«Уэ Алыхьым и дежкІэ улъапІэщ»!

1, 2. Иеговэ и дежкІэ лъапІэу дызэрыщытыр ди фІэщ тщІыну сыт къыддэІэпыкъунур?

ИЕГОВЭ и лэжьакІуэ языныкъуэхэм мыхьэнэншэу зыкъалъытэж. Абыхэм апхуэдэ гурыщІэ щІаІэр, нэгъуэщІхэр Іейуэ къазэрыхущытарауэ къыщІэкІынущ. Уэри Алыхьым фІыуэ укъилъагъуну пхуэмыфащэу ущегупсыс къэхъурэ? Апхуэдэу уегупсысмэ, Иеговэ и нэкІэ узэплъыжу, абы и дежкІэ лъапІэу узэрыщытыр къыбгурыІуэну сыт къыбдэІэпыкъунур?

² Библием ущеджэм деж гу лъытэ Иеговэ и мурадымкІэ цІыхум сыт хуэдэ пщІэ хуэфащэми. Хьисэ цІыхухэм пщІэ яхуищІт икІи гуапэу яхущытт. Апхуэдэу абы къигъэлъэгъуащ и Адэми езыми лъапІэу дыкъызэралъытэр, дэ зыри дримыщІысу зыкъытщыхъужми (Ин. 5:19; Евр. 1:3). Мы статьям дэ щызэпкърытхынущ: 1) Хьисэ цІыхухэм дапхуэдэу ядэІэпыкъуами, ахэр лъапІэу зэрыщытыр къагурыІуэну; 2) Алыхьым и дежкІэ дэ лъапІэу дызэрыщытым шэч къытедмыхьэну сыт къыддэІэпыкъунуми (Агг. 2:7).

ХЬИСЭ ЦІЫХУХЭМ ДАПХУЭДЭУ ЗЭРАДЭІЭПЫКЪУАР АХЭР ЛЪАПІЭУ ЗЭРЫЩЫТЫР КЪАГУРЫІУЭНУ?

3. Хьисэ Галилей хэкум щыщыІам щыгъуэ, абы и деж къакІуэ цІыхухэм дапхуэдэу зэрахущытар?

³ Хьисэ Галилей хэкум хъыбарыфІыр щигъэІум щыгъуэ абы и деж цІыху куэд къакІуэт, къедэІуэн икІи загъэхъужын щхьэкІэ. Абы илъагъут цІыхухэр «мэлыхъуэ зыбгъэдэмыт мэл хъушэм хуэдэу ешауэ, захъумэжын ялъэмыкІыу» зэрыщытыр (Мт. 9:36; «Учебная Библия» жыхуаІэм ит комментарием феплъ). Дин пашэхэм а цІыхухэм нэмыплъ иратт икІи «Тхьэм и ней къащыхуауэ» жаІэт (Ин. 7:47—49; «Учебная Библия» жыхуаІэм ит комментарием феплъ). Ауэ Хьисэ и деж къакІуэ псоми пщІэ яхуищІт. Ахэр иригъэджэн икІи игъэхъужын щхьэкІэ ар и зэманым щысхьтэкъым (Мт. 9:35). Абы нэмыщІ Хьисэ цІыху нэхъыбэм ядэІэпыкъун щхьэкІэ и апостолхэр хъыбарыфІыр ягъэІуну нэгъуэщІ щІыпІэхэм игъэкІуащ икІи сымаджэхэр ягъэхъужыну зэфІэкІ яритащ (Мт. 10:5—8).

4. Хьисэ цІыху къызэрыгуэкІхэм зэрахущытам сытым дыхуигъасэрэ?

