Сыт и лъэныкъуэкІи цІыху пэжу щыт

1, 2. Дэ цІыху пэжу дыщытын щхьэкІэ къарууэ диІэр зэретхьэлІэр Иеговэ щилъагъум деж, сыт абы и гум щыщІэр?

ЗЭГУЭРЫМ щІалэ цІыкІур школым къикІыжу бохъшэм ахъшэ дэлъу къигъуэтащ. Сыт абы ищІар? Абы а бохъшэр и щхьэм къыхуигъэнэфынут, ауэ абы и пІэкІэ а бохъшэр зейм иритыжащ. ЩІалэ цІыкІум ищІар и анэм къыщищІам щыгъуэ, анэм и гур абы хигъэхъуащ.

² Адэ-анэхэм я нэхъыбэр мэгуфІэ я сабийхэм пэжагъ яхэлъу щалъагъум деж. Уафэм щыІэ ди Адэ лъапІэ Иеговэ — «пэжыгъэм и Алыхьщ» икІи дэ цІыху пэжу дыщыщытым деж абы и гур догъэгуфІэ (Псалом 31:5). Дэ ар арэзы тщІыну дыхуейщ икІи «Іуэху псомкІэ пэжыгъэ дигу илъу дыпсэуну дыхуейщ» (Еврейхэм 13:18, ХъыбарыфІыр, 1993). ЦІыху пэжу ущытыну щымытынш лъэныкъуиплІым иджыпсту дытепсэлъыхьынщ. Абы иужь деплъынщ дэ цІыху пэжу дыкъызэрынэм сыт хуэдэ сэбэпынагъ къытхуихьми.

УИ ЩХЬЭР КЪОМЫГЪЭПЦІЭЖ

3—5. 1) Ди щхьэр дауэ къызэрыдгъэпцІэжыфынур? 2) Ди щхьэр къэдмыгъэпцІэжыну сыт къыддэІэпыкъуныр?

³ НэгъуэщІ цІыхухэм пэжагъ тхэлъу дахущытын щхьэкІэ, япэщІыкІэ дэ езым ди щхьэр къэдгъэпцІэжын хуейкъым. Ар щымытынши къохъу. Япэ лІэщІыгъуэм Лаодикие къалэм щыІа зэхуэсым щыщхэм Алыхьыр арэзы ящІ я гугъэу, я щхьэр къагъэпцІэжт, ауэ и пэжыпІэкІэ ар апхуэдэу щыттэкъым (Апокалипсис 3:17). Дэри дызэрыщытым теухуауэ ди щхьэр къэдгъэпцІыжыфынущ.

⁴ Хьисэ и гъэсэн Екъуб итхауэ щытащ: «Зыгуэрым Тхьэм и фІэлІыкІ и гум илъ фІэщІу, ауэ и бзэр имыубыдмэ, абы и щхьэр къегъэпцІэж, и динри пщІэншэщ» (Екъуб 1:26). Дэ цІыхухэм дахуэпхъашэми, псалъэ дыдж яжетІэми, пцІы дупсми, фІы гуэр зэрытщІэм щхьэкІэ, апхуэдэу дызэрыщытым Алыхьым гу лъимытэну ди гугъэу щытмэ, ди щхьэр къыдогъэпцІэж. Ди щхьэр къэдмыгъэпцІэжыну сыт къыддэІэпыкъуныр?

