ДунеищІэкІэ зэджэ Тхыгъэ ЛъапІэр сыт къыщІыдэдгъэкІар?

Илъэс куэдкІэ Иеговэ и Щыхьэтхэм зэмылІэужьыгъуэу зэдзэкІа Библиехэр къагъэсэбэпт, традзэт икІи ягуэшт. Ауэ зэман дэкІри дэ къыдгурыІуащ еджэгъуафІэу икІи тыншу къыбгурыІуэу щыт Библие дызэрыхуэныкъуэр, сыт щхьэкІэ жыпІэмэ апхуэдэ Библиер цІыхухэм ядэІэпыкъунут Алыхьым теухуа пэжыр нэгъэсауэ къащІэну (1 Тимофей 2:3, 4). Арати, 1950 гъэм ДунеищІэкІэ зэджэ Тхыгъэ ЛъапІэм и япэ Іыхьэр английскэбзэкІэ къыдэкІащ. Нобэ а Библиер бзэ 160-м щІигъукІэ зэдзэкІауэ щыІэщ, урысыбзэри абы хэту.

Тыншу къыбгурыІуэ Библие дыхуэныкъуэщ. Зэманыр кІуэтэхукІэ дэтхэнэ зы бзэми зэхъуэкІыныгъэхэр къыхохьэ. Абы къыхэкІкІэ къыбгурыІуэну гугъу икІи къамыгъэсэбэпыж псалъэхэр Библием щызэхъуэкІын хуей мэхъу. Абы нэмыщІ ди зэманым пасэрей Іэрытх куэд къагъуэтащ. Ахэр япэ дыдэу ятха Іэрытххэм куэдкІэ тохуэ икІи абыхэм я фІыгъэкІэ пасэрей журтыбзэкІэ, арамеибзэкІэ икІи пасэрей алыджыбзэкІэ тха Библием и Іыхьэхэр нэхъ гурыІуэгъуэ хъуащ.

Алыхьым къыбгъэдэкІ псалъэр пэжу къыбгурызыгъаІуэ Библие дыхуэныкъуэщ. Библиер зэзыдзэкІхэр хуиткъым езыхэр зэрыхуейм хуэдэу ар зэрадзэкІыну. Алыхьым къыбгъэдэкІ псалъэхэр зэрыщыт дыдэм хуэдэу абыхэм зэрадзэкІын хуейщ. Ауэ ди жагъуэ зэрыхъунщи, Библиер зэзыдзэкІахэм щыщу я нэхъыбэм Алыхьым и цІэр ятхакъым.

Езы Иеговэ зыгъэлъапІэ Библие дыхуэныкъуэщ (2 Самуила 23:2). Пасэрей Іэрытххэм Алыхьым и цІэм 7 000 хуэдизкІэ ущрихьэлІэт. Апхуэдэ зы Іыхьэ сурэтым щыдолъагъу. ДунеищІэкІэ зэджэ Тхыгъэ ЛъапІэм Иеговэ и цІэр здэщытын хуей дыдэхэм деж ягъэувыжащ (Псалом 83:18). Арати, илъэс куэдкІэ псэемыблэжу елэжьа нэужь, Алыхьым и гупсысэхэр пэжу икІи гурыІуэгъуэу зэрыт Библие къыдагъэкІащ. А Библием уеджэну гухэхъуэщ. ДунеищІэкІэ зэджэ Тхыгъэ ЛъапІэр уи бзэкІэ щыІэми щымыІэми, ухуэдгъэушыну дыхуейщ Иеговэ и Псалъэм махуэ къэс уеджэну (Иисус Навин 1:8; Псалом 1:2, 3).

• Иеговэ и Щыхьэтхэм Библиер зэрадзэкІыну щхьэ мурад ящІа?

• Алыхьым и мурадыр къэзыщІэну хуейхэм сыт махуэ къэс ящІэн хуейр?