Nthimo
30 Ii nĩsyo ndeto ngito sya Akuli mwana wa Yake, ila watavisye Ithieli, ĩĩ, Ithieli na Ukali.
2 Nyie nĩ mũtumanu kwĩ kĩla mũndũ,
Na ndyĩthĩawa na ũtonyi wa kũelewa maũndũ ũla mũndũ waĩle kwĩthĩwa nawʼo.
3 Nyie ndyĩmanyĩĩtye ũĩ,
Na ndyĩthĩawa na ũmanyi wa Ũla Mũtheu Vyũ.
4 Nũũ ũla wambatie ĩtunĩ na asyoka atheea?
Nũũ ũla woombanĩisye kĩseve itaanĩ sya moko make elĩ?
Nũũ ũla walingile kĩwʼũ na ngũa yake?
Nũũ ũla walũlũmĩĩilye* itulu syonthe sya* nthĩ?
We etawa ata na mwana wake etawa ata, ethĩwa nĩwĩsĩ?
5 Kĩla ndeto ya Ngai nĩ ntheu.*
We nĩ ngao kwa ala mevithaa nthĩnĩ wake.
6 Ndũkongele kĩndũ o na kĩmwe ndetonĩ syake,
Nũndũ weeka ũu, akaũkanyʼa,
Naku ũkoonanwʼa kana wĩ mũkengani.
7 Ve maũndũ elĩ ngũũvoya.
Ndũkambate mo ndanamba kũkwʼa.
8 Mbetangĩe maũndũ mate ma wʼo na ũvũngũ.
Ndũkanenge ũkya kana ũthwii.
Eka o nĩye lĩu ũla ũmbĩanĩe,
9 Nĩ kana ndikese kũvũna na ndiũkaĩa na ndyasya, “We Yeova nũũ?”
O na ndũkaeke nĩtwʼĩke ngya na ndyũya na ndivũthya* ĩsyĩtwa ya Ngai wakwa.
10 Ndũkatavye vwana wa mũthũkũmi ndeto sya kwanangĩa ũ mũthũkũmi ĩsyĩtwa,
Ndakese ũkũuma naku ũyoneka wĩ ĩvĩtyo.
11 Ve nzyawa ĩumanĩaa ĩthe
Na ĩtaathimaa inyia.
12 Ve nzyawa yonaa yĩ ntheu methonĩ mayo
Ĩndĩ ũyĩthĩa o na ndyambĩte kũthewʼa kĩko kyayo.*
13 Ve nzyawa metho mayo methĩawa mausĩe mĩngʼathĩlĩĩlyo
Na metho mayo masiasya angĩ na kĩvũthya mũno!
14 Ve nzyawa maeo mayo ne mbyũ
Na ngambu syayo ne tũvyũ twa kũthĩnza;
Nĩmelasya athĩni ma nthĩ
Na ngya kuma andũnĩ.
15 Nthambaa syĩthĩawa na eĩtu elĩ ala maĩaa mayasya, “Nenge! Nenge!”
Ve syĩndũ itatũ iteanĩawa,
Syĩndũ inya itesaa kwasya, “Nũu!”
17 Itho yĩla yĩthekeeaa ĩthe na yĩvũthasya kwĩwʼa inyia,
Ngũngũũ sya mwandanĩ* ikayĩkũa,
Na tũswii twa ndiũ tũkayĩya.
18 Ve maũndũ atatũ mavĩtũkĩte ũmanyi wakwa,*
Na ana ndaeleawa:
19 Nzĩa ya ndiũ matunĩ,
Nzĩa ya nzoka ĩvianĩ,
Nzĩa ya meli ũkanganĩ,
Na nzĩa ya mũndũũme na mwĩĩtu.
20 Ĩĩ nĩyo nzĩa ya mũndũ mũka kĩlaalai:*
Aĩsaa, akevangũla kanyw’a;
Na ĩndĩ ayasya, “Vai ũndũ mũthũku nĩneeka.”
21 Ve maũndũ atatũ matumaa nthĩ ĩtetema
Na maũndũ ana ĩtomĩĩsya:
22 Yĩla ngombo yasumbĩka yĩ mũsumbĩ,
Yĩla mũndũ mũtumanu waya lĩu mwingĩ mũno,
23 Yĩla mũndũ mũka ũmenetwe* watwawa,
Na yĩla mũthũkũmi mwĩĩtu woosa mwanya wa* mũndũ mũka ũla ũthũkũmaa kwake.*
24 Ve syĩndũ inya ĩũlũ wa nthĩ syĩ katĩ wa syĩndũ ila nini vyũ,
Ĩndĩ syũmbĩtwe syĩ mbũĩ:*
25 Nditikũ nĩ syũmbe ite vinya,*
Ĩndĩ o na ũu wĩ o vo, syũmbanasya lĩu wasyo thano.
26 Inyowe nĩ syũmbe ite* vinya mwingĩ,
Ĩndĩ o na ũu wĩ o vo, syakaa nyũmba syasyo mavianĩ me ngũka.
27 Ngie iyĩthĩawa na mũsumbĩ,
Ĩndĩ syonthe isongaa mbee syĩvangĩte nesa.*
29 Ve syĩndũ itatũ itambasya na nzĩa ya kwendeesya mũno,
Inya iendaa na nzĩa ya kwendeesya mũno:
30 Mũnyambũ, ũla nĩwʼo wĩ vinya vyũ katĩ wa nyamũ syonthe,
Ndũsyokaa na ĩtina ũkĩĩte mũndũ o na wĩva;
31 Ngitĩ ya nzyĩma; nthenge;
Na mũsumbĩ ũtongoesye ita syake.
32 Ethĩwa nĩwĩnenevetye na ũtumanu
Kana ethĩwa wĩ na mũvango wa kwĩka ũu,
Kunĩka kanywʼa waku na kwʼoko kwaku.
33 Nĩkwĩthĩwa o tondũ kũthuka ĩia kũtumaa yumya mauta*
Na kũvinyĩĩa ĩnyiũũ kũtumaa yumya nthakame,
Nowʼo kũkĩlya ũthatu kũetae ĩteta.