«ЦІыху Іущхэм жаІэм щІэдэІу»

1. Дапщэщ дэ чэнджэщ къыщыдатынкІэ хъунур икІи абы дедэІуэным мыхьэнэшхуэ щІиІэр сыт?

ЗЭМАН-ЗЭМАНКІЭРЭ дэ псори чэнджэщ дыщыхуэныкъуэ къохъу. Иныкъуэхэм деж пщІэ зыхуэтщІ гуэрым чэнджэщ къыдитыну дэ езым долъэІу. Ауэ дызыхущІегъуэжын щыуагъэ дымыщІэн щхьэкІэ къуэшым е шыпхъум чэнджэщ къыщыдити къохъу (Гал. 6:1). Абы нэмыщІ щыуагъэшхуэ тщІауэ щытмэ, дауикІ, чэнджэщ къыдатыну дэ дыхуэныкъуэщ. Чэнджэщыр дапхуэдэ щІыкІэкІэ къыдамытами, абы дедэІуэным мыхьэнэшхуэ иІэщ. Ар дэ къыддэІэпыкъунущ фІыкІэ зытхъуэжыну, уеблэмэ, ди гъащІэри къригъэлынкІэ хъунущ (Прит. 6:23, Гъэс.).

2. Притчи 12:15 зэритымкІэ, чэнджэщхэм дедэІуэну сыт хуэдэ щхьэусыгъуэ диІэр?

² Мы статьяр зытегъэщІа пычыгъуэм дыхуегъэуш «цІыху Іущхэм жаІэм» дыщІэдэІуну (Прит. 22:17, Гъэс.). Псори зыщІэ цІыху мы дунейм теткъым. Абы къыхэкІкІэ дэ нэхърэ нэхъыфІу Іуэху гуэрым щыгъуазэ цІыху сыт щыгъуи щыІэнущ. (Къеджэ Притчи 12:15, Гъэс.) Аращи, чэнджэщхэм дызэредаІуэмкІэ Іэдэбагъ догъэлъагъуэ, нэгъуэщІу жыпІэмэ, ди щІэныгъэмрэ ди зэфІэкІымрэ гъунэ зэриІэм икІи дэІэпыкъуэгъу дызэрыхуэныкъуэм дэ арэзы дытохъуэ. Алыхьым и къару лъапІэм пащтыхь Сэлмэн хуигъэушащ Іущагъ зыхэлъ мы псалъэхэр итхыну: «Чэнджэщэгъу зи куэдым ехъулІэныгъэ иІэнущ» (Прит. 15:22).

3. Сыт хуэдэ щІыкІэкІэ Иеговэ чэнджэщхэр къыдитрэ?

³ Иеговэ чэнджэщ къыдитын щхьэкІэ ІэмалитІ къегъэсэбэп: языныкъуэхэр и лъэпкъ псом хуэгъэзащ, адрейхэр — зы цІыхум хуэгъэзауэ щытыфынущ. Дапхуэдэу абы и лъэпкъ псом чэнджэщ зэрыритыр? Псалъэм папщІэ, Алыхьым Библиемрэ абы тегъэщІа публикациехэмрэ къыдитащ. Абыхэм дыщеджэм деж дэ къыдгуроІуэ дызэджар къызэрытлъэІэсыр икІи ди гъащІэм зэхъуэкІыныгъэ гуэр хэтлъхьэн зэрыхуейр (Евр. 4:12). Ауэ нэгъуэщІуи къэхъуфынущ. Псалъэм папщІэ, зэхуэсым и нэхъыжьыр хьэмэрэ Иеговэ и еплъыкІэ зиІэ къуэшыр е шыпхъур къыдбгъэдыхьэу дызэлэжьын хуейм теухуауэ къыджиІэфынущ. Апхуэдэ щІыкІэкІэ Иеговэ дэ езым чэнджэщ къыдиту жыпІэ хъунущ. ЦІыхур къыдэгупсысри, ди Іуэхум хуэкІуэ принципхэр Библием къыщигъуэтащ. Ар щыхьэт тохъуэ абы фІыуэ дыкъызэрилъагъур. Дэри ди лъэныкъуэкІэ чэнджэщыр фІыщІэ зэрытщІыр къэдгъэлъэгъуэфынущ, абы дедаІуэмэ икІи ар дгъэзащІэмэ.