⁵ Гъуджэм дыщиплъэм деж ди теплъэр сыт хуэдэми зэрытлъагъужым хуэдэу, Библием дыщеджэкІэ сыт хуэдэ цІыхуу дыщытми тлъэгъужыфынущ. Библиер къыддэІэпыкъуфынущ дэ тхэлъ хьэлыфІхэри хьэл Іейхэри къэтлъэгъуну икІи абы и фІыщІэкІэ дэ ди гупсысэкІэми, ди щытыкІэми, ди псэлъэкІэми теухуауэ тхъуэжын хуейр къыдощІэ. (Къеджэ Екъуб 1:23—25.) Ауэ ныкъусан лъэпкъ димыІэу тлъытэмэ, дэ зытхъуэжыфынукъым. Абы къыхэкІкІэ дэ дызэрыщыт дыдэр тлъэгъужын щхьэкІэ, Библиер къэдгъэсэбэпын хуейщ (Плач Иеремии 3:40; Аггей 1:5). Сыт хуэдэ цІыхуу дыщытми тлъэгъужыну тхьэлъэІури къыддэІэпыкъунущ. Иеговэ тхьэлъэІукІэ зыщыхуэдгъазэм деж делъэІу хъунущ зытхъуэжын щхьэкІэ ди ныкъусаныгъэхэр къихутэу, гу лъыдигъэтэну (Псалом 139:23, 24). Дэ мы псалъэхэр дощІэж: «ЦІыху бзаджэм Иеговэ гущыкІ хуещІ, ауэ цІыху пэжхэмрэ абырэ я зэхуаку зэхущытыкІэфІ дэлъщ» (Притчи 3:32).

УИ УНАГЪУЭМ ПЭЖАГЪ ЩЫГЪЭЛЪАГЪУЭ

6. Зэщхьэгъусэхэм я зэхуаку пэжагъ щІыдэлъын хуейр сыт?

⁶ Унагъуэм Іэмал имыІэу пэжагъ илъын хуейщ. Зэщхьэгъусэхэм зыри зыщамыбзыщІу щытмэ, я зэхуаку зэхущытыкІэфІ дэлъынущ икІи нэгъэсауэ дзыхь зэхуащІыфынущ. Зэщхьэгъусэхэм я зэхуаку пэжагъ зэрыдэмылъыр Іуэху зэмылІэужьыгъуэхэм къыхэщыфынущ. Псалъэм папщІэ, щхьэгъусэ зиІэ цІыхум нэгъуэщІ гуэрым зыкъыпригъэхын, порнографие еплъын е и щхьэгъусэу щымыт цІыхум гухэлъ хуищІу щэхуу хуэзэн щІидзэнкІэ хъунущ. 26-нэ Псаломыр зытха цІыхум и псалъэхэм гу лъытэт: «Сэ пцІыупсхэм сабгъэдэсакъым икІи зэрыщытыр щІэзыхъумэхэм саригъусакъым» (Псалом 26:4). Уи щхьэгъусэм уи гупсысэхэмкІэ ухуэмыпэжмэ, ар фи нэчыхьым зэран хуэхъунущ.

7, 8. Библиер дауэ къэбгъэсэбэп хъуну пэжагъым мыхьэнэшхуэ зэриІэр сабийхэм къагурыбгъэІуэн щхьэкІэ?

⁷ Пэжагъым мыхьэнэшхуэ зэриІэм сабийхэми зрагъэсэн хуейщ. Абыхэм пэжагъ ягъэлъэгъуэну ирагъэсэн щхьэкІэ адэ-анэхэм Библиер къагъэсэбэп хъунущ. Абы пэжагъ зымыгъэлъэгъуа цІыхухэм я щапхъэхэр итщ, псалъэм папщІэ, дыгъуэгъуакІуэ хъуа Ахан, ахъшэ зыІэригъэхьэн щхьэкІэ пцІы зыупса Гиезие, ахъшэ къэзыдыгъуу щыта икІи иужькІэ Хьисэ дыжьын ахъшэ щэщІкІэ зыща Иудэ сымэ (Иисус Навин 6:17—19; 7:11—25; 2 Царей 5:14—16, 20—27; Маттэ 26:14, 15; Иуан 12:6).

