ЦІыхухэм ягъэлъапІэ махуэшхуэхэр псори Алыхьым игу ирихьу пІэрэ?

1. Иеговэ дызэрыхуэлажьэр игу зэрырихьым шэч лъэпкъ къытедмыхьэн щхьэкІэ, сыт дэ тщІэн хуейр икІи сыт щхьэкІэ?

ХЬИСЭ жиІауэ щытащ Алыхьым и лэжьакІуэ пэжхэр пэжыгъэм тету абы зэрыхуэлэжьэнур (Иуан 4:23; 6:44). Дэтхэнэ зыми зэпымыууэ «Зиусхьэным игу ирихьыр» сытми зэхэдгъэкІын хуейщ (Ефес 5:10, ДЩІ). Ар сыт щыгъуи тыншу щыткъым. ШейтІаным дыкъигъапцІэу Иеговэ игу иримыхь гуэр дигъэщІэну хэтщ (Апокалипсис 12:9).

2. Синай бгы лъапэм деж къыщыхъуар жыІэж.

² Дапхуэдэу ШейтІаным дыкъигъэпцІэну зэрыхэтыр? Псалъэм папщІэ, фІымрэ Іеймрэ теухуауэ абы дыщигъэуэну хэтщ. Израил лъэпкъыр Синай бгы лъапэм деж къыщыувыІам къащыщІа Іуэхугъуэм егупсысыт. Мусэ бгым щыдэкІуеям щыгъуэ израил лъэпкъыр абы къыщигъэзэжынум ежьэу бгы лъапэм Іусащ. ИкІэм-икІэжым израил лъэпкъыр Мусэ ежьэурэ ешри, ахэр Хьэрун елъэІуащ тхьэ яхуищІыну. Хьэрун танэм и теплъэ иІэу дыщэм тхьэ нэпцІ къахухищІыкІащ. Абы иужькІэ израил цІыхухэм джэгушхуэ ящІри, танэр къафыхьурэ, щхьэщэ хуащІын щІадзащ. Абыхэм я гугъэт а танэм щхьэщэ зэрыхуащІымкІэ Иеговэ щхьэщэ хуащІу. А лъэпкъым ищІа Іуэхугъуэм «Иеговэ и махуэшхуэ» фІащами, абы къикІтэкъым абыхэм ящІар тэмэму. Иеговэ абыхэм ящІар тхьэнапэ гъэлъэпІэным хуэдэу ибжащ икІи абы къыхэкІкІэ израил цІыху куэдым я гъащІэр яфІэкІуэдащ (Исход 32:1—6, 10, 28). Сыт хуэдэ дерс абы дэркІэ хэлъыр? Зыми зыкъомыгъэгъапцІэ. «Мыкъабзэм уемыІусэ» икІи фІымрэ Іеймрэ теухуауэ Иеговэ и еплъыкІэр зыхэлъхьэ (Исаия 52:11; Иезекииль 44:23; Галатие 5:9).

3, 4. Нобэ куэдым ягъэлъапІэ махуэшхуэхэм я къежьапІэр щІызэхэдгъэкІын хуейр сыт?

³ Хьисэ щІылъэм щыщыІам и апостолхэр хуигъэхьэзыращ Алыхьым пэжу зэрыхуэлэжьэн хуеймкІэ щапхъэ ягъэлъэгъуэну. Хьисэ лІа иужь апостолхэм абы и лъэужь иува цІыхухэр Иеговэ и принципхэм хурагъаджэу щытащ. Ауэ апостолхэр лІа иужь егъэджакІуэ нэпцІхэм зэхуэсым еплъыкІэ нэпцІхэр, Алыхьым хуэмылажьэ лъэпкъхэм я хабзэхэр, я махуэшхуэхэр хапщэу щІадзащ. Языныкъуэ махуэшхуэхэм я цІэхэр яхъуэжащ чристэн махуэшхуэхэм ещхь хъун щхьэкІэ (2 Фессалоникэ 2:7, 10; 2 Иуан 6, 7). А махуэшхуэхэм ящыщ куэдыр нобэр къыздэсым ягъэлъапІэ икІи абыхэм япэм ещхьу дин нэпцІымрэ жин бзаджэхэмрэ пыщІа Іуэхугъуэхэращ ягъэлъапІэрa (Апокалипсис 18:2—4, 23).