4. Экклезиаст 7:9 зэритымкІэ, чэнджэщ къыщыдатым деж сыт тщІэн хуэмейр?

⁴ Чэнджэщ къыщыдатым деж абы дедэІуэну тыншкъым, уеблэмэ, зыдгъэгусэнкІи хъунущ. ГъэщІэгъуэныращи, дэ псоми къыдгуроІуэ гуэныхь зэрытхэлъыр, ауэ зыгуэрым ди ныкъусаным гу щылъыдигъатэм деж ар ди гум ежэлІэфынущ икІи ди жагъуэ хъуфынущ. (Къеджэ Экклезиаст 7:9.) Абы щыгъуэ ди щхьэр дгъэзэхуэжу щІэддзэнкІэ хъунущ. Къыдата чэнджэщымрэ ар къызэрыдата щІыкІэмрэ дигу иримыхьауэ щытмэ, мыпхуэдэу жытІэнкІэ хъунущ: «Сыту абы зыкъызэрыщыхъужар? И щхьэм иреплъыжи нэхъыфІщ!» Апхуэдэ гупсысэкІэ диІэу щытмэ, къыдат чэнджэщым демыдэІуэнкІэ хъунущ е дигу ирихьын гуэр къыджезыІэн къэтлъыхъуэу щІэддзэфынущ.

5. Мы статьям сыт щызэпкърытхынур?

⁵ Мы статьям дэ дыщытепсэлъыхьынущ Библием зи гугъу ищІ цІыху зыбжанэм я щапхъэхэм: языныкъуэхэм чэнджэщыр ІэщІыб ящІащ, адрейхэр — чэнджэщым едэІуащ. Абы нэмыщІ чэнджэщ къыдатым еплъыкІэ тэмэм худиІэну сыт къыддэІэпыкъунуми и гугъу тщІынущ.

ЧЭНДЖЭЩЫР ІЭЩІЫБ ЗЫЩІАХЭР

6. Ровоам кърата чэнджэщым зэрыхущытам дэ сытым дыхуигъасэрэ?

⁶ Пащтыхь Ровоам и щапхъэр дигу къэдгъэкІыжынщ. Ар Израилым и пащтыхь щыхъуам щыгъуэ цІыхухэр абы къелъэІуащ и адэ Сэлмэн лъэпкъым трилъхьа хьэлъэр нэхъ псынщІэ яхуищІыну. ЦІыхухэм жэуап яритыжын ипэ Ровоам нэхъыжьхэм зэречэнджэщамкІэ Іущагъ игъэлъэгъуащ. Абыхэм Ровоам жраІащ цІыхухэр къызэрелъэІуар яхуищІэмэ, ахэр я фІэфІу абы зэрыхуэлэжьэнур (1 Цар. 12:3—7). Нэхъыжьхэм кърата чэнджэщыр игу иримыхьу Ровоам и ныбжьэгъу щІалэхэм захуигъэзащ. А зэманым абыхэм я ныбжьыр илъэс 40-м нэблэгъат икІи гъащІэм зыри хамыщІыкІыу пхужыІэнутэкъым (2 Лет. 12:13). Ауэ а Іуэхум теухуауэ абыхэм Ровоам чэнджэщ мыхъумыщІэ иратащ: лъэпкъым и пщэ дэлъ хьэлъэр нэхъыбэж ищІыну (1 Цар. 12:8—11). Апхуэдизу зэщхьэщыкІ чэнджэщитІ щызэхихым щыгъуэ Ровоам Иеговэ тхьэлъэІукІэ зыхуигъазэу еупщІ хъунут дэтхэнэ чэнджэщым едаІуэмэ нэхъыфІми. Ауэ абы ипІэкІэ Ровоам и ныбжьэгъухэм кърата чэнджэщым едэІуащ, ар игу ирихьати. Абы къищта унафэм езыми Израил цІыхухэми фІы лъэпкъ къахуихьакъым. Ди дежкІэ сыт хуэдэ дерс абы хэлъыр? Дэ къыдат чэнджэщыр дигу иримыхьынкІэ хъунущ, ауэ, ар Библием тегъэщІауэ щытмэ, абы дедэІуэн хуейщ.

7. Пащтыхь Уззия и щапхъэм сытым дыхуигъасэрэ?

