Mũtavanyʼa

10 O tondũ ngi ngwʼũ itumaa mauta ma mũseũvya wa manukato manyunga na mayumya mavũyũ, nowʼo ũtumanu mũnini ũkĩlasya vinya ũĩ na ũkumyo.

2 Ngoo ya ũla mũĩ ĩmũtongoeasya nzĩanĩ ĩla yaĩlĩte,* ĩndĩ ngoo ya ndia ĩmĩtongoeasya nzĩanĩ ĩla nthũku.* 3 Mũndũ mũtumanu esĩla nzĩanĩ o na yĩva, onanasya kana nde na kĩlĩko,* na atumaa kĩla mũndũ amanya kana we nĩ mũtumanu.

4 Ethĩwa ũthatu wa* mũsumbĩ nĩwakwakanĩa, ndũkaume vandũnĩ vaku, nĩkwĩthĩwa ũuu nũvoovasya naĩ nene.

5 Ve ũndũ wa kũmakya nonete ungu wa sua, mũthemba wa ĩvĩtyo yĩla yĩkawa nĩ ala me na ũkũmũ: 6 Ũtumanu wiawa iandanĩ mbingĩ nene, ĩndĩ athwii* mekalaa iandanĩ sya nthĩ.

7 Nĩnonete athũkũmi makuĩtwe nĩ mbalasi ĩndĩ anene maendete na maaũ o ta athũkũmi.

8 Ũla wĩnzaa ĩima no avote vo; na ũla ũvũthũaa ũkũta wa mavia no aũmwe nĩ nzoka.

9 Ũla wĩnzaa mavia no aũmĩwʼe nĩmo, na mũndũ ũla watũaa itingʼĩ no alikwʼe mũisyonĩ nĩsyo.*

10 Ethĩwa mũio wa kyũma* nĩ mũtuvu na mũndũ ailea kũũnoa, akalasimĩka kũtũmĩa vinya mwingĩ. Ĩndĩ ũĩ nũtumaa maũndũ maĩla.

11 Ethĩwa nzoka nĩyaũmana ĩtambĩte kũvoovwʼa, vai ũndũ ũla wĩ ũtũĩka wa kũivoovya ũtonya* kũtethya.

12 Ndeto sya kanywʼa wa ũla mũĩ ietae ũseo, ĩndĩ ilomo sya ndia nĩsyo imyanangaa. 13 Ndeto sya mbee ila kanywʼa wayo waneena syĩthĩawa sya ũtumanu, na ndeto syayo sya mũthya syĩthĩawa sya ndũũka na nietae mũisyo. 14 Ĩndĩ ũla mũtumanu aendeeaa kũneena.

Mũndũ ndethĩawa esĩ kĩla kĩkekĩka; nũũ ũtonya kũmũtavya kĩla kĩkoka ĩtina wake?

15 Ndia nĩnoawʼa mũno nĩ wĩa wayo mũmũ, nĩkwĩthĩwa o na ĩyĩthĩawa yĩsĩ ũndũ ĩtonya kũthi ndũanĩ.

16 Nthĩ yĩthĩawa na thĩna mũnene ta kĩ yĩla yasumbĩkwa nĩ kamwana na yĩla anene mayo mambĩĩaa kwĩtanĩthya kwakya! 17 Nthĩ ĩtanaa mũno ta kĩ yĩla yasumbĩkwa nĩ mwana wa andũ ma ndaĩa na yĩla anene mayo maya ĩvinda yĩla yaĩlĩte nĩ kana makwate vinya, ĩndĩ ti nĩ kana mamilwe!

18 Nũndũ wa ũtulu mwingĩ mĩamba ya kĩala nĩleelaa, na nũndũ wa moko matulu nyũmba nĩyuasya.

19 Mũkate* ũseũvĩtwʼe ũtumae andũ matheka, na mbinyu nĩtanĩthasya thayũ; ĩndĩ mbesa isũngĩaa mavata onthe.

20 O na mosũanĩonĩ maku,* ndũkaumanĩe mũsumbĩ,* ndũkaumanĩe mũndũ mũthwii wĩ lumunĩ yaku ya kũkoma; nĩkwĩthĩwa nyũnyi* no ĩtwae wasya* ũsu, na kyũmbe kĩ nthwau no kĩtũngĩlĩĩle kĩla ũwetie.