Библиер зыджхэм псым зыщІагъэуэну зыхуагъэхьэзырыну фадэІэпыкъу

1. Апостол Петр Ерусалим къыщызэхуэса цІыху гупышхуэм сыт яжриІар?

ЕРУСАЛИМ цІыху гупышхуэ къыщызэхуэсащ. Абыхэм цІыхухъуи цІыхубзи яхэтщ. Ахэр къэрал куэдым къикІащ икІи бзэ зэмылІэужьыгъуэхэмкІэ мэпсалъэ. А махуэм абыхэм Іуэхугъуэ гъэщІэгъуэн ялъагъу: щІэныгъэ зимыІэ цІыху къызэрыгуэкІхэр Ерусалим къекІуэлІахэм я бзэхэмкІэ псэлъэн щІадзэ! Ауэ нэхъ гъэщІэгъуэну щытар абыхэм зэхахаращ. Апостол Петр цІыху гупышхуэм зыхуигъазэри, Хьисэ Мэссихь абыхэм я фІэщ хъумэ, ахэр къызэрелыфынур яжриІащ. А псалъэхэр цІыхухэм апхуэдизкІэ я гум хыхьати, абыхэм упщІэ къаІэтащ: «Сыт дэ тщІэн хуейр?» Петр абыхэм жэуап яритыжащ: «Псоми зыдвгъэумэхъ» (Апост. 2:37, 38).

2. Мы статьям сыт щызэпкърытхынур? (Обложкэм тет сурэтым феплъ.)

² АдэкІэ къэхъуар нэхъ гъэщІэгъуэныжт! А махуэ дыдэм цІыху 3 000 хуэдизым псым зыщІагъауэри Хьисэ и лъэужь иуващ. А Іуэхугъуэр Хьисэ и гъэсэнхэм къахуигъэна лэжьыгъэшхуэм щІэдзапІэ хуэхъуащ. Нобэр къыздэсми а лэжьыгъэр йокІуэкІ. ДауикІ, ди зэманым цІыхум сыхьэт зы-тІу уепсэлъа щхьэкІэ псым зыщІигъэуэну ар хуэхьэзыр хъунукъым. А Іуэхум мазэ зыбжанэ, илъэс е зэман нэхъыбэжи текІуэдэнкІэ хъунущ. ЦІыхур Хьисэ и гъэсэн хъуну удэІэпыкъун щхьэкІэ къаруушхуэ епхьэлІэн хуейщ икІи Библием цІыхухэр езыгъаджэхэм ар фІы дыдэу ящІэ. Мы статьям дэ щызэпкърытхынущ Библиер зыджым псым зыщІигъэуэн щхьэкІэ зыхуигъэхьэзырыну дауэ дыдэІэпыкъу хъунуми.

БИБЛИЕМ ЕБГЪАДЖЭ ЦІЫХУМ КЪИЩІАР И ГЪАЩІЭМ КЪЫЩИГЪЭСЭБЭПЫНУ ДЭІЭПЫКЪУ

3. Маттэ 28:19, 20 зэритымкІэ, Библиер зыджым псым зыщІигъэуэну хуэхьэзыру щытын щхьэкІэ сыт ищІэн хуейр?

³ ЦІыхум псым зыщІигъэуэн ипэ Библием ит принципхэр и гъащІэм къыщигъэсэбэпу зригъэсэн хуейщ. (Къеджэ Маттэ 28:19, 20.) Библиер зыджым апхуэдэу щищІэм деж Хьисэ зи гугъу ищІа «щІыр куууэ къэзытІу, унэ лъабжьэр мывэ быдэм тезыщІыхьа» цІыху губзыгъэм ещхь мэхъу (Лк. 6:47, 48; Мт. 7:24, 25). Едгъаджэм абыкІэ дауэ дыдэІэпыкъу хъуну? Абы теухуауэ чэнджэщищ зэпкърытхынщ.