⁷ Пащтыхь Уззия кърата чэнджэщыр ІэщІыб ищІащ. Ар дин пашэхэм фІэкІа зыри зыщІэмыхьэ хъуну Иеговэ и Унэшхуэм и Іыхьэм щІыхьэри, фимиамыр игъэсыну хэтащ. Дин пашэхэм абы жраІащ: «Уззия, уэ хуитыныгъэ уиІэкъым фимиамыр Иеговэ хуэбгъэсыну! Фимиамыр дин пашэхэм фІэкІа нэгъуэщІым зыми игъэс хъунукъым». Абы Іэдэбагъ хэлъу зэрыщыуар къыгурыІуэжу Алыхьым и Унэшхуэм щІэкІыжауэ щытамэ, Иеговэ абы и гуэныхьыр къыхуигъэгъункІэ хъунут. Ауэ Уззия апхуэдэу ищІакъым: ар дин пашэхэм яхуэгубжьащ. Сыт Уззия апхуэдэ ерыщагъ щІигъэлъэгъуар? Ар зэрыпащтыхьым къыхэкІкІэ зыхуейуэ хъуар ищІэну хуиту егупсысу щІидзауэ къыщІэкІынущ. Ауэ а Іуэхум теухуауэ Иеговэ нэгъуэщІ еплъыкІэт иІэр. Уззия и щхьэзыфІэфІагъым къыхэкІкІэ «лІэжыху уэшын уз къефыкІащ» (2 Лет. 26:16—21). Уззия и щапхъэм сытым дыхуигъасэрэ? Библиер къагъэсэбэпу ди къуаншагъэр щыдагъэлъэгъужым деж дэ зытхъуэжын хуейщ. Армыхъумэ, сыт хуэдэ къалэн зэхуэсым щыдмыгъэзащІэми, Иеговэ и ныбжьэгъуу дыщытыфынукъым.

ЧЭНДЖЭЩЫМ ЕДЭІУАХЭР

8. Іэиуб кърата чэнджэщым дапхуэдэу зэрыхущытар?

⁸ Щапхъэ Іей зыгъэлъэгъуа цІыхухэм нэмыщІ, щапхъэфІ зыгъэлъэгъуа цІыхухэми Библиер топсэлъыхь. Іэиуб и щапхъэр дигу къэдгъэкІыжынщ. Абы Иеговэ фІыуэ зэрилъагъум икІи сыт щыгъуи захуагъэм тетыну зэрыхущІэкъум щхьэкІэ къэмынэу, ар щыщыуаи къэхъуащ. Іэиуб гъащІэм апхуэдизкІэ ириудэкІати, Алыхьым теухуауэ пэжу щымыт гупсысэхэр щыжиІа къэхъуащ. Ар зэрыщыуэм теухуауэ Елиуйи езы Иегови Іэиуб жраІауэ щытащ. Дапхуэдэу абы ар къызэрыщыхъуар? Іэиуб Іэдэбагъ хэлъу и щыуагъэр къыгурыІуэжри, мыпхуэдэу жиІащ: «Сэ зыхэзмыщІыкІым сытепсэлъыхьт. [...] Абы къыхэкІкІэ сэ сабэм икІи сахуэм сыхэсу сыщІогъуэж». Іэиуб игъэлъэгъуа Іэдэбагъыр Иеговэ игу ирихьащ икІи и нэфІ щыхуащ (Иов 42:3—6, 12—17).

9. Сыт хуэдэ щапхъэ Мусэ къытхуигъэнар?

⁹ Мусэ и щапхъэри дигу къэдгъэкІыжынщ. Абыи щыуагъэшхуэ щищІа къэхъуащ, ауэ и къуаншагъэр къыгурыІуэжа нэужь зихъуэжащ. Зэгуэр къызэрыгубжьам къыхэкІкІэ абы Иеговэ хуэфащэ щІыхьыр хуищІакъым. Абы щхьэкІэ Алыхьым Израил лъэпкъыр къызэригъэгугъа щІыналъэм ихьэну Мусэ иІа Іэмалыр фІэкІуэдащ (Чис. 20:1—13). Мусэ ар хуабжьу игу къеуащ икІи Иеговэ и унафэр ихъуэжыну елъэІуат, ауэ Алыхьым абы мыпхуэдэу къыжриІащ: «Хъунщ иджы! АфІэкІ абыкІэ укъызэмылъэІу!» (Втор. 3:23—27). Мусэ Іэдэбу Иеговэ и унафэр къищтащ, абы къыхэкІкІэ Иеговэ хуит ищІащ ар адэкІи Израил лъэпкъым и пашэу щытыну (Втор. 4:1). Іэиуби Муси щапхъэфІ дыдэ къытхуагъэнащ. Іэиуб и щыуагъэм теухуауэ щыжраІам щыгъуэ абы и щхьэр игъэзэхуэжыну иужь имыту занщІэу зихъуэжащ. Мусэ Иеговэ хуэпэжу къэнащ, Алыхьым Израил лъэпкъыр къызэригъэгугъа щІыналъэм ихьэну иІа Іэмалыр зэрыфІэкІуэдам щхьэкІэ къэмынэу.

