Nthimo
31 Ndeto sya Mũsumbĩ Lemũeli, ũtũmani mũito ũla inyia wamũnengie nĩ kana amũmanyĩsye:
2 Yu naĩle kũkwĩa ata, we mwanawa,
Nĩũtavya kyaũ, we mwana wa ĩvu yakwa,
Na nĩkwĩa ata, we mwana wa mawĩvĩto makwa?
3 Ndũkanenge aka vinya waku,
O na ndũkaatĩĩe nzĩa ila syanangaa asumbĩ.
4 Ti ũseo kwa asumbĩ, we Lemũeli,
Ti ũseo kwa asumbĩ kũnywʼa mbinyu
Kana atongoi kũkũlya, “Ũkĩ wakwa wĩ va?”
5 Nĩ kana maikese kũnywʼa na mayũlwa nĩ kĩla kĩtwʼĩtwe
Na mayelelũkya kĩla kyaĩlĩte athĩni.
6 Nenge ala maangĩe kũkwʼa ũkĩ
Na mbinyu ala meũthĩnĩka mũno.*
7 Nĩmanywʼe na mayũlwa nĩ ũkya woo;
Maikalilikane thĩna woo ĩngĩ.
8 Neena kwondũ wa ala matatonya kũneena;
Tetea onthe ala maangĩe kũkwʼa makwate kĩla kĩmaĩle.
9 Neena na ũisila na ũlũngalu;
Tetea athĩni na ngya makwate kĩla maĩlĩte kũkwata.*
א [Aleph]
10 Nũũ ũtonya kũkwata kĩveti kĩseo?*
Kĩ vata mũno vyũ kwĩ maliani.*
ב [Beth]
11 Mũũme wakyo nũkĩĩkĩĩaa kuma ngoonĩ,
Na ndaaĩawa nĩ kĩndũ o na kĩmwe kya vata.
ג [Gimel]
12 Kĩmũtuvaa maũndũ maseo, ĩndĩ ti mathũku,
Mĩthenyanĩ yonthe ya thayũ wakyo.
ד [Daleth]
13 Kĩmanthaa wʼĩa na katane;
Nĩkĩtanĩaa kũthũkũma na moko makyo.
ה [He]
14 Kĩilye ta meli sya mũtandĩthya;
Kyumasya lĩu wakyo vaasa.
ו [Waw]
15 O na ĩngĩ, kĩamũkaa kwĩ o ũtukũ,
Kĩkanenga mũsyĩ wakyo lĩu
Na athũkũmi makyo eĩtu ilungu syoo.
ז [Zayin]
16 Nĩkĩsũanĩaa nesa kũthooa mũũnda na kĩyĩũthooa;
Nĩkĩvandaa mũũnda wa mĩsavivũ na kĩthito kyakyo;*
ח [Heth]
17 Kĩyũmbanĩasya wĩa mũmũ,*
Na kĩyĩkĩa moko makyo vinya.
ט [Teth]
18 Nĩkĩĩkĩĩthasya viasala wakyo nũkũete vaita;
Taa wakyo ũivoaa ũtukũ.
י [Yod]
19 Moko makyo nĩmalũmasya mũtĩ wa kũlingĩlĩĩla ndii,
Na moko makyo nĩmakwataa kamũtĩ ka kĩlinga.*
כ [Kaph]
20 Nĩkĩkũnzũĩaa mũthĩni kĩtaa kya kwʼoko kwakyo,
Na nĩkĩtambũũkĩasya ngya moko makyo.
ל [Lamed]
21 Ĩvindanĩ ya ĩa kĩikwatawa nĩ kĩũũyũ ĩũlũ wa andũ makyo ma mũsyĩ,
Nĩkwĩthĩwa andũ onthe ma mũsyĩ wakyo methĩawa mekĩĩte ngũa syĩ muutĩa.*
מ [Mem]
22 Nĩkĩĩseũvĩasya suka syakyo sya kĩtanda.
Ngũa syakyo syĩthĩawa syĩ sya katane na wʼĩa wa langi wa nzambalaũ.
נ [Nun]
23 Mũũme wakyo ethĩawa esĩkĩe nesa mĩvĩanĩ ya ndũa,
Vala wĩkalaa katĩ wa atumĩa ma ĩ nthĩ.
ס [Samekh]
24 Nĩkĩtumaa ngũa sya katane* na kĩyĩithoosya
Na nĩkĩthooeasya atandĩthya mĩsivi.
ע [Ayin]
25 Kĩkĩĩte vinya na ũkumyo,
Na kyeteelaa ĩvinda yũkĩte na ũkũmbaũ.*
פ [Pe]
26 Kyathamasya kanywʼa wakyo na ũĩ;
Mwĩao wa ũseo* wĩthĩawa ũĩmĩnĩ wakyo.
צ [Tsade]
27 Nĩkĩsiasya mawĩa ma nyũmba yakyo,
Na kĩyĩĩsaa mũkate wa ũtulu.
ק [Qoph]
28 Syana syakyo nĩsyũkĩlaa na iitangaasa kana nĩ kĩtanu;
Mũũme wakyo nĩwũkĩlaa na aikĩtaĩa.
ר [Resh]
29 Ve aka aingĩ aseo,*
Ĩndĩ we, ĩĩ we, nũmavĩtũkĩte onthe.
ש [Shin]
30 Mũndũ no oneke e wa kwendeesya ĩndĩ ũndũ ũsu no wĩthĩwe wĩ ũkengani, na wanake no wĩthĩwe o wa kavinda,*
Ĩndĩ kĩveti kĩla kĩkĩaa Yeova kĩkataĩwa.
ת [Taw]
31 Kĩnengei ĩtuvi nũndũ wa wĩa ũla kĩtethasya,*
Na mawĩa makyo nĩmakĩtaĩe mĩvĩanĩ ya ndũa.