Mũtavanyʼa

7 Ĩsyĩtwa ĩseo* yĩ kavaa kwĩ mauta maseo, na mũthenya wa kũkwʼa wĩ kavaa kwĩ mũthenya wa kũsyawa. 2 Nĩ kavaa kũthi nyũmbanĩ ya kũmeta kwĩ kũthi nyũmbanĩ ya mboka, nĩkwĩthĩwa ũsu nĩwʼo mũthya wa kĩla mũndũ, na andũ ala me thayũ maĩlĩte kwia ũndũ ũsu ngoonĩ. 3 Nĩ kavaa kyeva kwĩ ĩtheka, nĩkwĩthĩwa ũthyũ wĩ na kĩmako nũtumaa ngoo ĩseũva. 4 Ngoo ya mũndũ mũĩ yĩthĩawa nyũmbanĩ ya kũmeta, ĩndĩ ngoo ya ndia yĩthĩawa nyũmbanĩ ya kũtana.*

5 Nĩ kavaa kwĩthukĩĩsya ũkanyʼo wa mũndũ mũĩ kwĩ kwĩthukĩĩsya wathi wa andũ atumanu. 6 Nĩkwĩthĩwa o ũndũ kũtalĩkanga kwa mĩwʼa ĩkũvĩĩa ungu wa mbisũ kwĩthĩawa kũilye, nowʼo ĩtheka ya mũndũ mũtumanu yĩthĩawa yĩilye; na ũndũ ũũ o nawʼo nĩ mana. 7 Ĩndĩ kũnyamaa no kũtume mũndũ mũĩ akwatwa nĩ ndũũka, na ĩvaki nĩyĩthyoekasya ngoo.

8 Nĩ kavaa mũminũkĩlyo wa ũndũ kwĩ mwambĩlĩĩlyo wawʼo. Nĩ kavaa kwĩthĩwa na wũmĩĩsyo kwĩ kwĩthĩwa na veva wĩ na mĩngʼathĩlĩĩlyo. 9 Ndũkathatae na mĩtũkĩ,* nĩkwĩthĩwa ũthatu wĩkalaa kĩthũinĩ kya andũ atumanu.*

10 Ndũkakũlye, “Nĩkĩ mĩthenya ya tene yaĩ kavaa kwĩ ĩĩ?” nĩkwĩthĩwa ndũnakũlya ũu na ũĩ.

11 Ũĩ vamwe na ũtiĩwa nĩ kĩndũ kĩseo na nitethasya ala monaa kyeni kya mũthenya.* 12 Nĩkwĩthĩwa ũĩ nĩ ũsũvĩo o ũndũ mbesa ne ũsũvĩo, ĩndĩ ũũ nĩwʼo ũseo wa ũmanyi: Ũĩ nũsũvĩaa thayũ wa ũla wĩ nawʼo.

13 Sũanĩa wĩa wa Ngai ũla wa wʼo, nũndũ nũũ ũtonya kũlũngalya kĩla ũthyoeketye? 14 Mũthenyanĩ mũseo, onanyʼa ũseo, ĩndĩ mũthenyanĩ wa mathĩna,* manya kana Ngai nĩwe woombie mĩthenya ĩsu yĩ ĩlĩ, nĩ kana andũ maikese kũmanya nesa* kĩndũ o na kĩva kĩla kĩkamakwata ĩvindanĩ yũkĩte.

15 Thayũnĩ wakwa wa mana nĩnonete kĩla kĩndũ; nĩnonete mũndũ mũlũngalu ũla ũthelelaa ũlũngalunĩ wake na ngona mũndũ mũthũku ũla wĩkalaa thayũ ĩvinda yĩasa o na kau ekaa maũndũ mathũku.

16 Ndũkethĩwe wĩ mũlũngalu kũvĩtũka, o na ndũkonanyʼe wĩ mũĩ mũno. Wĩenda kwĩyanangĩa kĩ? 17 Ndũkethĩwe wĩ mũthũku mũno, o na ndũkethĩwe wĩ mũtumanu. Wĩenda kũkwʼa ĩvinda yaku yĩte ĩviku nĩkĩ? 18 Nĩ ũseo kũlũmya ũkanyʼo ũmwe ũte kũlekya ũla ũngĩ; nĩkwĩthĩwa ũla ũkĩaa Ngai akeewʼa maũndũ asu me elĩ.

19 Ũĩ ũtumaa mũndũ mũĩ ethĩwa na ũtonyi mũno kwĩ aũme ĩkũmi me vinya ndũanĩ. 20 Nĩkwĩthĩwa vai mũndũ mũlũngalu ĩũlũ wa nthĩ ũla mavinda onthe wĩkaa ũseo na ũtesaa kũvĩtya.

21 O na ĩngĩ, ndũkaie ngoonĩ yaku kĩla ndeto andũ maweta, nũndũ weeka ũu no wĩwʼe mũthũkũmi waku aikwathĩĩsya ũthũku;* 22 nũndũ nĩwĩsĩ nesa ngoonĩ yaku kana mavinda maingĩ o naku nĩwathĩĩisye angĩ maũndũ mathũku.

23 Ũndũ ũsu wʼonthe nĩnaũtatie na ũĩ, na nasya atĩĩ: “Nĩngwĩthĩwa na ũĩ.” Ĩndĩ waĩ vaasa vyũ nakwa. 24 Kĩla kĩthĩĩtwe tũitonya kũkĩvikĩa na nĩ kĩliku mũno vyũ. Nũũ ũtonya kũkĩelewa? 25 Nĩnatongoeisye ngoo yakwa nĩmanye na ndithiana na ndimantha ũĩ na kĩla kĩtumaa maũndũ mekĩka, na ndielewa mwĩkalĩle mũthũku wa ndia na ũtumanu wa ala mekaa maũndũ ta me na ndũũka. 26 Na ĩndĩ namanya ũndũ ũũ: Mũndũ mũka ũla wĩthĩawa ailye ta neti ya mũsyĩmi, ũla ngoo yake ĩilye neti nene ya kũtea makũyũ, na ũla moko make mailye ta nyololo sya yela, e ũũ kwĩ kĩkwʼũ. Mũndũ ũla wendeeasya Ngai ũla wa wʼo akavonoka kuma kwake, ĩndĩ mwĩki wa naĩ akakwatwʼa nĩwe.

27 “Sisya, kĩĩ nĩkyo namanyie,” easya ũu mũmbanyʼa. “Nĩnathianie ũndũ ũmwe ĩtina wa ũngĩ nĩ kana nĩelewe ũndũ maũndũ asu mailye, 28 ĩndĩ kĩla naendeeie* kũmantha, ndyaakĩkwata. Nĩnonete mũndũũme ũmwe* katĩ wa ngili, ĩndĩ ndyonete mũndũ mũka ũmwe katĩ woo. 29 Kĩĩ kĩ kyoka nĩkyo nĩmanyĩte: Ngai ũla wa wʼo oombie andũ me alũngalu, ĩndĩ nĩmemanthĩĩte mĩvango mingĩ.”