«Сэ Иеговэ сыхуэлэжьэну сыхуейт»

А Іуэхур зэриухар иужьыІуэкІэ вжесІэжынщ. Иджыпсту, хуит сыкъэфщІмэ, полновременнэ лэжьыгъэр зэрыщІэздзам теухуауэ къыфхуэсІуэтэнщ.

Сэ 1942-нэ гъэм Кюраса́о хытІыгу дахэм сыкъыщалъхуащ. Си адэр къыщыхъуар Суринам къэралырат, ауэ ар Кюрасао хытІыгум щылэжьэну къэІэпхъуат. Сэ сыкъалъхуным илъэситІ хуэдиз иІэу абы псым зыщІигъэуащ. Арат а хытІыгум япэ дыдэу Иеговэ и Щыхьэт хъуарa. Дэ сабиитху дыхъут. Библием деджэну дыщыхуэмей къэхъуми, ди адэм тхьэмахуэ къэс дызэхуишэст икІи Алыхьым и Псалъэм дригъаджэт. Сэ илъэс 14 сыщыхъум щыгъуэ, си адэр зи ныбжь хэкІуэта и анэм кІэлъыплъыжын хуей хъуати, зэрыунагъуэу Суринам къэралым дыІэпхъуащ.

СИ НЫБЖЬЭГЪУХЭМ ФІЫМ СЫХУАГЪЭУШАЩ

Суринам къэралым псэемыблэжу Иеговэ хуэлажьэ щІалэгъуалэхэр сэ ныбжьэгъу схуэхъуащ. Ахэр сэр нэхърэ тІэкІу нэхъыжьт икІи общэ пионеру лажьэт. ХъыбарыфІыр щагъэІум къащыщІахэр щыжаІэжкІэ ахэр апхуэдизкІэ насыпыфІэти, я нэгум нурыр кърихт. Зэхуэс нэужьым си ныбжьэгъухэмрэ сэрэ Библием тегъэщІа темэхэр зэпкърытхт, иныкъуэхэм деж вагъуэбэ жэщым дыхэплъэу. Ди ныбжьэгъугъэм и фІыгъэкІэ сэ къызгурыІуар зыщ: сэ Иеговэ сыхуэлэжьэну сыхуейт. Абы къыхэкІкІэ илъэс 16 сыщыхъум псым зыщІэзгъэуащ, илъэс 18 сыщыхъум общэ пионеру лэжьэн щІэздзащ.

МЫХЬЭНЭШХУЭ ЗИІЭ ДЕРСХЭР

Пионеру сыщылажьэм щыгъуэ, сэ куэдым зыхуезгъэсащ икІи а мыхьэнэшхуэ зиІэ дерсхэр полновременнэу сылэжьэху къысщхьэпэжащ. Псалъэм папщІэ, сэ занщІэу къызгурыІуащ къуэшхэм я къалэнхэр фІыуэ ягъэзэщІэфу ебгъэсэным мыхьэнэшхуэ зэриІэр. Пионер сыщыхъуам щыгъуэ, миссионеру лажьэ ди къуэш Виллем ван Сейел къыздэІэпыкъуу щІидзащb. Зэхуэсым къалэн зэмылІэужьыгъуэхэр зэрыщыгъэзэщІэн хуейм теухуауэ абы сэ куэдым сыхуригъэсащ. Абы щыгъуэ си гугъэххэтэкъым а псор куэд мыщІэу къысхуэсэбэпыну. Зы илъэс хуэдиз дэкІри, сэ специальнэ пионер сащІащ икІи мэз куум щыІэ гуп цІыкІухэм садэІэпыкъуну сагъэкІуащ. Къуэшхэм а гъэсэныгъэр сыту игъуэу къызбгъэдалъхьат! Сэ ар фІыщІэшхуэ сощІ. Абы лъандэрэ сэри, а къуэшхэм щапхъэ ятесхыу, адрейхэр зыгуэрым зэрыхуезгъэсэн Іэмалхэр сыт щыгъуи къызолъыхъуэ.

