И пэжыпІэр фщІэуэ пІэрэ?

1, 2. 1) Дэ сытым зедгъэсэн хуей икІи сыт абы мыхьэнэшхуэ щІиІэр? 2) Сыт мы статьям щызэпкърытхынур?

ДЭ ЗЭХЭТХАР, сытуи щрет ар, пэжрэ мыпэжрэ зэхэдгъэкІыфу икІи гупсысэ пэжхэм дыкъыхуэкІуэфу зедгъэсэн хуейщ (Прит. 3:21—23; 8:4, 5, Гъэс.). Армыхъумэ, ШейтІанымрэ абы и дунеймрэ тыншу дыкъагъэпцІэфынущ (Еф. 5:6; Кол. 2:8). Гупсысэ пэжхэм дыкъыхуэкІуэн щхьэкІэ, Іуэхум теухуауэ зэрыхъукІэ псори къэтщІэн хуейщ. Притчи 18:13 щыжыІащ: «УемыдэІуауэ икІэм нэс [е и пэжыпІэр къомыщІауэ] жэуап птыжыныр — акъылыншагъэщ, къыпхуихьри напэтехщ» (Гъэс.).

² Мы статьям дэ щызэпкърытхынущ Іуэхум теухуауэ псори къатщІэу, гупсысэ пэжхэм дыкъыхуэкІуэну зэран къытхуэхъунухэр. Абы нэмыщІ зэхэтхар пэжрэ мыпэжрэ зэхэдгъэкІыфу десэн щхьэкІэ Библием ит принципхэмрэ щапхъэхэмрэ дытепсэлъыхьынущ.

СЫТРИ УИ ФІЭЩ УМЫЩІ

3. Притчи 14:15 ит принципым дытетын щІыхуейр сыт? (Статьям ипэм ит сурэтым феплъ.)

³ Нобэ дэ, зей хуэмыдэу, Іуэхугъуэ куэдым теухуауэ хъыбархэр къытІэрохьэ. Псалъэм папщІэ, телевизорыр, интернетыр, газетыр, нэгъуэщІхэри темэ куэдым топсэлъыхь. Абы нэмыщІ ди ныбжьэгъухэми нэгъуэщІхэми зыгуэркІэ сэбэп къытхуэхъуну яхуейуэ электроннэ почтэмкІэ икІи социальнэ сетьхэмкІэ письмо куэд къытхурагъэхь. Иныкъуэм деж абы кІэ имыІэу къыпщохъу. Ауэ, нобэ цІыху куэдым пцІы жаІэу е пэжым пцІы халъхьэу хъуащи, Іэмал имыІэу дысакъын хуейщ икІи зэхэтхахэр пцІырэ пэжрэ зэхэдгъэкІын хуейщ. НтІэ, Библием ит сыт хуэдэ принцип дэ абыкІэ сэбэп къытхуэхъунур? Притчи 14:15 щыжыІащ: «ГъэпцІэгъуафІэм сытри и фІэщ мэхъу, губзыгъэм лъэбакъуэу ичым и нэІэ тригъэкІкъым» (Гъэс.).

4. Дызэджэнур къыщыхэтхым деж, Филиппи 4:8, 9 ит принципыр дауэ къызэрыддэІэпыкъур? Хъыбар къытІэрыхьэхэр пэжу сыт щІыщытын хуейр? (Абы нэмыщІ феплъ «Дзыхь зыхуэпщІ хъунур» жыхуиІэ рамкэм.)

