Иеговэ фІыгъуэ ирет абы хуэжыІэдаІуэхэм

СЭ 1923 гъэм Хемсуэрт (Йоркшир графствэ, Англие) къалэм сыкъыщалъхуащ. Сэ дэлъху нэхъыжь сиІэт, абы и цІэр Бобт. Илъэсибгъу хуэдиз сыщыхъум си адэм динхэм я пцІыр къыщІэзыгъэщ тхылъ зыбжанэ къыІэрыхьат. Абы а тхылъхэр игу ирихьат, сыт щхьэкІэ жыпІэмэ дин пашэхэм я фэрыщІагъыр илъагъу хъутэкъым. Илъэс зыбжанэ дэкІа иужь дэ ди унэм къэкІуат Боб Аткинсон зицІэ зы цІыхухъу гуэр. Абы патефонымкІэ Рутерфорд и псалъэ дригъэдэІуат. Дэ къыдгурыІуащ а псалъэр жызыІар си адэм тхылъ къихьауэ щытахэр къыдэзыгъэкІа организацэм зэрыщыщыр. Си адэ-анэм ди дэлъху Аткинсон кърагъэблэгъат махуэ къэс пщыхьэщхьэшхэ къэкІуэну икІи, Библием тегъэщІауэ упщІэ куэд диІэти, абыхэм я жэуапхэр иритыну. Дэ километр зыбжанэкІэ тпэмыжыжьэу ди зы дэлъхум и унэм щекІуэкІ зэІущІэм дыкърагъэблэгъат. Абы занщІэу дыкІуэн щІэддзащ икІи куэд мыщІэу Хемсуэрт зэхуэс цІыкІу диІэ хъуащ. Районым и нэхъыжьхэри ди деж къыщыувыІэт икІи тпэмыжыжьэу псэу пионерхэр шэджагъуашхэ къедгъэблагъэт. Ахэр сэ хуабжьу сэбэп къысхуэхъуащ Алыхьым гъунэгъу сыхуэхъуну.

Дэ лэжьыгъэ гуэр къетхьэжьат, ауэ си адэм си дэлъхум жриІащ: «Пионер ухъуну ухуеймэ, дэ ар къэдгъэнэн хуейщ». Боб абыкІэ арэзыт. Илъэс 21-рэ щыхъум ар щхьэхуэу псэун икІи пионеру лэжьэн щІидзащ. ИлъэситІ дэкІри, илъэс 16 сыхъуу сэри пионеру лэжьэн щІэздзащ. Инэхъыбэм Алыхьым теухуауэ си закъуэут цІыхухэм сызэрепсалъэр. Абы щхьэкІэ хъыбарыфІыр зэрагъэІу карточкэхэмрэ патефонымрэ къэзгъэсэбэпт. Ауэ, цІыхухэр щыдэс махуэхэм гъусэ сиІэу хъыбарыфІыр згъэІут. Иеговэ и нэфІ къысщыхуат: сэ зы цІыхубз гуэр Библием езгъэджэн щІэздзащ икІи куэд мыщІэу абы псым зыщІигъэуащ. ИужькІэ абы и Іыхьлы куэди Иеговэ и Щыхьэт хъуащ. КъыкІэлъыкІуэ илъэсым сэ специальнэ пионер сащІащ икІи Мэри Хеншалл хъыбарыфІ гъэІунымкІэ гъусэ къысхуащІащ. Абырэ сэрэ зэхуэсым пымыщІа щІыпІэм дагъэкІуащ, Чешир графствэм.

ЕтІуанэ дунейпсо зауэшхуэр екІуэкІыу, цІыхубзхэм къалэн хуащІат зауэм хэтхэр зыхуей хуагъэзэн щхьэкІэ лэжьэну. Диным и лэжьакІуэхэр а Іуэхум хэмытыну хуит ящІт. Дэри дыщыгугъащ абы дыхамыгъэтыну. Ауэ судым нэгъуэщІ унафэщ ищІар, абы махуэ 31-кІэ тутнакъым сисыну тезыр къыстрилъхьащ. Илъэс 19 сыхъуауэ, къэрал унафэщІхэм къагурызгъэІуащ зауэм пыщІа Іуэхухэм сыхэтыну си напэм къызэрысхуимыдэр. Сэ судым и пащхьэ сихьэн хуейуэ тІэу къысхуихуащ, ауэ тІум щыгъуи Іуэхур и кІэм нагъэсакъым. А псор къекІуэкІыху, сэ зыхэсщІэт Иеговэ и къару лъапІэмкІэ къызэрыздэІэпыкъур икІи Иеговэ си Іэр иІыгъыу къысщыхъут (Ис. 41:10, 13).