⁴ Хьисэ къедаІуэхэм нэмыплъ зырат цІыхухэри яхэтт. Ауэ ар абыхэм гуапэу, пщІэ хэлъу яхущытт. АбыкІэ Хьисэ къигъэлъэгъуащ езыми и Адэми апхуэдэ цІыхухэр лъапІэу зэралъытэр. Уэ Иеговэ ухуэлажьэу, ауэ абы и дежкІэ лъапІэу узэрыщытым шэч къытепхьэмэ-щэ? Апхуэдэу щытмэ, уигу къэгъэкІыж пэжыр къэзыщІэну хуея цІыху къызэрыгуэкІхэм Хьисэ зэрахущыту щытар. Ар уэ къыбдэІэпыкъунущ Иеговэ и дежкІэ лъапІэу узэрыщытыр къыбгурыІуэну.

5. Хьисэ Галилей хэкум хъыбарыфІыр щигъэІум щыгъуэ, зыхуэза цІыхубзым теухуауэ сыт дэ тщІэр?

⁵ Хьисэ цІыху гупышхуэхэм хъыбарыфІыр зэражриІам нэмыщІ, абыхэм зэрызу щадэІэпыкъуи къэхъут. Псалъэм папщІэ, ар Галилей хэкум щыІэу, илъэс 12 хъуауэ лъы куэд зыщІэкІ цІыхубзым хуэзащ (Мк. 5:25). Мусэ и хабзэмкІэ ар мыкъабзэу щытт икІи абы еІусэ дэтхэнэ зыри мыкъабзэ хъут. Абы къыхэкІкІэ, а цІыхубзыр цІыхухэм яхэмыхьэу икІи закъуэныгъэ зыхищІэу и гъащІэр ирихьэкІыу къыщІэкІынт. Абы нэмыщІ а цІыхубзым Іэмал иІэтэкъым нэгъуэщІхэм я гъусэу Алыхьым хуэлэжьэну, синэгуэгум кІуэну икІи махуэшхуэхэр игъэлъэпІэну (Лев. 15:19, 25). Абы узыншагъэм пыщІа гугъуехь зэриІэм нэмыщІ, зыри къыхуэмейуэ икІи фІыуэ къамылъагъуу и гугъэт (Мк. 5:26).

6. Хъужын щхьэкІэ сыт цІыхубзым ищІар?

⁶ А цІыхубз тхьэмыщкІэр хуейт и узыр Хьисэ игъэхъужыну. Ауэ ар абы занщІэу бгъэдыхьакъым. Сыт щхьэкІэ? А цІыхубзыр укІытэу къыщІэкІынт и узым теухуауэ цІыхухъум жриІэну. Е ар шынэу къыщІэкІынт, мыкъабзэу цІыху гупым зэрахэтым щхьэкІэ Хьисэ къешхыдэну. Абы къыхэкІкІэ, цІыхубзыр Хьисэ и щыгъыным еІусащ, зэрыхъужынумкІэ шэч къытримыхьэу (Мк. 5:27, 28). Абы и фІэщхъуныгъэр къыдэІэпыкъуащ узыншэ хъужыну. Хьисэ хэт къеІусами щыщІэупщІэм, а цІыхубзым зыкъиумысыжащ. Дапхуэдэу-тІэ Хьисэ ар къызэрыщыхъуар?

7. Хьисэ сымаджэ цІыхубзым гуапагъэрэ пщІэрэ хэлъу дапхуэдэу зэрыхущытар? (Марк 5:34).