⁴ Гупсысэ пэжхэм дыкъыхуэкІуэн щхьэкІэ зэхэтхам и пэжыпІэр къэтщІэн хуейщ. Абы къыхэкІкІэ дызэджэнур къыщыхэтхым деж, дысакъмэ нэхъыфІщ. (Къеджэ Филиппи 4:8, 9.) Дзыхь зыхуэпщІ мыхъун сайтхэм ит хъыбарыщІэхэм деплъу е электроннэ почтэмкІэ икІи социальнэ сетьхэмкІэ къытхурагъэхь письмохэр пэжрэ пцІырэ дымыщІэу, абыхэм деджэу ди зэманыр тедгъэкІуэдэным Іущагъ хэлъкъым. Псом хуэмыдэу, Иеговэ епцІыжахэм я гупсысэхэр зэрыт сайтхэм дыхуэсакъыным мыхьэнэшхуэ иІэщ. Ахэр зыщ зыхуейр — Иеговэ и лэжьакІуэхэм я фІэщхъуныгъэр зэтракъутэну икІи пэжыр пцІыкІэ зэрахъуэкІыну. Іуэхум теухуауэ зэхэтхар пцІыуэ щытмэ, гупсысэ пэжхэм дыкъыхуэкІуэфынукъым. Зэи фимыгугъэ пцІы зыхэлъ хъыбархэр зэран къыфхуэмыхъуну (1 Тим. 6:20, 21).

5. ТІасхъэщІэххэм ящыщу 10-м сыт израил цІыхухэм жраІар икІи ар дауэ абыхэм къазэрыщыхъуар?

⁵ ПцІыкІэ зэІылъ хъыбархэм дедаІуэмэ, абы зыри фІы къикІынукъым. Псалъэм папщІэ, Мусэ и зэманым къэхъуауэ щыта Іуэхугъуэр дигу къэдгъэкІыжынщ. Алыхьым яритыну къызэригъэгугъа щІыналъэр къаплъыхьын щхьэкІэ тІасхъэщІэх 12 кІуат. Ауэ абыхэм щыщу 10-м ялъэгъуам теухуауэ Іейщ жаІар (Чис. 13:25—33). Лей щІагъуу, пцІы зэрыжаІам щхьэкІэ Иеговэ и лъэпкъыр Іэнкун хъуат икІи шынат (Чис. 14:1—4). Сыт апхуэдэу къыщІэхъуар? Израил цІыхухэр мыпхуэдэу егупсысауэ къыщІэкІынщ: тІасхъэщІэххэм щыщу я нэхъыбэм а щІылъэм теухуауэ Іей щыжаІакІэ, ар пэжщ. Абыхэм Нун и къуэ Ехьошуарэ Халеврэ пэж жаІар я фІэщ хъуакъым (Чис. 14:6—10). Іуэхум теухуауэ пэжыр къащІэу, Иеговэ дзыхь хуащІыным и пІэкІэ абыхэм пцІыр я фІэщ ящІащ. Сыту ар акъылыншагъэт!

6. Ди бийхэм я напэр мысу Иеговэ и лъэпкъым теухуауэ пцІы зэрыжаІэр сыт дгъэщІэгъуэн щІыхуэмейр?

⁶ Дэ псом хуэмыдэу дысакъын хуейщ, Иеговэ и Щыхьэтхэм теухуауэ хъыбар гуэрхэр щызэхэтхым деж. Сыт абы мыхьэнэшхуэ щІиІэр? ШейтІаным Алыхьым и лэжьакІуэ пэжхэр сыт щыгъуи игъэкъуэншэну хэтщ. Ар зэи зыщывмыгъэгъупщэ (Апок. 12:10). Аращ Хьисэ ди бийхэм Іей куэд къытхужаІэну щІыжиІауэ щытар (Мт. 5:11). Абы и псалъэхэр зэрыпэжыр къыдгурыІуэу щытмэ, ди бийхэм я напэр мысу Иеговэ и лъэпкъым теухуауэ пцІы зэрыжаІэр дгъэщІэгъуэнукъым.

7. Письмо ебгъэхьын ипэ сыт узэгупсысын хуейр?

⁷ Уэ пфІэфІу къыщІэкІынщ электроннэ почтэмкІэ икІи социальнэ сетьхэмкІэ уи ныбжьэгъухэм уадэтхэну. Телевизорым къиту хъыбарыщІэхэм уеплъамэ е гъэщІэгъуэн гуэр зэхэпхамэ, ухущІэкъурэ уэ псом япэу абы теухуауэ адрейхэм къебгъэщІэну? Апхуэдэ зыдэплъэгъужамэ, письмо ебгъэхьын ипэ зэупщІыж: «Сэ езгъэхьынур пэжу пІэрэ? Абы теухуауэ псори къэсщІа?» Ар зэхомыгъэкІамэ, умыщІэххэу къуэш, шыпхъухэм пцІы гуэр хуебгъэхьынкІэ хъунущ. Аращи, ар пэжрэ пцІырэ умыщІэу щытмэ, зыщІыпІи йомыгъэхьу, игъэкІыжи нэхъыфІщ!

