Mũtavanyʼa
8 Nũũ ũilye ta mũndũ mũĩ? Nũũ wĩsĩ ũndũ thĩna ũtonya kũminwa?* Ũĩ wa mũndũ nũkenũkasya ũthyũ wake na ũyololosya wũmũ wa ũthyũ wake.
2 Yu nĩasya: “Ĩwʼa mĩao ya mũsumbĩ nũndũ wa wĩvĩto ũla ũmwĩvĩtĩe Ngai. 3 Ndũkekalaate wume mbee wake. Ndũkakwate mbau ũndũ o na wĩva mũthũku; nĩkwĩthĩwa no eke kĩndũ o na kĩva kĩla kĩũmwendeesya, 4 nũndũ ndeto ya mũsumbĩ nĩyo yĩthĩawa ya mũthya; nũũ ũtonya kũmwĩa, ‘Kĩĩ nĩ kyaũ ũkwĩka?’”
5 Ũla ũkwataa mwĩao ndakakwatwa nĩ ũthũku, na ngoo ĩla mbũĩ nĩmanyaa ĩvinda yĩla yaĩlĩte na mũtalatala* ũla waĩlĩte. 6 Nĩkwĩthĩwa kĩla ũndũ wĩthĩawa na ĩvinda yawʼo na mũtalatala* wawʼo, nũndũ mathĩna ma andũ nĩ maingĩ mũno. 7 Tondũ vai mũndũ wĩsĩ kĩla kĩkekĩka, nũũ ũtonya kũmũtavya ũndũ kĩkekĩka?
8 O tondũ vatethĩawa na mũndũ wĩ na ũkũmũ ĩũlũ wa veva* kana ũtonya kũsiĩĩa veva, nowʼo vatethĩawa na mũndũ wĩ na ũkũmũ ĩũlũ wa mũthenya wa kĩkwʼũ. O tondũ mũsikalĩ ũtatonya kwĩtĩkĩlwʼa enũke kaũ ũendeee, nowʼo ũthũku ũtaketĩkĩlya ala mawĩkaa mavonoke.*
9 Nĩnonete maũndũ aa onthe, na ngoo yakwa yasũanĩa kĩla wĩa wĩthĩĩtwe ũitethwʼa ungu wa sua, ĩvindanĩ yĩla mũndũ wĩthĩĩtwe aisumbĩka mũndũ ũla ũngĩ kwa kũmũũmĩsya.* 10 Na nĩnoonie athũku maithikwa, ala makothaa kũlika vandũnĩ vatheu na kumaala vo, ĩndĩ o mĩtũkĩ nĩmoolile ndũanĩ ĩla meekaa maũndũ asu. Ũndũ ũũ o nawʼo nĩ mana.
11 Nũndũ sila ũla ũtwʼĩĩawa kĩko kĩthũku ndwĩanĩawʼa na mĩtũkĩ, ngoo sya andũ nikwataa ũkũmbaũ wa kwĩka ũthũku. 12 O na kau mwĩki wa naĩ no eke ũthũku mavinda ĩana na ayĩendeea o kwĩkala thayũ ĩvinda yĩasa, ĩndĩ nĩnĩsĩ nesa kana maũndũ ma andũ ala makĩaa Ngai ũla wa wʼo makathi nesa, nũndũ nĩmamũkĩaa. 13 Ĩndĩ maũndũ ma ũla mũthũku maikathi nesa, o na ndakaasavangya mĩthenya yake ĩla ĩilye ta kyuu, nĩkwĩthĩwa ndamũkĩaa Ngai.
14 Ve ũndũ wa mana* wĩkawa ĩũlũ wa nthĩ: Ve andũ alũngalu makuawa ta mekĩte ũthũku, na ve andũ athũku makuawa ta mekĩte maũndũ malũngalu. Nĩasya ũndũ ũũ o nawʼo nĩ mana.
15 Kwoou, neeie andũ kana nũseo matane, nĩkwĩthĩwa vai kĩndũ kĩngĩ kĩseo kwa mũndũ ungu wa sua kwĩ kũya na kũnywʼa na kũtana; aĩlĩte kwĩkaa maũndũ asu o aendeee kũtethya wĩa wake mũmũ mĩthenyanĩ ya thayũ wake, ĩla Ngai ũla wa wʼo ũmũnengete ungu wa sua.
16 Nĩneekĩie kĩthito vyũ nĩthĩwe na ũĩ na ndyona maũndũ onthe ala mekawa* ĩũlũ wa nthĩ, o na nĩnaaĩawa nĩ too mũthenya na ũtukũ.* 17 Na ĩndĩ nĩnasũanĩie wĩa wʼonthe wa Ngai ũla wa wʼo na namanya kana andũ maitonya kũelewa kĩla kĩendeeaa ungu wa sua. O na makatata ata, maitonya kũkĩelewa. O na makasya nĩ oĩ ũndũ makĩelewa, kwa wʼo, maitonya kũkĩelewa.