Ди зэІущІэхэм къыпхуахьыну сэбэпынагъыр

Куэдым я диным пыщІа зэІущІэхэм кІуэн щагъэтащ, сыт щхьэкІэ жыпІэмэ а зэІущІэхэм Алыхьым теухуауэ зыри щызэхахтэкъым икІи гупсэхугъуэ щагъуэттэкъым. Ауэ Иеговэ и Щыхьэтхэм ирагъэкІуэкІ зэІущІэхэм сыт хуэдэ сэбэпынагъ къыпхуахьыфынур?

ЦІыхуфІхэм, цІыху щабэхэм дахэтщ. Япэ лІэщІыгъуэм псэуа Хьисэ и лъэужь ирикІуэхэми зэІущІэхэр яІэт. А зэІущІэхэм Алыхьыр зэгъусэу щагъэлъапІэт, Тхыгъэ ЛъапІэр щаджт икІи зэрыгъэгушхуэт (Еврейхэм 10:24, 25). Абыхэм я зэхуаку хуабагъэ дэлът икІи дэтхэнэ зыми зыхищІэт и къуэш, и шыпхъухэр абы и ныбжьэгъу пэжу зэрыщытыр (2 Фессалоникэ 1:3; 3 Иуан 14). Дэ абыхэм щапхъэ тыдох икІи абыхэм яІа гурыфІыгъуэм хуэдэ дэри зыхыдощІэ.

Библием ит принципхэр ди гъащІэм къыщыдгъэсэбэпу зыщыдогъасэ. Библием зэрыжиІэмкІэ, пасэм псэуа цІыхухъухэр, цІыхубзхэр икІи сабийхэр зэхуэст, Алыхьым теухуауэ къащІэн щхьэкІэ. Дэри абыхэм нобэ щапхъэ тыдох. Куэд щІауэ Алыхьым хуэлажьэ ди егъэджакІуэхэм къыдгурагъаІуэ Библием ит принципхэр махуэ къэс ди гъащІэм дауэ къыщыдгъэсэбэп хъунуми (Второзаконие 31:12; Неемия 8:8). Гукъыдэж зиІэ псоми ди гъусэу уэрэд жаІэ хъунущ икІи Библием тегъэщІа статьяр щызэпкърытхкІэ, я Іэр яІэту жэуап ят хъунущ. Ди зэІущІэхэм Алыхьым щытхъу къыхуэтхьыну Іэмал къыдат (Псалом 35:18).

Ди фІэщхъуныгъэм хыдогъахъуэ. Апостол Паул зы зэхуэсым хуитхат: «Фыслъагъуну куэду сыхуейщ. А зы фІэщхъуныгъэу диІэмкІэ дызэрыгъэгушхуэныращ жыхуэсІэр» (Рим 1:11, 12). Ди къуэш, ди шыпхъухэм щІэх-щІэхыурэ дазэрыхэтым ди фІэщхъуныгъэр нэхъ быдэ ещІ икІи Алыхьым и хабзэхэм дытету дыпсэуну дытрагъэгушхуэ.

Ди гум къыбгъэдэкІыу ди зэІущІэхэм укъыдогъэблагъэ. Ахэр зэрекІуэкІыр уи нэкІэ плъэгъуну Іэмал уиІэщ. УкъызэрыкІуам псори щыгуфІыкІынущ. ЩІыхьэпщІэ ептын хуейкъым икІи зэІущІэр щекІуэкІкІи ахъшэ лъэпкъ хахкъым.

• Иеговэ и Щыхьэтхэм я зэІущІэхэр зэрекІуэкІын хуейм теухуауэ хэт щапхъэ зытрахыр?

• Ди зэІущІэхэм узэрыкІуэм сыт хуэдэ сэбэпынагъ уэ къыпхуихьынур?