8. Сыт языныкъуэ къэралхэм ди бийхэм ящІэр икІи дауэ абыхэм дымыщІэххэу дазэрыдэІэпыкъункІэ хъунур?

⁸ Письмо къытІэрыхьар демыгупсысу ди къуэш, ди шыпхъухэм яхуедгъэхьыжмэ, иджыри нэгъуэщІкІэ зэран дахуэхъункІэ хъунущ. Иеговэ и Щыхьэтхэм ирахьэкІ лэжьыгъэм языныкъуэ къэралхэр зэран хуэхъуну хэтщ, ахэр щызэхуащІи щыІэщ. Ди бийхэм дагъэшынэну е зыр зым дзыхь хуэдмыщІыжу дащІыну я мураду, пцІы куэд ягъэІункІэ хъунущ. Псалъэм папщІэ, СССР-м къыщыхъуауэ щытам дытепсэлъыхьынщ. КГБ-м хъыбар игъэІуауэ щытащ зэхуэсым къалэн щызыгъэзащІэ языныкъуэ къуэшхэр Иеговэ епцІыжауэa. Ди жагъуэ зэрыхъунщи, ар куэдым я фІэщ хъури, Алыхьым и организацэр къагъэнащ. ИужькІэ языныкъуэхэм къагъэзэжащ, ауэ къэзымыгъэзэжаи яхэтщ. Абыхэм зэхаха пцІыр зэран зыхуагъэхъури «фІэщхъуныгъэм и гъуэгу текІыжащ» (1 Тим. 1:19). Дэри нобэ апхуэдэ къытщымыщІын щхьэкІэ сыт тщІэн хуэмейр? Зэран къытхуэхъун хъыбар Іейхэр нэгъуэщІхэм яжевмыІэ е зэхэфхар пэжрэ пцІырэ фымыщІэмэ, фымыгъэхъыбар. Зэхэфхыу хъуар фи фІэщ фымыщІ. ЯпэщІыкІэ пэжрэ пцІырэ зэхэвгъэкІ.

ІУЭХУР ЗЫІУТ ПСОР УМЫЩІЭМЭ

9. Сыт иджыри зэран къытхуэхъуфынур гупсысэ пэжым дыкъыхуэкІуэну?

⁹ Іуэхур зыІут псор умыщІэмэ е абы иныкъуэм фІэкІа пэжу щымытмэ, гупсысэ пэжым укъыхуэкІуэну гугъущ. Хъыбар къыбжаІам и процент 10-м фІэкІа пэжу щымытмэ, дзыхь хуэпщІ хъуну пІэрэ абы? Апхуэдэ хъыбархэр зэхэтха иужь дыкъэмыпцІэн щхьэкІэ сыт тщІэ хъунур? (Еф. 4:14).

10. Сыт израил цІыхухэр я къуэшхэм езэуэну щІыхуеяр икІи сыт абыхэм къадэІэпыкъуар лъы ямыгъэжэну?

