ШейтІаным и къапхъэным укъыІэщІэкІыфынущ!

1. ШейтІаныр щакІуэм сыткІэ ещхь?

ЩАКІУЭМ и мурадыр — ар псэущхьэр къиубыдыныр е иукІыныращ. Абы щхьэкІэ щакІуэм къапхъэн зэмылІэужьыгъуэхэр къегъэсэбэп. Языныкъуэ къапхъэнхэм Библиер топсэлъыхь (Иов 18:8—10). Ауэ щакІуэм псэущхьэр къиубыдын щхьэкІэ сыт ищІэн хуейр? Абы а псэущхьэр фІыуэ зрегъэцІыху: и хьэлыр, здэпсэур икІи ифІэфІыр. ШейтІанри а щакІуэм ебгъэщхь хъунущ. Ар дэ къыткІэлъоплъ. Абы гу лъетэ дэнэ дыкІуэми икІи сыт тфІэгъэщІэгъуэнми. Абы иужь, ар зэреплъымкІэ, дэ дыкъызэриубыдыфыну къапхъэныр къыхех икІи дэ дыщыхуэмыхьэзырым деж ар къегъэсэбэп. Ауэ Библием дыкъегъэгугъэ: ШейтІаным и къапхъэн гуэрым дихуауэ щытми, абы дыкъыІэщІэкІыну Іэмал щыІэщ. Абы нэмыщІ Библием къегъэлъагъуэ ШейтІаным и къапхъэнхэм димыхуэххэнуи зэрытхузэфІэкІынур.

2. ШейтІаным сыт хуэдэ къапхъэнхэр ехъулІэныгъэ иІэу къигъэсэбэпрэ?

² ШейтІаным ехъулІэныгъэ иІэу къигъэсэбэп къапхъэнхэр — ар пагагъэмрэ нэпсеягъэмрэщb. Илъэс мин бжыгъэ хъуауэ ШейтІаным ехъулІэныгъэ иІэу цІыхухэм яхэлъ а хьэл-щэн мыхъумыщІэхэр къегъэсэбэп. Бзум ещэм хуэдэу, ар зи ужь ихьа цІыхур гъэпцІагъэкІэ и къапхъэным ирешалІэри къеубыд (Пс. 91:3). Ауэ абы къикІкъым дэ Іэмал имыІэу абы дихуэн хуейуэ. Сыт щхьэкІэ жыпІэмэ абы къигъэсэбэп къапхъэнхэм Иеговэ щыгъуазэ дещІ (2 Кор. 2:11).

3. Хьэл мыхъумыщІэ зиІа цІыхухэм я щапхъэхэр Иеговэ Библием щІрыригъэтхар сыт?

³ Пагагъэмрэ нэпсеягъэмрэ фІым зэи дызэрыхуамышэнур наІуэ тхуищІын щхьэкІэ Иеговэ а хьэл-щэнхэр зиІа цІыхухэм я щапхъэхэм дегупсысыну дыхуегъэуш. Мы статьям щызэпкърытхыну щапхъэхэм къагъэлъагъуэ Иеговэ куэд щІауэ хуэлажьэхэри ШейтІаным а къапхъэнхэр къигъэсэбэпу къызэриубыдыфынур. НтІэ, абы къикІрэ Іэмал имыІэу а къапхъэнхэм дихуэн хуейуэ? Хьэуэ, къикІкъым. Иеговэ и Псалъэм а щапхъэхэр иригъэтхащ «цІыхухэм дерс яхуэхъун щхьэкІэ» (1 Кор. 10:11). Абы шэч къытрихьэкъым дэ абыхэм дерс къызэрыхэтхынум икІи ШейтІаным и къапхъэнхэм димыхуэххэну зэрытхузэфІэкІыфынум е, дихуэмэ, абы дыкъызэрыІэщІэкІыфынум.

ЯПЭ КЪАПХЪЭНЫР: ПАГАГЪЭ

4. Пагагъэм сытым ухуишэрэ?

