Алыхьым хуэпэж мелыІычхэм щапхъэ тефх

1, 2. 1) МелыІычхэмрэ дэрэ сыткІэ дызэщхьэщыкІрэ? 2) МелыІычхэмрэ дэрэ сыткІэ дызэщхь?

ИЕГОВЭ дэ псори зэкъуэту щыт и унагъуэшхуэм дыкъригъэблэгъащ. А унагъуэм хохьэ дуней псом тет къуэш, шыпхъухэмрэ, мелуан бжыгъэ хъу мелыІычхэмрэ (Дан. 7:9, 10). МелыІычхэм дыщегупсысым деж дэ япэу ди щхьэм къихьэр ахэр куэдкІэ къызэрытщхьэщыкІыращ. Псалъэм папщІэ, Иеговэ цІыхухэр къигъэщІыным зэман куэд иІэу ахэр къигъэщІащ (Иов 38:4, 7). МелыІычхэр цІыхухэм нэхърэ куэдкІэ нэхъ лъэщщ. Ахэр апхуэдизкІэ къабзэщ икІи Алыхьым хуэпэжщи, гуэныхь зыхэлъ цІыхум ар нэгъэсауэ къыгурыІуэну гугъущ (Лк. 9:26).

² Ауэ мелыІычхэмрэ дэрэ куэдкІи дызэщхьщ. Псалъэм папщІэ, дэри мелыІычхэри дызыхуейр къыхэтхынымкІэ хуитыныгъэ диІэщ икІи Иеговэ хэлъ хьэл-щэн дахэхэм хуэдэ догъэлъэгъуэф. Абы нэмыщІ дэ псоми цІэ диІэщ, хьэл зырызыххэ тхэлъщ икІи дэтхэнэ зыми Иеговэ къалэн гуэр къыдитащ. Иджыри Иеговэ мелыІычхэри дэри дыкъигъэщІащ абы дыхуэлэжьэну дыхуэныкъуэу (1 Пет. 1:12).

3. Алыхьым хуэпэж мелыІычхэм я щапхъэм сытым дыхуигъэсэфыну?

³ МелыІычхэмрэ дэрэ дызэрызэщхьым къыхэкІкІэ дэ абыхэм деж куэдым зыщедгъэсэфынущ. АдэкІэ деплъынщ Алыхьым хуэпэж мелыІычхэм Іэдэбагърэ теубыдагъэрэ зэрагъэлъагъуэм, цІыхухэр фІыуэ зэралъагъум икІи зэхуэсым илъ къабзагъэр зэрахъумэм. Иджыри дэ дытепсэлъыхьынущ мелыІычхэм дапхуэдэу щапхъэ ятетх хъунуми.

МЕЛЫІЫЧХЭМ ІЭДЭБАГЪ ЯГЪЭЛЪАГЪУЭ

4. 1) МелыІычхэм я Іэдэбагъыр сытым къыхэщрэ? 2)МелыІычхэр Іэдэбу щІыщытыр сыт? (Псалом 89:7).

⁴ МелыІычхэм Іэдэбагъ ягъэлъагъуэ. Абыхэм гъащІэм куэд хащІыкІми, къарурэ Іущагъышхуэрэ ябгъэдэлъми, ахэр Иеговэ жиІэм йодаІуэ (Пс. 103:20). МелыІычхэм ехъулІэныгъэ яІэу я къалэнхэр зэрагъэзащІэм икІи зэфІэкІышхуэ зэраІэм щхьэкІэ закъыфІэщІыжкъым. Абыхэм гуфІэгъуэ яІэу Иеговэ и Іэмырыр ягъэзащІэ икІи я цІэр щІэхъумауэ къызэрынэм иригузавэкъым (ЩІэдз. 32:24, 29; 2 Цар. 19:35)a. МелыІычхэр зэи иужь иткъым Иеговэ хуэфащэ щІыхьыр я щхьэ хуахьыну. Сыт ахэр апхуэдизу Іэдэбу щІыщытыр? Абыхэм Иеговэ фІыуэ ялъагъу икІи пщІэшхуэ хуащІри аращ. (Къеджэ Псалом 89:7.)

5. Апостол Иуан щыуагъэ щищІам щыгъуэ зы мелыІычым дапхуэдэу Іэдэбагъ зэригъэлъэгъуар? (Сурэтми феплъ.)