Иджыри сэ зезгъэсащ мылъкум етауэ щымыт гъащІэ есхьэкІыну икІи си Іуэхухэр зэтеухуауэ щытыну. Си гъусэу пионеру лажьэ къуэшымрэ сэрэ мазэм и пэм дытІысти, къытпэщылъ тхьэмахуэ зыбжанэм дызыхуэныкъуэну псор ттхыт. Абы иужь дэ тІум я зыр къалащхьэ жыжьэм кІуэти, а псор къищэхут. Къэтщэхуар фІыуэ зэдгъэзэхуэн хуейт, мазэм и кІэ хъуху дрикъун щхьэкІэ. Псалъэм папщІэ, абы щыщ гуэр дыухамэ, мэз Іувым ар къыщыпхуэщэхунутэкъым. Си щІалэгъуэм мылъкум етауэ щымыт гъащІэ есхьэкІыу икІи си Іуэхухэр зэтеухуауэ щыту зэрызезгъэсам и фІыгъэкІэ зыри зэран зыхуэзмыгъэхъуу Иеговэ си гъащІэ псокІэ сыхуэлэжьэфащ.

Иджыри мыпхуэдэ дерс хэсхащ: цІыхур щебгъаджэкІэ, и анэдэлъхубзэмкІэ ебгъаджэмэ, нэхъыфІщ. Сэ сызэрыцІыкІурэ бзиплІ сощІэ: нидерландскэ, английскэбзэ, папьяменто, абы нэмыщІ Суринам къэралым куэдыр зэрыщыпсалъэ сранан-тонго бзэр. Ауэ сэ гу лъыстащ мэз Іувым щыпсэухэр я бзэмкІэ хъыбарыфІым нэхъыфІу зэредаІуэм. Пэжыр жысІэнщи, языныкъуэ бзэхэр къызэхьэлъэкІт, псалъэм папщІэ, макъ дэшей-къешэх зыхэт сарамакканскэ бзэр. А Іуэхум къару куэд зэресхьэлІам фІыгъуэ куэд къыпэкІуэжащ, сыт щхьэкІэ жыпІэмэ бзэхэр зэрысщІэм и фІыгъэкІэ цІыху нэхъыбэ пэжым хуезгъэджэфащ.

Іэнкун узыщІ Іуэхугъуэхэри, дауикІ, къэхъут. Зэгуэр сарамакканскэбзэмкІэ Библием ирагъаджэ цІыхубзым и ныбэр зэрыузыр къэсщІати, и узыншагъэм сыщІэупщІэну мурад сщІащ. Ауэ сэ абы еста упщІэм ар хуабжьу игъэукІытащ, сыт щхьэкІэ жыпІэмэ сыщыуэри, а цІыхубзыр лъэщыджэу щытрэ щымытрэ сеупщІа хуэдэу хъуащ. Апхуэдэ гуэрхэр къызэрысщыщІым емылъытауэ, дэнэ сыщымыпсэуами, цІыхум и бзэмкІэ сызэрепсэлъэным сыхущІэкъут.