⁸ Пэжагъ зыгъэлъэгъуа цІыху куэдми я щапхъэхэр Библием итщ. Екъуб, Иеффэ, Хьисэ сымэ абыхэм ящыщщ. Екъуб и къуэхэм ахъшэ къагъуэтар зейм хуахьыжыну хуигъэушащ, Иеффэрэ и пхъумрэ Алыхьым ирата псалъэр ягъэзэщІэжащ, Хьиси гугъуехь щыпэщІэхуэми пэжагъ игъэлъэгъуащ (ЩІэдзапІэ 43:12; Судей 11:30—40; Иуан 18:3—11). Мы щапхъэхэр сабийхэм къадэІэпыкъунущ пэжагъым мыхьэнэшхуэ зэриІэр къагурыІуэну.

9. Адэ-анэм я пэжагъыр сабийхэм дауэ къадэІэпыкъуфыну?

⁹ Адэ-анэхэм Библием ит мыпхуэдэ принципым дерс къыхахыфынущ: «Дауэ уэ нэгъуэщІхэр ебгъаджэу, уи щхьэр зэромыгъэджэжыр? Умыдыгъуэ жыпІэу, узэрыдыгъуэр?» (Рим 2:21, ДЩІ). Сабийхэм къагуроІуэ адэ-анэхэм жаІэмрэ ящІэмрэ щызэтемыхуэм деж. Ди сабийхэр пэжагъ ягъэлъэгъуэну дгъасэу, ауэ дэ езыр пэжу дыщымытмэ, абыхэм ящІэныр ямыщІэу Іэнкун хъунущ. Сабийхэм я адэ-анэхэм пцІы яупсу гу лъатэу щытмэ, ар мыхьэнэшхуэ зимыІэ Іуэхуу къыпщыхъуми, езыхэми пцІы яупсу хъункІэ хъунущ. (Къеджэ Лука 16:10.) Ауэ сабийхэм я адэ-анэм пэжагъ яхэлъу щалъагъум деж езыхэри балигъ хъуа иужь дзыхь зыхуэпщІ хъун адэ-анэ хъуфынущ (Притчи 22:6, Гъэсэпэтхыдэхэр; Ефес 6:4).

ЗЭХУЭСЫМ ПЭЖАГЪ ЩЫГЪЭЛЪАГЪУЭ

10. Дауэ ди къуэш, ди шыпхъухэм дыщепсалъэкІэ пэжагъ зэрыдгъэлъэгъуэфынур?

¹⁰ Зэхуэсым щыщ ди къуэш, ди шыпхъухэми пэжагъ тхэлъу дабгъэдэтын хуейщ. Дэ ди къуэш, ди шыпхъухэм дыщепсалъэм деж дымыщІэххэу адрейхэм теухуа хъыбархэр дгъэІуу щІэддзэн е нэгъуэщІхэм пцІы ятетлъхьэнкІэ шынагъэ щыІэщ. Зэхэтхар пэжрэ пцІырэ дымыщІэу, нэгъуэщІхэм яжетІэмэ, дэ пцІы гуэр дгъэбэгъуэнкІэ хъунущ. Абы нэхърэ ди бзэм дыхуэсакъмэ нэхъыфІщ (Притчи 10:19). ЦІыху пэжу ущытыным къикІкъым узэгупсысри, пщІэри, зэхэпха псори жыпІэн хуейуэ. Дэ жытІэну дызыхуейр пэжу щытми, абы ди Іуэху хэмылъынкІэ хъунущ е ар Іэмал имыІэу жытІэжын хуей Іуэхугъуэу щымытынкІэ хъунущ икІи апхуэдэу пщІэным лъагъуныгъэ хэлъкъым (1 Фессалоникэ 4:11). Языныкъуэ цІыхухэм я псэлъэкІэр зэрыпхъашэр ягъэзахуэн щхьэкІэ «Сэ пэжыр жысІэу аращ» жаІэ. Дэ Иеговэ и лъэпкъым дызэрыщыщым къыхэкІкІэ ди псалъэхэр сыт щыгъуи гуапэу икІи щабэу щытыну дыхуейщ. (Къеджэ Колоссэ 4:6.)