4. Библием едгъаджэм псым зыщІигъэуэну зыхуигъэхьэзырыну дапхуэдэу дызэрыдэІэпыкъуфынур? («Библием ебгъаджэм мурадхэр зыхуигъэувыну икІи ахэр игъэзэщІэну дэІэпыкъу» жыхуиІэ рамкэм феплъ.)

⁴ Библием ебгъаджэм мурадхэр игъэувыну дэІэпыкъу. Сыт абы мыхьэнэшхуэ щІиІэр? Уи нэгу къыщІэгъэхьэ щІыпІэ пхыдза гуэрым машинэкІэ укІуэну зыбгъэхьэзыру. Гъуэгуанэ кІыхьым уримыгъэзэшын щхьэкІэ укъыщыувыІэ хъуну щІыпІэхэр картэм къыщыхыбогъэщ. Абы и фІыгъэкІэ гъуэгуанэ зэпыпчыныр нэхъ тынш мэхъу. Апхуэдэ дыдэу Библиер зыджым пІалъэ кІэщІым къриубыдэу хузэфІэкІыну мурадхэр зыхуигъэувмэ икІи ахэр игъэзащІэмэ, псым зыщІэгъэуэныр къемыхъулІэфын Іуэхугъуэу къыщыхъунукъым. Абы щхьэкІэ «ГъащІэ мыухыж уиІэу псэу!» тхылъым ит «ПщІэ хъунур» жыхуиІэ рамкэр къэбгъэсэбэпу Библием ебгъаджэм мурадхэр зыхуигъэувыну дэІэпыкъу. Урокым и кІэм абы къищІар и гъащІэм къыщигъэсэбэпын щхьэкІэ а рамкэм итыр дапхуэдэу къыдэІэпыкъунуми тепсэлъыхь. Ауэ Библием ебгъаджэр иджыри зыгуэрым елэжьын хуейуэ къэплъытэу щытмэ, ар «НэгъуэщІ» жыхуиІэ Іыхьэм иритхэну хуэбгъэуш хъунущ. Ебгъаджэ цІыхум пІалъэ кІэщІым икІи пІалъэ кІыхьым къриубыдэу хузэфІэкІыну мурадхэр зыхуигъэувыжу икІи ахэр игъэзащІэу удэІэпыкъун щхьэкІэ а рамкэр къэгъэсэбэп.

5. Марк 10:17—22 зэритымкІэ, Хьисэ мылъкушхуэ зиІэ лІым сыт жриІар икІи сыт щхьэкІэ?

⁵ Библием ебгъаджэм и гъащІэм зэхъуэкІыныгъэхэр хилъхьэн щхьэкІэ дэІэпыкъу. (Къеджэ Марк 10:17—22.) Хьисэ мылъкушхуэ зиІэ лІым жриІат иІэу хъуар ищэжу ахъшэр тхьэмыщкІэхэм яхуигуэшыну (Мк. 10:23). Абы къыгурыІуэт апхуэдэ зэхъуэкІыныгъэхэр и гъащІэм хилъхьэну а лІым дежкІэ тыншу зэрыщымытынур. Хьисэ апхуэдэу жиІэну хуэзыгъэушар сыт? Лъагъуныгъэращ. Иныкъуэхэм деж дэ къытщохъу едгъаджэ цІыхум и гъащІэм зэхъуэкІыныгъэ хилъхьэну хьэзыру щымыту, абы къыхэкІкІэ ар зыгуэрым хуэдгъэушыну дытегушхуэкъым. ДауикІ, цІыхум хьэл мыхъумыщІэхэр зыхинэу, хьэл-щэныфІхэр зыхилъхьэн щхьэкІэ зэман хуейщ (Кол. 3:9, 10). Абы теухуауэ цІыхум нэхъ псынщІэу уепсэлъэху, и гъащІэм нэхъ псынщІэу зэхъуэкІыныгъэхэр хилъхьэнущ. Апхуэдэу уэ къэбгъэлъэгъуэнущ Библием ебгъаджэр къыпфІэмыІуэхуу зэрыщымытыр (Пс. 141:5; Прит. 27:17).