⁴ Нобэ дуней псом цІыхухэм махуэшхуэхэм мыхьэнэшхуэ ират. Ауэ Иеговэ и еплъыкІэхэм теухуауэ нэхъыбэ къэпщІэхукІэ, уэ къыбгурыІуэну къыщІэкІынущ а махуэшхуэхэм узэрыхущытыр пхъуэжын зэрыхуейр. Ар тыншу щымытынкІэ хъунущ, ауэ Иеговэ къызэрыбдэІэпыкъунум шэч къытомыхьэ. Нобэ куэдым ягъэлъапІэ махуэшхуэ зыбжанэм я къежьапІэм дытепсэлъыхьынщ, абыхэм Иеговэ зэрыхущытыр къэтщІэн щхьэкІэ.

ХЬИСЭ КЪЫЩАЛЪХУА МАХУЭ ГЪЭЛЪЭПІЭНЫР КЪЫЗЭРЫУНЭХУАР

5. Дыгъэгъазэм и 25-нэм Хьисэ къызэрамылъхуам сыт щыхьэт техъуэр?

⁵ Къэрал куэдым дыгъэгъазэм и 25-нэр Хьисэ къыщалъхуа махуэу ялъытэ икІи ягъэлъапІэ. Библием Хьисэ къыщалъхуа махуэми мазэми теухуауэ зыри щыжыІакъым, ауэ дэ абы къыщытщІэфынущ ар илъэсым и сыт хуэдэ зэманым ирихьэлІэу къалъхуами. Хьисэ Бэтлэхьэм къалэм къыщалъхуа зэманым теухуауэ Лука итхащ: «Мэлхэр жэщым яхъумэу, а Іэхэлъахэм мэлыхъуэ гуп итт» (Лука 2:8—11). Дыгъэгъазэ мазэм Бэтлэхьэм къалэр здэщыІэ щІыпІэмкІэ щІыІэщ, а зэманым уэшх къошх, уэси къос. Абы къыхэкІкІэ мэлыхъуэхэм я хъушэхэр я гъусэу губгъуэм жэщу къинэнутэкъым. Абы къызэригъэлъагъуэмкІэ, Хьисэ къыщалъхуа зэманым хуабэу щытащ, дыгъэгъазэ мазэм апхуэдэ хуабэ щыІэтэкъым. Нобэ фокІадэ, жэпуэгъуэкІэ дызэджэ мазэхэм къриубыдэу Хьисэ къызэралъхуам Библиери, тхыдэри щыхьэт тохъуэ.

6, 7. 1) Хьисэ къыщалъхуа махуэр зэрагъэлъапІэм пыщІа хабзэхэр дэнэ къыздикІар? 2) НэгъуэщІхэм тыгъэ яхуэтщІыну сытым дыхуигъэушын хуей?

⁶ Дауэ-тІэ Хьисэ къыщалъхуа махуэ гъэлъэпІэныр къызэрыунэхуар? Абы и щІэдзапІэ хъуар тхьэ нэпцІхэр щагъэлъапІэ махуэхэращ, псалъэм папщІэ, рим цІыхухэм мэкъумэш щІэным и тхьэ Сатурн хухахауэ ягъэлъапІэ Сатурналий махуэшхуэр. «Американская энциклопедия» жыхуиІэ тхылъым щыжыІащ: «Нобэ Хьисэ къыщалъхуа махуэр щагъэлъапІэм деж къекІуэкІ хабзэхэр урымхэм дыгъэгъазэм и кум ягъэлъапІэу щыта Сатурналий махуэшхуэм къытехъукІащ. Псалъэм папщІэ, а махуэшхуэр щІэдзапІэ хуэхъуащ хабзэ хъуауэ къекІуэкІ ефэ-ешхэ инхэм, тыгъэ тыным, кІэртІофуэздыгъэ щІэгъэнэным». Абы нэмыщІ персхэм дыгъэм и тхьэ нэпцІ Митрэ дыгъэгъазэм и 25-нэм къалъхуауэ ябжт икІи а махуэр абыхэм ягъэлъапІэт.