⁴ ШейтІаныр хуейщ дэ цІыху пагэу дыщытыну. Абы ещІэ а хьэл-щэным лъабжьэ ищІыну Іэмал еттмэ, езым ещхь дызэрыхъунур икІи гъащІэ мыухыжыр зэрытфІэкІуэдынур (Прит. 16:18, Гъэсэпэтхыдэхэр). Апостол Паул а хьэл-щэным къыпэкІуэм теухуауэ мыпхуэдэу жиІащ: а цІыхур «зыкъыфІэщІыжынурэ, ШейтІаныр къуаншэ зэрыхъуам хуэдэу, ари къуаншэ хъунущ» (1 Тим. 3:6, 7). Аращи, дэтхэнэ зыри пагагъэм дебэнын хуейщ: куэд мыщІауэ пэжыр къэзыщІахэри илъэс куэд хъуауэ Иеговэ хуэлажьэхэри.

5. Экклезиаст 7:16, 20 зэритымкІэ, цІыхум пагагъэр дауэ зэригъэлъэгъуэфынур?

⁵ Пагагъэр — ар щхьэхуещагъэм и зы лъэныкъуэщ. ШейтІаныр хуейщ дэ ди щхьэм егъэлеяуэ дегупсысу щІэддзэу Иеговэ тщыгъупщэну, псом хуэмыдэу гугъуехь гуэр дыщыпэщІэхуэм деж. Псалъэм папщІэ, зыгуэрым пцІы къыптрилъхьэу е пхуэмыфащэ гуэр къыуищІэу щытмэ, сыт уэ пщІэнур? Иеговэ е ди къуэш, ди шыпхъухэр бгъэкъуаншэу щІэбдзэмэ, ШейтІаныр абыкІэ егъэлеяуэ бгъэгуфІэнущ. Ар хуейщ уэ мыпхуэдэ гупсысэм укъыхуэкІуэну: «Мы Іуэхум хэкІыпІэу иІэр зыщ — Иеговэ и Псалъэм ит чэнджэщхэм сытет нэхърэ, сэ езым си акъылкІэ псори зэфІэзгъэкІмэ, нэхъыфІщ». (Къеджэ Экклезиаст 7:16, 20.)

6. Нидерланды къэралым щыщ ди шыпхъум и щапхъэм сытым дыхуигъасэрэ?

⁶ Нидерланды къэралым щыщ ди зы шыпхъум и щапхъэм деплъынщ. Ар зэхуэсым щыщхэм я щыуагъэхэм щхьэкІэ щІэх-щІэхыурэ къэгубжьт. ИкІэм-икІэжым абы къыгурыІуащ адэкІэ Іуэхур апхуэдэу щыт зэрымыхъунур. Абы жеІэж: «Сэ закъуэныгъэр хуабжьу зыхэсщІэт икІи си гурыщІэхэм сыпэлъэщтэкъым. Абы къыхэкІкІэ си щхьэгъусэм жесІащ Іэмал имыІэу нэгъуэщІ зэхуэсым дызэрыкІуэн хуейр». Ауэ абы иужь 2016-нэ гъэм гъатхэпэ мазэм къыдэкІа ди интернет-телевидением и программэм ар еплъащ. А программэм нэгъуэщІхэм я щыуагъэхэм дызэрыхущытын хуейм теухуауэ чэнджэщ зыбжанэ щызэпкърахат. А шыпхъум пещэ: «Сэ къызгурыІуащ къуэш, шыпхъухэм я хьэлхэр схъуэжыну сыхэтын зэрыхуэмейр, атІэ си щхьэр къэзмыгъэпцІэжу, Іэдэбагъ схэлъу си щыуагъэхэм сызэреплъын хуейр. Абы нэмыщІ сэ къызгурыІуащ япэ дыдэу Иеговэрэ абы и тепщэныгъэмрэ сызэрегупсысын хуейр». Мы щапхъэм сыт хуэдэ дерс хэтхыфыну? Зыгуэрым дыдэгъуэгурыкІуэну ди дежкІэ тыншу щымытмэ, ди гурыщІэхэр япэ идмыгъэщу Иеговэ лъэІукІэ зыхуэдгъэзэн хуейщ. Абы нэмыщІ Иеговэ и нэкІэ нэгъуэщІхэм деплъу зедгъэсэн щхьэкІэ абы зэпымыууэ делъэІун хуейщ. Уафэм щыІэ ди Адэ лъапІэм абыхэм я щыуагъэхэр елъагъу икІи яхуигъэгъуну хьэзырщ. Дэри апхуэдэу дыщытыну ар къытщогугъ (1 Ин. 4:20).

