Mũtavanyʼa

6 Ve mũisyo* ũngĩ nonete ungu wa sua, na kaingĩ nũkwataa andũ: 2 Ngai ũla wa wʼo nũnengae mũndũ ũthwii na syĩndũ sya kĩ-mwĩĩ na ũkumyo, ũkethĩa vai kĩndũ o na kĩmwe ũkwenda* ũte nakyo; ĩndĩ o na ũu wĩ o vo, Ngai ũla wa wʼo ndamũnengae ũtonyi wa kũitanĩa, o na kau mũeni no aitanĩe. Ũndũ ũũ o nawʼo nĩ mana na thĩna mũnene. 3 Ethĩwa mũndũ nĩweethĩwa na syana ĩana na ayĩkala thayũ myaka mingĩ na aikũa, ĩndĩ ũyĩthĩa ndanatanĩa* syĩndũ syake nzeo atanalika mbũanĩ,* ndi na nzika kwasya kana kasyaĩtwe ke kakwʼũ ke kavaa kwĩ we. 4 Nĩkwĩthĩwa mwana ũsu ookie o mana na athi kĩvindunĩ, na ĩsyĩtwa yake yavwʼĩkwa nĩ kĩvindu. 5 O na kau ndaaona sua kana kũmanya kĩndũ o na kĩmwe, we e kavaa* kwĩ ũla mũndũ wa mbee. 6 Ve vata mwaũ wa mũndũ kwĩkala thayũ myaka ngili kũndũ kwĩlĩ ĩndĩ ũyĩthĩa ndanatanĩa thayũ? Mũthya onthe mayĩendaa o vandũ vamwe?

7 Mũndũ atethasya wĩa wʼonthe mũmũ nĩ kana ausũsye kanywʼa wake; ĩndĩ o na ũu wĩ o vo, wendi* wake ndwĩsaa kwĩanĩwʼa. 8 Nĩkwĩthĩwa mũndũ ũla mũĩ akĩlĩtye ndia kyaũ, kana ngya ĩtethekaa ata yamanya ũndũ yaĩle kwĩka nĩ kana ĩendeee kwĩkala thayũ?* 9 Nĩ kavaa mũndũ kũtanĩa kĩla metho make mekwona kwĩ kwanganga aatĩĩe wendi wake.* Ũndũ ũũ o nawʼo nĩ mana, ta kũsembanyʼa na kĩseve.

10 Kĩndũ o na kĩva kĩtanamba kwĩthĩwa kĩthĩawa kyatwʼĩĩiwe ĩsyĩtwa, na mũndũ nĩwĩsĩkĩe ũndũ ũilye; na ndethĩawa atonya kũkananĩa* na mũndũ ũla wĩ ũtonyi kwĩ we. 11 O ũndũ ndeto* syaingĩva, nowʼo syĩthĩawa syĩ sya mana; na syo itethasya mũndũ ata? 12 Nũũ wĩsĩ maũndũ maseo ala mũndũ waĩle kwĩka mĩthenyanĩ mĩvũthũ ya thayũ wake wa mana, ĩla ĩvĩtaa o ta kyuu? Nĩkwĩthĩwa nũũ ũtonya kũtavya mũndũ kĩla kĩkekĩka ungu wa sua akwʼa?