Mũtavanyʼa

9 Kwoou nĩneekĩie maũndũ asu onthe ngoonĩ na natwʼa kana ala alũngalu na ala oĩ, o vamwe na mawĩa moo, methĩawa mokonĩ ma Ngai ũla wa wʼo. Andũ mayĩthĩawa mesĩ wendo na kĩmena kĩla kyaĩ kwʼo mbee woo. 2 Onthe methĩawa na mũminũkĩlyo o ũmwe,* ala alũngalu na ala athũku, ala aseo na ala mate avuku na ala avuku, ala maumasya nthembo na ala mataumasya nthembo. Ũla mũseo no ũndũ ũmwe na mwĩki wa naĩ; ũla wĩvĩtaa wĩvĩto no ũndũ ũmwe na ũla wĩthĩawa e metho ĩũlũ wa kwĩvĩta wĩvĩto. 3 Ũũ nĩ ũndũ wa kũmakya wĩkĩkaa ungu wa sua: Nũndũ onthe methĩawa na mũminũkĩlyo o ũmwe,* ngoo ya andũ o nayo yĩthĩawa yusĩe ũthũku; na ngoo yoo yĩthĩawa na ndũũka thayũnĩ woo, na ĩndĩ maikwʼa!*

4 Ve wĩkwatyo kwa mũndũ o na wĩva ũla wĩ katĩ wa ala me thayũ, nũndũ ngitĩ yĩ thayũ yĩ kavaa kwĩ mũnyambũ mũkwʼũ. 5 Nĩkwĩthĩwa ala me thayũ nĩmesĩ makakwʼa, ĩndĩ akwʼũ mayĩsĩ ũndũ o na ũmwe, o na mai na ĩtuvi ĩngĩ,* nũndũ maũndũ onthe ala maĩ matonya kũlilikanwa ĩũlũ woo nĩmoolile. 6 O na ĩngĩ, wendo woo na kĩmena kyoo na kĩwĩu kyoo syĩthĩawa syathelile, na maiendeeaa kwĩthĩwa na kĩanda o na kĩmwe maũndũnĩ ala mekawa ungu wa sua.

7 Enda ũye lĩu waku wĩ mũtanu, na ũinywʼa mbinyu yaku wĩ na ngoo ndanu, nĩkwĩthĩwa Ngai ũla wa wʼo nũtanĩthĩtwʼe nĩ mawĩa maku. 8 Ngũa syaku syĩthĩawe nzaũ mavinda onthe,* na ndũkaemae kũvaka mũtwe waku mauta. 9 Tanĩa thayũ na kĩveti kyaku kĩla wendete mĩthenyanĩ yonthe ya thayũ waku wa mana, ĩla Ngai ũkũnengete ungu wa sua, mĩthenyanĩ yonthe yaku ya mana, nĩkwĩthĩwa kĩu nĩkyo kĩanda* kyaku thayũnĩ na wĩanĩ waku mũmũ ũla wĩtĩaa yuutĩa ungu wa sua. 10 Ũndũ o na wĩva ũla kwʼoko kwaku kwoona wa kwĩka, wĩke na vinya waku wʼonthe, nĩkwĩthĩwa vai wĩa o na mĩvango o na ũmanyi o na ũĩ Mbũanĩ,* vala ũendete.

11 Nĩnonete ũndũ ũngĩ ungu wa sua, kana ti mavinda onthe ala me maaũ masindaa mathaũnĩ ma kũsemba, o na ti ala me vinya masindaa kaũnĩ, o na ti mavinda onthe ala me ũĩ methĩawa na lĩu, o na ti mavinda onthe ala oĩ methĩawa athwii, o na ti mavinda onthe ala me ũmanyi maĩlaa, nũndũ ĩvinda na maũndũ matataĩĩwe nĩmamakwataa* onthe. 12 Nĩkwĩthĩwa mũndũ ndethĩawa esĩ ĩvinda yake. O ũndũ makũyũ makwatawʼa nĩ neti nthũku na nyũnyi ikwatawʼa nĩ kĩtei, nowʼo ana ma andũ makwatawʼa nĩ ĩvinda ya mũisyo,* yĩla wamakwata matataĩĩe.

13 O na ĩngĩ, nĩnoonie ũndũ ũũ ũkonetye ũĩ ungu wa sua, na wambendeesya: 14 Vaĩ ndũa nini yaĩ na aũme avũthũ; na mũsumbĩ waĩ na ũtonyi ooka amĩthyũlũlũka na aaka ngũta nene nĩ kana amĩvithũkĩe. 15 Ndũanĩ ĩsu vaĩ na mũndũũme ngya ĩndĩ mũĩ, na nĩwatangĩĩie ndũa ĩsu na ũĩ wake. Ĩndĩ vai ũmwe waalilikana mũndũũme ũsu ngya. 16 Na neetavya atĩĩ: ‘Ũĩ wĩ kavaa kwĩ ũtonyi; ĩndĩ o na vailye ũu, ũĩ wa mũndũ ngya nũvũthĩĩawʼa, na ndeto syake iyĩatĩĩawa.’

17 Nĩ kavaa kũatĩĩa ndeto nduu sya ala oĩ kwĩ kwalĩlĩka kwa ũla ũsumbĩkĩte katĩ wa ndia.

18 Ũĩ wĩ kavaa kwĩ mĩio ya kaũ, ĩndĩ mwĩki o ũmwe wa naĩ no anange ũseo mwingĩ.