11, 12. 1) Гуэныхь зыщІа цІыхум пцІы иупсу дауэ и Іуэхур нэхъ Іей зэрищІыфынур? 2) Сыт хуэдэ упщІэхэр дэ зэттыж хъуну? 3) Иеговэ и организацэм пэжагъ дауэ иджыри зэрыщыдгъэлъэгъуэфынур?

¹¹ Иеговэ зэхуэсым и нэхъыжьхэм къалэн яхуищІащ зэхуэсым хэтхэм дэІэпыкъуну. Зэхуэсым и нэхъыжьхэм пэжагъ тхэлъу дабгъэдэту щытмэ, дэ къыддэІэпыкъуну абыхэм я дежкІэ нэхъ тынш хъунущ. Сыт щхьэкІэ? Уэ сымаджэ ухъуу, дохутырым деж укІуауэ щытамэ, абы уи узым и нэщэнэ гуэрхэр щыббзыщІынут? Уэ апхуэдэу пщІауэ щытамэ, ар къыбдэІэпыкъуфынут? Абы ещхьу дэ гуэныхь хьэлъэ къытІэщІэщІамэ, пцІы дупс хъунукъым. Дэ зэхуэсым и нэхъыжьхэм дабгъэдыхьэу псори яжетІэжын хуейщ (Псалом 12:2; Апостолхэм 5:1—11). Ауэ мыпхуэдэ Іуэхугъуэ къэхъункІэ хъунущ: уэ уи ныбжьэгъум гуэныхь хьэлъэ зэрищІар къыбощІэ (Левит 5:1). Мыпхуэдэу уегупсысыну пІэрэ уэ: «Сэ абы сыриныбжьэгъу пэжу щытмэ, абы и щэхур зыми къезгъэщІэнукъым» жыпІэу? Хьэмэрэ абы дэІэпыкъуну хьэзыр зэхуэсым и нэхъыжьхэр зэрыщыІэр уигу къэкІыжыну? Ахэр уи ныбжьэгъум дэІэпыкъуфынущ Иеговэрэ абырэ я зэхуаку дэлъа зэхущытыкІэр зэтригъэувэжу, нэхъ быдэ ищІыну (Еврейхэм 13:17; Екъуб 5:14, 15).

¹² Абы нэмыщІ Иеговэ и организацэм пэжагъ щыдгъэлъэгъуэн хуейщ, псалъэм папщІэ, хъыбарыфІыр зэрыдгъэІуам теухуауэ отчет щыттхым деж. Иджыри пионеру дылэжьэну е нэгъуэщІ лэжьыгъэ гуэрхэм дыхэтыну дыхуейуэ заявленэ щыттхым деж абы упщІэ итхэм я жэуапыр пцІы дымыупсу иттхэн хуейщ. (Къеджэ Притчи 6:16—19, Гъэс.)

13. Дауэ ди къуэш, ди шыпхъухэм лэжьыгъэ ІуэхухэмкІэ пэжагъ тхэлъу дазэрыбгъэдэтыфынур?

¹³ Хьисэ и лъэужь ирикІуэхэм лэжьыгъэ Іуэхухэмрэ Алыхьым хуэлэжьэнымрэ зы ящІ хъунукъым. Псалъэм папщІэ, дэ дыщызэхуэс Унэхэм дыщыщыІэм деж е хъыбарыфІыр щыдгъэІум деж ди лэжьыгъэ Іуэхухэр зэфІэдгъэкІкъым. ИкІи ди фейдэ къэтлъыхъуэу, ди къуэш, ди шыпхъухэр къэдгъэсэбэпыркъым. Ди къуэш, ди шыпхъухэм щыщ бгъэлэжьэну къапщтэмэ, ар къызэрыбгъэгугъа лэжьапщІэр игъуэу ет икІи законым игъэува льготэхэри ет. Абы хохьэ медицинскэ страховкэри отпуск щыкІуэм деж ахъшэ иратри (1 Тимофей 5:18; Екъуб 5:1—4). Ауэ уэ езыр ди къуэш, ди шыпхъу гуэрым деж ущылажьэу щытмэ, нэхъ лейуэ къыпхущытын хуейуэ къомылъытэ (Ефес 6:5—8). ФызэрызэгурыІуа сыхьэт бжыгъэмкІэ лажьэ икІи лэжьапщІэ къыщІыуат лэжьыгъэр гъэзащІэ (2 Фессалоникэ 3:10).