7. Пащтыхь Озие сыт къыщыщІар?

⁷ Пагагъэм пащтыхь Озие хуигъэушащ чэнджэщ къратар ІэщІыб ищІыну икІи и щхьэм щыгугъыжыну. Озие зэфІэкІыныгъэ зэмылІэужьыгъуэхэр иІэт. Абы зауэм, ухуэныгъэм икІи мэкъумэш лэжьыгъэхэм пыщІа ІуэхухэмкІэ ехъулІэныгъэ иІащ. Библием зэритымкІэ, а ехъулІэныгъэр абы къезыту щытар Алыхь пэжырат (2 Лет. 26:3—7, 10). Ауэ абы теухуауэ адэкІэ щыжеІэ: «Ар лъэщ хъуа иужь абы и гур пагэ хъуащ икІи абы игъэунэхъуащ». Пащтыхь Озие хуитыныгъэ зимыІэ Іуэхум хэІэбащ: ар Алыхьым и Унэшхуэм щІыхьэри фимиамыр къурмэн щІыпІэм щигъэсыну хэтащ. Ар ящІэну дин пашэхэм фІэкІа нэгъуэщІым зыми хуитыныгъэ иІэтэкъым. Иеговэ Озие и пагагъэм щхьэкІэ тезыр трилъхьащ: уэшын уз къригъэуэлІащ икІи псэухукІэ абы а узыр къефыкІащ (2 Лет. 26:16—21).

8. ЦІыху пагэ дымыхъун щхьэкІэ 1 Коринф 4:6, 7 ит псалъэхэр дауэ къыддэІэпыкъуфыну?

⁸ Озие хуэдэу дэри нобэ пагагъэм и къапхъэным дихуэфыну? Хосе́ и щапхъэм деплъынщ. Ар ехъулІэныгъэ зиІэ бизнесмент икІи зэхуэсым и нэхъыжьт. Хосе конгрессхэм псалъэ гъэхьэзырахэр щыжиІэт икІи районым и нэхъыжьхэр абы ечэнджэщт. Абы жеІэж: «Сэ Иеговэ сыщымыгугъыу си щхьэм сыщыгугъыжу сыхъуащ. Сэ зэи зыри къысщымыщІыну къысщыхъут, абы къыхэкІкІэ Иеговэ и чэнджэщхэм семыдаІуэу щІэздзащ». Хосе гуэныхь хьэлъэ ищІэри ар зэхуэсым хагъэкІащ. Илъэс зыбжанэ ипэ ар зэхуэсым щыщ хъужащ. Абы къыщыщІам теухуауэ мыпхуэдэу жеІэ: «Псом нэхърэ нэхъапэр сытми Иеговэ сигъэлъэгъуащ — ар титулкъым икІи увыпІэ лъагэкъым, атІэ жыІэдаІуэныгъэ дгъэлъагъуэрэ дымыгъэлъагъуэрэщ». Зыщыдгъэгъупщэнкъым: дэ диІэ зэфІэкІхэмрэ пщІэ зыпылъ къалэнхэмрэ къызыбгъэдэкІыр Иеговэщ. (Къеджэ 1 Коринф 4:6, 7.) Ауэ цІыху пагэхэр Иеговэ къигъэсэбэпкъым.

ЕТІУАНЭ КЪАПХЪЭНЫР: НЭПСЕЯГЪЭ

9. Нэпсеягъэм ШейтІанымрэ Хьэуарэ сытым хуиша?