10. 1) Притчи 4:10—13 ит ущиехэм дедэІуэным мыхьэнэшхуэ щІиІэр сыт? 2) Эммануэль, Меган, Марко сымэ я псалъэхэм сыт хуэдэ дерс къыхэфха?

¹⁰ Іэиубрэ Мусэрэ хуэдэ цІыху пэжхэм щапхъэ тетхмэ, дэ абы сэбэпынагъ къытхуихьынущ. (Къеджэ Притчи 4:10—13, Гъэс.) Ар зэрыпэжым къуэш, шыпхъу куэдыр щыхьэт тохъуэ. Конго щыщ Эммануэ́льb щыуагъэшхуэхэр имыщІэну зэхуэсым и нэхъыжьхэр къыдэІэпыкъуащ. Ар къыддогуашэ: «Алыхьым и еплъыкІэ зиІэ къуэшхэм си фІэщхъуныгъэр махэ зэрыхъуам икІи Иеговэрэ сэрэ ди зэхуаку дэлъ зэхущытыкІэр зэтекъутэну шынагъэ зэрыщыІэм гу лъатэри, къыздэІэпыкъуащ. Абыхэм я чэнджэщхэм сызэредэІуам и фІыгъэкІэ гугъуехь куэдым щыхъума сыхъуащ». Канадэ щыщ пионеру лажьэ ди шыпхъу Ме́ган къыддогуашэ: «Чэнджэщ къызэрызатыр сигу щримыхь къохъу, ауэ сэ къызгуроІуэ арыншэуи зэрымыхъунур». Хорватием щыщ ди къуэш Ма́рко и псалъэхэми гу лъыттэнщ. Абы жеІэ: «Сэ зэхуэсым щызгъэзащІэ къалэнхэр сфІэкІуэдауэ щытащ. Ауэ иджыпсту къызгуроІуэ: абы щыгъуэ къуэшхэм чэнджэщ къызамытауэ щытамэ, сэ Иеговэ пэжыжьэ сыхуэхъунут».

11. Чэнджэщхэм къытхуахь сэбэпынагъым теухуауэ Карл Клейн сыт жиІэжар?

¹¹ УнафэщІ гупым хэта Карл Клейн чэнджэщхэм къыпхуахь сэбэпынагъым теухуауэ жиІэжащ. И щІалэгъуэм абырэ Джо́зеф Рутерфо́рдрэ зэныбжьэгъут икІи зэгуэр абы чэнджэщ ткІий къритауэ щытащ. Ди къуэш Карл зэрыжиІэжымкІэ, япэщІыкІэ ар абы игу ирихьакъым. И гъащІэм теухуауэ абы итхыжам мыпхуэдэ псалъэхэр хэтщ: «ИужькІэ ди къуэш Рутерфорд сыщыхуэзам щыгъуэ абы гуапэу сэлам къызихащ: „Карл, дауэ ущыт?“ Ауэ абы къызжиІар иджыри си гум хьэлъэу телъти, ерагъкІэ къыдэсшейри сэлам есхыжащ. Арати, абы мыпхуэдэу къызжиІащ: „Карл, сакъ! ШейтІаныр уи ужь итщ!“ Сэ сыукІытэжауэ абы жэуап естащ: „Псори тэмэмщ, си къуэш Рутерфорд“. Ауэ абы къыгурыІуэт зыри зэрымытэмэмыр. Абы щхьэкІэ къытригъэзэжри, иджыри зэ къызжиІащ: „Хъунщ, ауэ сакъ. ШейтІаныр уи ужь итщ“. Абы жиІэр пэжт. Чэнджэщ къыдитыну хуитыныгъэ зиІэ къуэшым зыгуэр къызэрыджиІам щхьэкІэ зыхуэдгъэгусэу щытмэ... ШейтІаным и къапхъэным дихуэну шынагъэ щыІэщ»c (Еф. 4:25—27). Рутерфорд и чэнджэщым Карл Клейн зэредэІуам и фІыгъэкІэ ахэр зэныбжьэгъуу къэнащ.

