Nthimo
29 Mũndũ ũla ũmasya ngingo yake* ĩtina wa kũkanwʼa kaingĩ
Akatũlangwa vyũ atataĩĩe wĩthĩe ndatonya kũvoa.
2 Ala alũngalu maingĩva, andũ nĩmatanaa,
Ĩndĩ ũla mũthũku asumbĩka, andũ nĩmalumaa.
3 Mũndũ ũla wendete ũĩ nũtanĩthasya ĩthe,
Ĩndĩ ũla ũtindanasya na malwaya nĩwanangaa ũthwii wake.
4 Mũsumbĩ aatĩĩa ũsili wa katĩ nũtumaa nthĩ yake yĩthĩwa yĩ ndũmu,
Ĩndĩ mũndũ ũla ũmanthaa ĩvaki nũmyanangaa.
5 Mũndũ ũla ũkathĩĩaa mũtũi wake mana
Alanĩalya maaũ make neti.
6 Ĩvĩtyo ya mũndũ mũthũku nĩyĩmũkwatasya,
Ĩndĩ ũla mũlũngalu nĩwinaa na aitana.
7 Ũla mũlũngalu nũthĩnĩkĩaa maũndũ ala ngya syĩtĩkĩlĩtwʼe nĩ mĩao kũkwata,
Ĩndĩ ũla mũthũku ndakwatasya ũu.
8 Andũ ala mekathĩĩaa makwatasya ndũa mwaki,
Ĩndĩ ala oĩ nĩmavoovasya ũthatu.
9 Mũndũ mũĩ eethĩwa na ngananĩo na mũndũ mũtumanu,
Vethĩawa ĩteta yingĩ na kĩvũthya, ĩndĩ vai kĩndũ mesaa kwĩanĩsya.
10 Andũ ala methĩawa na waũni wa nthakame methĩawa mamenete mũndũ o na wĩva ũte na ĩvĩtyo,*
Na nĩmamanthaa ũndũ meũmina thayũ wa ala alũngalu.*
12 Mũtongoi eethukĩĩsya ũvũngũ,
Athũkũmi make onthe matwʼĩkaa andũ athũku.
13 Ngya na mũndũ ũla ũnyamaasya angĩ, mavwʼanene ũndũnĩ ũũ:*
Me elĩ, Yeova nĩwe ũnengae metho moo kyeni.*
14 Mũsumbĩ asilĩla ngya nesa,
Kĩvĩla kyake kya ũsumbĩ kĩkekalaa kĩ kĩsũvĩĩku.
15 Ndata* na ũkanyʼo itumaa mũndũ ethĩwa e mũĩ,
Ĩndĩ mwana ũla walekeleelwʼa ekĩĩthasya inyia nthoni.
16 Ala athũku mongeleka, mavĩtyo nĩmongelekaa,
Ĩndĩ ala alũngalu makoona athũku maivalũka.
17 Lũnga mwana waku na akaũthũmũsya;
Na akaũtanĩthya* mũno.
18 Vala vate woni,* andũ mekaa kĩla mekwenda,
Ĩndĩ nĩ atanu ala makwataa mĩao.
19 Mũthũkũmi ndaketĩkĩla kũlũngwa na ndeto,
Nũndũ o na kau nũeleawa, ndaatĩĩaa kĩla watavwʼa.
20 We nĩwonete mũndũ wĩ mĩtũkĩ ya kũneena?
Mũndũ mũtumanu ethĩawa na wĩkwatyo mwingangĩ kwĩ we.
21 Mũthũkũmi ananwʼa kuma e wa mũika,
Ĩtina akatwʼĩka mũndũ ũte mũvea.
22 Mũndũ ũthataa mĩtũkĩ okĩlasya kĩthokoo;
Mũndũ o na wĩva ũthilĩkaa mĩtũkĩ ekaa mavĩtyo maingĩ.
23 Mĩngʼathĩlĩĩlyo ya mũndũ ĩkamũnyivya,
Ĩndĩ mũndũ o na wĩva wĩ veva wa wĩnyivyo akakumwʼa.
24 Ũla ũtetheeasya kĩngʼei ethĩawa emenete.*
No ewʼe wĩtano wa kumya ũkũsĩ,* ĩndĩ ayĩema kũweta kĩndũ o na kĩmwe.
26 Andũ aingĩ mamanthaa ũndũ matonya kũkomana na* mũtongoi,
Ĩndĩ mũndũ akwataa ũsili wa katĩ kuma vala ve Yeova.
27 Mũndũ ũla ũtaatĩĩaa ũsili wa katĩ nĩ ũthatyo kwa ala alũngalu,
Ĩndĩ ũla nzĩa yake yĩthĩawa yĩ ndũngalu nĩ ũthatyo kwa ũla mũthũku.