¹⁰ Нун и къуэ Ехьошуа и зэманым Иорданым и къухьэпІэмкІэ щыпсэуа израил цІыхухэм къащыщІар дигу къэдгъэкІыжынщ (Иис. Н. 22:9—34). Абыхэм зэхахат къуэкІыпІэмкІэ щыпсэу израил цІыхухэм псы ежэхым и гъунэгъуу къурмэнщІыпІэ ин ягъэувауэ. Ар пэжт, ауэ абыхэм Іуэхур зыІут псор ящІэтэкъыми, къуэкІыпІэмкІэ щыпсэу я къуэшхэр Иеговэ пэщІэувауэ ягугъащ. Абы къыхэкІкІэ зауэ иращІылІэну мурад ящІат. (Къеджэ Иисус Навин 22:10—12b.) Ауэ ятеуэн ипэ къухьэпІэмкІэ щыпсэуа израил цІыхухэм дзыхь зыхуэпщІ хъун цІыхухъу зыбжанэ къыхахри Іуэхур зыІутыр къащІэну ягъэкІуат. Сыт-тІэ абыхэм къащІар? КъуэкІыпІэмкІэ щыпсэу израил цІыхухэм къурмэнщІыпІэр зэрагъэувар пэжт. Ауэ тхьэ нэпцІхэм къурмэн къыхуахьыну я мураду аратакъым абыхэм, атІэ ар щІагъэувар къащІэхъуэну щІэблэм ящІэн щхьэкІэт, ахэр Иеговэ пэжу зэрыхуэлажьэу щытар. Иорданым и къухьэпІэмкІэ щыпсэуа израил цІыхухэр икъукІэ гуфІауэ къыщІэкІынт занщІэу я къуэшхэм езэуэну мыкІуэу, япэщІыкІэ Іуэхур зыІутыр къызэращІам щхьэкІэ.

11. 1) Мемфивосфей сыт хуэдэ хабзэншагъэ къыщыщІар? 2) Апхуэдэ къэмыхъун щхьэкІэ сытыт Даут ищІэн хуеяр?

¹¹ КъэхъункІэ хъунущ цІыхухэм дэ ттеухуауэ жаІэр псори пэжу щымыту. Даутрэ Мемфивосфейрэ къащыщІам ар къегъэлъагъуэ. Даут гущабагъэрэ хьэлэлагърэ игъэлъэгъуащ Мемфивосфей и адэшхуэ Щаул губгъуэ иІыгъахэр щритыжам щыгъуэ (2 Сам. 9:6, 7). ИужькІэ Даут Мемфивосфей теухуауэ Іей гуэр къыжраІащ. Ар пэжрэ пцІырэ зэхимыгъэкІыу, абы и мылъкур трихащ (2 Сам. 16:1—4). Ауэ иужькІэ Даут Мемфивосфей епсалъэри зэрыщыуар къыгурыІуэжащ икІи трихам и ныкъуэр иритыжащ (2 Сам. 19:24—29). Даут мыпІащІэу Іуэхур зыІутыр зэхигъэкІатэмэ, Мемфивосфей апхуэдэ хабзэншагъэ къыщыщІынутэкъым.

12, 13. 1) Хьисэ езым щхьэкІэ пцІы щыжаІэм деж, сытыт ищІэр? 2) Дауэ дэ абы щапхъэ зэрытетхыфынур?

¹² Фэ фтеухуауэ пцІы гуэр жаІауэ щытамэ, сытыт фщІэнур? Хьисэ Мэссихьрэ цІыхухэр псым щІэзыгъауэу щыта Иуанрэ апхуэдэ Іуэхугъуэ ихуауэ щытащ. (Къеджэ Маттэ 11:18, 19.) Сытыт-тІэ Хьисэ ищІар? Ар зэрыпцІыр къагуригъэІуэн щхьэкІэ абы и къаруи и зэмани игъэкІуэдтэкъым. Абы и пІэкІэ абы цІыхухэр хуигъэушт езым ищІэ Іуэхухэмрэ зыхуригъаджэмрэ егупсысыну. Хьисэ зэрыжиІамкІэ цІыхум Іущагъ зэрыхэлъыр и Іуэхухэращ къызыхэщыр.

¹³ Хьисэ и щапхъэм дэ куэдым дыхуигъэсэфынущ. Къэдмылэжьауэ псалъэ Іейхэр цІыхухэм къытхужаІэмэ, абы ди цІэр игъэулъиину дригузэвэнкІэ хъунущ. Сыт абы щыгъуэ пщІэ хъунур? Дэ ттеухуауэ зыгуэрым пцІы щыжиІэм деж, ар зэрымыпэжыр ди псэукІэм къыхэщу дунейм дытетын хуейщ. Хьисэ и щапхъэм къызэригъэлъэгъуамкІэ, ди щытыкІэфІым сыт хуэдэ пцІыри къыщІигъэщыфынущ.