⁷ Ауэ и нэхъыбэ цІыхухэм а махуэр щагъэлъапІэм деж абы и къежьапІэм егупсыскъым. Абыхэм я деж а махуэшхуэм я унагъуэм я гъусэну, ІэфІу шхэну, зыгуэрым тыгъэ иратыну Іэмал къарит закъуэу аращ. Дэ, дауикІ, ди унагъуэри ди ныбжьэгъухэри фІыуэ долъагъу икІи Иеговэ хуейщ абы и лэжьакІуэхэм зым зым тыгъэхэр иратыну. 2 Коринф 9:7 зэритымкІэ, «и гуапэу зытырщ Тхьэм фІыуэ илъагъур» (ХъыбарыфІыр, 1993). Иеговэ хуейкъым дэ нэгъуэщІхэм тыгъэ яхуэтщІын щхьэкІэ махуэ хэха гуэрхэм дежьэну. Илъэсым и кІуэцІым сыт хуэдэ зэманми Иеговэ и лэжьакІуэхэм яфІэфІщ нэгъуэщІхэм тыгъэ гуэркІэ яхуэупсэну, я ныбжьэгъухэмрэ я унагъуэм щыщхэмрэ яхуэзэну икІи ахэр пэплъэкъым зыгуэр къыхуащІэжыну. Абыхэм нэгъуэщІхэм тыгъэхэр щІратыр ахэр фІыуэ ялъагъури аращ (Лука 14:12—14).

8. Астрологхэм Хьисэ тыгъэхэр къыщыхуахьам ар сабий къалъхуагъащІэу щыта?

⁸ Хьисэ къыщалъхуа махуэм тыгъэ зэращІым и щхьэусыгъуэу ябжыр — ар сабий цІынэу жэмхэм я шхалъэм щыдэлъам щыгъуэ цІыхухъуищ тыгъэхэр къыхуахьу къэкІуауэ зэрыжаІэращ. Пэжщ, Хьисэ деж тыгъэхэр яІыгъыу цІыху гуэрхэр къэкІуауэ щытащ. Библиер щатха зэманым увыпІэ лъагэ зыІыгъ цІыхухэм тыгъэхэр ирату щытащ (1 Царей 10:1, 2, 10, 13). Ауэ пщІэуэ пІэрэт уэ Библием зэрыжиІэмкІэ Хьисэ деж къэкІуахэр астрологу — Іэзэгъуазэ зезыхьэ икІи Иеговэ хуэмылажьэ цІыхуу — зэрыщытар? Абы нэмыщІ ахэр Хьисэ деж къыщыкІуам ар сабий къалъхуагъащІэу щытыжтэкъым. Астрологхэр Хьисэ деж къыщыкІуар нэхъ гувауэщ, апщыгъуэм ар унэм щыпсэут (Маттэ 2:1, 2, 11).

ЦІЫХУР КЪЫЩАЛЪХУА МАХУЭР ГЪЭЛЪЭПІЭНЫМ ТЕУХУАУЭ БИБЛИЕМ СЫТ ЖИІЭР?

9. Къыщалъхуа махуэр зыгъэлъэпІауэ Библием хэт зи гугъу ищІыр?

⁹ Сабийр къыщалъхуа махуэр, дауикІ, гуфІэгъуэ махуэшхуэщ (Псалом 127:3). Ауэ абы къикІкъым дыкъыщалъхуа махуэр дгъэлъэпІэн хуейуэ. Къыщалъхуа махуэр зыгъэлъэпІауэ цІыхуитІщ Библием зи гугъу ищІыр. Япэр — ар Мысырым и фирхьэуным къыщалъхуа махуэр зэригъэлъэпІаращ, етІуанэр — ар пащтыхь Ирод Антипэщ. (Къеджэ ЩІэдзапІэ 40:20—22; Марк 6:21—29.) А пащтыхьитІри Иеговэ и лэжьакІуэу щытакъым. ИкІи Иеговэ и лэжьакІуэхэм къыщалъхуа махуэр ягъэлъапІэу щытауэ Библием зыщІыпІи иткъым.

10. Япэ лІэщІыгъуэм псэуа Хьисэ и лъэужь ирикІуэхэр цІыхур къыщалъхуа махуэр гъэлъэпІэным дауэ зэрыхущыту щытар?

¹⁰ «Уорлд бук» жыхуиІэ энциклопедием щыжыІащ япэ лІэщІыгъуэм псэуа Хьисэ и лъэужь ирикІуэхэм «цІыхур къыщалъхуа махуэр гъэлъэпІэныр тхьэ нэпцІхэр гъэлъэпІэным пыщІа хабзэу ябжу зэрыщытар». Апхуэдэ хабзэхэм лъабжьэ хуэхъуар дин нэпцІым зыхуригъаджэрат. Псалъэм папщІэ, пасэрей алыджхэм я фІэщ хъурт дэтхэнэ зы цІыхури ар къыщалъхум щыта жиным къихъумэу. ИкІи а цІыхур къыщалъхуа махуэм къалъхуа тхьэм а жиныр пыщІауэ абыхэм я гугъэт. ЦІыхур къыщалъхуа махуэ гъэлъэпІэныр зыпыщІар дин нэпцІым епха хабзэхэм я закъуэкъым, атІэ ар астрологиеми гороскопхэми епхащ.