ЧЭНДЖЭЩХЭМ ДЕДЭІУЭНУ СЫТ КЪЫДДЭІЭПЫКЪУНУР?

12. Чэнджэщхэм дедэІуэну Іэдэбагъыр дапхуэдэу къызэрыддэІэпыкъур? (Псалом 141:5).

¹² Чэнджэщхэм дедэІуэну сыт къыддэІэпыкъунур? Япэрауэ, Іэдэбу дыщытын хуейщ. Дэ зыщыдгъэгъупщэн хуейкъым гуэныхь зэрытхэлъыр икІи иныкъуэхэм деж ди ІуэхущІафэхэм акъыл хэмылъу зэрыщытыфынур. Мы статьям и гугъу зэрыщытщІам хуэдэу, Іэиуб щыуагъэ ищІами, иужькІэ и гупсысэкІэр ихъуэжащ, сыт щхьэкІэ жыпІэмэ ар цІыху Іэдэбт. Псалъэм папщІэ, езым нэхърэ куэдкІэ нэхъ щІалэ Елиуй и псалъэхэм ар едэІуащ (Иов 32:6, 7). Иеговэ Іэиуб и нэфІ щыхуащ ар Іэдэбу зэрыщытам щхьэкІэ. Дэри Іэдэбагъыр къыддэІэпыкъунущ, къыдат чэнджэщым дыхуэмыныкъуэу къытщыхъумэ е ар къыдэзытыр дэр нэхърэ нэхъыщІэу щытмэ. Канадэ щыщ зэхуэсым и нэхъыжьым мыпхуэдэу жеІэ: «Дэ зэрызыдмылъагъужым къыхэкІкІэ зыгуэрым чэнджэщ къыдимытмэ, Алыхьым и фІэфІ хьэл-щэнхэр тхузыхэлъхьэнукъым». ДауикІ, зыми жиІэфынукъым ар нэхъ егъэджакІуэфІ хъун икІи Алыхьым и къару лъапІэм къыбгъэдэкІ хьэл-щэнхэр зыхилъхьэн щхьэкІэ иригъэфІэкІуэн хуэмейуэ. (Къеджэ Псалом 141:5.)

13. Дапхуэдэу дэ чэнджэщхэм дазэрыхущытын хуейр?

¹³ Иеговэ и лъагъуныгъэр зэрыдигъэлъагъу Іэмалу чэнджэщхэр къэфлъытэ. Алыхьыр хуейщ дэ фІым дыхуэзэну (Прит. 4:20—22, Гъэс.). Иеговэ и лъагъуныгъэр дегъэлъагъу Библиер, абы тегъэщІа публикациехэр е къуэш, шыпхъухэр къигъэсэбэпу чэнджэщ къызэрыдитымкІэ. Еврейхэм 12:9, 10 зэритымкІэ, Иеговэ «и фІагъ къыдигъэкІыну ІурыщІэ дещІ».

14. Чэнджэщ къыщыдатым деж сыт зыщыдгъэгъупщэн хуэмейр?

¹⁴ Зыщывмыгъэгъупщэ: мыхьэнэ зэттын хуейр чэнджэщ къызэрыдыта щІыкІэракъым, атІэ езы чэнджэщыращ. Иныкъуэхэм деж чэнджэщ къызэрыдат щІыкІэр дигу иримыхьынкІэ хъунущ. ДауикІ, Иеговэ и Щыхьэтхэм чэнджэщ щаткІэ гуапагърэ щабагърэ яхэлъын хуейщ (Гал. 6:1)d. Ауэ чэнджэщ къызэрыдата щІыкІэр дигу иримыхьами, дэ зыщыдгъэгъупщэн хуейкъым: япэ дыдэу мыхьэнэ зэттын хуейр езы чэнджэщыращ. ФызэупщІыж: «Чэнджэщ къызэрызата щІыкІэр сигу иримыхьами, абы пэж гуэр хэмылъу пІэрэ? Чэнджэщ къызэзытам и ныкъусанхэр сигу къэзмыгъэкІыжу, абы и псалъэхэр къызэрыслъэІэсым сегупсысмэ, мынэхъыфІу пІэрэ?» Чэнджэщ къыдатыр дигу ирихьми иримыхьми, абы хэлъ сэбэпынагъым гу лъыттэным Іущагъ хэлъщ (Прит. 15:31, Гъэс.).