6. ЦІыхум и еплъыкІэм теухуауэ упщІэхэр еттын щІыхуейр сыт?

⁶ ЦІыхур щебгъаджэм деж и еплъыкІэмкІэ къыбдэгуэшэну хуэбгъэушыным мыхьэнэшхуэ иІэщ. Абы къыхэкІкІэ и еплъыкІэм теухуауэ упщІэхэр ты, ебгъаджэм и фІэщ хъумрэ икІи фызэджэр къызэрыгурыІуэмрэ къэпщІэн щхьэкІэ. ЦІыхум апхуэдэ упщІэхэм жэуап ириту зригъасэмэ, иужькІэ абы зэхъуэкІыныгъэ гуэрхэм теухуауэ нэхъ тыншу уепсэлъэфынущ. «ГъащІэ мыухыж уиІэу псэу!» жыхуиІэ тхылъым цІыхум и еплъыкІэм теухуа упщІэхэр щІэх-щІэхыурэ къыщыхьащ. Псалъэм папщІэ, 4-нэ урокым мыпхуэдэ упщІэ итщ: «Дауэ уеплърэ, Иеговэ и гуапэ абы и цІэмкІэ ущеджэм деж?» Абы нэмыщІ 9-нэ урокым итщ: «Алыхьым сыткІэ уелъэІуну ухуейт?» Библиер зыджым апхуэдэ упщІэхэм жэуап иритыну япэщІыкІэ къегугъуэкІынкІэ хъунущ. Ауэ урокым къыщыхьа едзыгъуэхэмрэ сурэтхэмрэ темэм зэрыпыщІам ар ебгъэгупсысмэ, абы зэхэщІыкІ иІэ хъуну удэІэпыкъуфынущ.

7. ГъащІэм къыщыхъуа Іуэхугъуэхэр зыгуэр щедгъаджэм деж дапхуэдэу къызэрыддэІэпыкъунур?

⁷ Библием ебгъаджэм зихъуэжыну гукъыдэж иІэн щхьэкІэ гъащІэм къыщыхъуа Іуэхугъуэхэр щапхъэу къыхуэпхь хъунущ. Псалъэм папщІэ, цІыхур зэІущІэхэм къэкІуэну къехьэлъэкІмэ, 14-нэ урокым ит «Нэхъыбэ къащІэ» зи цІэ рамкэм къыщыхьа «Иегова заботился обо мне» жыхуиІэ видеор абы ебгъэлъагъу хъунущ. Апхуэдэ роликхэм я ссылкэхэр урок куэдым къыщыбгъуэтынущ. Абы нэмыщІ «Нэхъ куууэ хэплъэ» зи цІэ Іыхьэм ахэр къыщыхьащb. Ауэ ебгъаджэр нэгъуэщІхэм йомыгъапщэ икІи мыпхуэдэ псалъэхэм хуэсакъ: «Абы ар щыхузэфІэкІакІэ, уэри пхузэфІэкІынущ». А гупсысэм езы цІыхур къыхуэкІуэмэ, нэхъыфІщ. Абы щхьэкІэ ебгъаджэм видеом хэт гупсысэ нэхъыщхьэхэм гу лъегъатэ, псалъэм папщІэ, абы къыщыхьа Библием ит едзыгъуэм е абы зи гугъу ищІ цІыхум къищІар и гъащІэм къызэрыщигъэсэбэпам. Иеговэ абы зэрыдэІэпыкъуами щІэх-щІэхыурэ гу лъегъатэ.

8. Библием ебгъаджэм Иеговэ фІыуэ илъагъуу хъун щхьэкІэ сыт пщІэ хъунур?