11. Хьэлэлагъым теухуауэ Иеговэ сыт къызэрытщыгугъыр?

¹¹ ЦІыху куэдым я гугъэщ къыщалъхуа махуэр адрей махуэхэм къыщхьэщыкІыу икІи ахэр фІыуэ къызэралъагъур, лъапІэу зэралъытэр а махуэм псоми ягъэлъэгъуэн хуейуэ ябж. Ауэ дэ ди унагъуэм щыщхэмрэ ди ныбжьэгъухэмрэ фІыуэ зэрытлъагъур зы махуэ хэха гуэр мыхъуу, илъэсым и кІуэцІым сыт щыгъуи едгъэлъагъу хъунущ. Иеговэ хуейщ дэ сыт щыгъуи цІыхуфІу икІи хьэлэлу дыщытыну. (Къеджэ Апостолхэм 20:35.) Дэ дыкъыщалъхуа махуэ закъуэр мыхъуу махуэ къэс Иеговэ къыдита гъащІэ лъапІэм щхьэкІэ фІыщІэ худощІ (Псалом 8:3, 4; 36:9).

12. ЦІыхур къыщалъхуа махуэм нэхърэ щылІа махуэр щІэнэхъыфІыр сыт?

¹² Экклезиаст 7:1 щыжыІащ: «Уи цІэр фІыкІэ къраІуэныр дагъэ лъапІэм нэхърэ нэхъыфІщ икІи цІыхур щылІа махуэр ар къыщалъхуа махуэм нэхърэ нэхъыфІщ». ЦІыхур къыщалъхуа махуэм нэхърэ щылІа махуэр щІэнэхъыфІыр сыт? Дэ дунейм дыкъыщытехьэм деж ди гъащІэм иджыри зыри щытщІакъым — фІыи Іейи. Ауэ дэ Иеговэ дыхуэлэжьэн икІи нэгъуэщІхэм дадэІэпыкъун щхьэкІэ ди гъащІэр къэдгъэсэбэпмэ, «ди цІэр фІыкІэ дгъэІуу» жыпІэ хъунущ. ДылІа нэужьи Иеговэ игу дилъынущ (Иов 14:14, 15). Иеговэ и лэжьакІуэхэм езыхэр къыщалъхуа махуэри Хьисэ къыщалъхуа махуэри ягъэлъапІэкъым. Хьисэ дгъэлъэпІэн хуейуэ жиІар и гъащІэр щита махуэм и закъуэщ — ар Зиусхьэным и Пщыхьэщхьэшхэращ (Лука 22:17—20; Еврейхэм 1:3, 4).

ІУТІЫЖ МАХУЭШХУЭМ И КЪЕЖЬАПІЭР

13, 14. ІутІыж махуэшхуэ гъэлъэпІэныр сытым епха?

¹³ ЦІыху куэдым ІутІыж махуэшхуэр щагъэлъапІэм деж Хьисэ лІахэм къащыхэтэджыкІыжа махуэр ягъэлъапІэу я гугъэщ. Ауэ ІутІыж махуэшхуэ гъэлъэпІэныр зыпыщІар англо-саксонхэм гъатхэмрэ нэхущымрэ и тхьэ гуащэу ябж Эострэщ. «Словарь мифологии» жыхуиІэ тхылъым иджыри щыжыІащ а Эострэр бэвыгъэм и тхьэ гуащэу щытауэ. Аращ ІутІыж махуэшхуэм пыщІа языныкъуэ хабзэхэр къыздикІыр. Псалъэм папщІэ, «Британская энциклопедия» жыхуиІэ тхылъым щыжыІащ джэдыкІэр «щІэуэ къэунэху гъащІэм икІи къэщІэрэщІэжыныгъэм и нэщэнэу щытауэ». Абы нэмыщІ тхьэ нэпцІхэр зыгъэлъапІэ лъэпкъхэм тхьэкІумэкІыхьхэр бэгъуэным и нэщэнэу зэман куэдкІэ ялъытэу щытащ. ГурыІуэгъуэщ ІутІыж махуэшхуэр Хьисэ лІахэм къазэрыхэтэджыкІыжам зыкІи зэремыпхар.

