Гуапэу къызэрыхущытам и фІыгъэкІэ пэжыр къищІащ
ГУДЖАРАТ штатым (Индие) дэт зы къалэ цІыкІум Джон и цІэу зы щІалэ цІыкІу щыпсэут. Абы и адэр 1950 гъэхэм и кІэм Иеговэ и Щыхьэт хъуат. Ауэ Джони, абы и анэми, и къуэш и шыпхъуитхуми ягу ирихьакъым и адэм и диныр зэрихъуэжар, сыт щхьэкІэ жыпІэмэ абыхэм псоми католицизмыр быдэу я фІэщ хъут.
Зэгуэрым Джон и адэр къелъэІуат зэхуэсым щыщ зы къуэшым конверт хуихьыну. Абы деж щыкІуэну пщэдджыжьым Джон и Іэпэр Іейуэ иуІэжат гъущІ бочкэ щытрихым. Ауэ и адэр къызэрелъэІуар игъэзэщІэну хуейти абы и Іэпэр хъыданкІэ ипхэри гъуэгу теуващ.
Къуэшым и унэм щынэсам абы и щхьэгъусэм бжэр Іуихащ. Ари Иеговэ и Щыхьэтт. Джон къихьа конвертыр ди шыпхъум къыщриІыхым и Іэпэр зэриуІэжам гу лъитати хущхъуэкІэ и уІэгъэр хуигъэкъабзэри, хуипхэжащ. Абы иужь Джон шей пщтыр хутригъэувэри Библием теухуауэ гуапэу епсэлъэн щІидзащ.
Ди шыпхъур гуапэу къызэрыхущытар Джон къыдэІэпыкъуащ Иеговэ и Щыхьэтхэм хуиІэ еплъыкІэр ихъуэжыну. Абы и адэмрэ езымрэ зэрызэтемыхуэ упщІитІ ди шыпхъум иритащ: «Хьисэ Алыхьу щыт икІи Хьисэ и анэ Мэрием тхьэлъэІукІэ зыхуэбгъэзэн хуей?» Ди шыпхъум гуджарати бзэр ищІэти Джон и бзэкІэ жэуап иритыжыфащ. Абы Джон и упщІэхэм теухуауэ Библием итыр иригъэлъэгъуащ икІи «Эта благая весть о Царстве» брошюрэр иритащ.
Джон а брошюрэм щеджэм къыгурыІуащ пэжыр къызэригъуэтар. Ар дин пашэм деж кІуэри а упщІэ дыдэхэр иритащ. Дин пашэр къэгубжьщ, Библиер абы жьэхидзэри кІиин щІидзащ: «Уэ Иблис ухъуащ! Сыгъэлъагъут, Библием Хьисэ мы-Алыхьыу здитыр. Сыгъэлъагъут, Мэрием дыхуэлэжьэн хуэмейуэ абы щыжиІэр. Сыгъэлъагъу!» Дин пашэм и щытыкІэм Джон апхуэдизкІэ гущыкІ хуищІати, мыпхуэдэу жриІащ: «АфІэкІа, мы члисэм зэи сыкъэкІуэнукъым!» Абы и псалъэр иІыгъыжащ.
Джон Библиер иджын щІидзащ, фІэщхъуныгъэ быдэ зригъэгъуэтри Алыхь пэжым и лэжьакІуэ хъуащ. Зэман дэкІри абы и унагъуэм щыщхэри Иеговэ и Щыхьэт хъуащ. Джон иджыри къыздэсым Іэ ижьым и Іэпхъуамбапщэм дыркъуэ зэрытелъыр болъагъу. Илъэс 60 ипэ ди шыпхъур гуапэу къызэрыхущытам и фІыгъэкІэ Иеговэ хуэлэжьэн зэрыщІидзар абы и гум ІэфІу къинэжащ (2 Кор. 6:4, 6).