⁸ Библием ебгъаджэм Иеговэ фІыуэ илъагъуу хъун щхьэкІэ дэІэпыкъу. Дапхуэдэу ар зэрыпщІ хъунур? Иеговэ и хьэл-щэн дахэхэм гу лъебгъэтэн щхьэкІэ дэтхэнэ зы Іэмалри къэгъэсэбэп. Библием ебгъаджэм къыгурыгъаІуэ Иеговэ Алыхь насыпыфІэу зэрыщытыр икІи ар фІыуэ зылъагъухэм и нэІэ сыт щыгъуи зэрытригъэтыр (1 Тим. 1:11; Евр. 11:6). Ебгъаджэм къищІэр и гъащІэм къыщигъэсэбэпмэ, абы фІыгъуэ къыхуихьынухэм теухуауэ жеІэ икІи Иеговэ ар фІыуэ зэрилъагъур къыгурыгъаІуэ (Ис. 48:17, 18). ЦІыхум Иеговэ хуиІэ лъагъуныгъэр хэхъуэхукІэ, абы и гъащІэм зэхъуэкІыныгъэ гуэрхэр хилъхьэну гукъыдэж нэхъ иІэ хъунущ (1 Ин. 5:3).

ЕБГЪАДЖЭМ КЪУЭШ, ШЫПХЪУХЭР ЕГЪЭЦІЫХУ

9. Ебгъаджэм псым зыщІигъэуэн щхьэкІэ зыгуэр зыхуигъэныкъуэну хуэхьэзыру щытыну Марк 10:29, 30 ит псалъэхэр дапхуэдэу къызэрыдэІэпыкъуфынур?

⁹ Библиер зыджым псым зыщІигъэуэн щхьэкІэ зыгуэр зыхуигъэныкъуэн е къигъэнэн хуей хъунущ. ИпэкІэ зи гугъу тщІа мылъкушхуэ зиІа лІым хуэдэу, Библием едгъаджэми зыгуэр къигъэнэнрэ къимыгъэнэнрэ къыхихын хуей хъунущ. Псалъэм папщІэ, и лэжьапІэр ихъуэжыну, ар Библием ит принципхэм темыхуэу щытмэ. Куэдым Иеговэ фІыуэ зымылъагъу я ныбжьэгъухэр къагъэнэн хуей хъунущ. Хэти Иеговэ и Щыхьэтхэр фІыуэ зымылъагъу и Іыхьлыхэр бий къыхуэхъуфынущ. Хьисэ жиІауэ щытащ апхуэдэ зэхъуэкІыныгъэхэр я гъащІэм халъхьэну языныкъуэхэм я деж тыншу зэрыщымытынур. Ауэ Хьисэ и лъэужь иувэну мурад зыщІахэр къигъэгугъащ абы зэи зэрыхущІемыгъуэжынур. Абыхэм лъагъуныгъэ зыгъэлъагъуэ унагъуэшхуэ Иеговэ къаритынущ. (Къеджэ Марк 10:29, 30.) НтІэ, дэ ди лъэныкъуэкІэ Библием едгъаджэм сыт хуэтщІэфынур?

10. Мануэль и псалъэхэм сытым ухуагъасэрэ?

¹⁰ Библием ебгъаджэм ныбжьэгъу хуэхъу. Ебгъаджэ цІыхур къыпфІэмыІуэхуу зэрыщымытыр ебгъэлъэгъуным мыхьэнэшхуэ иІэщ. Мексикэм щыщ Мануэ́ль мыпхуэдэу жеІэ: «Сэ сезыгъэджа къуэшыр Библиер дджын щІэддзэн ипэ си Іуэхур дауэ щытми сыт щыгъуи къызэупщІт. Абы и фІыгъэкІэ сэ сыт хуэдэ темэми теухуауэ сымыукІытэу абы сепсэлъэфт. Сэ зыхэсщІэт и гум къыбгъэдэкІыу ар къызэрыздэІэпыкъур».

11. Библием ебгъаджэм нэхъыбэрэ узэрыригъусэм сыт хуэдэ сэбэпынагъ абы къыхуихьынур?