¹⁴ ЦІыхухэм дин нэпцІым пыщІа хабзэхэмрэ Хьисэ лІахэм къазэрыхэтэджыкІыжамрэ зэхапщэу Иеговэ щилъагъум деж, ар абы игу ирихьу пІэрэ? ДауикІ, ирихькъым (2 Коринф 6:17, 18). Хьисэ лІахэм къазэрыхэтэджыкІыжар дгъэлъэпІэну Иеговэ зэи унафэ тхуищІакъым.

ХЕЛЛОУИНЫР ЗИЩІЫСЫР СЫТ?

15. Хеллоуин махуэшхуэр дэнэ къыщежьар?

¹⁵ Хеллоуин жыхуаІэ махуэшхуэм иджыри «Канун Дня всех святых»-кІэ йоджэ икІи ар жинхэм, удхэм, гоблинхэм епхащ. Ар щІэуэ къежьа махуэшхуэкъым. Великобританиемрэ Ирландиемрэ щыпсэуа пасэрей кельтхэм щэкІуэгъуэм и 1-нэм нэхъ пэгъунэгъуу мазэр из щыхъум Самайн жыхуиІэ махуэшхуэр ягъэлъапІэу щытащ. А махуэм лІахэм я псэхэм щІылъэм къагъэзэжу абыхэм я фІэщ хъурт. ЛІахэм я псэхэр зэран къахуэмыхъун щхьэкІэ абыхэм яшхынрэ зэфэнрэ унэм къыхущІагъэувыкІт. Нобэ сабийхэм хьэжыгъафэу захуапэу унэ-унэкІэ къакІухьурэ «Зыгуэр къыдэт, армыхъумэ дыптебжэнущ!» щыжаІэм деж а пасэрей дин нэпцІым епха хабзэм щапхъэ зэрытрахыр ящІэкъым.

АЛЫХЬЫМ ИГУ ИРИХЬ ХЬЭГЪУЭЛІЫГЪУЭХЭР

16, 17. ХьэгъуэлІыгъуэ пщІыну мурад щыпщІым деж сытым уегупсысын хуей?

¹⁶ ХьэгъуэлІыгъуэр — гуфІэгъуэшхуэ Іуэхугъуэщ. ХьэгъуэлІыгъуэр зэрырагъэкІуэкІ щІыкІэр дуней псом зэщхьэщокІ. И нэхъыбэм цІыхухэр егупсыскъым хьэгъуэлІыгъуэ хабзэхэр къыздикІам икІи абы къыхэкІкІэ абыхэм ящІэкъым языныкъуэ хабзэхэм я къежьапІэр дин нэпцІым зэрыпыщІар. Ауэ хьэгъуэлІыгъуэ зыщІыну тезыухуа ди къуэшымрэ ди шыпхъумрэ хуейщ абыхэм я хьэгъуэлІыгъуэм Иеговэ игъэгуфІэну. ХьэгъуэлІыгъуэм пыщІа хабзэхэр къыздикІыр къащІа нэужь, абыхэм Іущагъ зыхэлъ унафэ къащтэфынущ (Марк 10:6—9).

¹⁷ ХьэгъуэлІыгъуэм пыщІа языныкъуэ хабзэхэм зэрыша щІалэмрэ хъыджэбзымрэ «ехъулІэныгъэ» къыхуахьу ябж (Исаия 65:11). Апхуэдэу языныкъуэ щІыпІэхэм щауэмрэ нысащІэмрэ прунж е нэгъуэщІ зыгуэрхэр кърапхъых. Абыхэм я гугъэщ абы сабий, насып, гъащІэ кІыхь къахуихьыну икІи зэрышагъащІэхэр Іейм щихъумэну. Ауэ Алыхьым и лэжьакІуэхэм дин нэпцІым пыщІа дэтхэнэ зы хабзэми пэІэщІэ защІ. (Къеджэ 2 Коринф 6:14—18.)

18. Библием ит сыт хуэдэ принципхэр иджыри хьэгъуэлІыгъуэм хуэкІуэрэ?