КЪАЛЭНЫЩІЭХЭР КЪЫЗАТ

1970-нэ гъэм сэ районым и нэхъыжьу сытрагъэуващ. А гъэм мэз Іувым щыпсэу гуп куэдым я деж сыщыІащ икІи Иеговэ и Щыхьэтхэм я дунейпсо ІуэхузехьэпІэм теухуа слайдхэр ди къуэш, ди шыпхъухэм езгъэлъэгъуащ. Пхъэм къыхэщІыкІа кхъуафэжьей кІыхьымкІэ дэ хьэпшып куэд здэтшэт, псалъэм папщІэ, генератор, бензин зэрыт канистрэ, керосинкІэ лажьэ уэздыгъэ нэф, слайдхэр зэрыдгъэлъэгъуэн Іэмэпсымэ. Псыежэхым дытету дыздэкІуэ щІыпІэм дынэса иужь, а псор ди плІэм телъу мэз Іувым дыхэту зэІущІэр щедгъэкІуэкІыну щІыпІэм нэс тхьыт. Ауэ сэ си гум къинэжар гугъуехьхэракъым, атІэ а мэзхэм щыпсэу цІыхухэм апхуэдэ зэІущІэхэр лъапІэу ялъытэу зэрыщытаращ. Сыту си гуапэт Иеговэрэ абы и организацэмрэ теухуауэ абыхэм къезгъэщІэну! Иеговэ сызэрыхуэлажьэм къыпІэкІуэ фІыгъуэхэр апхуэдизкІэ куэдти, зыгуэр зыхуэзгъэныкъуэн хуей зэрыхъуар сщагъэгъупщэжт.

ЩЫУЭ ЗЭГУЭЛЪ КІАПСЭ

Щхьэгъусэ сызэримыІэм и фІыгъэкІэ Алыхьым и лэжьыгъэм нэхъыбэу сыхэтыфт. Ауэ, абы емылъытауэ, щхьэгъусэфІ схуэхъун шыпхъу къэзгъуэтыну сэ сыхуейт. Абы къыхэкІкІэ мэз Іувым полновременнэ лэжьыгъэм пыщІа гугъуехьхэм имыгъэшынэ щхьэгъусэ къызитыну Иеговэ селъэІут. Илъэс хуэдиз дэкІри, специальнэ пионеру лажьэ ди зы шыпхъум сепсалъэу щІэздзащ. Псэемыблэжу щыт а шыпхъум и цІэр Этелт. ЗэрыцІыкІурэ абы апостол Паул и щапхъэр игу ирихьт икІи, абы хуэдэу, и гъащІэр зэрыщыту Иеговэ и лэжьыгъэм тригъэкІуэдэну хуейт. 1971-нэ гъэм, фокІадэ мазэм дэ дызэрышэри, зэгъусэу районнэ лэжьыгъэм пытщащ.

Этел къыщыхъуа унагъуэр къулейтэкъыми, районнэ лэжьыгъэм пыщІа гугъуехьхэм ар ягъэшынэтэкъым. Псалъэм папщІэ, мэз Іувым щыІэ зэхуэсым дыщыкІуэкІэ куэд къыздэтщтэтэкъым. Дэ псыежэххэм зыщыдгъэпскІт икІи абыхэм ди щыгъыныр щыджьыщІт. Шхын хэплъыхьи диІэтэкъым, дезыгъэблагъэхэм сыт къытхутрамыгъэувами фІыщІэ тщІыт. Мэзым е псыежэхым къыщаубыдыфа сыт хуэдэ псэущхьэри тшхыт, псалъэм папщІэ, игуанэ, пиранья е нэгъуэщІ гуэр. Тепщэч щымыІамэ, бананым и тхьэмпэхэр къэдгъэсэбэпт, гуахъуэ, бжэмышх щымыІамэ, ІэкІэ дышхэт. Иеговэ псэемыблэжу дызэрыхуэлажьэм щыуэ зэгуэлъ кІапсэ быдэ дызэрищІыр Этелрэ сэрэ зыхэтщІэт (Эккл. 4:12). Апхуэдэ гъащІэм пэтщІын зыри щыІэтэкъым!

Ипэ дыдэм зи гугъу сщІа Іуэхугъуэр зэриухар вжесІэжынщ иджы. Дызэрыс кхъуафэжьейр псым щІиІуба щхьэкІэ, щІимылъафу занщІэу къыхэпкІыжащ. Ди насыпти, «спасательные жилеты» жыхуаІэхэр тщыгът: аращ дэ кхъуафэжьейм дыкъыщІимыхуар. Ауэ абы псыр из хъуати, шыуан цІыкІухэм илъ шхыныр псым хэддзэри, абыхэмкІэ кхъуафэжьейм ит псыр къыщІэдгъалъэурэ къитхыу щІэддзащ.