⁹ «Нэпсеягъэ» щыжаІэм деж япэу дигу къэкІыр ШейтІан Иблис хъуа мелыІычыращ. Ар Иеговэ щыхуэлажьэм щыгъуэ пщІэ зыпылъ къалэн куэд иІауэ къыщІэкІынщ. Ауэ абы ар фІэмащІэт. ШейтІаныр езы Алыхьым и увыпІэм ехъуэпсащ. Апхуэдэу Иеговэ фІэкІа зыми хуэмыфащэ хуитыныгъэр абы зыІэригъэхьэну иужь ихьащ. ШейтІаныр хуейщ дэ абы ещхь дыхъуну икІи диІэмкІэ арэзыуэ дыщымытыну дыхуегъэуш. А Іэмалыращ абы къигъэсэбэпар Хьэуа щепсэлъам щыгъуэ. ЗэрытщІэщи, Иеговэ Хьэуарэ абы и щхьэгъусэмрэ ерыскъы пэрыхьэту здэщыІэ жыг хадэ псэупІэ яхуищІат. Абыхэм «дэтхэнэ жыгми къыпыкІэр» яшхыну хуитт, зы жыгым къыпыкІэм фІэкІа къэмынэу (ЩІэдз. 2:16). Ауэ, абы емылъытауэ, ШейтІаным Хьэуа къигъэпцІэфащ. Ар насыпыфІэу щытын щхьэкІэ Іэмал имыІэу а жыгым къыпыкІэр ишхын хуейуэ и фІэщ ищІащ. Хьэуа иІауэ хъуар фІэмащІэу къыщыхъури, нэхъыбэ зыІэригъэхьэну иужь ихьащ. Абы къыпэкІуар дэ псоми фІы дыдэу дощІэ: Хьэуа гуэныхь илэжьри икІэм-икІэжым лІащ (ЩІэдз. 3:6, 19).

10. Пащтыхь Даут нэпсеягъэм и къапхъэным дауэ зэрихуар?

¹⁰ Пащтыхь Даути нэпсеягъэр зытригъэкІуащ. Алыхьым абы увыпІэ лъаги, мылъкуи, зауэхэм текІуэныгъи иритт. Даут Иеговэ къыхуищІэр фІыщІэ ищІт икІи а тыгъэхэм щхьэкІэ мыпхуэдэу жиІат: «АпхуэдизкІэ куэдщи ахэр схуэбжынукъым» (Пс. 40:5). Ауэ зы зэман гуэркІэ абы а псор щыгъупщэри, нэхъыбэ хуейуэ къилъытащ. Даут щхьэгъусэ зыбжанэ иІэ пэтми, лІы зиІэ Вирсавие ехъуэпсащ икІи абы зинэ дищІэри ар уэндэгъу хъуащ. Даут абыкІэ къэмыувыІэу Вирсавие и щхьэгъусэ Урие зауэм щригъэукІащ (2 Сам. 11:2—15). Дауэ ар абы игу къэкІа икІи сыт ар зэгупсысар? Иеговэ зыри имылъагъуу и гугъауэ пІэрэ? Ар илъэс куэдкІэ Иеговэ пэжу хуэлэжьа пэтми, нэпсеягъэр зытригъакІуэри, абы уасэшхуэ щІитын хуей хъуащ. И насыпти, Даут и щыуагъэр къыгурыІуэжри хущІегъуэжащ. Абы и гуэныхьыр Иеговэ къызэрыхуигъэгъуам щхьэкІэ Даут икъукІэ фІыщІэшхуэ ищІащ! (2 Сам. 12:7—13).

11. Ефес 5:3, 4 зэритымкІэ, нэпсей дымыхъун щхьэкІэ сыт къыддэІэпыкъунур?

¹¹ Даут къыщыщІам сытым дыхуигъасэрэ? Иеговэ къытхуищІэ псом щхьэкІэ ди гум фІыщІэ илъмэ, дэ нэпсей дыхъунукъым. (Къеджэ Ефес 5:3, 4.) Дэ диІэмкІэ арэзыуэ дыщытын хуейщ. ЦІыху гуэрым и гъусэу Библиер дджын щыщІэддзэм деж ар худогъэуш Иеговэ къыхуищІэм махуэ къэс егупсысыну икІи фІыщІэ хуищІыну. Едгъаджэм апхуэдэу ищІэу щытмэ, тхьэмахуэм и кІуэцІым ар Иеговэ къыбгъэдэкІ фІыгъуэ зэмылІэужьыгъуэхэм теухуауэ блэнейрэ епсэлъэфынущ (1 Фес. 5:18). Фэ-щэ? Апхуэдэ хьэл фиІэу пІэрэ? Иеговэ фэ къыфхуищІэм теухуауэ фегупсысмэ, ар къывдэІэпыкъунущ фи гум фІыщІэ илъыну. Фи гум фІыщІэр илъмэ, фэ арэзыуэ фыщытынущ. Арэзыуэ фыщытмэ, нэпсеягъэр къыфтекІуэнукъым.

12. Нэпсеягъэм Иудэ Искариот сытым хуиша?