¹¹ Хьисэ и гъэсэнхэм зэман тригъэкІуадэу зэрыщытам щапхъэ тех (Ин. 3:22). Библием ебгъаджэм и гъащІэм зэхъуэкІыныгъэхэр хилъхьэу щІидзамэ, ар хьэщІапІэ къебгъэблагъэ хъунущ фызэдэшхэн е JW Broadcasting^® программэм зэгъусэу феплъын щхьэкІэ. Ар абы и гуапэ хъунущ, псом хуэмыдэу цІыхухэм я гъусэу махуэшхуэхэр зэримыгъэлъапІэм къыхэкІкІэ закъуэныгъэ щызэхищІэм деж. Угандэ къэралым щыщ ди къуэш Кази́бве игу къегъэкІыж: «Библиер щызджым щыгъуэ Иеговэ теухуауэ куэд къасщІэт. Ауэ, сэ сызэрегупсысымкІэ, сезыгъэджа къуэшым и гъусэу зэманыр щызгъакІуэм щыгъуэ апхуэдиз дыдэ къасщІэт. Сэ слъагъут Иеговэ и лэжьакІуэхэм и нэІэ зэрытригъэтыр икІи ахэр насыпыфІэу зэрыщытыр. Апхуэдэ гъащІэт сэри сызыхуейр!»

12. Библие джыным къуэш, шыпхъу зэмылІэужьыгъуэхэр къебгъэблэгъэн щІыхуейр сыт?

¹² Библие джыным къуэш, шыпхъу зэмылІэужьыгъуэхэр къегъэблагъэ. ЦІыхур уи закъуэу ебгъаджэмэ е абы ебгъэцІыхуам фІэкІа зыри къомыгъэблагъэмэ, Библие джыныр нэхъ тыншу екІуэкІыну къыпщыхъункІэ хъунущ. Ауэ къуэш, шыпхъу нэхъыбэ къебгъэблагъэмэ, ебгъаджэ цІыхум сэбэп нэхъыбэ къыхуихьынущ. Абы щыхьэт тохъуэ Молдовэ щыщ ди къуэш Дмитрий и псалъэхэр: «Сэ сыщрагъаджэм щыгъуэ дэтхэнэ зыми къихь щапхъэхэм лъэныкъуэ зэмылІэужьыгъуэкІэ темэм сеплъыну къыздэІэпыкъут. Абы нэмыщІ япэ дыдэу зэІущІэм сыщыкІуам, егъэлеяуэ сыгузавэтэкъым, сыт щхьэкІэ жыпІэмэ зэхуэсым щыщ куэдыр сцІыхут».

13. Библием едгъаджэр зэІущІэхэм кІуэну хуэдгъэушын щІыхуейр сыт?

¹³ Библием ебгъаджэр зэІущІэхэм кІуэну хуэгъэуш. Сыт абы мыхьэнэшхуэ щІиІэр? Езы Иеговэ и лэжьакІуэхэм унафэ яритащ ахэр зэІущІэн хуейуэ. Апхуэдэ зэІущІэхэм кІуэныр — ар Иеговэ дызэрыхуэлажьэм и Іыхьэщ (Евр. 10:24, 25). Абы нэмыщІ зэхуэсым щыщ ди къуэш, ди шыпхъухэмрэ дэрэ зы унагъуэ хуэдэ дыхъуащ. Абыхэм я гъусэу зэІущІэхэм дыщыщыІэм деж дэ зы Іэнэм дыпэрысу шхыныгъуэ ІэфІ тшхы хуэдэщ. Библием ебгъаджэр зэІущІэхэм кІуэну щыхуэбгъэушым деж, псым зыщІигъэуэну хуэзышэ лъэбакъуэхэм щыщ зы ичыну уэ абы удоІэпыкъу. Ауэ а лъэбакъуэр ичыну дэтхэнэ зыми и деж тыншу щымытынкІэ хъунущ. А Іуэхум теухуауэ «ГъащІэ мыухыж уиІэу псэу!» жыхуиІэ тхылъыр ебгъаджэм дауэ сэбэп зэрыхуэхъуфынур?