¹⁸ Алыхьым и лэжьакІуэхэр хуейщ я хьэгъуэлІыгъуэр екІуу екІуэкІыну икІи абы къекІуэлІа псоми гуфІэгъуэ хахыну. Алыхьым хуэлажьэхэм я хьэгъуэлІыгъуэм къеблэгъа хьэщІэхэм цІапІагъэ гуэрхэр зыхэт псалъэ мыхъумыщІэхэр жаІэу зэрышахэм е нэгъуэщІ цІыхухэм я пщІэр ираудыхыркъым (Притчи 26:18, 19, Гъэсэпэтхыдэхэр; Лука 6:31; 10:27). Алыхьым и лэжьакІуэхэм хьэгъуэлІыгъуэр щхьэусыгъуэ яхуэхъуркъым яІэ мылъкур ягъэлъэгъуэну (1 Иуан 2:16). Ауэ фэ хьэгъуэлІыгъуэ фщІыну мурад фщІауэ щытмэ, а махуэр фІыкІэ фІэкІа фигу къэмыкІыжын щхьэкІэ, фхузэфІэкІ къэвмыгъанэ. (Приложение 28-нэм еплъ.)

ХЪУЭХЪУХЭМ Я КЪЕЖЬАПІЭР

19, 20. Хъуэхъухэм сыт я къежьапІэр?

¹⁹ ХьэгъуэлІыгъуэхэми нэгъуэщІ ефэ-ешхэхэми хъуэхъу жаІэ хабзэщ. ЦІыхум хъуэхъу щыжиІэм деж, фІыкІэ мэхъуахъуэ, адрейхэм фадэбжьэ къаІэт. Алыхьым и лэжьакІуэхэр хъуэхъухэм дауэ зэрыхущытын хуейр?

²⁰ Лъэпкъ зэмылІэужьыгъуэхэм фадэм теухуауэ яІэ хабзэхэм тепсэлъыхь зы справочник гуэрым щыжыІащ хъуэхъухэм я къежьапІэу къыщІэкІынур пасэрей зэманым тхьэ нэпцІхэм хуэлажьэ лъэпкъхэм я тхьэхэм къурмэныпхъэу шагъыр къыхуахьу яІа хабзэр арауэ. Ар абыхэм щІащІэр я тхьэм зэрелъэІур къахуищІэн щхьэкІэт. Абыхэм лъэІу жаІэхэм къикІыр мырат: «ГъащІэ кІыхь!» е «Уи узыншагъэм щхьэкІэ!» (International Handbook on Alcohol and Culture). Пасэрей зэманым цІыхухэм фадэбжьэ къаІэтурэ я тхьэхэм я нэфІ къащыхуэну елъэІухэт. Ауэ Иеговэ апхуэдэ щІыкІэкъым къызэрыддэІэпыкъур (Иуан 14:6; 16:23).

«ИЕГОВЭ ФІЫУЭ ЗЫЛЪАГЪУХЭМ ІЕЙР ФЛЪАГЪУ МЫХЪУУ ФЫЩЫТ»

21. Алыхьым и лэжьакІуэхэм сыт хуэдэ махуэшхуэхэм иджыри пэІэщІэ защІын хуей?

²¹ Махуэшхуэ гуэрым ухэтыным теухуауэ унафэ щыпщІым деж егупсыс сыт хуэдэ щытыкІэ икІи еплъыкІэ уиІэну абы ухуигъэушми. Псалъэм папщІэ, языныкъуэ махуэшхуэхэмрэ карнавалхэмрэ эротическэ къафэхэр, фадэкІэ егъэлеиныр, зинэ щІэныр яхэт хабзэщ. Апхуэдэ махуэшхуэхэм иджыри гомосексуалистхэмрэ лесбиянкэхэмрэ я дуней тетыкІэм е лъэпкъ зэхэгъэж щІыным цІыхухэр хуагъэушыфынущ. Апхуэдэ махуэшхуэхэм дыхэту щытмэ, Иеговэ илъагъу мыхъур дэри тлъагъу мыхъуу жытІэ хъуну пІэрэ? (Псалом 1:1, 2; 97:10; 119:37).

22. Махуэшхуэ гуэрым хэтынрэ хэмытынрэ унафэ ищІыну Алыхьым и лэжьакІуэм сыт къыдэІэпыкъуныр?