⁵ МелыІычхэм я Іэдэбагъыр къэзыгъэлъагъуэ зы Іуэхугъуэ дыхэплъэнщ. Хуэгъэфэщауэ ди эрэм 96 гъэм, зи цІэ дымыщІэ мелыІычым, апостол Иуан Іуэхугъуэ гъэщІэгъуэныщэхэр и нэгу щІигъэкІащ (Апок. 1:1). Дапхуэдэу ар Иуан къызэрыщыхъуар? Ар лъэгуажьэмыщхькІэ уври мелыІычым щхьэщэ хуищІыну хэтащ. Ауэ абы занщІэу къыжриІащ: «Апхуэдэу умыщІ. Уэрэ уи къуэшхэмрэ... сывигъусэу сэри Тхьэм сыхуолажьэ. Тхьэращ бгъэлъэпІэн хуейр» (Апок. 19:10). А мелыІычыр сыту Іэдэбт! Абы пщІэ лей зыхуригъэщІыну хэмыту, Иеговэ пщІэ зэрыхуищІын хуейм апостолым занщІэу гу лъригъэтащ. МелыІычым Иуан нэхърэ нэхъ лъагэу зыкъилъытакъым. ДауикІ, Иуан елъытауэ мелыІычыр куэд щІауэ Иеговэ хуэлажьэт икІи куэдкІэ нэхъ къарут. Ауэ абы Іэдэбагъ хэлъу Иуан хуэдэу Алыхьым зэрыхуэлажьэр жиІащ. Иуан щыуагъэ ищІами мелыІычыр абы ешхыдакъым, атІэ щабэу икІи гуапэу епсэлъащ. Абы къыгурыІуэу къыщІэкІынт Иуан илъэгъуа псом щхьэкІэ и гурыщІэхэм зэрызэщІищтар.

6. МелыІычхэм я Іэдэбагъым дапхуэдэу щапхъэ зэрытетхыфынур?

⁶ МелыІычхэм я Іэдэбагъым дапхуэдэу щапхъэ зэрытетхыфынур? Дэри ди щхьэ дыщымытхъужу, пщІэ лей къэдмылъыхъуэу, дегугъуу Иеговэ дыхуэлэжьэн хуейщ (1 Кор. 4:7). Дэ нэгъуэщІхэм нэхърэ зэман нэхъыбэкІэ Иеговэ дыхуэлажьэмэ е абыхэм ямыІэ къалэнхэр дгъэзащІэмэ, зыгуэркІэ дынэхъыфІу зыкъэтлъытэжын хуейкъым. Уеблэмэ, къалэн нэхъыбэ диІэху, Іэдэбагъ нэхъыбэу дгъэлъэгъуэн хуейщ (Лк. 9:48). НэгъуэщІхэм дащригъусэм деж дэ дыхуейкъым ахэр зыми имыщІысу къащыдгъэхъуну, атІэ мелыІычхэм ещхьу къуэш, шыпхъухэм дадэІэпыкъуну дыхуейщ.

7. НэгъуэщІхэм я щыуагъэм гу лъедгъэтэжын е чэнджэщ еттын щыхуейм деж дапхуэдэу Іэдэбагъ зэрыдгъэлъэгъуэфынур?

⁷ Дапщэщ иджыри Іэдэбагъ дгъэлъэгъуэн щыхуейр? Дэ нэгъуэщІым и щыуагъэм гу лъедгъэтэжын е чэнджэщ еттын щыхуей къохъу. Ар ди къуэшу, ди шыпхъуу е ди сабийуэ щытыфынущ. Иныкъуэхэм деж къехьэкІ-нехьэкІ хэмыту дыпсэлъэн хуейщ, ауэ абы къикІкъым пхъашэу дыпсалъэ хъуну. Дэ дыхуейкъым цІыхур хэдутэну и пщІэри едудыхыну. Дигу къэдгъэкІыжынщ мелыІычыр щабэу Иуан зэрепсэлъар. Дэ нэгъуэщІхэм нэхърэ нэхъ лъагэу зыкъэдмылъытэжмэ, Библием ит гупсысэхэр къыщытхькІэ гущІэгъурэ пщІэрэ хэлъу абыхэм депсэлъэнущ (Кол. 4:6).

МЕЛЫІЫЧХЭМ ЦІЫХУХЭР ФІЫУЭ ЯЛЪАГЪУ

8. 1) МелыІычхэм цІыхухэр фІыуэ зэралъагъур сытым къыхэщрэ? (Лука 15:10). 2) ХъыбарыфІыр дгъэІуну дапхуэдэу мелыІычхэр къызэрыддэІэпыкъур? (Сурэтми феплъ.)

