Mũtavanyʼa

12 Yu ĩndĩ, lilikana Mũmbi waku Mũnene, mĩthenyanĩ ya ũika waku, mĩthenya ya mũisyo* ĩtanamba kũka na myaka ĩivika yĩla ũkasya: “Ndiũmĩtanĩa”; 2 sua na kyeni na mwei na ndata itanamesya kĩvindu, na matu maisyoka ĩtina wa* mbua mbingĩ; 3 mũthenya ũla asungi* ma nyũmba methĩlĩa,* na aũme me vinya mekumana, na aka mayĩeka kũthia nũndũ nĩ avũthũ, na iveti ila isyaĩlye ndĩlĩsyanĩ iyona kĩvindu; 4 yĩla mĩomo ĩla ĩendete nzĩanĩ yĩvingwa, yĩla wasya wa kĩthii wĩoleka, yĩla mũndũ wamũkawʼa nĩ wasya wa nyũnyi, na yĩla eĩtu onthe ala mainaa methelwa nĩ vinya. 5 O na ĩngĩ, yĩla mũndũ wĩkĩa kũndũ kũtũlu, na vayĩthĩwa mĩisyo nzĩanĩ. Na yĩla mũtĩ wa mũlosi wĩlaũka, na kĩtooli kĩithi kĩkusĩtye,* na mũtĩ wa kwongela wendi wa kũya ũivalĩka, nũndũ mũndũ aendete nyũmbanĩ yake ĩla ũkekala ĩvinda yĩasa na andũ ala meũmeta metembeanga nzĩanĩ; 6 ĩkanda ya vetha yĩtanavetwa, na mbakũli ya thaavu ĩtanatumbwatumbwa, na mbisũ ĩtũmĩawa mbulutinĩ* ĩtanoawa, na ndĩa ya kĩthima ĩtanatumbwatumbwa. 7 Na ĩndĩ kĩtoo kĩisyoka mũthanganĩ, o vala kyaĩ, na veva* ũisyokea Ngai ũla wa wʼo ũla waũnenganie.

8 “Nĩ mana* vyũ!” easya ũu mũmbanyʼa. “Kĩla kĩndũ nĩ mana.”

9 Mũmbanyʼa ndaaĩthĩwa na ũĩ wʼoka, ĩndĩ nĩwaendeeie kũmanyĩsya andũ kĩla weesĩ, na asũanĩa mũno na eeka ũkunĩkĩli mwingĩ nĩ kana ombanyʼe nthimo mbingĩ.* 10 Mũmbanyʼa nĩweekĩie kĩthito amanthe ndeto sya kwendeesya na aiandĩka ndeto sya wʼo na sya kwĩkwatwʼa.

11 Ndeto sya ala oĩ syĩthĩawa iilye ta mĩsenge, na ũneeni ũla mombanĩtye wĩthĩawa ũilye ta mĩsumaa ĩathĩĩwe vandũ ĩkalũma; inenganĩtwe nĩ mũithi ũmwe. 12 Ĩũlũ wa ũndũ ũngĩ o na wĩva eka maũndũ aa, mwanawa, kanwʼa: Mavuku maingĩ meendeea kũandĩkwa, na kwĩnengane vyũ ũmasome nĩkũnoasya mwĩĩ.

13 Ũũ nĩwʼo mũminũkĩlyo wa maũndũ, ĩtina wa kĩla ũndũ kwĩwʼĩka: Kĩa Ngai ũla wa wʼo, na ũikwata mĩao yake, nĩkwĩthĩwa kĩĩ nĩkyo kĩanda kyonthe kya andũ. 14 Nĩkwĩthĩwa Ngai ũla wa wʼo akatwʼĩĩa kĩla ũndũ sila, o vamwe na kĩla ũndũ mũvithe, vamanyĩke ethĩwa nĩ mũseo kana nĩ mũthũku.