы щапхъэ зытепх хъун хьэл-щэн куэд игъэлъэгъуащ. Абыхэм щыщ языныкъуэхэр адэкІэ зэпкърытхынщ.

5. Ханаан хэкум щыщ цІыхубзым сыт хуэдэ хьэл-щэнхэр игъэлъэгъуа икІи Хьисэ сыт абы хуищІар? (Сурэтми феплъ.)

⁵ Ханаан хэкум щыщ цІыхубзыр Хьисэ къыдэІэпыкъуну къыщелъэІуам абы жриІащ: «ЩІакхъуэр сабийхэм къаІэщІэпхыу хьэхэм [«хьэ цІыкІухэм», ДЩІ] яхуэбдзыныр къезэгъыркъым». НэгъуэщІ зыгуэрым Хьисэ жиІа псалъэхэр и жагъуэ хъууэ, «Щхьэи селъэІуххат» жиІэнкІэ хъунут. Ауэ Ханаан хэкум щыщ цІыхубзым ар и жагъуэ хъуакъым, сыт щхьэкІэ жыпІэмэ абы Іэдэбагъ хэлът. Абы нэмыщІ ар ІумыкІыжу, адэкІи теубыдагъэ хэлъу Хьисэ елъэІуащ. Сыт абы апхуэдэу щІищІар? А цІыхубзым Хьисэ къызэрыдэІэпыкъуфынур быдэу и фІэщ хъут. Хьисэ абы фІэщхъуныгъэ быдэ иІэу къыщилъэгъуам, дэІэпыкъуну мурад ищІащ. Хьисэ «Израил цІыхуу мэл щхьэрыуахэм я закъуэщ сэ Тхьэм сыкъызыхуигъэкІуар» жиІами, а цІыхубзыр къызэрелъэІуар хуищІащ.

6. Ханаан хэкум щыщ цІыхубзым и щапхъэм сытым дыхуигъасэрэ?

⁶ Ханаан хэкум щыщ цІыхубзым хэлъа хьэл-щэнхэр дэркІи щхьэпэщ. Дэри Іэдэбагърэ теубыдагъэрэ тхэлъу, Алыхьыр къыддэІэпыкъун щхьэкІэ делъэІун хуейщ. Абы нэмыщІ мыхьэнэшхуэ иІэщ Хьисэ МэссихькІэ фІэщхъуныгъэ диІэным икІи абы унафэхэр къыдитын щхьэкІэ къигъэсэбэп цІыхухэм дзыхь яхуэтщІыным (Мт. 24:45—47). Иеговэрэ Хьисэрэ Іэдэбагъ, теубыдагъэ, фІэщхъуныгъэ быдэ зыгъэлъагъуэ цІыхухэм ядэІэпыкъуну сыт щыгъуи хьэзырщ. (Евгъапщэ Екъуб 1:5—7.) АдэкІэ Петр, Паул, Даут сымэ ягъэлъэгъуа щапхъэм дытепсэлъыхьынщ. Дэ къэтлъэгъунущ Иеговэ щІэныгъэ пэжыр куэду къызэрыдитыр, абы нэмыщІ хьэл-щэныфІхэр зыхэтлъхьэну икІи и хъумапІэм дыщыІэну къызэрыддэІэпыкъур.

ПЕТР ХУЭДЭУ АЛЫХЬЫМ И ПСАЛЪЭР АДЭКІИ КУУУЭ ВДЖЫ

7. Петр сыт хуэдэ къалэнт иІэр икІи езыми сытыт ищІэн хуейр? (Еврейхэм 5:14—6:1).

