Mũtavanyʼa

11 Ĩkya mũkate waku* kĩwʼũnĩ, nĩkwĩthĩwa ĩtina wa mĩthenya mingĩ ũkawona ĩngĩ. 2 Aĩa andũ mũonza kana o na nyanya, nĩkwĩthĩwa ndwĩsĩ nĩ mũisyo* wĩva ũkethĩwa ĩũlũ wa nthĩ.

3 Ethĩwa matu nĩmausũa kĩwʼũ, makatuma mbua yua ĩũlũ wa nthĩ; na ethĩwa mũtĩ nĩwavalũka welekele ngalĩko ya ĩtheo kana welekele ngalĩko ya ĩũlũ, o vala wavalũka no vo ũkekala.

4 Ũla ũsiasya kĩseve ndakavanda mbeũ, na ũla ũsiasya matu ndakaketha.

5 O ũndũ ũtesĩ ũndũ veva ũthũkũmaa mavĩndĩnĩ ma kana ke ĩvunĩ ya* mũndũ mũka mũito, nowʼo ũtesĩ wĩa wa Ngai ũla wa wʼo, ũla wĩkaa maũndũ onthe.

6 Vanda mbeũ yaku kwakya, na nginya ĩ ya wĩoo ndũkaeke kwʼoko kwaku kũthũmũe; nĩkwĩthĩwa ndwĩsĩ nĩ yĩva ĩkaĩla, nĩ ĩĩ kana nĩ ĩya, kana ethĩwa syelĩ ikeeka nesa.

7 Kyeni kĩ mũyo, na nĩ ũndũ mũseo metho mone sua. 8 Nũndũ ethĩwa mũndũ akekala thayũ myaka mingĩ, eka amĩtanĩe yonthe. Ĩndĩ aĩle kũlilikana kana mĩthenya ya kĩvindu no yĩthĩwe mingĩ; maũndũ onthe ala makoka makeethĩwa me ma mana.

9 Mwanake, ĩtanĩthye wĩ o wa mũika, na eka ngoo yaku ĩtane mĩthenyanĩ ya ũika waku. Atĩĩa nzĩa sya ngoo yaku na ũithi vala metho maku meũkũtongoesya; ĩndĩ manya kana Ngai ũla wa wʼo akaũsilĩla* nũndũ wa maũndũ asu onthe. 10 Kwoou, umya maũndũ onthe ala maetae mathĩna ngoonĩ yaku, na ũivetanga maũndũ ma kũũmĩsya mwĩĩnĩ waku, nĩkwĩthĩwa ũika na ĩvinda yĩla mũndũ wĩthĩawa na vinya mwingĩ vyũ yĩthĩawa yĩ ya mana.