УИ ЩХЬЭМ УЩЫМЫГУГЪЫЖ

14, 15. Сыт уи щхьэм ущыгугъыным шынагъэу хэлъыр?

¹⁴ КъызэрыдгурыІуащи, Іуэхур зыІут псор умыщІэмэ, гупсысэ пэжым укъыхуэкІуэну гугъущ. Ауэ абы нэмыщІ гуэныхь зэрытхэлъри зэран къытхуэхъуфынущ. Дэ Иеговэ илъэс куэд щІауэ дыхуэлажьэу къыщІэкІынщ. А зэманым къриубыдэу зэхэщІыкІрэ Іущагърэ зэдгъэгъуэта хъунщ икІи куууэ дызэрыгупсысэм щхьэкІэ цІыхухэм пщІэ къытхуащІ хъунщ. Апхуэдэу щытмэ, фІыдыдэщ, ауэ абы шынагъэ гуэр хэмылъу пІэрэ?

¹⁵ Хэлъщ. Ди щхьэм дыщыгугъыжу щІэддзэнкІэ хъунущ. Дэ езым ди гурыщІэхэмрэ Іуэхум еплъыкІэ дыхуиІэмрэ зэран къытхуэхъуфынущ. Дэ къытщыхъункІэ хъунущ зэ еплъыгъуэкІэ псори къыдгурыІуауэ, Іуэхур зыІут псор дымыщІэми. Ар икъукІэ шынагъуэщ! Библием дыкъыхуреджэ: «Уи акъылым ущымыгугъыщэ» (Прит. 3:5, 6; 28:26, Гъэс.).

16. Абзацым къыщыхьа щапхъэм фытепсэлъыхьыж: рестораным сыт къыщыхъуар икІи сыт Том и гугъар?

¹⁶ Зы Іуэхугъуэ гуэр ди нэгу къыщІэдгъэхьэнщ. Зэхуэсым и нэхъыжь Том пщыхьэщхьэм рестораным кІуащ. Абы зэхуэсым и нэхъыжь Джон елъагъу и щхьэгъусэу щымыт цІыхубз гуэрым и гъусэу щысу. Ахэр дыхьэшхыу, гуфІэжу зопсалъэ, зэи ІэплІэ зыхуащІащ. Том ар игъэщІэгъуащ икІи хуабжьу гузэващ: Джон и щхьэгъусэм бгъэдэкІыжыну зигъэхьэзыру ара? И щхьэгъусэмрэ сабийхэмрэ дауэ хъуну? Том куэд щІауэ зэхуэсым и нэхъыжьу щытщи, мызэ-мытІэу илъэгъуащ апхуэдэу унагъуэхэр зэрыкъутэжыр. Том и пІэ фитамэ, сытыт фэ фи гугъэнур?

17. Сыт иужькІэ Том къищІар икІи сытым дэ абы дыхуигъасэрэ?

¹⁷ Гупсысэ гуэрым фыкъыхуэкІуэну фымыпІащІэ. Джон и щхьэгъусэм епцІыжауэ Том и гугъащ, ауэ а Іуэхум теухуауэ псори ищІэрэт абы? А пщыхьэщхьэ дыдэм Том телефонкІэ Джон епсэлъащ. А цІыхубзыр Джон и шыпхъуу къыщІэкІащ. Ар жыжьэ къикІат. Ахэр илъэс куэд щІауэ зэрылъэгъуатэкъым икІи Джон и шыпхъум зэман мащІэт иІэри рестораным щызэхуэзэу, зэбгъэдэсыну мурад ящІат. Джон и щхьэгъусэр къэкІуэфатэкъым. Том щыгуфІыкІыжащ гурыщхъуэ ищІахэр зыми зэрыжримыІэжам. Сыт абы дэ къыдгуригъаІуэр? Иеговэ дызэрыхуэлажьэ илъэс бжыгъэм емылъытауэ, Іуэхум теухуауэ псори къэтщІэн хуейщ, гупсысэ гуэрым дыкъыхуэкІуэн ипэ.

