Mũtavanyʼa

4 O na ĩngĩ, nĩnasũanĩie mũno ĩũlũ wa maũndũ ma kũnyamasya ala mekawa ungu wa sua. Nĩnoonie methoi ma ala manyamaawʼa, na vayaĩ mũndũ o na ũmwe wa kũmakiakisya. Na ala mamanyamaasya maĩ na ũkũmũ, na vayaĩ mũndũ o na ũmwe wa kũmakiakisya. 2 Na nĩnakathie akw’ũ ala maminĩte kũkwʼa vandũ va andũ me thayũ ala maĩ o thayũ. 3 Na ũla wĩ kavaa kwĩ asu elĩ nĩ ũla ũtanamba kũsyawa, ũla ũtonete maũndũ ma kũmakya ala mekawa ungu wa sua.

4 Na nĩnonete ũndũ vethĩawa na kĩthito kingĩvĩte* na wĩa wingĩvĩte wĩ na ũtũĩka yĩla andũ meũsindana; ũndũ ũũ o nawʼo nĩ mana, nĩ kũsembanyʼa na kĩseve.

5 Ndia ĩkũnzaa moko mayo o mwĩĩ wayo ũendeee kũthela.*

6 Nĩ kavaa ũvĩ ũmwe usĩe ũthũmũo vandũ va mbĩ ilĩ syusĩe wĩa mũmũ na kũsembanyʼa na kĩseve.

7 O na ĩngĩ, nĩnasũanĩie mũno ũndũ ũngĩ wa mana wĩthĩawa ungu wa sua: 8 Ve mũndũ wĩkalaa e weka, ate na mũnyanyae; ndethĩawa na mwana kana mwana-a-ĩthe, ĩndĩ vayĩthĩawa na mũthya wa wĩa wake wʼonthe mũmũ. Metho make mayĩsaa kwĩanĩwa nĩ ũthwii. Ĩndĩ we nĩwĩkũlasya, ‘We nũũ nthũkũmĩaa wĩa ũũ mũmũ na ndyĩvata* syĩndũ nzeoʼ? Ũndũ ũũ o nawʼo nĩ mana na wĩa wa thĩna.

9 Elĩ me kavaa kwĩ ũmwe nũndũ makwataa ĩtuvi ĩseo ya* wĩa woo mũmũ. 10 Nĩkwĩthĩwa ethĩwa ũmwe nĩwavalũka, ũla ũngĩ no atetheesye mũnyanyae kũũngama. Ĩndĩ vakathi ata kwa ũla wavalũka ate na mũndũ wa kũmũtetheesya kũũngama?

11 O na ĩngĩ, ethĩwa andũ elĩ makakoma vamwe, makakwatanyʼa muutĩa, ĩndĩ we mũndũ e o weka atonya kwĩkwatya muutĩa ata? 12 Na mũndũ no akĩlye mũndũ wĩ weka vinya, ĩndĩ elĩ me vamwe no metetee makamũsinda. Na ĩkanda ya ndii itatũ yĩitonya kũtwʼĩka mĩtũkĩ.*

13 Kavaa mwana ngya ĩndĩ mũĩ kwĩ mũsumbĩ mũkũũ ĩndĩ mũtumanu, ũla ũtethĩawa ĩngĩ na ũmanyi ũtoetye wa kwĩwʼa ũkanyʼo. 14 Nĩkwĩthĩwa aumie* yela akatwʼĩke mũsumbĩ, o na kau asyaĩwe ũsumbĩnĩ wa ũ mũsumbĩ e o ngya. 15 Nĩnasũanĩie andũ onthe me thayũ ala matembeangaa ungu wa sua, o vamwe na kĩla kĩkwataa ũla mwanake wosaa mwanya wa ũsu ũngĩ.* 16 O na kau onthe ala mamũkwataa mbau maithelaa, ala mokaa ĩtina maitanĩthawʼa nĩwe. Ũndũ ũũ o nawʼo nĩ mana, nĩ kũsembanyʼa na kĩseve.