⁷ Хьисэ а цІыхубзым гуапэу, пщІэ хэлъу хущытащ. Абы илъагъут ар зэрышынэр икІи хуабжьу зэрыгузавэр (Мк. 5:33). Абы къыхэкІкІэ, Хьисэ а цІыхубзым щабэу епсэлъащ, уеблэмэ, ипхъукІэ еджащ. А псалъэхэм Хьисэ и лъагъуныгъэ куур къыхэщт. (Къеджэ Марк 5:34.) «Учебная Библия» жыхуаІэм «пхъу» псалъэм хуэхьа комментарием мыпхуэдэу щыжыІащ: «Библием зэритымкІэ, цІыхубзхэм защыхуигъазэм, Хьисэ а зыращ „сипхъу“ зыжриІар. Абы апхуэдэу щІищІар а цІыхубзым и узыр псоми яжримыІэфу икІи гузавэу зэрыщытарауэ къыщІэкІынущ». Уи нэгу къыщІэгъэхьэт, Хьисэ гуапэу къыщепсэлъам щыгъуэ, абы гупсэхугъуэрэ гуфІэгъуэрэ зэригъуэтыжар! Хьисэ апхуэдэу имыщІамэ, а цІыхубзым и узыншагъэр зэтеувэжами, и напэр къеныкъуэкъунут. Хьисэ и фІыгъэкІэ, а цІыхубзым къыгурыІуащ Иеговэ фІыуэ къызэрилъагъур икІи ипхъу лъапІэу къызэрилъытэр.

8. Бразилием щыщ ди зы шыпхъум сыт хуэдэ гугъуехьхэр иІа?

⁸ Нобэ Иеговэ и лэжьакІуэ языныкъуэхэм узыншагъэм пыщІа гугъуехьхэр зэраІэм къыхэкІкІэ, зыри къахуэмейуэ къащохъу. Бразилием щыщ, общэ пионеру лажьэ Марияa и гъащІэм дыхэплъэнщ. Абы и Іэ сэмэгумрэ и лъакъуитІымрэ пымыту къалъхуащ. Мария къыддогуашэ: «Школым сыщыщІэсым щыгъуэ, сэ сыт щыгъуи си пщІэр ираудыхт икІи си жагъуэ хъу цІэ лейхэр къысфІащт. Уеблэмэ, си унагъуэм щыщхэми сакъызэрытехьэлъэр сагъэлъагъут».

9. Мария Иеговэ и нэкІэ зэплъыжу зригъэсэну сыт къыдэІэпыкъуар?

⁹ Мария и гъащІэм дапхуэдэу зэрызихъуэжар? Ар Иеговэ и Щыхьэт хъуа иужь, зэхуэсым щыщ къуэш, шыпхъухэр абы къыдэІэпыкъуащ, гупсэхугъуи къратащ. Абыхэм я фІыгъэкІэ, Мария Иеговэ и нэкІэ зэплъыжу зригъэсащ. Абы жеІэ: «ФІы къысхуэзыщІа псори апхуэдизкІэ куэд мэхъури, я цІэхэр си блокнотым ихуэнукъым. Сэ Иеговэ фІыщІэ хузощІ и унагъуэшхуэм щыщ сызэрищІам щхьэкІэ». Къуэш, шыпхъухэр Мария дэІэпыкъуащ Иеговэ лъапІэу къызэрилъытэм хуэдэу, езыми лъапІэу зилъытэжыну.

10. Магдалэ жылэм щыщ Мэрием сыт хуэдэ гугъуехьхэр иІа? (Сурэтхэми феплъ.)

¹⁰ Хьисэ иджыри Магдалэ жылэм щыщ Мэрием зэрыдэІэпыкъуам деплъынщ. Абы жин бзаджэу блы кІуэцІыст (Лк 8:2). Жин бзаджэхэр зэран къызэрыхуэхъум къыхэкІкІэ, Мэрием зэрыщымыту зищІ къыщІэкІынт икІи абы щхьэкІэ цІыхухэм пэІэщІэ зыкъыхуащІт. А зэман гугъум ар сыт щыгъуи шынэу, закъуэныгъэ зыхищІэу икІи и Іуэхум хэкІыпІэ имыІэу къыщыхъуу къыщІэкІынт. Хьисэ Мэрием и фэр изых жын бзаджэхэр хихужа иужь, ар абы и лъэужь иуващ. Хьисэ Мэрием иджыри дапхуэдэу зэрыдэІэпыкъуар, ар Алыхьым и дежкІэ лъапІэу зэрыщытыр къыгурыІуэну?

11. Хьисэ Мэрием дапхуэдэу зэрыригъэлъэгъуар, Иеговэ ар лъапІэу зэрилъытэр? (Сурэтхэми феплъ.)