НЭГЪУЭЩІ ГЪУСЭ СИІЭЩ

1946 гъэм Артур Маттьюзрэ сэрэ дызэрыцІыхуащ. Ар армэм кІуэн зэримыдам щхьэкІэ тутнакъым мазищкІэ исауэ къикІыжа къудейт икІи специальнэ пионеру лажьэ и къуэш Деннис деж Хемсуэрт къэкІуат. Ахэр сабийуэ я адэм Иеговэ теухуауэ къаригъэщІат икІи иджыри ныбжьыщІэу псым зыщІагъэуат. Артур Хемсуэрт къэкІуа иужь, куэд дэмыкІыу гъусэ имыІэу къэнащ, Деннис Ирландием зэрагъэкІуам щхьэкІэ. А щІалэм и щытыкІэр икІи жыджэру хъыбарыфІыр зэригъэІур си адэ-анэм ягу ирихьати я деж щыпсэуну кърагъэблэгъащ. Си адэ-анэм я деж сыкІуэжа иужь Артуррэ сэрэ зэгъусэу хьэкъущыкъур ттхьэщІт. Апхуэдэурэ, письмокІэ дызэхуэтхэу щІэддзащ. 1948 гъэм Артур аргуэру мазищкІэ ягъэтІысащ. 1949 гъэм, щІышылэм дэ дызэрышащ икІи Іэмал диІэху адэкІи полновременнэ лэжьыгъэм пытщэну мурад тщІащ. Дэ диІэр зэдгъэзахуэу дыпсэуну дыхущІэкъути, отпуск дыщыкІуэкІэ зыгуэр къэдлэжьын папщІэ, пхъэщхьэмыщхьэ къэтщыпт. Иеговэ и фІыгъэкІэ дэ адэкІи пионер лэжьыгъэр етхьэкІыфащ.

Зы илъэс хуэдиз дэкІауэ Ищхъэрэ Ирландием дагъэкІуащ, япэщІыкІэ Армэ, итІанэ Ньюри. А къалитІми католикхэр куэду дэст. Абыхэм нэгъуэщІ динхэр ялъагъу хъутэкъыми, дыхуэсакъыпэу хъыбарыфІыр дгъэІун хуейт. Километр 16-кІэ тпэмыжыжьэу псэу зэщхьэгъусэхэм я унэм зэІущІэхэр щекІуэкІт. Абы цІыхуий хуэдиз къекІуалІэт. Зэзэмызэ жэщкІэ дыкъыщынэ къэхъут, апхуэдэхэм деж унэ лъэгум дыщыжейт икІи пщэдджыжьым шхыныр берычэту къытхутрагъэувэт. Сэ хуабжьу сегъэгуфІэ нобэ а щІыпІэхэм Иеговэ и Щыхьэтхэр куэду зэрыщыІэм!

«ДЭ ДЫХЬЭЗЫРЩ!»