⁸ МелыІычхэм цІыхухэр къафІэмыІуэхуу щыткъым икІи зыри имыщІысу къалъытэкъым. Абыхэм цІыхухэр фІыуэ ялъагъу. Ахэр мэгуфІэ зи гуэныхьым хущІегъуэжа Иеговэ и лэжьакІуэм зэхуэсым къыщигъэзэжым е зыгуэрым и гъащІэм зэхъуэкІыныгъэ хилъхьэу, пэжым и гъуэгум щытеувэм деж. (Къеджэ Лука 15:10.) Абы нэмыщІ мелыІычхэр къыддоІэпыкъу цІыхухэм хъыбарыфІымкІэ дадэгуэшэну (Апок. 14:6). МелыІычхэм езыхэм хъыбарыфІыр цІыхухэм жрамыІэми, Иеговэ теухуауэ къэзыщІэну хуейхэм дыхуагъэзэфынущ. ДауикІ, апхуэдэ Іуэхугъуэхэм псоми мелыІычхэр хэтауэ пхужыІэнукъым, сыт щхьэкІэ жыпІэмэ Иеговэ нэгъуэщІ Іэмалхэри къегъэсэбэп. Псалъэм папщІэ, Иеговэ и къару лъапІэр къигъэсэбэпу цІыхухэм ядоІэпыкъу икІи и лэжьакІуэхэр абыхэм яхуегъакІуэ (Апост. 16:6, 7). Ауэ, дапхуэдэу мыхъуами, дэ дыщыгугъ хъунущ хъыбарыфІыр щыдгъэІукІэ мелыІычхэр дигъусэну, сыт щхьэкІэ жыпІэмэ къыддэІэпыкъуну абыхэм я къалэнщ. («Абыхэм я тхьэлъэІухэм я жэуапхэр къаІэрыхьащ» жыхуиІэ рамкэм феплъb.)

9. МелыІычхэм цІыхухэр фІыуэ зэралъагъум дапхуэдэу щапхъэ зэрытетхыфынур?

⁹ МелыІычхэм цІыхухэр фІыуэ зэралъагъум дапхуэдэу щапхъэ зэрытетхыфынур? Зыгуэр зэхуэсым къыщыхагъэхьэжым деж мелыІычхэр зэрыгуфІэм хуэдэу, дэри дыгуфІэ хъунущ. Дэ дыхуейщ къуэшым е шыпхъум зыхедгъэщІэну ар фІыщэу зэрытлъагъур икІи Иеговэ деж къызэригъэзэжам щхьэкІэ дызэрыгуфІэр (Лк. 15:4—7; 2 Кор. 2:6—8). Дэ иджыри мелыІычхэм щапхъэ ятетхыфынущ хъыбарыфІ гъэІуным псэемыблэжу дызэрыхэтымкІэ (Эккл. 11:6). Ахэр хъыбарыфІыр дгъэІуну къызэрыддэІэпыкъум хуэдэу, дэри ди къуэш, ди шыпхъухэм а ІуэхумкІэ щІэгъэкъуэн дахуэхъуфынущ. Псалъэм папщІэ, хъыбарыфІыр игъэІун щІэзыдзагъащІэм, зи ныбжь хэкІуэтам е узыншагъэм пыщІа гугъуехь зиІэм и гъусэу хъыбарыфІыр пхуэгъэІуну пІэрэ?

10. Сарэ и щапхъэм сытым дыхуигъасэрэ?

¹⁰ Иеговэ и лэжьыгъэм япэм дызэрыхэту щытам хуэдиз иджыпсту дыхэтыну Іэмал димыІэжмэ-щэ? Апхуэдэу щытмэ, мелыІычхэм дазэрыдэлэжьэн ІэмалыщІэхэр къэтлъыхъуэ хъунущ. Индием щыщ ди шыпхъу Сарэc и щапхъэм деплъынщ. Сарэ илъэс 20 хуэдизкІэ пионеру лэжьащ, ауэ иужькІэ ар сымаджэ хьэлъэ хъури, къэмытэджыжыфу пІэхэнэ хъуащ. Ар абы хуабжьу къытехьэлъэт. Ауэ Сарэ махуэ къэс Библием зэреджэм икІи къуэш, шыпхъухэр къызэрыдэІэпыкъум и фІыгъэкІэ абы гуфІэгъуэ иІэ хъужащ. ДауикІ, абы хъыбарыфІыр зэригъэІу щІыкІэм зэхъуэкІыныгъэ хилъхьэн хуейт. Абы къызыфІэтІысхьу письмо зэримытхыфым къыхэкІкІэ телефонкІэ хъыбарыфІыр игъэІут. Сарэ цІыхухэм тригъэзэжу щепсалъэкІэ, абыхэм Библием теухуауэ нэхъыбэ къэзыщІэну хуей я цІыхугъэхэм я номерхэр къыхуагъанэт. Апхуэдэу мазэ зыбжанэм и кІуэцІым Сарэ Библием иригъаджэхэр цІыху 70-м нэсат. Абы апхуэдиз цІыху иригъэджэну хузэфІэкІтэкъыми, языныкъуэхэр зэхуэсым щыщхэм яритыжащ. Абыхэм щыщ куэдыр иджыпсту зэІущІэхэм къокІуэ. МелыІычхэр зэрыгуфІэр фи нэгу къыщІэвгъэхьэт, Сари, зыхузэфІэкІыр зыщІэ адрей Алыхьым и лэжьакІуэхэми, дэлэжьэну Іэмал зэраІэм щхьэкІэ!