⁷ Апостол Петр и щапхъэм дегупсысынщ. Хьисэ зэры-Мэссихьыр япэ дыдэу зи фІэщ хъуахэм ар яхэтащ. Абы къыгурыІуэт Иеговэ Хьисэ къигъэсэбэпу «мыкІуэдыжын гъащІэ» къозыт псалъэхэмкІэ и лъэпкъыр игъэнщІу зэрыщытар (Ин. 6:66—68). ЛІахэм къахэтэджыкІыжа Хьисэ уафэм дэкІуеижын ипэ, Петр мыпхуэдэу жриІащ: «Си мэлхэр гъэхъу» (Ин. 21:17). Петр псэемыблэжу а къалэныр игъэзащІэт. Уеблэмэ, Иеговэ ар хуигъэушащ Библием и Іыхьэ хъуа тхылъитІ итхыну. Ауэ Петр езыми Алыхьым теухуауэ иІэ щІэныгъэр адэкІи хигъэхъуэн хуейт. Псалъэм папщІэ, Алыхьым Паул иригъэтха письмохэр Петр куууэ зэпкърихт икІи жиІэт абыхэм хэт языныкъуэ гупсысэхэр къыбгурыІуэну зэрымытыншыр (2 Пет. 3:15, 16). Ауэ абы теубыдагъэ игъэлъагъуэт икІи и фІэщ хъут Паул и псалъэхэр нэхъыфІу къыгурыІуэу, и гъащІэм къыщигъэсэбэпыну Иеговэ къызэрыдэІэпыкъунур. (Къеджэ Еврейхэм 5:14—6:1.)

8. Иеговэ кърита унафэр Петр дапхуэдэу къызэрыщыхъуар?

⁸ Петр фІэщхъуныгъэ быдэ зэриІэр къыдэІэпыкъут Алыхьым кърит унафэхэм жыІэдаІуэу тетыну. Псалъэм папщІэ, Иоппие къалэм къыщыхъуа Іуэхугъуэм деплъынщ. Торэт хабзэмкІэ мыкъабзэу щыт псэущхьэхэр Иеговэ Петр и нэгу щІигъэкІри, жриІащ абыхэм ящыщ зы фІигъэжу ишхыну. Журтхэм я дежкІэ ар къезэгътэкъыми, Петр япэщІыкІэ мыпхуэдэу жиІащ: «Хьэуэ, Зиусхьэн... ар хъуххэнукъым. Мышхыпхъи хьэрэми зэи сшхакъым». ИужькІэ Петр мыпхуэдэ псалъэ зэхихащ: «Тхьэм хьэлэлу икІи шхыпхъэу жыхуиІар уэ хьэрэму умылъытэ» (Апост. 10:9—15). Петр псори къыгурыІуэри и еплъыкІэр ихъуэжащ. Дэнэ дэ ар щытщІэр? Куэд дэмыкІыу журт лъэпкъым щымыщ Корнелий деж къикІыу Петр цІыхуищ къыхуэкІуащ. Абыхэм ар Корнелий и унэм кърагъэблэгъащ. Алыхьым Петр и нэгу щІигъэкІа Іуэхугъуэр мыхъуатэмэ, ар зэи абы и деж кІуэнутэкъым, сыт щхьэкІэ жыпІэмэ журтхэм нэгъуэщІ лъэпкъхэм щыщ цІыхухэр мыкъабзэу къалъытэт (Апост. 10:28, 29). Ауэ Петр иджы къыгурыІуат хъыбарыфІыр цІыху псоми зэхахыну Иеговэ зэрыхуейр. Ар зэхъуэкІыныгъэшхуэт, ауэ Петр абы занщІэу арэзы техъуэри, Корнелий и деж кІуащ (Прит. 4:18). Абыи, и благъэхэми, и ныбжьэгъухэми Петр хъыбарыфІыр яжриІэу щІидзащ. А цІыхухэм Хьисэ я фІэщ хъури, Алыхьым и къару лъапІэр къаритащ икІи абыхэм псым зыщІагъэуащ (Апост. 10:44—48).

9. КъыбгурыІуэну гугъуу щыт пэжхэри куууэ зэпкърытхыу зедгъэсэн щІыхуейр сыт?

