Mũtavanyʼa

5 Syaĩĩsya matambya maku ĩvinda o na yĩva ũendete nyũmbanĩ ya Ngai ũla wa wʼo; nĩ kavaa kũthengeea wĩthukĩĩsye kwĩ kumya nthembo o tondũ ndia syĩkaa, nĩkwĩthĩwa iyĩthĩawa syĩsĩ kĩla syĩkwĩka nĩ kĩthũku.

2 Kanyw’a waku ndũkaneene na mĩtũkĩ, o na ndũkaeke ngoo yaku ĩneene na mĩtũkĩ mbee wa Ngai ũla wa wʼo, nĩkwĩthĩwa Ngai ũla wa wʼo e ĩtunĩ ĩndĩ we wĩ ĩũlũ wa nthĩ. Nĩkyo kĩtumi ndeto syaku syaĩlĩte kwĩthĩwa syĩ mbũthũ. 3 Nũndũ ndoto ĩetawe nĩ kwĩthĩwa na maũndũ maingĩ* mũno, na mĩambangĩle ya ndia ĩetawe nĩ ndeto mbingĩ mũno. 4 Ĩvinda o na yĩva weevĩtĩa Ngai wĩvĩto, ndũkaselewe kũwĩanĩsya, nĩkwĩthĩwa ndendeeawʼa nĩ ndia. Ĩanĩsya kĩla weevĩta. 5 Nĩ kavaa ũkaema kwĩvĩta, kwĩ kwĩvĩta na ũiema kwĩanĩsya. 6 Ndũketĩkĩlye kanywʼa waku ũtume* wĩka naĩ, na ndũkasye mbee wa mũlaĩka* kana kĩla weeka kĩĩ ĩvĩtyo. Ve vata mwaũ ũthatye Ngai ũla wa wʼo nũndũ wa kĩla ũũweta nginya alasimĩke kwananga wĩa wa moko maku? 7 Nĩkwĩthĩwa o tondũ maũndũ maingĩ maetae ndoto, nowʼo ndeto mbingĩ syĩthĩawa o sya mana. Ĩndĩ kĩa Ngai ũla wa wʼo.

8 Ethĩwa nĩwoona ngya iinyamawʼa ũndũnĩ o na wĩva na woona ũsili wa katĩ na ũlũngalu ũte kũatĩĩwa kĩsionĩ* kyaku, ndũkasengwʼe nĩ ũndũ ũsu. Nĩkwĩthĩwa mũnene ũsu nũsyaĩĩwʼe nĩ ũngĩ wĩ ĩũlũ wake, na ve angĩ me o ĩũlangũ wa asu.

9 O na ĩngĩ, vaita wa nthĩ ũaanawʼa katĩ woo onthe; o na mũsumbĩ eanĩawʼa mavata make mĩũnda yaĩmwa.

10 Ũla wendete vetha ndakesa kwĩanĩwa nĩ vetha, o na ũla wendete ũthwii ndakesa kwĩanĩwa nĩ kĩla ũkwataa. Ũndũ ũũ o nawʼo nĩ mana.

11 Yĩla syĩndũ nzeo syaingĩva, ala maitũmĩaa nĩmaingĩvaa. Na mwene aunĩkaa ata, eka o kũisyaĩĩsya na metho make?

12 Too wa ũla ũthũkũmaa wĩ mũyo, ethĩwe eya lĩu mũnini kana mwingĩ, ĩndĩ syĩndũ mbingĩ ila mũthwii wĩthĩawa nasyo iimwĩtĩkĩlasya kũkoma.

13 Ve mũisyo* mũnene nonete ungu wa sua: ũthwii ũla mwene weeyũmbanĩisye na wamũũmĩsya o we mwene. 14 Ũthwii ũsu waaie nũndũ kĩla weekaa kĩyaathi* nesa, na yĩla wesa kũmesya mwana, ũyĩthĩa nde na kĩndũ kĩtialĩte.

15 O ũndũ mũndũ waumie ĩvunĩ ya inyia e mũthei, akathi e o mũthei, o ũndũ waumie vo. Na ndatonya kũkua kĩndũ o na kĩmwe kĩthĩwe ĩtuvi ya wĩa wake wʼonthe mũmũ.

16 Ũũ o nawʼo nĩ mũisyo* mũnene: O ũndũ wookie, now’o ũkathi; na ũla ũendeeaa kũthũkũmĩa kĩseve na kĩthito atethekaa ata? 17 O na ĩngĩ, kĩla mũthenya aĩĩaa lĩu kĩvindunĩ, atũlĩkĩte ngoo mũno na e mũwau na e mũthatu.

18 Ũndũ ũũ nĩwʼo nonete wĩ mũseo na waĩle: kana mũndũ aĩlĩte kũya na kũnywʼa na kũtanĩa wĩa wʼonthe mũmũ ũla wĩtĩaa yuutĩa ungu wa sua mĩthenyanĩ mĩvũthũ ya thayũ, ĩla Ngai ũla wa wʼo ũmũnengete, nĩkwĩthĩwa yĩu nĩyo ĩtuvi yake.* 19 O na ĩngĩ, yĩla Ngai ũla wa wʼo wanenga mũndũ ũthwii na syĩndũ sya kĩ-mwĩĩ o vamwe na ũtonyi wa kũitanĩa, aĩlĩte kwosa ĩtuvi yake* na aitanĩa wĩa wake mũmũ. Ũsu nĩ mũthĩnzĩo wa Ngai. 20 Nĩkwĩthĩwa ũkeethĩwa wĩ ũndũ wĩ vinya kwake kũmanya* ũndũ mĩthenya ya thayũ wake ĩvĩtĩte, nũndũ Ngai ũla wa wʼo amwĩkalasya akwatene e na ũtanu ngoonĩ.