¹² Нэпсеягъэм Иудэ Искариот Хьисэ епцІыжыну хуигъэушащ. Япэм ар цІыху Іейуэ щытакъым, уеблэмэ, езы Хьисэ ар апостолу къыхихат (Лк. 6:13, 16). Иудэ зэфІэкІ зиІэ икІи дзыхь зыхуэпщІ хъун цІыхуу щытауэ къыщІэкІынт. ГъэщІэгъуэнкъым, абы апостолхэм зыхуэныкъуэр къащэхун щхьэкІэ ахъшащхьэр зэрихьэну зэрыхуагъэфэщар. А ахъшэр нобэ дунейпсо лэжьыгъэм щхьэкІэ арэзыуэ къат ахъшэм ебгъэщхь хъунущ. Ауэ зэман гуэрым щыщІэдзауэ Иудэ а ахъшэм щыщ къидыгъуу щІидзащ, Хьисэ мызэ-мытІэу нэпсеягъэм къыпэкІуэм теухуауэ жиІа пэтми (Мк. 7:22, 23; Лк. 11:39; 12:15). Ауэ Иудэ Хьисэ и псалъэхэм едэІуакъым.

13. Сыт хуэдэ Іуэхугъуэм щыгъуэ Иудэ и нэпсеягъэр наІуэ щыхъуар?

¹³ Хьисэ лІэн ипэ куэд имыІэжу къэхъуа Іуэхугъуэм Иудэ и нэпсеягъэр ІупщІу къигъэлъэгъуащ. Хьисэ и гъэсэнхэм я гъусэу Мэриемрэ Марфэрэ абыхэм яхэту уэшын уз зэфыкІа Симон и унэм пщыхьэщхьэшхэм къеблэгъат. А пщыхьэщхьэм Мэрием мэ ІэфІ къызыпих дагъэ лъапІэр къищтэри, Хьисэ и щхьэм трикІэу щІидзащ. Ар щалъэгъуам щыгъуэ Иудэрэ адрей гъэсэнхэмрэ хуабжьу къэгубжьат. А дагъэ лъапІэр ящэу, ахъшэр тхьэмыщкІэхэм хуагуэшыну нэхъ тэмэму абыхэм къалъытауэ къыщІэкІынут. Ауэ Иудэ къыщІэгубжьам и щхьэусыгъуэр нэгъуэщІт. Ар дыгъуэгъуакІуэти, а ахъшэр къидыгъуну хуейуэ арат. ИужькІэ нэпсеягъэм Иудэ хуигъэушащ Хьисэ пщылІ уасэкІэ ищэну (Ин. 12:2—6; Мт. 26:6—16; Лк. 22:3—6).

14. Лука 16:13 ит псалъэхэр Румынием щыщ зэщхьэгъуситІым дауэ къагъэсэбэпа?

¹⁴ Хьисэ и гъэсэнхэм мыхьэнэшхуэ зиІэ пэж ягу къигъэкІыжащ: «Тхьэми ахъшэми фахуэлэжьэн флъэкІынукъым фэ». (Къеджэ Лука 16:13.) А псалъэхэр ди зэманми хуокІуэ. Румынием щыщ зэщхьэгъуситІым а псалъэхэр къызэрагъэсэбэпам деплъынщ. Абыхэм хамэ къэралым ахъшэфІ къыщалэжьыну Іэмал яІэ хъуащ. Ахэр къыддогуашэ: «Дэ банкым еттыжын хуейуэ щІыхуэшхуэ ттелът. ЯпэщІыкІэ, Иеговэ апхуэдэу ди тхьэлъэІухэм жэуап къриту дэ дегупсысащ». Ауэ ар апхуэдэу къащыхъуу арат. Пэжыр жыпІэмэ, Иеговэ хуэлэжьэну а лэжьыгъэр абыхэм зэран яхуэхъуфынут. Зэщхьэгъусэхэм унафэ тэмэм къащтэну къадэІэпыкъуащ 2008-нэ гъэм шыщхьэІум и 15-нэм къыдэкІа «ХъумакІуэ чэщанэм» ит «Пусть твоё сердце будет полностью предано Иегове» жыхуиІэ статьяр. Абыхэм жаІэж: «Хамэ къэралым ахъшэ нэхъыбэ къыщыдлэжьын щхьэкІэ дыІэпхъуауэ щытамэ, дэ къэдгъэлъэгъуэнут Иеговэ ди дежкІэ япэу зэрыщымытыр. Апхуэдэу Иеговэрэ дэрэ ди зэхуаку дэлъ зэхущытыкІэр тфІэкІуэдыфынут». Абы къыхэкІкІэ абыхэм ядакъым лэжьыгъэ щхьэкІэ нэгъуэщІ къэрал кІуэну. Сыт адэкІэ къэхъуар? Ди къуэшым и унагъуэр зыхуей хуигъэзэн щхьэкІэ зыхуэныкъуэ ахъшэр къыщилэжьыфыну лэжьапІэ Румынием къыщигъуэтащ. Ди шыпхъум жеІэ: «Иеговэ Іэмал имыІэу и лэжьакІуэхэм дэІэпыкъунущ». А зэщхьэгъуситІыр хуабжьу мэгуфІэ Иеговэ ипІэкІэ ахъшэр я зиусхьэн зэрымыхъуам щхьэкІэ.