14. Иеговэ и лэжьакІуэхэм зэгъусэу лэжьыгъэ Іуэху гуэр зэдащІэн ипэ сыт ящІэн хуейр?

¹⁴ Ауэ дэ ди къуэш, ди шыпхъу гуэрым лэжьыгъэ дэтщІэну иужь дихьэмэ-щэ? Абы ахъшэ хэплъхьэн е кредит къэпщтэн хуей хъункІэ хъунущ. Апхуэдэ Іуэхугъуэхэм теухуауэ сэбэпынагъышхуэ зыпылъ принцип Библием итщ: фызэрызэгурыІуар тхылъымпІэм иту зивгъэІэ! Бегъымбар Иеремие щІы Іыхьэ къыщищэхуам абы зэгурыІуэныгъэр экземпляритІу итхри, зыр щыхьэтхэм яритащ Іэ щІригъэдзын щхьэкІэ икІи иужькІэ зыгуэр къэхъуу щытмэ, абыхэм зыхуагъэзэжыфын хуэдэу ахэр игъэтІылъащ (Иеремия 32:9—12; абы нэмыщІ еплъ ЩІэдзапІэ 23:16—20). Языныкъуэхэм къащохъу апхуэдэ зэгурыІуэныгъэ ятхыу щытмэ, я къуэшым дзыхь хуамыщІ хуэдэу къикІыу. Ауэ пэжыр жыпІэмэ, апхуэдэ зэгурыІуэныгъэ птхыуэ щытмэ гукъеуэ, гухэщІ, зэгурымыІуэныгъэ куэдым зыщыпхъумэфынущ. Зыгуэрым Іуэху щыдэпщІэкІэ зыщомыгъэгъупщэ абы къыпхуихьыну фейдэм нэхърэ зэхуэсым илъ мамырыгъэр куэдкІэ нэхъ лъапІэу зэрыщытыр (1 Коринф 6:1—8; Приложение 30-нэм еплъ).

МЫ ДУНЕЙМ ПЭЖАГЪ ЩЫГЪЭЛЪАГЪУЭ

15. ЦІыхухэм лэжьыгъэ Іуэху гуэр щызэдащІэм деж пэжагъ зэрамыгъэлъагъуэм Иеговэ дауэ зэрыхущытыр?

¹⁵ Дэ дэтхэнэ зы цІыхуми, Иеговэ и Щыхьэту щымытхэми, пэжагъ тхэлъу дабгъэдэтын хуейщ. Дэ цІыху пэжу дыщытыным Иеговэ и дежкІэ мыхьэнэшхуэ иІэщ. «ХуищІакІэщ гущыкІ тэрэзэ нэпцІхэм Тхьэуэ Зиусхьэным, еплъащ Ар нэфІкІэ шэчалъэ пэжым» (Притчи 11:1; 20:10, 23, Гъэс.). Библиер щатха зэманым сатуущІэхэм тэрэзэ къагъэсэбэп хабзэт. Ауэ иныкъуэхэм деж абыхэм я щэхуакІуэхэр къагъапцІэт, зэрызэгурыІуам нэхърэ нэхъ мащІэ къыхуашэчу е уасэр нэхъыбэу къраІыхыу. Ноби, Библиер щатха зэманми хуэдэу, цІыхур къызэрагъапцІэм зиубгъуащ. Ди зэманми Иеговэ пцІы упсыным зэрыхущытым зихъуэжакъым, япэм хуэдэуи абы ар илъагъу хъукъым.

16, 17. Мы дунейм къыщекІуэкІ сыт хуэдэ пцІым зыщытхъумэн хуей?