Си дэлъхумрэ абы и щхьэгъусэ Лоттирэ специальнэ пионеру Ищхъэрэ Ирландием щылажьэт. 1952 гъэм дэ плІыри дызэгъусэу Белфаст областной конгрессым дыкІуащ. А зэманым Британием и филиалым и нэхъыжьу лажьэ Прайс Хьюзрэ дэрэ ди зы дэлъху гуэрым и унэм дыкъригъэблэгъат. Зы пщыхьэщхьэ гуэрым Ирландием щхьэкІэ къыдагъэкІа «Путь Божий — любовь» жыхуиІэ брошюрэм дытепсэлъыхьу дыщысу Хьюз къыджиІэжащ Ирландием щыпсэу католикхэм хъыбарыфІыр яжепІэну зэрымытыншыр. Иеговэ и Щыхьэтхэр фэтэру къащта унэхэм къыщІахут икІи дин пашэхэм цІыхухэр къызыщІагъэстти абыхэм ираутІыпщт. Прайс къыджиІат: «Мы брошюрэхэр къэрал псом щыдгуэшыфын щхьэкІэ машинэ зиІэ зэщхьэгъусэхэм дыхуэныкъуэщ»a. Абы щыгъуэщ щыжытІар: «Дэ дыхьэзырщ!»

Дэ Дублин дыкІуа иужь, «мамэ РатлендкІэ» псори зэджэ ди шыпхъум и деж дыкъыщыувыІащ. Ар куэд щІауэ Иеговэ хуэлажьэт икІи сыт щыгъуи и гуапэу пионерхэр къригъэблагъэт. Дэ ди хьэпшыпхэм щыщ гуэрхэр тщащ, абы иужь дэ плІыри гу цІыкІу зыгуэт Боб и мотоциклымкІэ дежьащ машинэ къэтлъыхъуэну. Дэ дызыхуей машинэм хуэдэ къэдгъуэтат, ауэ ар къезыхуэкІыф зыри къытхэттэкъыми машинэр зызейм делъэІуащ ди унэм нэс ар къытхуихужыну. А пщыхьэщхьэ псом Артур гъуэлъыпІэм исащ машинэм и скоростыр зэрыжьэдилъхьэр къызыщигъэхъуу. Пщэдджыжьым абы гаражым машинэр къыщІихуну иужь щитым, ди деж къэкІуащ Милдред Уиллетт (миссионеру лажьэ, иужькІэ Джон Барр дэкІуа шыпхъур). Абы ищІэт машинэ къехуэкІыкІэ! Милдред Артур машинэ кърихуэкІыфу иригъасэри, гъуэгу дытеуващ.

Дэ дыщыпсэун къэдгъуэтын хуейт. Арати унэ къэтлъыхъуэн щІэддзащ, сыт щхьэкІэ жыпІэмэ къызэрыджаІамкІэ фургоныр жагъуэгъухэм ягъэсынкІэ хъунут. Ауэ дэ зыри дгъуэтакъым — а жэщым плІыри машинэм дыщыжейн хуей хъуащ. КъыкІэлъыкІуэ махуэм дэ къэдгъуэтыфар ІэкІэ ящІыжа фургонт, тІууэ зэтет гъуэлъыпІэ иту. Ар ди унэ хъуащ. ГъэщІэгъуэнщ, ауэ фермерхэр гуапэу къытхущытти, къытхуадэт абы я щІыпІэм ди фургоныр къыщыдгъэнэну. Дэ хъыбарыфІыр дгъэІун щхьэкІэ ди фургоныр къыщыдгъэна щІыпІэм километр 15—25-кІэ дыкъыІукІт. ИужькІэ нэгъуэщІ щІыпІэ фургоныр дгъэувти, ар здэщыта щІыпІэм хъыбарыфІыр щыдгъэІут.

Дэ зыри зэран къытхуэмыхъуу Ирландием ипщэ-къуэкІыпІэмкІэ щыІэ унэу хъуам хъыбарыфІыр щыдгъэІуфащ икІи брошюрэу мин тІощІым щІигъу дгуэшащ. ЗыфІэгъэщІэгъуэн хъуахэм я цІэхэр Британием и филиалым яхуедгъэхьащ. Иджыпсту а щІыпІэм Иеговэ и Щыхьэтхэр куэду зэрыщыІэр гуфІэгъуэшхуэщ.