¹¹ Хьисэ Магдалэ жылэм щыщ Мэрием пщІэ зэрыхуищІыр Іэмал зыбжанэкІэ къигъэлъэгъуащ. Псалъэм папщІэ, хъыбарыфІыр щигъэІум игъуса цІыхухэм, Мэриеми яхэтащb. Абы и фІыгъэкІэ Мэрием Іэмал иІащ Хьисэ цІыхухэр зэрыригъаджэм едэІуэну. Абы нэмыщІ Хьисэ лІахэм къащыхэтэджыкІыжам щыгъуэ, ар япэ дыдэу зылъэгъуахэм Мэриеми яхэтащ. Уеблэмэ, Хьисэ абы къалэн иритащ къызэрытэджыжар апостолхэм яжриІэну. Зэрытлъагъущи, Хьисэ Мэрием Іэмал зыбжанэкІэ иригъэлъэгъуащ Иеговэ ар лъапІэу зэрилъытэр (Ин. 20:11—18).

12. ФІыуэ къалъэгъуну хуэмыфащэу Лидие сытыт щІегупсысыр?

¹² Нобэ цІыху куэдым, Магдалэ жылэм щыщ Мэрием хуэдэу, зыри къахуэмейуэ къащохъу. Абыхэм ящыщ зыуэ щытащ Испанием щыпсэу ди шыпхъу Лидие. Ар ныбэ щилъым и анэм иригъэкъутэжыну хуеящ. Лидие зэрыцІыкІурэ и анэр къызэрыхуэмейр зыхищІэт. Абы и анэр тэмэму къыкІэлъыплътэкъым икІи пхъашэу къыхущытт. Ди шыпхъум жеІэ: «Сэ зэрысщІэжрэ фІыуэ сыкъалъагъуным икІи цІыхум сыхабжэным хуабжьу сыхуэныкъуэт. Ауэ нэгъуэщІхэр апхуэдэу къысхущытыну схуэмыфащэу къысщыхъут, сыт щхьэкІэ жыпІэмэ си анэм ар быдэу си фІэщ ищІат».

13. Лидие сыт къыдэІэпыкъуар Иеговэ дежкІэ лъапІэу зэрыщытыр къыгурыІуэну?

¹³ Лидие Иеговэ къыщицІыхуам и гъащІэм зихъуэжащ. Иеговэ дежкІэ лъапІэу зэрыщытыр къыгурыІуэну абы къыдэІэпыкъуащ тхьэлъэІур, Библием зэреджэр икІи къуэш, шыпхъухэр гуапэу къызэрыхущытыр. Лидие къыддогуашэ: «Си щхьэгъусэм щІэх-щІэхыурэ къызжеІэ фІыщэу сыкъызэрилъагъур. Сыт хуэдэ хьэл-щэныфІхэр схэлъми абы мызэ-мытІэу сигу къегъэкІыж. Си ныбжьэгъухэри сыт щыгъуи къысщотхъу». Лидие иІа гурыщІэхэм хуэдэ зиІэ къуэш е шыпхъу фэри фи зэхуэсым хэту пІэрэ? Ахэр зэрылъапІэр къагурыІуэн щхьэкІэ дапхуэдэу фазэрыдэІэпыкъуфынур?

ИЕГОВЭ И НЭКІЭ ДЫЗЭПЛЪЫЖЫНУ СЫТ КЪЫДДЭІЭПЫКЪУНУР?

14. 1 Самуила 16:7 ит псалъэхэр Иеговэ и нэкІэ дызэплъыжыну дапхуэдэу къызэрыддэІэпыкъур? («Иеговэ и лэжьакІуэхэр лъапІэу щІилъытэр сыт?» жыхуиІэ рамкэми феплъ.)