ЧЭНДЖЭЩ КЪЫВАТЫХУ ФЕМЫЖЬЭУ ФЭ ЕЗЫМ АР КЪЭФЛЪЫХЪУЭ

15. НэгъуэщІхэм я деж чэнджэщ къыщытлъыхъуэным мыхьэнэшхуэ щІиІэр сыт?

¹⁵ Библием дыхуегъэуш нэгъуэщІхэм я деж чэнджэщ къыщытлъыхъуэну. Притчи 13:10 (Гъэс.) мыпхуэдэу щыжыІащ: «Чэнджэщ щІэдэІур Іущщ». Мы псалъэхэр сыту пэж! Зыгуэр къыдбгъэдыхьэу чэнджэщ къыдитыху демыжьэу, япэ лъэбакъуэ тчырэ, дызэлэжьын хуейм теухуауэ нэгъуэщІым деупщІмэ, нэхъыфІщ. Апхуэдэу тщІэмэ, нэхъ Іущ дыхъунущ икІи Алыхьым и еплъыкІэр зэдгъэгъуэтынущ. Аращи, нэгъуэщІхэр къывбгъэдыхьэху фемыжьэу фэ езым япэ зивгъэщ.

16. Сыт хуэдэ Іуэхугъуэхэм деж ди къуэш, ди шыпхъухэм дыщечэнджэщ хъунур?

¹⁶ Сыт хуэдэ Іуэхугъуэхэм деж ди къуэш, ди шыпхъухэм дыщечэнджэщ хъунур? Щапхъэ зыбжанэ зэпкърытхынщ: 1) Шыпхъум цІыхубз гуэр Библием ирегъаджэ. ЕгъэджакІуэфІу щыт гуэр абы Библие джыным кърегъэблагъэри, езым иригъэфІэкІуэн щхьэкІэ сыт ищІэ хъунуми йоупщІ. 2) Щхьэгъусэ зимыІэ шыпхъум щыгъын къищэхуну хуейщи, Алыхьым и еплъыкІэ зиІэ шыпхъум йочэнджэщ. 3) Псалъэ гъэхьэзыра зэи жызымыІа къуэшым псалъэ игъэхьэзырыну къалэн къратащ. А ІуэхумкІэ ехъулІэныгъэ зиІэ къуэшым ар йолъэІу псалъэ щыжиІэкІэ фІыуэ едаІуэу, зэлэжьын хуей лъэныкъуэхэм теухуауэ чэнджэщ къритыну. Илъэс куэд щІауэ псалъэ гъэхьэзыра жызыІэ къуэшхэми мы чэнджэщыр къагъэсэбэп хъунущ.

17. Къыдат чэнджэщым сэбэпынагъ къытхуихьын щхьэкІэ сыт тщІэн хуейр?

¹⁷ Дэ къэтщІащ Иеговэ и лъэпкъ псор зэригъасэм нэмыщІ, дэтхэнэ зыри дызэригъасэр. Чэнджэщхэр къызэрыдат щІыкІэр зэмыщхьми, дэ щІэх-щІэхыурэ чэнджэщ гуэрхэр къыдатынущ. Аращи, чэнджэщ къыщыдатым деж мы статьям ит гупсысэ нэхъыщхьэхэр къызэрыдгъэсэбэпыным иужь дивгъэт: Іэдэбу дыщывгъэт, чэнджэщ къызэрыдата щІыкІэм мыхьэнэ едмыту, езы чэнджэщым дыщІэвгъэдэІу икІи фІыкІэ зэрызытхъуэжыным дыхущІэвгъэкъу. Іущагъыр езыр-езыру уафэм къехуэхкъым, абы къыхэкІкІэ Иеговэ мыпхуэдэу къыджеІэ: «ЩІэдэІу чэнджэщхэм, ущиери умыщІ ІэщІыб, урихъунщ иужькІэ абыхэм уэ цІыху Іущ» (Прит. 19:20, Гъэс.).