18. Ди къуэш, ди шыпхъухэмрэ дэрэ ди зэхуаку дэлъ зэхущытыкІэм сыт зэран хуэхъуфынур?

¹⁸ Фи хьэлхэр зэрызэтемыхуэм щхьэкІэ зэхуэсым щыщ гуэрымрэ фэрэ фи зэхуаку зэхущытыкІэфІ дэмылъмэ, гупсысэ пэжым фыкъыхуэкІуэну ар зэран къыфхуэхъуфынущ. Къуэшым дигу иримыхьу хэлъ хьэл-щэнхэм сыт щыгъуи дегупсысмэ, гурыщхъуэ хуэтщІу дыхъункІэ хъунущ. ИкІи абы теухуауэ зы Іей гуэр зэхэтхыу щытмэ, ар ди фІэщ тщІыну къыщІэкІынщ, пэжрэ мыпэжрэ дымыщІэу щытми. Сыт хуэдэ дерс абы хэтхыфынур? Ди къуэш, ди шыпхъухэм ди гум Іей яхуилъмэ е дефыгъуэмэ, абыхэм теухуауэ гупсысэ нэпцІхэм дыкъыхуэкІуэфынущ (1 Тим. 6:4, 5). Апхуэдэ къытщымыщІын щхьэкІэ ди гум илъ Іейри фыгъуэнри итхын хуейщ. Зэи зыщывмыгъэгъупщэ: Иеговэ хуейщ ди къуэш, ди шыпхъухэр фІыуэ тлъагъуну икІи ди гум къыбгъэдэкІыу яхуэдгъэгъуну. (Къеджэ Ефес 4:2, 32.)

БИБЛИЕМ ИТ ПРИНЦИПХЭМ ДЫКЪАХЪУМЭ

19, 20. 1) Библием ит сыт хуэдэ принципхэр къыддэІэпыкъуну зэхэтхар пэжрэ мыпэжрэ зэхэдгъэкІыну? 2) Сыт къыкІэлъыкІуэ статьям щызэпкърытхынур?

¹⁹ Іуэхум теухуауэ псори къапщІэу, зэхэпхар пэжрэ мыпэжрэ зэхэбгъэкІыну тыншкъым, сыт щхьэкІэ жыпІэмэ хъыбар зэхэтххэм я нэхъыбэр пэжкъым е и ныкъуэм фІэкІа пэжу щыткъым. Абы нэмыщІ гуэныхь зэрытхэлъри зэран къытхуэхъуфынущ. Сыт-тІэ къыддэІэпыкъунур? Библием ит принципхэр зэрытщІэр икІи ахэр къызэрыдгъэсэбэпыр. Абыхэм щыщ зым дигу къегъэкІыж Іуэхум и пэжыпІэр къомыщІауэ жэуап птыжыныр акъылыншагъэу икІи напэтехыу зэрыщытыр (Прит. 18:13, Гъэс.). НэгъуэщІым къыдгурегъаІуэ зэхэтхыу хъуар пэжрэ пцІырэ зэхэдмыгъэкІауэ ди фІэщ тщІын зэрыхуэмейр (Прит. 14:15, Гъэс.). ИкІи Иеговэ дызэрыхуэлажьэ илъэс бжыгъэм емылъытауэ, ди щхьэм дыщыгугъыжын хуейкъым (Прит. 3:5, 6, Гъэс.). Библием ит принципхэм дыкъахъумэнущ икІи гупсысэ пэжхэм дыкъыхуэкІуэу, Іущагъ зыхэлъ унафэхэр тщІыну къыддэІэпыкъунущ, къытІэрыхьэ хъыбархэр пэжрэ пцІырэ зэхэдгъэкІыу щытмэ.

²⁰ Ауэ цІыхум тэмэму дыхущытыну сыт иджыри зэран къытхуэхъуфынур? ЦІыхум и теплъэращ. КъыкІэлъыкІуэ статьям дыщытепсэлъыхьынщ цІыхум дызэрыхущытыр и теплъэм елъытауэ щытмэ, абы шынагъэ хэлъхэм икІи апхуэдэу дыщымытын щхьэкІэ сыт къыддэІэпыкъунуми щызэпкърытхынщ.