⁹ Петр и щапхъэм сытым дыхуигъасэрэ? Дэ зэпымыууэ Алыхьым и Псалъэр дджын хуейщ. ДауикІ, и нэхъыбэм дызэджэр къыбгурыІуэну гугъукъым. Ауэ къыбгурыІуэну гугъуу щыт пэжхэри куууэ зэпкърытхыу Іэмал имыІэу дэ зедгъэсэн хуейщ. Аращи, Алыхьым и Псалъэр нэхъ куууэ къыдгурыІуэн щхьэкІэ зэман хухэтхыным икІи къару етхьэлІэным мыхьэнэшхуэ иІэщ. Сыт апхуэдэу жыпІэ щІэхъунур? Иеговэ теухуауэ нэхъыбэ къэтщІэху, япэрауэ, абы худиІэ лъагъуныгъэмрэ пщІэ хуэтщІымрэ нэхъ ин мэхъу. ЕтІуанэрауэ, Алыхьым теухуауэ нэгъуэщІхэм жетІэну диІэ гукъыдэжыр хохъуэ (Рим 11:33; Апок. 4:11). Петр и щапхъэм нэгъуэщІ зыгуэрми дыхуегъасэ. Библием ит пэж гуэрыр къызэрыдгурыІуэм зэхъуэкІыныгъэ къыщыхыхьэм деж, дэ занщІэу абы арэзы дытехъуэу, ди еплъыкІэри ди ІуэхущІафэри тхъуэжын хуейщ. Апхуэдэу дыщытмэ, Иеговэ дэ адэкІи диунэтІынущ икІи абы пэжу дыхуэлэжьэфынущ.

ПАУЛ ХУЭДЭУ АЛЫХЬЫМ ИГУ ИРИХЬ ХЬЭЛ-ЩЭНХЭР ЗЫХЭФЛЪХЬЭ

10. Иеговэ дгъэгуфІэн щхьэкІэ сыт дэ тщІэн хуейр? (Колоссэ 3:8—10).

¹⁰ Алыхьыр дгъэгуфІэн щхьэкІэ, апостол Паул зэритхам хуэдэу, дэ хьэл-щэныжьхэр зыхэдну, хьэл-щэныфІхэр зыхэтлъхьэн хуейщ. (Къеджэ Колоссэ 3:8—10.) Абы зэман куэдрэ къару куэдрэ текІуэдэфынущ. Езы Паул и щапхъэр дигу къэдгъэкІыжынщ. Ар и щІалэгъуэм щыщІэдзауэ Алыхьыр арэзы зэрищІынум хущІэкъут (Гал. 1:14; Флп. 3:4, 5). Ауэ Иеговэ пэжу узэрыхуэлажьэ хъунур Паул къыгурыІуэтэкъым. Ар хуабжьу цІыху пагэт икІи Хьисэ зыхуригъаджэу щытар ищІэтэкъым. Абы къыхэкІкІэ, Паул и ІуэхущІафэхэм Иеговэ игъэгуфІэтэкъым. ИужькІэ абы езым щхьэкІэ итхыжауэ щытащ напэншэу зэрыщытар (1 Тим. 1:13).

11. Паул сыт хуэдэ хьэл-щэныжьым ебэнын хуей хъуа?

¹¹ Паул Хьисэ и лъэужь иувэн ипэ къэгубжьыгъуафІэу щытащ. Апостолхэм тхылъым щыжыІащ абы Хьисэ и лъэужь ирикІуэхэр илъагъу мыхъуу зэрыщытар икІи ахэр игъэкІуэдыну зэрыхуеяр (Апост. 9:1). Паул Хьисэ и лъэужь щиувам, дауикІ, а хьэл-щэныжьыр зыхинэн щхьэкІэ къару куэд ирихьэлІащ (Еф. 4:22, 31). Ауэ Варнавэрэ абырэ я зэхуаку зэгурымыІуэныгъэ къыщыдыхьам щыгъуэ, Паул и губжьыр зэтриІыгъэну хузэфІэкІакъым (Апост. 15:37—39). Апхуэдэу къызэрыхъуар Паул и гум щІыхьащ, ауэ абы и Іэр ирихьэхакъым. Абы адэкІи къару ирихьэлІащ Иеговэ пэжыжьэ хуэзыщІыфыну и ныкъусанхэм ебэнын щхьэкІэ (1 Кор. 9:27).

12. Паул и ныкъусанхэм ебэныну сыт къыдэІэпыкъуар?

