Зауэм къихь гузэвэгъуэр
Зауэм хуэдэу гуауэрэ гузэвэгъуэрэ къыпхуэзыхьыр мащІэщ. Абы арэзы техъуэнущ япэм зауэм хэтахэри адрей къызэрыгуэкІ цІыхухэри.
ЯПЭМ ЗАУЭМ ХЭТАХЭМ ЖАІЭР
«Махуэ къэс болъагъу зыгуэр зэраукІыр е ныкъуэдыкъуэ зэрыхъур. КъыкІэлъыкІуэ дакъикъэм уэри езым къыпщыщІынур пщІэкъым» (Гари, Великобритание).
«Зауэм си щІыбымрэ си нэкІумрэ уІэгъэ щащІащ. ЦІыху куэд зэраукІыр си нэгу щІэкІащ. Сэ слъэгъуащ ныбжь зиІэхэмрэ сабийхэмрэ зэрылІэр. ЦІыхур зэраукІым гу щІыІэ сызэрыхуэхъуам зэгуэр сэ гу лъыстащ» (Уилмар, Колумбие).
«ЦІыхум шэ къызэрытехуэр щыплъагъукІэ, ар зэрыкІийр икІи зэрыгызыр щызэхэпхкІэ, апхуэдэр зэи пщыгъупщэжынукъым» (Зафирэ, США).
КЪЫЗЭРЫГУЭКІ ЦІЫХУХЭМ ЖАІЭР
«Зэи зыми афІэкІа гуфІэгъуэ къысхуимыхьыжыну къысщыхъут. Сэ си гъащІэм щхьэкІэ сышынэт, ауэ нэхъ Іеижу си унагъуэм щыщхэмрэ си ныбжьэгъухэмрэ щхьэкІэ сышынэт» (Александрэ, Украинэ).
«Жэщым сыхьэтитІым щыщІэдзауэ пщыхьэщхьэм сыхьэт пщыкІуз хъуху шхын къыдатыным дыпэплъэу дызэхэтт икІи абдежым дыщытыху хэти шэ цІыва къыттехуэфынут. Сыту шынагъуэт ар» (Далер, Таджикистан).
«Зауэм и ягъэкІэ сэ зеиншэу сыкъэнащ. Сэ зыми сыкъыфІэІуэхутэкъым, гупсэхугъуэ къызэзытыни сиІэтэкъым» (Мари, Руандэ).
Зауэм мы цІыхухэм я гъащІэм дыркъуэ къытринами, абыхэм гупсэхугъуэ ягъуэтыжыфащ. Абыхэм я фІэщ мэхъу зауэхэмрэ залымыгъэмрэ куэд мыщІэу кІэ къазэрыхуэкІуэнур. Ар къызэрыхъуну щІыкІэр Библием къыдгурегъаІуэ.