ЯПЭЩІЫКІЭ АНГЛИЕМ ДОГЪЭЗЭЖ, ИУЖЬКІЭ ШОТЛАНДИЕМ ДОКІУЭ

Зэман гуэр дэкІри дэ Лондоным ипщэкІэ дыщылэжьэну дагъэкІуащ. Тхьэмахуэ зыбжанэ дэкІауэ Артур Британием и филиалым щыщ къуэш гуэр телефонкІэ къепсалъэри къелъэІуащ къыкІэлъыкІуэ махуэм щыщІэдзауэ районым и нэхъыжьу лэжьэну! ТхьэмахуэкІэ драгъэджа иужь, Шотландием хъыбарыфІыр щыдгъэІуну дыкІуащ. Артур зэман куэд иІэтэкъым псалъэхэр игъэхьэзырыну, ауэ сэ сигъэгушхуат, абы лэжьыгъэ къыпэщылъыр дапхуэдэу гугъуу щымытами, ар игъэзэщІэну зэрыхьэзырым. Дэ районнэ лэжьыгъэр хуабжьу дигу ирихьат, сыт щхьэкІэ жыпІэмэ абы ипэ илъэс зыбжанэкІэ ди дэлъху, ди шыпхъу куэд здэщымыІэ щІыпІэм хъыбарыфІыр щыдгъэІуат, ауэ иджы дэ Иеговэ и лэжьакІуэ куэдым дахэтт. Ар Иеговэ къыбгъэдэкІ фІыгъуэшхуэт!

1962 гъэм Артур мазипщІкІэ Галаад Школым щрагъэджэну кърагъэблэгъат. Абы теухуауэ гугъут унафэ тщІыну, сыт щхьэкІэ жыпІэмэ сэ сыкърагъэблэгъатэкъыми куэдрэ дызэрылъэгъунутэкъым. Ауэ дэ къыдгурыІуащ абы пщІэшхуэ зэрыпылъыр икІи Артур Іэмал имыІэу кІуэн зэрыхуейр. Сэ гъусэ симыІэу сыкъэнати, специальнэ пионеру Хемсуэрт къалэм сагъэкІуэжащ. Илъэс дэкІри Артур къигъэзэжащ икІи областной надзиратель ящІащ. Дэ хъыбарыфІыр щыдгъэІуащ Шотландием, Англием и ищхъэрэм икІи Ищхъэрэ Ирландием.

ИРЛАНДИЕМ НЭГЪУЭЩІ КЪАЛЭН КЪЫЩЫДАТ

1964 гъэм Артур Ирландием и филиалым и нэхъыжьу ягъэуващ. ЯпэщІыкІэ сэ абы Іейуэ сригузавэт, сыт щхьэкІэ жыпІэмэ дэ районнэ лэжьыгъэр хуабжьу дигу ирихьт. Ауэ иджы сэ икъукІэ согуфІэ Вефилым дыщылэжьэну Іэмал дызэриІам щхьэкІэ! Сэ къызгурыІуащ: Иеговэ къалэн гуэр къыущиткІэ, ар уигу иримыхьыщэу щытми, абы иужь уихьэмэ, Іэмал имыІэу езым фІыгъуэ куэд къыплъигъэсынущ. Сэ офисым сыщылажьэт, литературэр коробкэхэм ислъхьэт, сыпщафІэт икІи къабзагъэм сыкІэлъыплът. Иныкъуэхэм деж дэ областной лэжьыгъэм дыхэтт, ди дэлъху, ди шыпхъухэр дгъэгушхуэу. Дэ дигъэгуфІэт Библием едгъаджэхэм ехъулІэныгъэхэр зэраІэм. А псом Ирландием щыпсэу Иеговэ и лэжьакІуэхэмрэ дэрэ зы унагъуэм хуэдэу зэкъуэт дищІащ. Ар Иеговэ къыбгъэдэкІ тыгъэшхуэщ!

