Машинэр къесхуэкІын щызгъэтын хуейуэ пІэрэ?

Апхуэдэ Іуэхугъуэ иджыпсту уиту пІэрэ? Пэж дыдэу машинэр къепхуэкІын щыбгъэтмэ мынэхъыфІу пІэрэ? Унафэ тэмэм къэпщтэну сыт къыбдэІэпыкъунур?

Языныкъуэ къэралхэм цІыхур илъэс бжыгъэ гуэр ирикъуа иужь машинэ кърихуэкІын щхьэкІэ, дохутырым хуит ищІын хуейщ. Апхуэдэ къэралхэм щыпсэу Иеговэ и лэжьакІуэхэр а унафэм тетщ (Рим 13:1). Ауэ дэнэ щІыпІэ ущымыпсэуами, рулым удэс хъунрэ мыхъунрэ къыбгурызыгъэІуэн Іуэхугъуэ зыбжанэ щыІэщ.

МАШИНЭР КЪЫЗЭРЕПХУЭКІЫМ ЕГУПСЫС

«Национальный институт старения» (США) жыхуаІэм и саитым рул дэсхэр хуегъэуш къыкІэлъыкІуэ упщІэхэм егупсысыну:

• Гъуэгум тет знакхэр зэхэзгъэкІыфрэ икІи жэщым тэмэму слъагъурэ?

• Гъуджэхэм сиплъэну икІи абыхэм къимыщ лъэныкъуэхэмкІэ зызгъэзэну къызэхьэлъэкІрэ?

• Гъуэгум къыщыхъум елъытауэ, псынщІэу зыгуэр сщІэну къызэхьэлъэкІрэ, псалъэм папщІэ, си лъакъуэр газым къытесхыу, тормозым тескъузэну?

• Хуэму къызэрызжыхьыр нэгъуэщІхэм зэран яхуэхъурэ?

• Аварие сыхэхуэну шынагъэ щыщыІэ щІэх-щІэхыурэ къэхъуу пІэрэ? ЗыщІыпІэ сызэрыщихъуам е сызэрыжьыхэуам къыхэкІкІэ, си машинэр къитхъауэ е иушкІумбауэ щыту пІэрэ?

• Машинэр къызэресхуэкІ щІыкІэм щхьэкІэ полицейскэхэм сыкъагъэувыІауэ пІэрэ?

• Рулым сыдэсу сыщыІуриха къэхъуа?

• Машинэ къесхуэкІыну зэран къысхуэхъу хущхъуэ зэсхьэлІэу пІэрэ?

• Машинэ къызэресхуэкІ щІыкІэм теухуауэ си Іыхьлыхэр е си ныбжьэгъухэр зэрыгузавэр къызжаІэу пІэрэ?

Зы упщІэм е упщІитІым арэзы утехъуамэ, адэкІэ пщІэ хъунум егупсыс. Абы и хэкІыпІэу щытыфынущ нэхъ мащІэу рулым удэтІысхьэныр, псом хуэмыдэу, кІыфІ щыхъуам деж. Машинэр къызэрепхуэкІ щІыкІэм щІэх-щІэхыурэ кІэлъыплъ икІи уи благъэхэм е уи ныбжьэгъухэм абы теухуауэ яІэ еплъыкІэр къащІэ. Абы нэмыщІ инструктор къапщтэ хъунущ, нэхъыфІу къэбжыхьу зебгъэсэн щхьэкІэ. Ауэ мыбдеж къыщыхьа упщІэ зыбжанэм арэзы утехъуамэ, уэ уегупсысынкІэ хъунущ «машинэ къехуэкІыныр щызгъэтмэ мынэхъыфІу пІэрэ?» жыпІэуa.

БИБЛИЕМ ИТ ПРИНЦИПХЭР КЪЭГЪЭСЭБЭП

Япэм хуэдэу ІэкІуэлъакІуэу машинэр къызэромыхуэкІыжыфым арэзы утехъуэну къохьэлъэкІыу къыщІэкІынщ. Рулыр быутІыпщыпэну ущегупсысым деж, ар хуабжьу уигу щІыхьэнкІэ хъунущ. Апхуэдэм деж Іущагъ зыхэлъ унафэ къэпщтэну Библием ит сыт хуэдэ принципхэр къыбдэІэпыкъуну? Абыхэм щыщу иджыпсту тІу зэпкърытхынщ.

Уи зэфІэкІыр здынэсыр пщІэжу щыт (Прит. 11:2). ЦІыхум и ныбжьыр хэкІуэтэху, и нэми фІыуэ имылъагъужу, и тхьэкІумэми фІыуэ зэхимыхыжу мэхъу, и къаруми кІэреч, и реакцэри апхуэдэуи жаныжкъым. Псалъэм папщІэ, куэдым я ныбжьыр хэкІуэтэху, къагуроІуэ спорт лІэужьыгъуэ языныкъуэхэм зэрыхэмытыжыфынур, сыт щхьэкІэ жыпІэмэ фэбжь хахынкІэ шынагъэ щыІэщ. Машинэ къехуэкІынри абы ебгъэщхь хъунущ. Зи зэфІэкІыр здынэсыр зыщІэжым къыгуроІуэ и гъащІэр хъума хъун щхьэкІэ рулым дэтІысхьэн щигъэтын зэрыхуейр (Прит. 22:3). Абы нэмыщІ нэгъуэщІхэр зэрыгузавэр къыжраІэмэ, апхуэдэ цІыхум а псалъэхэм мыхьэнэ иритынущ. (Евгъапщэ 2 Самуила 21:15—17.)

ГъащІэр лъапІэу лъытэ (Втор. 22:8). Машинэр хуэсакъыу къезымыхуэкІым е тэмэму къезымыхуэкІыжыф цІыхур езым и гъащІэми нэгъуэщІхэм я гъащІэми зэран хуэхъуфынущ. Абы и ягъэкІэ аварие къэхъуу, зыгуэр хэкІуэдэнкІэ хъунущ.

Машинэр къомыхуэкІыжыну унафэ пщІымэ, нэгъуэщІхэм пщІэ къыпхуащІын икІи лъапІэу уалъытэн щагъэтыну уимыгугъэ. Уэ пхэлъ хьэл-щэныфІхэм щхьэкІэ, Иеговэ фІыуэ укъелъагъу. Псалъэм папщІэ, уи зэфІэкІыр здынэсыр зэрыпщІэжым, Іэдэбагъ зэрыпхэлъым икІи нэгъуэщІхэм уазэрыхуэсакъым щхьэкІэ. Абы укъегъэгугъэ сыт щыгъуи къыбдэІэпыкъуну (Ис. 46:4). Алыхьым уэ зэи укъигъэнэнукъым. Аращи, машинэр къепхуэкІын къэбгъэнэнрэ къомыгъэнэнрэ унафэ щыпщІым деж, Иеговэ Іущагъ къыуитыну елъэІу икІи сэбэп къыпхуэхъун чэнджэщхэр Библием къыщылъыхъуэ.