¹⁶ Дэ псоми пцІы щыдупсыфын Іуэхугъуэ дохуэ — ар ирехъу лэжьапІэ дыщыувым деж, къэралым и бланк гуэрхэм я упщІэхэм жэуап щеттым деж, школым экзамен щыттым деж. Куэдыр зэрегупсысымкІэ, зыри Іей хэлъкъым пцІы бупсыным, узэрыщымыт жыпІэным е зыгуэр щІэпхъумэным. Дэ ар дгъэщІагъуэкъым. Библием щыжыІауэ щытащ мы дунейм и иужьрей махуэхэм «цІыхухэм езыхэм фІыуэ залъагъужу, ахъшэри фІыуэ ялъагъуу... фІыгъуэр [«фІыр», ДЩІ] фІыуэ ямылъагъужу» зэрыхъуныр (2 Тимофей 3:1—5).

¹⁷ Иныкъуэхэм деж къыпщыхъункІэ хъунущ мы дунейм пэжагъ зыхэмылъ цІыхухэм ехъулІэныгъэ нэхъ яІэу (Псалом 73:1—8). Иеговэ и лэжьакІуэр цІыху пэжу зэрыщытым щхьэкІэ и лэжьапІэр фІэкІуэдынкІэ хъунущ, къагъапцІэу ахъшэ къыІэщІагъэкІыфынущ е лэжьапІэм гугъу щрагъэхьыфынущ. Ауэ а псом емылъытауэ цІыху пэжу ущытыным фІыгъуэ куэд къыпокІуэ. Сыт щхьэкІэ?

ПЭЖАГЪЫМ КЪЫПЭКІУЭ ФІЫГЪУЭХЭР

18. Сыт цІыху пэжу уацІыхуным уасэшхуэ щІиІэр?

¹⁸ Ди зэманым дзыхь зыхуэпщІ хъун цІыху пэжу уацІыхуным уасэшхуэ иІэщ икІи апхуэдэ цІыхухэр мы дунейм щыгъуэтыгъуейщ. Дэтхэнэ зыми Іэмал иІэщ апхуэдэ цІэ къилэжьыну (Михей 7:2). ДауикІ, уэ цІыху пэжу ущытыну узэрыхущІэкъум щхьэкІэ ауан узыщІыни, делафэ къозыплъыни цІыхухэм къахэкІынущ. Ауэ нэгъуэщІ цІыхухэм уэ пэжагъ зэрыбгъэлъагъуэм гу лъатэмэ, дзыхь къыпхуащІынущ. Дуней псом Иеговэ и Щыхьэтхэр цІыху пэжущ зэрацІыхур. Языныкъуэхэм Иеговэ и Щыхьэтхэр ягъэлэжьэну нэхъ къащтэ, сыт щхьэкІэ жыпІэмэ абыхэм пцІы зэрамыупсынур ящІэри. ИкІи пэжагъ зэрамыгъэлъагъуэм щхьэкІэ куэдыр я лэжьапІэм щыІуагъэкІыжым щыгъуэ Иеговэ и Щыхьэтхэм я лэжьапІэр яфІэмыкІуэду къэнащ.

19. Иеговэрэ уэрэ фи зэхущытыкІэм пэжагъыр дауэ сэбэп хуэхъуну?

¹⁹ Сыт и лъэныкъуэкІи цІыху пэжу ущытмэ, уэ напэ къабзэ уиІэнущ икІи уи гум мамырыгъэ илъынущ. Дэ Паул щапхъэ тетхыфынущ, абы мыпхуэдэу итхат: «МыхъумыщІэ дигу илъу зыдэтщІэжыркъым» (Еврейхэм 13:18). ИкІи псом нэхърэ нэхъапэр — уэ сыт и лъэныкъуэкІи цІыху пэжу ущытын щхьэкІэ къару епхьэлІэхэм уафэм щыІэ ди Адэ лъапІэ Иеговэ гу зэрылъитэнуращ. (Къеджэ Псалом 15:1, 2a; Притчи 22:1, Гъэс.)