¹⁴ Зыщывмыгъэгъупщэ, Иеговэ къызэрывэплъыр мы дунейм щыщ цІыхухэр къызэрывэплъым хуэдэукъым. (Къеджэ 1 Самуила 16:7.) Мы дунейм щыщ цІыхухэм мыхьэнэ зыратыр цІыхум и теплъэм, ахъшэ къилэжьым икІи щІэныгъэ иІэращ. Ауэ Иеговэ лъапІэу илъытэр нэгъуэщІщ икІи аращ дэ ди акъылыр зытедухуэн хуейр (Ис. 55:8, 9). Библиеми и гугъу ещІ зэман-зэманкІэрэ зыми имыщІысу зыкъэзылъытэжу щыта цІыхухэм. Абыхэм ящыщт Иляс, НэІумий, Аннэ сымэ. Абыхэм теухуауэ фыщеджэм деж Иеговэ ахэр фІыуэ илъагъуу икІи лъапІэу илъытэу зэрыщытам гу лъыфтэ. Алыхьым и нэкІэ дызэплъыжыну сыт иджыри къыддэІэпыкъунур? Иеговэ фІыуэ фызэрилъагъур икІи лъапІэу фызэрилъытэр къызыхэщ Іуэхугъуэхэр фтхы хъунущ. Абы нэмыщІ уи щхьэм пщІэ хуэпщІыжыну къыбдэІэпыкъун чэнджэщхэр ди публикациехэм къыщыплъыхъуэ хъунущc.

15. Иеговэ Данил лъапІэу щІилъытэр сытыт? (Даниил 9:23).

¹⁵ Иеговэ фызэрыхуэпэжым щхьэкІэ лъапІэу фызэрилъытэр зыщывмыгъэгъупщэ. Зэгуэр бегъымбар Данил къарууншэ хъуат икІи и лъэр щІэхуат (Дан. 9:20, 21). Иеговэ мелыІыч ДжэбрэІил къигъэсэбэпри, абы гупсэхугъуэ иритащ. МелыІычым Данил къыжриІащ «Алыхьым и дежкІэ лъапІэу» зэрыщытыр икІи и тхьэлъэІухэр зэрызэхихар. (Къеджэ Даниил 9:23.) Сытыт Иеговэ Данил лъапІэу щІилъытэр? Ар Алыхьым хуэпэжти аращ (Иез. 14:14). Данил теухуа хъыбарыр Алыхьым и Псалъэм щІригъэтхар, дэ абы гупсэхугъуэ къыдитын щхьэкІэщ (Рим 15:4). Фэри фи тхьэлъэІухэр Иеговэ зэхех икІи лъапІэу фелъытэ абы фызэрыхуэпэжым щхьэкІэ (Мих. 6:8; Евр. 6:10).

16. Иеговэ фІыуэ укъэзылъагъу Адэу зэрыщытыр къыбгурыІуэну сыт къыбдэІэпыкъунур?

¹⁶ Быдэу фигу ивгъэлъ: Иеговэ фІыщэу фыкъэзылъагъу фи Адэщ. Алыхьыр къывдэІэпыкъуну хуейщ икІи фыщІигъэкъуэншэн щхьэусыгъуэ къилъыхъуэкъым (Пс. 130:3; Мт. 7:11, ДЩІ; Лк 12:6, 7). Зыри имыщІысу зыкъэзылъытэж къуэш, шыпхъухэр абы теухуауэ щегупсысым деж гупсэхугъуэ ягъуэтыж. Испанием щыпсэу Мише́ль зи цІэ ди шыпхъум и щапхъэм дыхэплъэнщ. Абы и щхьэгъусэм илъэс куэдкІэ и пщІэр ириудыхыу щытащ. Абы къыхэкІкІэ, ди шыпхъур фІыуэ къамылъагъуу и гугъэт икІи зыри имыщІысу зыкъыщыхъужт. Абы жеІэ: «Сымыхьэнэншэу икІи зыри къысхуэмейуэ сегупсысу щыщІэздзэм деж, Иеговэ ІэплІэкІэ сыкъищтэу си нэгу къыщІызогъэхьэ. Апхуэдэхэм деж сэ зыхызощІэ Иеговэ фІыуэ сыкъызэрилъагъур икІи сыкъызэрихъумэр» (Пс. 28:9). Ипщэ Африкэм щыщ ди шыпхъу Ло́рен жиІэми деплъынщ: «Сэ сызэрегупсысыр мыпхуэдэущ: Иеговэ лъагъуныгъэ хэлъу и деж сыкъригъэблэгъащ. Иджыри къыздэсым ныбжьэгъу сыхуэхъуну ар къыздоІэпыкъу, уеблэмэ, цІыхухэр Библием езгъэджэну дзыхь къысхуищІащ. А псом къегъэлъагъуэ Иеговэ пэж дыдэу лъапІэу сызэрилъытэр» (Ос. 11:4).