¹² Паул езым и къарум щыгугътэкъыми, ехъулІэныгъэ иІэу и ныкъусанхэм ебэнащ икІи хьэл-щэныфІхэр зыхилъхьэфащ (Флп. 4:13). Петр хуэдэу ар «Тхьэм къару къритым» щыгугът (1 Пет. 4:11). Ауэ зэман-зэманкІэрэ Паул щыуагъэ гуэрхэр ищІэт икІи абы хуабжьу и гур хигъэщІт. Апхуэдэхэм деж уафэм щыІэ и Адэм къыхуищІа фІыгъуэхэм Паул егупсыст икІи абы къару къыщІилъхьэт, адэкІи и гуэныхьым ебэнын щхьэкІэ (Рим 7:21—25).

13. Паул сыткІэ щапхъэ тетхыфыну?

¹³ Дапхуэдэу дэ Паул щапхъэ зэрытетхыфынур? Илъэс куэд щІауэ Иеговэ дыхуэлажьэми, дэ адэкІи ди хьэл-щэнхэм делэжьын хуейщ. ДауикІ, иныкъуэхэм деж дэ ди пІэм дыкъыщикІ е гум еуэн псалъэ щыжытІэ къохъу. Апхуэдэхэм деж дэ ди Іэр етхьэхын хуейкъым, атІэ адэкІи къару етхьэлІэн хуейщ хьэл-щэныфІхэр зыхэтлъхьэн щхьэкІэ (Рим 12:1, 2; Еф. 4:24). Ауэ мыхьэнэшхуэ зиІэ зы Іуэхугъуэ дэ зыщыдгъэгъупщэн хуейкъым. Алыхьым и фІэфІ хьэл-щэнхэр адэкІи зыхэтлъхьэн щхьэкІэ, абы къытхуигъэувыр нэхъыфІу къыдгурыІуэн хуейщ. ДауикІ, абы акъыл хэлъщ, сыт щхьэкІэ жыпІэмэ дэ Алыхьыр арэзы тщІыну дыхуейщ.

ДАУТ ХУЭДЭУ ИЕГОВЭ И ХЪУМАПІЭМ ФЫКЪЫЩЫНЭ

14, 15. Иеговэ и лъэпкъыр дапхуэдэу къызэрихъумэр? (Псалом 27:5). (Сурэтми феплъ.)

¹⁴ Нэгъэсауэ насыпыфІэу дыщытын щхьэкІэ, Алыхьым и Псалъэм куууэ деджэныр икІи абы и фІэфІ хьэл-щэнхэр зыхэтлъхьэныр мащІэщ. Дэ иджыри Алыхьым и хъумапІэм Іэмал имыІэу дыкъыщынэн хуейщ. Иеговэ дапхуэдэу дыкъызэрихъумэр икІи абы и хъумапІэм дыщІэтрэ дыщІэмытрэ дапхуэдэу зэрызэхэдгъэкІынур?

¹⁵ Пащтыхь Даут шэч къытрихьэтэкъым гузэвэгъуэ махуэм Иеговэ ар и хъумапІэм зэрыщигъэпщкІуным. (Къеджэ Псалом 27:5.) Дэри дапхуэдэу Иеговэ и хъумапІэм дызэрыщигъэпщкІур? Абы ди фІэщхъуныгъэр тфІэзыгъэкІуэдыфыну псоми дыщехъумэ. Иеговэ дыкъегъэгугъэ къытпэщІэувэн щхьэкІэ ящІа зы Іэщэми ехъулІэныгъэ зэримыІэнумкІэ (Пс. 34:7; Ис. 54:17). ШейтІанымрэ абы и лъэныкъуэр зыІыгъхэмрэ къару яІэщ, ауэ Иеговэ абыхэм нэхърэ куэдкІэ нэхъ лъэщщ. Абыхэм ди гъащІэр тфІагъэкІуэду щытми, Алыхьым дыкъигъэтэджыжынущ (1 Кор. 15:55—57; Апок. 21:3, 4). Ауэ ди бийхэм нэмыщІ дэ езыр дыщІэгузавэ Іуэхугъуэхэри зэран къытхуохъу. Иеговэ дыхуэлэжьэн щыдмыгъэтын щхьэкІэ, абыхэми дыпэлъэщыну ар къыддоІэпыкъу (Прит. 12:25; Мт. 6:27—29, ДЩІ). Уафэм щыІэ ди Адэм унагъуэшхуэ къыдитащ икІи ар зэман гугъухэм щІэгъэкъуэн къытхуохъу. Абы иджыри къыдитащ ди фІэщхъуныгъэр тхъумэну къыддэІэпыкъу икІи дызыгъасэ зэхуэсым и нэхъыжьхэр (Ис. 32:1, 2). Абы нэмыщІ дэ зэІущІэхэр диІэщ. Абыхэм дэ къыщыдощІэ иджыри сыт хуэдэ ІэмалкІэ Иеговэ дыкъихъумэми (Евр. 10:24, 25).