ШЕЙТІАНЫМ И КЪАПХЪЭНХЭМ ЗЫЩЫФХЪУМЭ

15. ШейтІаным и къапхъэнхэм дыкъыІэщІэкІыну Іэмал зэрыщыІэм сыт дэ шэч къыщІытедмыхьэр?

¹⁵ Ауэ пагагъэм е нэпсеягъэм и къапхъэным дихуамэ-щэ? Дэ абы дыкъыІэщІэкІыфынущ! Паул итхауэ щытащ цІыхур псэууэ «ШейтІаным иубыда нэужь», абы и къапхъэным къызэрикІыжыфынур (2 Тим. 2:26). Ар зэрыпэжыр Даут къыщыщІам къыхощ: Нафан абы и къуаншагъэр щригъэлъэгъужам щыгъуэ Даут и нэпсеягъэм хущІегъуэжри, Иеговэрэ абырэ я зэхуаку дэлъа зэныбжьэгъугъэр зэтригъэувэжащ. Зыщыдгъэгъупщэнкъым: Иеговэ ШейтІаным нэхърэ нэхъ къарущ. Аращи, Иеговэ и деж дэІэпыкъуэгъу къыщытлъыхъуэу щытмэ, ШейтІаным игъэув сыт хуэдэ къапхъэнми дыкъыІэщІэкІыжыфынущ.

16. ШейтІаным и къапхъэнхэм димыхуэну сыт къыддэІэпыкъунур?

¹⁶ ДауикІ, ШейтІаным и къапхъэнхэм укъикІыжыным нэхърэ абыхэм уимыхуэххэмэ нэхъыфІщ. Алыхьыр къызэрыддэІэпыкъум и фІыгъэкІэ дэ ар тхузэфІэкІынущ. ЦІыху пагэ е нэпсей дымыхъуну зэи дегупсыс хъунукъым, сыт щхьэкІэ жыпІэмэ Иеговэ илъэс куэдкІэ хуэлэжьахэми а къапхъэнхэм ихуаи къыхэкІащ. Аращи, а хьэл мыхъумыщІэхэм ди гупсысэхэмрэ ди ІуэхущІафэхэмрэ лъабжьэ щащІу щІадзарэ щІамыдзарэ къыдгурыІуэн щхьэкІэ махуэ къэс Иеговэ девгъэлъэІу (Пс. 139:23, 24). Пагагъэмрэ нэпсеягъэмрэ къыттемыкІуэн щхьэкІэ къарууэ диІэр етхьэлІэнщ!

17. Куэд мыщІэу сыт ШейтІаным къыщыщІынур?

¹⁷ Илъэс мин зыбжанэ хъуауэ ШейтІаныр дэ къыдощакІуэ, ауэ куэд мыщІэу езыр къаубыдынурэ, япхынущ икІи икІэм-икІэжым ягъэкІуэдынущ (Апок. 20:1—3, 10). Дэ къытхуэмыгъэсу а зэманым дыпоплъэ! Ауэ ар къэсыху ШейтІаным и къапхъэнхэм теухуауэ набдзэгубдзаплъэу дыщывгъэт. Пагагъэмрэ нэпсеягъэмрэ зытедгъэкІуэнкъым. ШейтІаным дызэрыпэщІэтыным ди акъылыр тедухуэмэ, ар ди «пащхьэм икІынурэ щІэпхъуэжынущ» (Екъуб 4:7).