Mũtavanyʼa
3 Ve ĩvinda yĩnyuvĩtwe kwondũ wa kĩla kĩndũ,
Ĩvinda kwondũ wa kĩla ũndũ ungu wa matu:
2 Ĩvinda ya kũsyawa na ĩvinda ya kũkwʼa;
Ĩvinda ya kũvanda na ĩvinda ya kũkũa kĩla kĩvande;
3 Ĩvinda ya kũaa na ĩvinda ya kũvosya;
Ĩvinda ya kũomboa na ĩvinda ya kwaka;
4 Ĩvinda ya kũĩa na ĩvinda ya kũtheka;
Ĩvinda ya kũĩa uĩte mbu na ĩvinda ya kũsũnga;*
5 Ĩvinda ya kwĩkya mavia ĩtheka na ĩvinda ya kũmbanyʼa mavia;
Ĩvinda ya kũkumbatĩa na ĩvinda ya kũema kũkumbatĩa;
6 Ĩvinda ya kũmantha na ĩvinda ya kũeka kũmantha kĩla kyau;
Ĩvinda ya kwia na ĩvinda ya kwĩkya;
7 Ĩvinda ya kũtembũa na ĩvinda ya kũtuma;
Ĩvinda ya kũvindya na ĩvinda ya kũneena;
8 Ĩvinda ya kwenda na ĩvinda ya kũmena;
Ĩvinda ya kaũ na ĩvinda ya mũuo;
9 We mũthũkũmi atethekaa ata nĩ kĩthito kyake kyonthe? 10 Nĩnonete wĩa ũla Ngai ũnengete ana ma andũ nĩ kana mekalae makwatene. 11 Nũseũvĩtye kĩla kĩndũ kĩ kyanake* ĩvindanĩ yakyo. O na nĩwiĩte ĩvinda ya tene na tene ngoonĩ syoo; ĩndĩ andũ maikesa kũmanya wĩa ũla Ngai ũla wa wʼo ũtethetye kuma mwambĩlĩĩlyo kũvika mũminũkĩlyo.
12 Nĩthĩĩte vai kĩndũ kĩseango kwoo kwĩ kũtana na kwĩka ũseo thayũnĩ woo, 13 o na ĩngĩ, kana kĩla mũndũ aĩle kũya na kũnywʼa na kũtanĩa wĩa wake wʼonthe mũmũ. Ũsu nĩ mũthĩnzĩo wa Ngai.
14 Yu nĩnĩmanyĩte kana kĩla wĩa Ngai ũla wa wʼo ũtethasya ũkekala tene na tene. Vai kĩndũ o na kĩmwe kĩtonya kwongelwa na vai kĩndũ o na kĩmwe kĩtonya kũolwa. Ngai ũla wa wʼo aũtethetye ũu, nĩ kana andũ mamũkĩe.
15 Ũndũ o na wĩva ũla wĩkĩkaa nĩweekĩkie, na ũndũ ũla ũkoka waĩ o kwʼo; ĩndĩ Ngai ũla wa wʼo amanthaa ũndũ ũla ũatĩanĩwe nawʼo.*
16 O na ĩngĩ, nĩnonete ũndũ ũũ ungu wa sua: Vandũ va kwĩthĩwa na ũsili wa katĩ vaĩ ũthũku, na vandũ va kwĩthĩwa na ũlũngalu vaĩ ũthũku. 17 Kwoou, naisye ũũ ngoonĩ yakwa: “Ngai ũla wa wʼo akatwʼĩĩa ala alũngalu na ala athũku sila, nĩkwĩthĩwa ve ĩvinda kwondũ wa kĩla ũndũ na kwondũ wa meko onthe.”
18 O na ĩngĩ, ĩũlũ wa ana ma andũ, naisye ũũ ngoonĩ yakwa: “Ngai ũla wa wʼo akamatata na aimonyʼa kana mailye nyamũ.” 19 Nĩkwĩthĩwa ve mũminũkĩlyo wa andũ* na ve mũminũkĩlyo wa nyamũ; onthe methĩawa na mũminũkĩlyo o ũmwe. O ũndũ nyamũ ĩkusaa, nowʼo mũndũ ũkusaa; na onthe methĩawa na veva o ũmwe. Kwoou, mũndũ ti mũseo kwĩ nyamũ, nĩkwĩthĩwa kĩla kĩndũ nĩ mana. 20 Onthe maendete vandũ vamwe. Onthe maumaa kĩtoonĩ, na onthe masyokete kĩtoonĩ. 21 Nũũ kwa wʼo wĩsĩ ethĩwa veva wa andũ wambataa ĩũlũ, na ethĩwa veva wa nyamũ ũtheeaa nthĩ? 22 Na nĩnoonie kana vai kĩndũ kĩseango kwĩ mũndũ kũtanĩa wĩa wake, nĩkwĩthĩwa yĩu nĩyo ĩtuvi yake;* nũndũ nũũ ũtonya kũtuma ona kĩla kĩkekĩka akwʼa?