Тшхын димыІэу дыкъэнати, бдзэжьей дещэу щІэддзащ, арщхьэкІэ зыри къытхуэубыдтэкъым. Апхуэдэу щыхъум, Иеговэ делъэІуащ нобэ дызыхуэныкъуэ шхыныр къыдитыну. «Іэмин» зэрыжытІэу, ди зы къуэшым и къунтхыр псым хидзэри, занщІэу зы бдзэжьеишхуэ къиубыдащ. А бдзэжьейр цІыхухъуищымрэ цІыхубзитІымрэ ди ныбэ изу дрикъуащ.

ЩХЬЭГЪУСЭУ, АДЭУ ИКІИ РАЙОНЫМ И НЭХЪЫЖЬУ СЫЩЫТЩ

Районнэ лэжьыгъэм илъэситхукІэ дыхэта иужь, Этелрэ сэрэ къэтщІащ куэд мыщІэу сабий дызэриІэнур. Сэ абы сыщыгуфІыкІт, ауэ тІэкІуи сыгузавэт. Дэ дыхуейт полновременнэ лэжьыгъэм адэкІи дыхэтыну. 1976-нэ гъэм ди къуэ Э́тниэл дунейм къытехьащ, илъэситІрэ ныкъуэрэ дэкІри, абы и къуэш цІыкІу Гьофа́нни къалъхуащ.

А зэманым ди организацэр Суринам къэралым районым и нэхъыжьу щылэжьэн къуэшхэм хуэныкъуэти, филиалым хуит сищІащ адэм и къалэнхэмрэ районым и нэхъыжьым и къалэнхэмрэ здэсхьыну. Ди къуэхэр щыцІыкІум щыгъуэ, зэхуэс мащІэ зыхыхьэ районхэр къызатт. Абы и фІыгъэкІэ тхьэмахуитІкІэ районым и нэхъыжьу сылажьэт, адрей зэманым ди зэхуэсым и гъусэу пионер лэжьыгъэм сыхэтт. Сыздэлэжьэну зэхуэсыр ди унэм щыпэмыжыжьэм деж, си щхьэгъусэмрэ си къуэхэмрэ къыздэсщтэт. Ауэ зэхуэсыр е конгрессыр мэз Іувым щыщекІуэкІым деж, абы си закъуэу сыкІуэт.

Къалэн куэдыр здэсхьыфын щхьэкІэ, псори фІыуэ зэтезухуэн хуейт. Ди унагъуэм Библиер зэгъусэу тхьэмахуэ къэс зэриджыным сэ сыкІэлъыплът. Зэхуэс гуэрым сыдэІэпыкъуну мэз Іувым сыкІуауэ сыкъыщытым деж, ди щІалэхэр Этел иригъаджэт. Дауэ мыхъуами, зэман нэхъыбэ дызэгъусэу зэрыдгъэкІуэным дыхущІэкъут. Этелрэ сэрэ сабийхэм я гъусэу зэрызыдгъэпсэхун Іэмал къэтлъыхъуэт: зэгъусэу дыджэгут е природэм дыкІуэт. Районым и Іуэхухэм яужь ситурэ жэщ ныкъуэ хъуху сыщыщыс щІэх-щІэхыурэ къэхъут. Притчи 31:15 зи гугъу ищІ щхьэгъусэфІым хуэдэу, Этел пщэдджыжьым жьыуэ, иджыри кІыфІу къэтэджт. Абы и фІыгъэкІэ, ди щІалэхэр школым щІэмыкІ щІыкІэ, зэгъусэу пщэдджыжьышхэ тщІыну икІи махуэм хухэха едзыгъуэр зэпкърытхыну Іэмал диІэт. Сэ Иеговэ фІыщІэшхуэ хузощІ апхуэдизу псэемыблэжу щыт щхьэгъусэ къызэрызитам щхьэкІэ! Си къалэнхэр нэгъэсауэ згъэзэщІэну Этел сыт щыгъуи къыздэІэпыкъут.

