Nthimo
8 Wʼo ũĩ ndũkwĩtana na wasya mũnene?
Wʼo ũtonyi wa kũvathũkanyʼa maũndũ ndũkũkĩlya wasya wawʼo?
2 Kũndũnĩ kũtũlu ũtee wa nzĩa,
Ũũngamaa vandũnĩ vawʼo mataanĩsyonĩ ma nzĩa.
3 Ũtee wa mĩvĩa ĩla ĩlikĩte ndũanĩ,
Ũlikĩlonĩ wa mĩomo,
Ũendeeaa kũĩa na wasya mũnene ũyasya:
4 “Inywʼĩ andũ, ninywʼĩ ngwĩta;
Nũkĩlĩlye kĩla mũndũ* wasya wakwa.
5 Inywʼĩ mũte na ũmanyi, ĩmanyĩsyei kwĩthĩwa mwĩ oĩ;
Inyw’ĩ ndia, ĩkĩai kĩthito mwĩthĩwe na ngoo ĩkũelewa maũndũ.*
6 Ĩthukĩĩsyei, nĩkwĩthĩwa kĩla ngũweta nĩ kya vata,
Ilomo syakwa ineenaa kĩla kyaĩlĩte;
7 Nĩkwĩthĩwa kanywʼa wakwa ũneenaa ũwʼo na wasya wa nthĩ na wa kwendeesya,
Na ilomo syakwa nimenete kĩla kĩthũku.
8 Maũndũ onthe ala kanyw’a wakwa ũneenaa nĩ malũngalu.
Vai ũndũ ũmwe katĩ wamo wa ũvũngũ kana mũthyoeku.
9 Onthe methĩawa me ũtheinĩ vyũ kwa ala mesĩ kũvathũkanyʼa maũndũ
Na maĩlĩte kwa ala makwatĩte ũmanyi.
10 Osai ũkany’o wakwa vandũ va vetha,
Na ũmanyi vandũ va thaavu ũla mũseo vyũ,
11 Nĩkwĩthĩwa ũĩ wĩ kavaa kwĩ maliani;*
Syĩndũ ila ingĩ syonthe sya kwendwa iyĩelekanwʼa nawʼo.
12 Nyie, ũĩ, nĩkalanasya na ũtonyi wa kũelewa maũndũ;
Nĩnĩkwatĩte ũmanyi na ũtonyi wa kũsũanĩa.
13 Kũmũkĩa Yeova kwonanasya kũmena ũthũku.
Nĩnĩmenete kwĩnenevya na ngathĩĩo na nzĩa nthũku na ũneeni mũvuku.
14 Nĩthĩawa na ũtao mũseo na ũĩ wa kwĩka maũndũ;
Ũtonyi wa kũelewa maũndũ na vinya nĩ syakwa.
15 Ninyie ndetheeasya asumbĩ maendeee kũsumbĩka,
Na anene kumya mĩao ya ũlũngalu.
16 Ninyie ndetheeasya anene me mbee ũsumbĩnĩ maendeee kũtongoesya,
Na andũ ma ndaĩa matwʼe sila na ũlũngalu.
17 Nĩnendete ala mambendete,
Na ala mamanthaa makambona.
18 Nĩ na ũthwii na ũkumyo,
Malĩ ĩtathelaa* na ũlũngalu.
19 Ũsyao wakwa nĩ mũseo kwĩ thaavu, o na nĩ mũseo kwĩ thaavu mũtheu,
Na kĩla nĩnenganae nĩ kĩseo kwĩ vetha ũla mũseo vyũ.
20 Nĩsĩlaa kasĩlanĩ ka ũlũngalu,
Katĩkatĩ wa tũsĩla twa ũsili wa katĩ;
21 Nĩnengae ala mambendete ũtiĩwa mwingĩ,
Na nĩnusũasya makũmbĩ moo vyũ.
22 Yeova ambũmbie mwambĩlĩĩlyonĩ wa nzĩa yake,
Mbee vyũ katĩ wa maũndũ ala weanĩisye tene mũno.
23 Naiiwe vandũnĩ vakwa kuma mavindanĩ ma tene,*
Kuma mwambĩĩonĩ, kuma mavindanĩ ma mbee o na nthĩ ĩtanamba kũmbwa.
25 Iĩma itanamba kwiwa vandũnĩ vasyo,
Mbee wa tũlĩma, nĩnasyaiwe,
26 Yĩla ũtaĩ anoomba nthĩ na itheka syayo
Kana mavali ma mbee ma mũthanga wa nthĩ.
27 Yĩla waseũvasya matu, naĩ vo;
Yĩla weekĩaa mũvaka* katĩ wa yayaya na ũkanga,
28 Yĩla walũlũmĩĩilye matu ala me ĩũlũ,*
Yĩla weekĩie mũsingi wa mbuluti* sya kĩwʼũ kĩliku,
29 Yĩla weekĩĩie ũkanga mwĩao
Kana kĩw’ũ kyawʼo kĩyaĩlĩte kũvĩtũka mwĩao wake,
Yĩla walũlũmĩĩilye* mĩsingi ya nthĩ,
30 Ĩvindanĩ yĩu, naĩ ũtee wake nĩ mũthũkũmi wĩ na ũtũĩka.
Ninyie wendete mũno mũthenya kũthi ũla ũngĩ;
Natanĩaa mbee wake mavinda onthe;
31 Nĩnatanĩaa nthĩ yake ĩla yĩkalawa,
Na kĩla nendete mũno nĩ ana ma andũ.*
32 Na yu, ana makwa, mbĩthukĩĩsyei;
Ĩĩ, nĩ atanu ala makwataa nzĩa syakwa.
33 Ĩthukĩĩsyei mũilũngwa mwĩthĩwe oĩ,
Na mũikaaĩse kũvũthĩĩsya kĩu.
34 Nĩ mũtanu mũndũ ũla ũmbĩthukĩĩasya
Kwa kũka tene* mĩomonĩ yakwa mũthenya kũthi ũla ũngĩ,
Kwa kweteela ũtee wa mĩtĩ ĩla yĩ ndeenĩ sya mĩomo yakwa;
35 Nĩkwĩthĩwa ũla ũmbonaa akakwata thayũ,
Na nĩwĩtĩkĩlawa nĩ Yeova.
36 Ĩndĩ ũla ũmbũthĩĩasya nĩwĩyĩũmĩasya we mwene,*
Na ala mamenete mendete kĩkw’ũ.”