ИРЛАНДИЕМ ЩЫПСЭУ ИЕГОВЭ И ЩЫХЬЭТХЭМ ЩХЬЭКІЭ МЫХЬЭНЭШХУЭ ЗИІЭ ІУЭХУГЪУЭ

Къэрал куэдым къикІа Иеговэ и Щыхьэтхэр щызэхуэс конгрессыр япэ дыдэу Ирландием (Дублин) 1965 гъэм щекІуэкІащb. Бийхэр хуабжьу зэран къытхуэхъуну зэрыхэтам емылъытауэ, конгрессыр фІы дыдэу екІуэкІащ. Абы цІыху 3 948 щыІащ икІи абыхэм щыщу 65-м псым зыщІагъэуащ. Хамэ къэралым къикІа цІыху 3 500 къезыгъэблэгъахэм псоми фІыщІэ зэрыт письмо иратащ. Ирландием щыпсэу ди дэлъху, ди шыпхъухэри я деж щыІа хьэщІэхэм я щытыкІэм Іейуэ щытхъуащ. А конгрессыр дауикІ, ди дежкІэ мыхьэнэшхуэ зиІэ Іуэхугъуэт.

1966 гъэм унафэ ящІат Ирландием и ищхъэрэмрэ ипщэмрэ щекІуэкІ хъыбарыфІ гъэІуным Дублин щыІэ филиалыр кІэлъыплъыну. Ирландием политикэмрэ динымрэ къыхэкІыу зэгурымыІуэныгъэшхуэ къыщекІуэкІым ди зэкъуэтыныгъэр хуабжьу къыхэщт. Гухэхъуэт плъэгъуну католик куэд Иеговэ и Щыхьэт зэрыхъур икІи япэм протестанту щыта ди дэлъхухэм я гъусэу хъыбарыфІыр зэрагъэІур.

АРГУЭРУ ДИ ГЪАЩІЭМ ЗЕХЪУЭЖ

2011 гъэм ди гъащІэм зихъуэжащ. Британиемрэ Ирландиемрэ щыІэ филиалхэр зы ящІыжащ, икІи дэ Лондон щыІэ Вефилым дагъэкІуащ. Ар къыщыджаІа зэманым Артур и узыншагъэм сигъэгузавэт. Абы Паркинсон зицІэ узыфэ иІэт. 2015 гъэм, накъыгъэм и 20-м, илъэс 66-кІэ сыздэпсэуа Артур, дунейм ехыжащ.

Сэ иджыри къыздэсым си гум гуауэ илъщ икІи иныкъуэхэм деж закъуэныгъэ зыхызощІэ. Япэм Артур сыт щыгъуи си гъусэт. Сэ абы хуабжьу сыхуозэш! Ауэ апхуэдэ гугъуехьхэм Иеговэ гъунэгъу ухуащІ. Ди дэлъху, ди шыпхъу куэдым Артур фІыуэ ялъагъуу зэрыщытам си гур хегъахъуэ. Сэ Ирландием, Великобританием икІи Америкэм щыІэ ди ныбжьэгъухэм письмо куэд къысхуатх. А письмохэм къару къызат икІи Артур и къуэш Деннисрэ абы и щхьэгъусэ Мейвисрэ, абы нэмыщІ си дэлъхум и пхъуитІ Рутрэ Джудирэ къыздоІэпыкъу. А псор фІыщІэ зэрысщІыр псалъэкІэ пхужыІэнкъым.

Сэ Исаия 30:18 ит псалъэхэм къару къысхалъхьэ: «Иеговэ къыфпэплъэнущ и фІыгъуэр къыфлъигъэсын щхьэкІэ, абы зыкъиІэтынущ, гущІэгъу къыфхуищІын папщІэ. Сыт щхьэкІэ жыпІэмэ, Иеговэ — захуагъэ зыщІэ Алыхьщ. НасыпыфІэщ абы пэплъэ псори». Ди гугъуехьхэр тщхьэщихыу, удэзыхьэх къалэн гъэщІэгъуэнхэр дунейщІэм къыщыдитыну зэманым Иеговэ зэрыпэплъэм сэ гупсэхугъуэ къызет.

БлэкІа зэманым сыщегупсысыжкІэ, сэ наІуэ сщохъу Иеговэ Ирландием хъыбарыфІ гъэІуныр зэригъэкІуатэр икІи абы и нэфІ зэрыщыхуэр! Мы къэралым хъыбарыфІыр щызгъэІуну Іэмал сызэриІам сэ икъукІэ срогуфІэ. Сэ езым си нэкІэ слъэгъуащ Иеговэ хуэжыІэдаІуэхэм фІыгъуэ зарыритыр.