Nthimo
9 Ũĩ wa wʼo nĩwakĩte nyũmba yawʼo;
Nĩwasĩte* ituĩ syawʼo mũonza.
3 Nũtũmĩte athũkũmi mawʼo aka
Metanĩe na wasya mũnene kũndũnĩ kũtũlu kwa ndũa, mayasya:
4 “Mũndũ o na wĩva ũte na ũmanyi, nalike vaa.”
Eaa ũla ũte kĩlĩko* atĩĩ:
5 “Ũka, ũye mũkate wakwa
Na ũinywʼa mbinyu ĩla mbulanĩtye.
6 Tia ũtumanu waku* nĩ kana wĩkale thayũ;
Enda ĩmwe kwa ĩmwe nzĩanĩ ya ũtonyi wa kũelewa maũndũ.”
7 Ũla ũlũngaa mũndũ wĩ kĩvũthya athokasya nthoni,
Na mũndũ o na wĩva ũla ũkanasya mũndũ mũthũku akaũmĩa.
8 Ndũkakany’e mũndũ wĩ kĩvũthya, nũndũ weeka ũu nũkũũmena.
Kanyʼa mũndũ mũĩ, nake nũkũkwenda.
9 Taa mũndũ mũĩ, nake akeethĩwa e mũĩ mũnango.
Manyĩsya mũndũ mũlũngalu, nake akongeleela maũndũ ala wĩmanyĩĩtye.
10 Kũmũkĩa Yeova nĩkwʼo mwambĩlĩĩlyo wa ũĩ,
Na kũmũmanya Ũla Mũtheu Vyũ nĩkwʼo kũelewa maũndũ.
11 Nĩkwĩthĩwa ngatuma mĩthenya yaku yĩthĩwa yĩ mingĩ,
Na myaka ya thayũ waku ĩkongelwa.
12 Weethĩwa wĩ mũĩ, ũĩ ũsu no uwe ũtethasya,
Ĩndĩ ethĩwa wĩ mũndũ wĩ kĩvũthya, no uwe wĩ weka ũkathĩna.
13 Mũndũ mũka ndia e kĩlonzo.
Ethĩawa e mũtumanu na vai kĩndũ o na kĩmwe wĩthĩawa esĩ.
14 Ekalaa mũomonĩ wa nyũmba yake
Kĩvĩlanĩ kũndũnĩ kũtũlu kwa ndũa,
15 Ayĩtaa ala mesĩle vakuvĩ nake na wasya mũnene,
Ala maendete ĩmwe kwa ĩmwe mesĩle nzĩanĩ yoo, aimea:
16 “Mũndũ o na wĩva ũte na ũmanyi, nalike vaa.”
Eaa ala mate kĩlĩko:*
17 “Kĩw’ũ kyũyĩtwe kĩ mũyo,
Na lĩu ũla ũĩĩawa kĩmbithĩnĩ nĩ wa kwendeesya.”
18 Ĩndĩ mũndũ ũsu ndethĩawa esĩ kana ala makwie na mate na ũtonyi o na ũmwe me vau,
Kana aeni ma mũndũ mũka ũsu me kũndũnĩ kũla kũliku Mbũanĩ.*