16. Иеговэ дапхуэдэу Даут зэрихъумар?

¹⁶ Даут Иеговэ щедаІуэм, ар абы къихъумэт. Алыхьыр абы Іущагъ зыхэлъ унафэхэр къищтэну дэІэпыкъут. Апхуэдэу Даут гугъуехь куэдым щыхъума хъут. (Евгъапщэ Притчи 5:1, 2.) Ауэ ар Торэт хабзэхэм щебакъуэм деж, абы къыпэкІуэ гугъуехьхэм Алыхьым щихъумэтэкъым (2 Сам. 12:9, 10). НэгъуэщІхэм я зэранкІи гугъу щехьа Даут и гъащІэм къыхуихуащ. Апхуэдэхэм деж абы и гум илъу хъуар Иеговэ хуиІуатэт. Езы Иегови Даут гупсэхугъуэ иритт, фІыуэ зэрилъагъури зэрыдэІэпыкъунури жриІэт (Пс. 23:1—6).

17. Даут сыткІэ щапхъэ тетхыфыну?

¹⁷ Дапхуэдэу Даут щапхъэ зэрытетхыфынур? Унафэ гуэр къэтщтэн ипэ, Иеговэ дечэнджэщыным мыхьэнэшхуэ иІэщ. Иджыри дэ зыщыдгъэгъупщэн хуейкъым: иныкъуэхэм деж гугъуехь дыщІиІэр Иеговэ дыкъимыхъумэу аракъым, атІэ Іущагъ зыхэмылъ унафэ къэтщтауэ аращ (Гал. 6:7, 8). Ауэ Алыхьым дызэредаІуэм емылъытауи, гугъуехьхэм дыпэщІэхуэфынущ. Абы щыгъуэ дызыгъэгузавэхэр Иеговэ хуэтІуатэу, къыддэІэпыкъуну делъэІун хуейщ. Абы Іэмал имыІэу гупсэхугъуэ къыдитынущ, фІыуэ дыкъызэрилъагъури зыхыдигъэщІэнущ (Флп. 4:6, 7).

ИЕГОВЭРЭ УЭРЭ ФИ ЗЭХУАКУ ДЭЛЪ НЫБЖЬЭГЪУГЪЭР АДЭКІИ ГЪЭБЫДЭ

18. Алыхьым гъунэгъу зыхуэтщІыну сыт зэран къытхуэхъуфынур икІи апхуэдэу къэмыхъун щхьэкІэ сыт тщІэн хуейр? (Сурэтхэми феплъ.)

¹⁸ 2026 гъэм хухаха пычыгъуэм мыпхуэдэу итщ: «НасыпыфІэщ Алыхьым зэрыхуэныкъуэр къызыгурыІуэхэр икІи ар къэзылъыхъуэхэр». Мы псалъэхэм нобэ хуэдэу мыхьэнэ щиІа къэхъуакъым. Сыт щхьэкІэ жыпІэмэ нобэ цІыху куэдым Алыхьым хуэныкъуэу къалъытэкъым е дин нэпцІымрэ философиемрэ къагъэсэбэпу, абы гъунэгъу зыхуащІыну хэтщ. Ауэ абы ахэр нэгъэсауэ насыпыфІэ ищІкъым. Дапхуэдэу абыхэм я еплъыкІэр зэран зэрызыхуэдмыгъэхъунур? Дэ Алыхьым къыбгъэдэкІ щІэныгъэр зэтхьэлІэн, хьэл-щэныфІхэр зыхэтлъхьэн икІи абы и хъумапІэм дыкъыщынэн хуейщ.