17. Иеговэ къызэрытхуэарэзым шэч къытедмыхьэну сыт къыддэІэпыкъунур? (Псалом 5:12). (Сурэтми феплъ.)

¹⁷ Иеговэ къызэрыфхуэарэзым шэч къытевмыхьэ. (Къеджэ Псалом 5:12.) Даут жиІащ Иеговэ къызэрытхуэарэзым мэІухум хуэдэу дыкъызэрихъумэр. Аращи, зыри дримыщІысу дегупсысу щыщІэддзэм деж Иеговэ къызэрытхуэарэзым икІи къызэрыддэІэпыкъум шэч къытедмыхьэмэ, абы ди акъылыр къихъумэнущ. НтІэ, Иеговэ къызэрытхуэарэзыр дапхуэдэу къызэрытщІэнур? Алыхьым къыдита Библием деджэмэ, абы къытхуиІэ гурыщІэхэр къэтщІэфынущ. Абы нэмыщІ зэхуэсым и нэхъыжьхэр, ди ныбжьэгъухэр икІи нэгъуэщІ къуэш, шыпхъухэр къигъэсэбэпу Иеговэ и лъагъуныгъэр дегъэлъагъу. Абыхэм псалъэ гуапэхэр къыщыджаІэм деж сыт дэ тщІэн хуейр?

18. Щытхъум дапхуэдэу дызэрыхущытын хуейр?

¹⁸ Зыгуэр и гум къыбгъэдэкІыу къыщыфщытхъум деж, ар ІэщІыб фымыщІ. Апхуэдэ щІыкІэу Иеговэ арэзы къызэрыфхуэхъур фигъэлъэгъуну хуейми фщІэкъым. ИпэкІэ зи гугъу тщІа Мишель жеІэ: «Сэ стеухуауэ фІы гуэр щыжаІэм деж ар си фІэщ сщІыну хуэмурэ зызогъасэ. Ар сыт щыгъуи схузэфІэкІыу жысІэнкъым, ауэ сэ сощІэ: а Іуэхум къару зэресхьэлІэр Иеговэ и гуапэщ». Абы нэмыщІ зэхуэсым и нэхъыжьхэр Мишель доІэпыкъу, Иеговэ фІыуэ къызэрилъагъур икІи къызэрыхуэарэзыр и фІэщ ищІыну. Нобэ а шыпхъур пионеру мэлажьэ икІи Вефилым доІэпыкъу.

19. Иеговэ лъапІэу дызэрилъытэм шэч къытетхьэну щхьэусыгъуэ лъэпкъ дыщІимыІэр сыт?

¹⁹ Хьисэ гуапэу дигу къегъэкІыж уафэм щыІэ ди Адэм лъапІэу дызэрилъытэр (Лк 12:24). Аращи, абы шэч къыщІытетхьэн щхьэусыгъуэ лъэпкъ дэ диІэкъым. Ар зэи зыщыдгъэгъупщэнкъым икІи нэгъуэщІхэми дадэІэпыкъунщ Иеговэ ахэр лъапІэу зэрилъытэр къалъэгъуну.