Ди щІалэхэм Иеговэрэ абы и лэжьыгъэмрэ фІыуэ ялъагъун щхьэкІэ, дэ тхузэфІэкІ къэдгъэнакъым. Дэ дыхуейт абыхэм полновременнэ лэжьыгъэр я гъащІэ гъуэгу ящІыну икІи апхуэдэ унафэм щхьэусыгъуэ хуэхъун хуейр дэ абы дызэрыхуейратэкъым, атІэ езыхэр абы зэрыхущІэкъурат. Абыхэм дащыдэуэршэркІэ дэ къыхэдгъэщт полновременнэ лэжьыгъэм гуфІэгъуэшхуэ къызэрытхуихьыр. Гугъуехь дызэриІари дыбзыщІтэкъым, ауэ Иеговэ сыт щыгъуи ди унагъуэм къызэрыдэІэпыкъуу щытар нэхъыбэу къыхэдгъэщт. Абы нэмыщІ зи гъащІэм япэ увыпІэр Иеговэ езыт къуэш, шыпхъухэр ди къуэхэм ныбжьэгъу зэрахуэхъуным дэ дыкІэлъыплът.

Ди къуэхэр къыдэкІуэтеиху ахэр зыхуей хуэдгъэзэну Иеговэ къыддэІэпыкъуащ. ДауикІ, сэри сыхущІэкъут адэм и къалэныр нэгъэсауэ згъэзэщІэну. Специальнэ пионеру сыщылажьэм ахъшэр зэзгъэзахуэу икІи сызыхуэныкъуэм фІэкІ нэгъуэщІым зыми ар тезмыгъэкІуадэу сыпсэууэ зезгъэсащ. Дызыхуэныкъуэ гуэр щыдмыгъуэт къэхъуми, сэ шэч къытесхьэтэкъым Иеговэ къызэрыддэІэпыкъунум. Псалъэм папщІэ, 1980 гъэхэм и кІэмрэ 1990 гъэхэм и пэмрэ Суринам гражданскэ зауэ щекІуэкІти, Іуэхур щІагъуэтэкъым. А зэманым узыхуэныкъуэр къэбгъуэтыну тынштэкъым, ауэ дэ Иеговэ зэи дыкъигъэнакъым (Мт. 6:32).

СЫКЪЫЗЭПЛЪЭКІЫЖМЭ

Иеговэ сыт щыгъуи и нэІэ къыттригъэтт икІи ди гъащІэр насыпкІэ гъэнщІат. Ди бынхэр — Иеговэ къыдита тыгъэщ! Ахэр дгъэсэну ди дежкІэ щІыхьышхуэт. ПсалъэкІэ пхужыІэнкъым дэ дызэрыщыгуфІыкІыр абыхэми полновременнэ лэжьыгъэр я гъащІэ гъуэгу зэращІам. Этниелрэ Гьофаннирэ ди организацэм иригъэкІуэкІ школ зэмылІэужьыгъуэхэм щеджащ икІи иджыпсту я щхьэгъусэхэр я гъусэу ахэр Суринам щыІэ филиалым щолажьэ.

Этелрэ сэрэ ди ныбжьыр хэкІуэтами, специальнэ пионеру Иеговэ и лэжьыгъэм тхузэфІэкІыр хыдощІыхь. Дэ апхуэдизкІэ дыхущІыхьэкъыми, иджыри къыздэсым сэ есыкІэ зезгъэсэну зэман къысхуэгъуэтакъым. Ауэ сэ зыми сыхущІегъуэжкъым! СыкъызэплъэкІыжмэ, жысІэфынур зыщ: полновременнэ лэжьыгъэм си гъащІэр тезгъэкІуэдэну сыщыныбжьыщІэм къэсщта унафэм нэхърэ нэхъыфІ си гъащІэм къэсщтауэ къыщІэкІынкъым!