14. Ебгъаджэ цІыхур зэІущІэхэм кІуэну дапхуэдэу зэрыхуэбгъэушыфынур?

¹⁴ ЗэІущІэхэм укІуэным мыхьэнэшхуэ зэриІэм теухуауэ 10-нэ урокым щытопсэлъыхь. А тхылъыр къыдагъэкІын ипэ языныкъуэ къуэш, шыпхъухэм ирагъаджэ цІыхухэм я гъусэу 10-нэ урокым итыр зэпкърахыну елъэІуат икІи абыхэм къыхагъэщащ ар сэбэпышхуэ къазэрыхуэхъуар. ДауикІ, цІыхур зэІущІэхэм къебгъэблэгъэн щхьэкІэ а урокым нэсыху уежьэн хуейкъым. Іэмал зэриІэкІэ, нэхъ пасэу ебгъаджэр зэІущІэм къегъэблагъэ икІи адэкІи зэпымыууэ абыхэм кІуэну хуэгъэуш. Библиер зыдж дэтхэнэ зыми гугъуехь зэхуэмыдэхэр яІэщ. Абы къыхэкІкІэ ебгъаджэр зэІущІэхэм кІуэну зэран къыхуэхъур зэхэгъэкІ икІи абы узэрыдэІэпыкъуфыну щІыкІэм егупсыс. ЦІыхум занщІэу зэІущІэхэм кІуэн щІимыдзэмэ, уи жагъуэ умыщІ. ШыІэныгъэ зыхэгъэлъ икІи уи Іэр йомыхьэх.

ЕБГЪАДЖЭР ЗЫЩЫШЫНЭМ ПЭЛЪЭЩЫНУ ДЭІЭПЫКЪУ

15. Библием едгъаджэ цІыхур зыщышынэнкІэ хъунур сыт?

¹⁵ Уэ езым Библиер щыбджа зэманыр уигу къэгъэкІыж. Иеговэ и Щыхьэт ухъуу щытмэ, хъыбарыфІыр унэ-унэкІэ бгъэІун зэрыхуейм щхьэкІэ ущышына къэхъуауэ пІэрэ? Е уи Іыхьлыхэмрэ уи ныбжьэгъухэмрэ къызэрыппэщІэувэнум уигъэгузэвауэ пІэрэ? Апхуэдэу щытамэ, уэ Библием ебгъаджэ цІыхум и гурыщІэхэр къыбгурыІуэфынущ. Хьиси ибзыщІакъым и гъэсэнхэм апхуэдэ гурыщІэхэр зэраІэфынур. Ауэ абы ахэр хуигъэушт шынэр зытрамыгъакІуэу адэкІи Иеговэ хуэлэжьэну (Мт. 10:16, 17, 27, 28). Хьисэ и гъэсэнхэм дапхуэдэу зэрадэІэпыкъуу щытар, ахэр шынэм пэлъэщын щхьэкІэ? ИкІи дауэ дэ абы щапхъэ зэрытетх хъунур?

16. Ебгъаджэр и фІэщ хъум теухуауэ нэгъуэщІхэм ядэгуашэу дауэ зэребгъасэ хъунур?