²² Алыхьым и лэжьакІуэхэр сакъын хуейщ Иеговэ зыгъэпуд махуэшхуэхэм хэмытын щхьэкІэ. Апостол Паул итхауэ щытащ: «Фышхэми, фефэми е нэгъуэщІ гуэр фщІэми, цІыхухэм Тхьэм фІыщІэ [«щІыхь», ДЩІ] хуевгъэщІын щхьэкІэщ щІэфщІэнур» (1 Коринф 10:31; Приложение 29-нэм еплъ). ДауикІ, махуэшхуэ псори зинэ щІэным, дин нэпцІым, лъэпкъ зэхэгъэж щІыным епхауэ щыткъым. Махуэшхуэ гуэрыр Библием ит принципхэм емыбакъуэу щытмэ, дэ езым унафэ тщІын хуейщ абы дыхэтынрэ дыхэмытынрэ. Абы нэмыщІ дэ нэгъуэщІхэм я напэм дегупсысын хуейщ.

УИ ПСАЛЪЭХЭМКІИ УИ ІУЭХУХЭМКІИ ИЕГОВЭ ГЪЭЛЪАПІЭ

23, 24. Иеговэ и Щыхьэту щымыт ди благъэхэм языныкъуэ махуэшхуэхэр щІэдмыгъэлъэпІэжыр дауэ къазэрыгурыдгъэІуэфынур?

²³ Иеговэ зыгъэпуд махуэшхуэхэм уэ ухэтыж хъункъым. Ауэ Иеговэ хуэмылажьэ уи благъэ гуэрхэр егупсысынкІэ хъунущ уэ ахэр фІыуэ умылъагъужу икІи уаригъусэну ухуэмеижу. Ахэр зэрегупсысымкІэ махуэшхуэхэм зэрыунагъуэу зэхуэсыну Іэмал къариту аращ. Сыт-тІэ уэ пщІэ хъунур? Уи благъэхэр фІыуэ зэрыплъагъур зэребгъэлъагъу хъун Іэмал куэд щыІэщ (Притчи 11:25; Экклезиаст 3:12, 13). Уэ ахэр нэгъуэщІ махуэхэм фызэхэсыну къебгъэблагъэ хъунущ.

²⁴ Уэ афІэкІа махуэшхуэ гуэрхэр щІомыгъэлъэпІэжым и щхьэусыгъуэр уи благъэхэм къащІэну хуеймэ, абыхэм узэрепсалъэ хъуным теухуауэ ди публикациехэмрэ jw.org сайтымрэ нэхъыбэ къыщыбгъуэтыфынущ. Абыхэм уедэуэну икІи уи гупсысэкІэм къытебгъэхьэну ухэмыт. Уи унагъуэм къыгурыгъаІуэ уэ апхуэдэ унафэ къэпщтэн ипэ Іуэхугъуэ куэдым фІыуэ узэрегупсысар. УщыпсалъэкІэ укъэмыгубжь икІи «псалъэ мышыухэр хэмыту, уи псалъэхэр ирегуапэ» (Колоссэ 4:6).

25, 26. Адэ-анэхэр я сабийхэм дауэ дэІэпыкъуфыну Иеговэ и хабзэхэр абыхэм фІыуэ ялъагъуну?

²⁵ Махуэшхуэ гуэрхэм дыхэмытыну мурад щІэтщІам и щхьэусыгъуэр дэтхэнэ зыми къыдгурыІуэжыным мыхьэнэшхуэ иІэщ (Еврейхэм 5:14). Дэ Иеговэ дгъэгуфІэну дыхуейщ. Дэ сабий диІэу щытмэ, абыхэм Библием ит принципхэр къагурыдгъэІуэн икІи а принципхэр фІыуэ ялъагъуну дадэІэпыкъун щхьэкІэ зэман хухэтхын хуейщ. Иеговэ уафэм щыІэ Алыхь закъуэу зэрыщытыр абыхэм къагурыІуэу щытмэ, ди сабийхэри хуеинущ Иеговэ ягъэгуфІэну (Исаия 48:17, 18; 1 Петр 3:15).

²⁶ Иеговэ пэжу икІи къабзэу дыхуэлэжьэн щхьэкІэ тлъэкІ къызэрыдмыгъанэр щилъагъум деж и гур догъэгуфІэ (Иуан 4:23). Ауэ куэдыр йогупсыс мы дуней уцІэпІам цІыху пэжу ущытыну пхузэфІэмыкІыну. Ар апхуэдэу щыту пІэрэ? КъыкІэлъыкІуэ псалъащхьэм абы дыщытепсэлъыхьынщ.