Дауэ Библием ит пэжыр щІэрыщІэу къызэІуха зэрыхъуар?

Библием щыжыІат Мэссихьыр лІа нэужь, абы и гъэсэнхэм бегъымбар нэпцІхэр къазэрыхыхьэнур (Апостолхэм 20:29, 30). Апхуэдэуи къэхъуащ. Бегъымбар нэпцІхэм Хьисэ зыхуригъаджэу щытамрэ дин нэпцІым зыхуригъаджэмрэ зэхапщащ. Апхуэдэу чристэн дин нэпцІыр къэунэхуащ (2 Тимофей 4:3, 4). АтІэ, Библием итыр пэжу къыдгурыІуэрэ къыдгурымыІуэрэ дауэ зэхэдгъэкІа хъуну?

Зэманыр къэсри, Иеговэ пэжыр къызэІуихащ. Алыхьым зэрыжиІамкІэ, иужьрей махуэхэм «щІэныгъэ пэжыр бэгъуэнущ» (Даниил 12:4). 1870 гъэм пэжыр къэзылъыхъуэ цІыху гупым къыгурыІуащ члисэм зыхуригъаджэр Библием тегъэщІауэ зэрыщымытыр. Абы иужькІэ а гупым щыщхэм, пэжыр къагъуэтыну я мураду, Библием итыр куууэ яджу щІадзащ икІи Иеговэ абыхэм пэжыр къахузэІуихащ.

Зигу къабзэ цІыхухэм Библиер нэгъэсауэ яджт. Библием и КъэхутакІуэхэм Тхыгъэ ЛъапІэр зэраджу щытар дэ ар нобэ зэрыдджым хуэдэущ. Абыхэм Библиер темэ-темэкІэ зэпкърахт. КъыбгурыІуэну гугъу пычыгъуэ ирихьэлІэу щытмэ, а пычыгъуэр гурыІуэгъуэ пщызыщІ нэгъуэщІ едзыгъуэхэр абыхэм къалъыхъуэт. Тхыгъэ ЛъапІэм итым техуэ гупсысэм ахэр къыхуэкІуа иужь, а гупсысэр зыщІыпІэ иратхэт. Апхуэдэу, упщІэ къагурымыІуэхэм я жэуапхэр езы Библием къыщалъыхъуэурэ, пэжыр къагъуэтащ, псалъэм папщІэ, Алыхьым и цІэм, абы и Пащтыхьыгъуэм, цІыхухэмрэ щІылъэмрэ теухуауэ Алыхьым и мурадым, цІыхум лІа нэужь къыщыщІым икІи лІахэр къызэрытэджыжынум теухуа пэжыр. Абы и фІыгъэкІэ абыхэм дин нэпцІымрэ дуней тетыкІэ къемызэгъымрэ къагъэнащ (Иуан 8:31, 32).

1879-нэ гъэм Библием и КъэхутакІуэхэм къагурыІуащ цІыхухэм пэжыр къыхузэІуахыну зэманыр къызэрысар. Абыхэм журнал къыдагъэкІыу щІадзащ. Иджыри къыздэсым ар къыдокІ икІи абы и цІэщ «ХъумакІуэ чэщанэ. Иеговэ и Пащтыхьыгъуэм и хъыбарыр егъэІу». Нобэ Библием ит пэжыр къэрал 240-м бзэ 900-м щІигъукІэ щыдогъэІу. Ди зэманым хуэдэу Библием ит пэжыр щыбэгъуа зэи къэхъуакъым!

• Хьисэ лІа нэужь, Библием ит пэжым сыт иращІар?

• Сытым и фІыгъэкІэ Библием ит пэжыр щІэрыщІэу къызэІуха зэрыхъуар?