МЕЛЫІЫЧХЭМ ТЕУБЫДАГЪЭ ЯГЪЭЛЪАГЪУЭ

11. МелыІычхэм теубыдагъэ ягъэлъагъуэу сыт жыпІэ щІэхъунур?

¹¹ Алыхьым хуэпэж мелыІычхэм теубыдагъэ зэрагъэлъагъуэр дэ щапхъэ тхуохъу. МелыІычхэм илъэс мин бжыгъэ хъуауэ ялъагъу щІылъэм захуагъэ лъэпкъ зэрытемытыр икІи дуней псор ІейкІэ зэрыгъэнщІар. Иджыри абыхэм ялъэгъуащ езыхэм я гъусэу Иеговэ пэжу хуэлажьэу щыта мелыІычхэр Алыхьым пэщІэувэу бий зэрыхуэхъуар (ЩІэдз. 3:1; 6:1, 2; Иудэ 6). Библием щыжыІащ Алыхьым хуэпэж зы мелыІычыр къару зиІэ жин бзаджэм махуэ бжыгъэкІэ зэребэнар (Дан. 10:13). Абы нэмыщІ мелыІычхэм ялъэгъуащ цІыхухэр дунейм зэрытетрэ и нэхъыбэм Иеговэ и лъэныкъуэр зэрамыубыдар. Ауэ, а псом емылъытауэ, Иеговэ хуэпэж мелыІычхэр хуэпабгъэу, гуфІэгъуэ яІэу адэкІи Алыхьым хуолажьэ. Абыхэм ящІэ и зэманыр къэсмэ, Иеговэ Іей псоми кІэ къызэрыхуигъэкІуэнур.

12. Теубыдагъэ дгъэлъэгъуэну сыт къыддэІэпыкъунур?

¹² МелыІычхэм теубыдагъэ зэрагъэлъагъуэм дапхуэдэу щапхъэ зэрытетхыфынур? МелыІычхэм хуэдэу дэри долъагъу дунейм пэжагъ зэрытемытыр. Ауэ дэ шэч лъэпкъ къытетхьэкъым и зэманыр къэсмэ, Иеговэ Іей псом кІэ къызэрыхуигъэкІуэным. Аращи, Алыхьым хуэпэж мелыІычхэм хуэдэу ди Іэр едмыхьэхыу, фІы зэрытщІэным дыхэтщ (Гал. 6:9). Езы Алыхьым дыкъегъэгугъэ псоми дыпэлъэщын щхьэкІэ къыддэІэпыкъуну (1 Кор. 10:13). Дэ шыІэныгъэрэ гуфІэгъуэрэ диІэн щхьэкІэ Иеговэ и къару лъапІэр къыдитыну делъэІуным мыхьэнэшхуэ иІэщ (Гал. 5:22; Кол. 1:11). Ауэ уэ Иеговэ узэрыхуэлажьэм щхьэкІэ нэгъуэщІхэр къыппэщІэувэмэ-щэ? Егъэлеяуэ умыгузавэу, Иеговэ дзыхь хуэщІ. Ар Іэмал имыІэу къыбдэІэпыкъунущ, къаруи къыуитынущ (Евр. 13:6).

МЕЛЫІЫЧХЭМ ЗЭХУЭСЫМ ИЛЪ КЪАБЗАГЪЭР ЯХЪУМЭ

13. Мы иужьрей махуэхэм мелыІычхэм сыт хуэдэ лэжьыгъэ хэха ягъэзащІэрэ? (Маттэ 13:47—49).

