Ди тхыгъэхэм еджэхэм я упщІэхэр

1 Тимофей 5:21 зи гугъу ищІ «Тхьэм къыхиха мелыІычхэр» хэт хъуну?

Апостол Паул езым хуэдэу зэхуэсым и нэхъыжьу щыт Тимофей хуитхащ: «Тхьэм, Зиусхьэн Хьисэ Мэссихь, Тхьэм къыхиха мелыІычхэм я пащхьэм быдэу унафэ щыпхузощІ, нэкъыфІэщІхэм зыкъевмыгъэгъапцІэу, зыми уримытелъхьэу мы Іуэху псори гъэзащІэ» (1 Тим. 5:21).

ЯпэщІыкІэ а мелыІычхэм химыубыдэр хэтми къэтщІэнщ. ГурыІуэгъуэщ абы зэрыхэмыхьэр уафэм кІуэну гугъэ зиІэ 144 000-р. Паул а псалъэхэр Тимофей щыхуитхым щыгъуэ помазанникхэр уафэм дэкІуеижын щхьэкІэ лІахэм къахэтэджыкІыжын щІадзатэкъым. Апостолхэми адрей помазанникхэми иджыри нэрымылъагъу Іэпкълъэпкъ яІэтэкъым. Абы къыхэкІкІэ «Тхьэм къыхиха мелыІычхэр» ахэракъым (1 Кор. 15:50—54; 1 Фес. 4:13—17; 1 Ин. 3:2).

Иджыри «Тхьэм къыхиха мелыІычхэм» хыхьэркъым Псыдзэшхуэр къэхъун ипэ Алыхьым и лъабжьэ щІэкІа мелыІычхэр. ШейтІаным и лъэныкъуэр щаубыдам ахэр жин бзаджэ икІи Хьисэ и бий хъуащ (ЩІэдз. 6:2; Лк. 8:30, 31; 2 Пет. 2:4). КъэкІуэну зэманым ахэр илъэс 1 000 «щІылъэм и кууупІэу щІэ зимыІэм» ирадзэнущ, абы иужь ахэр Иблис и гъусэу ягъэкІуэдыпэнущ (Апок. 20:1—3, 10; Иудэ 6).

ГурыІуэгъуэщ «Тхьэм къыхиха мелыІычхэр» ар уафэм щыІэ мелыІычхэрауэ зэрыщытыр. Абыхэм Алыхьымрэ Хьисэ Мэссихьрэ я лъэныкъуэр яІыгъщ.

Алыхьым хуэпэж мелыІычхэм я бжыгъэр мин куэдыкІей мэхъу (Евр. 12:22, 23). МелыІычхэм къалэн зырыз ягъэзащІэу къыщІэкІынщ (Апок. 14:17, 18). Псалъэм папщІэ, дигу къэдгъэкІыжынщ зы мелыІычым ашур зауэлІу 185 000 иукІыну Иеговэ къалэн зэрыритар (2 Цар. 19:35). МелыІыч зыбжанэм Алыхьым къалэн яритащ «цІыхухэм гуэныхь езыгъащІэ цІыхухэри, бзаджагъэ зыщІэ нэгъуэщІ цІыхухэри Тхьэм и Тепщэныгъэшхуэм щІагъэкъэбзыкІыну» (Мт. 13:39—41). МелыІычхэм щыщ гуэрхэм уафэм кІуэну гугъэ зиІэхэр зэхуашэс (Мт. 24:31). Алыхьым унафэ зэрахуищІам хуэдэу нэгъуэщІ мелыІычхэм дыкъахъумэ (Пс. 91:11; Мт. 18:10; евгъапщэ Маттэ 4:11; Лука 22:43).

ЗэщхьэгъуситІым хъыбарыфІыр ягъэІу, мелыІычым ахэр унэмкІэ еунэтІ. Унэм цІыхухъу щІэсщ, абы Алыхьым лъэІукІэ зыхуегъазэ.

1 Тимофей 5:21 зи гугъу ищІ «Тхьэм къыхиха мелыІычхэр» — ар зэхуэсхэм дэІэпыкъуну къалэн зыхуащІа мелыІычхэрауэ къыщІэкІынущ. Мы псалъащхьэм Паул щетх зэхуэсым и нэхъыжьхэм къуэш, шыпхъухэм пщІэ къыхуащІын щхьэкІэ я къалэнхэр дапхуэдэу ягъэзэщІэн хуейми. Абыхэм цІыху зэхэгъэж ящІын икІи унафэ гуэр къыщащтэкІэ епІэщІэкІын хуейкъым. Зэхуэсым и нэхъыжьхэр Паул и унафэм тетыным мыхьэнэшхуэ иІэщ, сыт щхьэкІэ жыпІэмэ ахэр «Тхьэм, Зиусхьэн Хьисэ Мэссихь, Тхьэм къыхиха мелыІычхэм» я пащхьэ иту я къалэныр ягъэзащІэ. Апхуэдэу, языныкъуэ мелыІычхэм я къалэныр — ар зэхуэсхэм дэІэпыкъуныращ. Абыхэм Алыхьым и лэжьакІуэхэр къахъумэ, хъыбарыфІ гъэІунымкІэ ядоІэпыкъу икІи гу зылъатар Иеговэ жраІэж (Мт. 18:10; Апок. 14:6).