Nthimo

Mwana mũĩ nũtanĩthasya ĩthe,

Ĩndĩ mwana mũtumanu nĩ kyeva kwa inyia wake.

 2 Ũthwii ũla ũkwatĩkanaa kwa nzĩa nthũku ndũkatethya o na vanini,

Ĩndĩ ũlũngalu nĩwʼo ũvonokasya mũndũ kuma kĩkw’ũnĩ.

 3 Yeova ndakaeka mũndũ mũlũngalu ekale* na nzaa,

Ĩndĩ akavata ala athũku kĩla meliĩlaa.

 4 Moko matulu maetae ũkya,

Ĩndĩ moko me kĩthito maetae ũthwii.

 5 Mwana ũla wĩkaa maũndũ na ũmanyi mũliku ombanasya lĩu thano,

Ĩndĩ mwana ũla wĩkaa maũndũ me nthoni ethĩawa akomete vyũ ĩvindanĩ ya ngetha.

 6 Moathimo methĩawa mũtwenĩ wa ũla mũlũngalu,

Ĩndĩ kanyw’a wa ũla mũthũku ũvithaa ũngʼendu.

 7 Ũlilikano wa* mũndũ mũlũngalu ũkaathimwa,

Ĩndĩ ĩsyĩtwa ya ũla mũthũku yĩkoa.

 8 Mũndũ ũla mũĩ ngoonĩ akeetĩkĩla motao,*

Ĩndĩ ũla ũneenaa ndeto sya ũtumanu akakinyangĩwa nthĩ.

 9 Mũndũ ũla ũkinyĩlaa wĩanĩunĩ akathi e mũsũvĩĩku,

Ĩndĩ ũla ũthyoekasya nzĩa syake akamanyĩka.

10 Ũla ũvenasya itho yake na ũseleke atumaa kwĩthĩwa na kyeva,

Na ũla ũneenaa ndeto sya ũtumanu akakinyangĩwa nthĩ.

11 Kanyw’a wa ũla mũlũngalu nĩ mbuluti ya* thayũ,

Ĩndĩ kanyw’a wa ũla mũthũku ũvithaa ũngʼendu.

12 Kĩmena nĩkyo kyũkĩlasya mĩaanĩko,

Ĩndĩ wendo ũvw’ĩkaa mavĩtyo onthe.

13 Ũĩ wonekaa ilomonĩ sya mũndũ ũla wĩsĩ kũvathũkanyʼa maũndũ,

Ĩndĩ ndata nĩ ya mũongo wa ũla ũte kĩlĩko.*

14 Ala oĩ maiaa ũmanyi ta ũthwii,

Ĩndĩ kanyw’a wa ũla mũtumanu ũthokasya wanangĩko.

16 Wĩa wa ũla mũlũngalu ũtongoeasya thayũnĩ;

Ĩndĩ ũsyao wa ũla mũthũku ũtongoeasya naĩnĩ.

17 Ũla wĩwʼaa alũngwa nĩ kasĩla kelekele thayũnĩ,*

Ĩndĩ ũla ũvũthĩĩasya ũkanyʼo elelũkasya angĩ.

18 Ũla ũvithaa kĩmena kyake aneenaa ũvũngũ,

Na ũla ũnyaĩĩkasya maũvoo* ma kũũmĩsya nĩ ndia.

19 Ndeto syeethĩwa syĩ mbingĩ, ĩvĩtyo yĩyĩema kwĩthĩwa vo,

Ĩndĩ mũndũ ũla ũsiĩĩaa ilomo syake ekaa maũndũ kwa ũĩ.

20 Ũĩmĩ wa ũla mũlũngalu nĩ ta vetha ũla mũseo vyũ,

Ĩndĩ ngoo ya ũla mũthũku ndĩ vata mũnene.

21 Ilomo sya ũla mũlũngalu nĩsiĩthasya* aingĩ,

Ĩndĩ ndia ikusaa nĩ kwaa kĩlĩko.

22 Ũathimo wa Yeova nĩwʼo ũthuasya mũndũ,

Na ndawongelanasya na woo.*

23 Kwĩlikya mwĩkalĩlenĩ wĩ nthoni nĩ ta ĩthaũ kwa ndia,

Ĩndĩ ũĩ nĩ wa mũndũ ũla wĩ ũtonyi wa kũvathũkanyʼa maũndũ.

24 Ũla mũthũku akookĩwa nĩ kĩla ũkĩaa;

Ĩndĩ wendi wa ũla mũlũngalu ũkeanĩwʼa.

25 Kĩuutani kyavĩta, ũla mũthũku ndakethĩwa vo ĩngĩ,

Ĩndĩ ũla mũlũngalu nĩ mũsingi tene na tene.

26 O ta siki maeonĩ na syũki methonĩ,

Nowʼo mũndũ ũla mũtulu wĩthĩawa ailye kwa ũla ũkũmũtũma.*

27 Kũmũkĩa Yeova nĩkũasavangasya thayũ,

Ĩndĩ myaka ya ũla mũthũku ĩkakuvĩvwʼa.

28 Kĩla ala alũngalu meteele nĩkĩetae* ũtanu,

Ĩndĩ wĩkwatyo wa ala athũku ũkathela.

29 Nzĩa ya Yeova nĩ ngome kwa ũla ũtaweteka ũthũku,

Ĩndĩ yonanasya wanangĩko kwa eki ma naĩ.

30 Ũla mũlũngalu ndakesa kũvalũkwʼa,

Ĩndĩ ũla mũthũku ndakaendeea kwĩkala ĩ nthĩ.

31 Kanyw’a wa ũla mũlũngalu ũneenaa* ũĩ,

Ĩndĩ ũĩmĩ ũla mũvuku ũkatilwa.

32 Ilomo sya ũla mũlũngalu nĩsyĩthĩawa syĩsĩ maũndũ ala ma kwendeesya,

Ĩndĩ kanyw’a wa ũla mũthũku ũneenaa maũndũ mavuku.