¹³ Мы иужьрей махуэхэм Иеговэ мелыІычхэм лэжьыгъэ хэха яритащ. (Къеджэ Маттэ 13:47—49.) Алыхьым и Пащтыхьыгъуэм теухуа хъыбарыфІым мы дуней псом мелуан бжыгъэ хъу цІыху зэмылІэужьыгъуэхэр йодаІуэ. Хэти Иеговэ и лэжьакІуэ мэхъу, хэти хъукъым. МелыІычхэм къалэн яІэщ цІыху бзаджэхэмрэ Алыхьым хуэпэж цІыхухэмрэ зыхадзыну, нэгъуэщІу жыпІэмэ, абыхэм зэхуэсым илъ къабзагъэр яхъумэ. ДауикІ абы къикІкъым зыгуэр зэхуэсым хэкІмэ, абы къигъэзэжыну зы Іэмали щымыІэу. Иджыри абы къикІкъым зэхуэсым зэи гугъуехь гуэрхэр имылъыну. Ауэ дэ шэч лъэпкъ къытедмыхьэми хъунущ зэхуэсыр къабзэу щытын щхьэкІэ, мелыІычхэм къарууэ яІэр зэрырахьэлІэм.

14, 15. МелыІычхэм зэхуэсым илъ къабзагъэр зэрахъумэм дапхуэдэу щапхъэ зэрытетхыфынур? (Сурэтхэми феплъ.)

¹⁴ МелыІычхэм зэхуэсым илъ къабзагъэр зэрахъумэм дапхуэдэу щапхъэ зэрытетхыфынур? Дэ дыхуейщ зэхуэсыр сыт хуэдэ лъэныкъуэкІи къабзэу щытын щхьэкІэ къару етхьэлІэну. Абы къыхэкІкІэ дэ дгъэныбжьэгъур Иеговэ фІыуэ зылъагъухэращ икІи абы пэжыжьэ дыхуэзыщІыфыну псом пэІэщІэ зыхудощІ (Пс. 101:3). Абы нэмыщІ ди зэхуэсым щыщхэм Иеговэ хуэпэжу къэнэну дадэІэпыкъуфынущ. Псалъэм папщІэ, къуэшым е шыпхъум гуэныхь хьэлъэ ищІауэ къатщІэмэ, сыт дэ тщІэнур? Дэ а цІыхур фІыуэ долъагъури, зэхуэсым и нэхъыжьхэм зыхуигъэзэну ар хуэдгъэушынущ. Ауэ абы а лъэбакъуэр имычмэ, дэ езым къэхъуам теухуауэ зэхуэсым и нэхъыжьхэм яжетІэнущ. Дэ дыхуейщ ахэр зэрыхъукІэ нэхъ псынщІэу зи фІэщхъуныгъэр махэ хъуа къуэшым е шыпхъум дэІэпыкъуну (Екъуб 5:14, 15).

¹⁵ Ди жагъуэ зэрыхъунщи, гуэныхь хьэлъэ зыщІахэр иныкъуэхэм деж зэхуэсым хагъэкІын хуей мэхъу. Апхуэдэу къэхъумэ дэ абыхэм депсэлъэн щыдогъэт (1 Кор. 5:9—13)d. А Іэмалым и фІыгъэкІэ зэхуэсыр къабзэу къонэ. Ауэ абы и закъуэкъым. Пэжыр жыпІэмэ, зэхуэсым хагъэкІам дызэремыпсалъэм езыми фІыгъуэ къыхуехь. Сыт апхуэдэу жыпІэ щІэхъунур? Абы щыгъуэ а цІыхум нэхъ псынщІэу къыгурыІуэнущ Иеговэ и деж къигъэзэжын зэрыхуейр. Апхуэдэу къэхъумэ, Алыхьми мелыІычхэми я гъусэу дэри дыгуфІэнущ (Лк. 15:7).

16. МелыІычхэм сыткІэ щапхъэ тепхыну ухуей?

¹⁶ Дэ Иеговэ фІыщІэшхуэ худощІ мелыІычхэм теухуауэ къызэрыджиІэм икІи абыхэм дадэлэжьэну Іэмал къызэрыдитым щхьэкІэ. МелыІычхэм Іэдэбагърэ теубыдагъэрэ зэрагъэлъагъуэм, цІыхухэр фІыуэ зэралъагъум икІи зэхуэсым илъ къабзагъэр зэрахъумэм щапхъэ тедвгъэх. Апхуэдэу тщІэмэ, Иеговэ и унагъуэшхуэм игъащІэкІэ дыхэтыфынущ.