¹⁶ Библием ебгъаджэм и фІэщ хъум теухуауэ нэгъуэщІхэм ядэгуашэу егъасэ. Хьисэ и гъэсэнхэр япэ дыдэу хъыбарыфІыр ягъэІуну щигъэкІуам щыгъуэ ахэр гузавэу къыщІэкІынт. Сыт абыхэм къадэІэпыкъуар? Хьисэ и гъэсэнхэм къагуригъэІуащ ахэр дэнэ кІуэн хуейми икІи сыт жаІэн хуейми (Мт. 10:5—7). Уэ-щэ? Дауэ Хьисэ щапхъэ зэрытепхыфынур? Ебгъаджэм дэІэпыкъу хъыбарыфІымкІэ хэт дэгуашэ хъунуми къыгурыІуэну. Псалъэм папщІэ, Библием ит пэж гуэр зэпкърыфха иужь и цІыхугъэхэм щыщу а къищІар хэт фІэгъэщІэгъуэн хъунуми еупщІ. Абы иужь жиІэну псалъэхэр зэгъусэу вгъэхьэзыри, ар зэрыжиІэ хъуну щІыкІэр егъэлъагъу. Езыри а пэжымкІэ къыбдэгуэшэну елъэІу. АбыкІэ сэбэп къыфхуэхъуфынущ «ГъащІэ мыухыж уиІэу псэу!» тхылъым ит «Зыгуэрым жиІэфынущ» икІи «Зыгуэрым мыпхуэдэ упщІэ иІэфынущ» жыхуиІэ рамкэхэр. Абы нэмыщІ Библиер къэбгъэсэбэпу жэуапхэр птынымрэ гурыІуэгъуэу икІи гуапэу упсэлъэнымрэ мыхьэнэшхуэ зэриІэр къыхэгъэщ.

17. Маттэ 10:19, 20, 29—31 ит псалъэхэр къэбгъэсэбэпу ебгъаджэр Иеговэ дзыхь хуищІыну дапхуэдэу зэребгъасэ хъунур?

¹⁷ Ебгъаджэр Иеговэ дзыхь хуищІу егъасэ. Хьисэ и гъэсэнхэм яжриІэт Иеговэ лъагъуныгъэм къыхэкІкІэ Іэмал имыІэу абыхэм къазэрыдэІэпыкъунур. (Къеджэ Маттэ 10:19, 20, 29—31.) Ебгъаджэ цІыхум зэман-зэманкІэрэ игу къэгъэкІыж Иеговэ ари дэІэпыкъуэгъуншэу къызэримыгъэнэнур. Абы Иеговэ дзыхь хуищІу нэхъ псынщІэу зригъэсэфынущ, зэгъусэу Алыхьым зыщыхуэвгъазэкІэ абы и мурадхэр къехъулІэну уи лъэІухэм хэбгъэхьэу щытмэ. Польшэм щыщ ди къуэш Франци́шек къыддогуашэ: «Сэ сезыгъэджа къуэшыр щІэх-щІэхыурэ си мурадхэр къызэхъулІэну Алыхьым елъэІут. Иеговэ абы и лъэІухэм жэуап зэрыритыр щыслъагъум щыгъуэ сэри тхьэлъэІукІэ Алыхьым зыхуэзгъазэу щІэздзащ. Иеговэ къызэрыздэІэпыкъур зыхэсщІэт зэІущІэхэмрэ конгрессхэмрэ сыкІуэн щхьэкІэ лэжьапІэм зыкъыщезгъэутІыпщым щыгъуэ».

18. Библием едгъаджэхэм дазэрыдэІэпыкъур щилъагъукІэ Иеговэ и гум щыщІэр сыт?

¹⁸ Иеговэ Библием едгъаджэхэм и нэІэ сыт щыгъуи тригъэтщ. Абы къыгуроІуэ и лэжьакІуэхэм къаруушхуэ зэрырахьэлІэр Библием ирагъаджэхэм фІэщхъуныгъэ быдэ яІэн щхьэкІэ. А къалэныр зыгъэзащІэ дэтхэнэ зыри Иеговэ фІыуэ елъагъу (Ис. 52:7). Дэ зыгуэр щедгъаджэкІэ е Библие джыным дыкъыщрагъэблагъэкІэ мы статьям ит чэнджэщхэр къэдвгъэгъэсэбэп. Апхуэдэу дэ нэгъуэщІхэм дадэІэпыкъунущ ахэр Иеговэ нэхъ гъунэгъу хуэхъуну икІи псым зыщІагъэуэну зыхуагъэхьэзырыну.