Nthimo
28 Ala athũku masembaa vate mũndũ ũmasembanĩtye,
Ĩndĩ ala alũngalu methĩawa na ũkũmbaũ ta mũnyambũ.*
2 Yĩla ve na ĩvĩtyo* ĩ nthĩ, nthĩ ĩsu ĩkeethĩawa na mũtongoi ĩtina wa ũngĩ,
Ĩndĩ mũndũ wĩ na ũtonyi wa kũvathũkanyʼa maũndũ na wĩ na ũmanyi, akatetheesya mũtongoi* ekale ĩvinda yĩasa.
3 Mũndũ ngya ũla ũkengaa mũthĩni na aimũvena
Nĩ ta mbua ĩla ĩtutaa lĩu wʼonthe.
4 Ala matiaa mĩao mataĩaa ũla mũthũku,
Ĩndĩ ala maatĩĩaa mĩao nĩmamathatĩaa.
5 Andũ ala athũku maitonya kũelewa ũsili wa katĩ,
Ĩndĩ andũ ala mamũmanthaa Yeova no maelewe kĩla ũndũ.
6 Nĩ kavaa mũndũ ngya ũla ũendaa wĩanĩunĩ wake
Kwĩ mũndũ mũthwii ũla nzĩa syake ne nthũku.
7 Mwana ũla ũeleawa maũndũ nũkwataa mĩao,
Ĩndĩ ũla ũtindanasya na andũ me ĩtomo aeteae ĩthe nthoni.
8 Ũla wongeleelaa ũthwii wake na ũtandĩthyo na vaita
Awũmbanĩasya ũla wonasya ngya ũseo.
9 Ũla ũleaa kwĩthukĩĩsya mĩao,
O na mboya yake nĩ ũthatyo.
10 Ũla ũtongoeasya andũ alũngalu nzĩanĩ nthũku akavalũka ĩimanĩ yake mwene,
Ĩndĩ ala mataweteka ũthũku makatiĩwa ũseo.
11 Mũndũ mũthwii ethĩawa e mũĩ methonĩ make mwene,
Ĩndĩ mũndũ ngya wĩ na ũmanyi nũmanyaa nesa ũndũ ũilye.
12 Ala alũngalu masinda, kwĩthĩawa na ũkumyo mwingĩ,
Ĩndĩ ala athũku makwata ũkũmũ, andũ masembaa makevithe.
13 Ũla ũvithaa mavĩtyo make mwene ndakaendeea nesa,
Ĩndĩ mũndũ o na wĩva ũmaumbũlaa na aimatia akeewʼĩwa tei.
14 Nĩ mũtanu mũndũ ũla mavinda onthe wĩkalaa e metho,*
Ĩndĩ mũndũ o na wĩva ũla ũmasya ngoo yake akavalũka mũisyonĩ.
15 O ta mũnyambũ ũũkooma na nduva ĩsembanĩtye nzyĩma,
Nowʼo mũtongoi mũthũku wĩ na ũkũmũ ĩũlũ wa athĩni wĩthĩawa ailye.
16 Mũtongoi ũte ũmanyi atũmĩaa ũkũmũ wake naĩ,
Ĩndĩ ũla ũmenete vaita ũla ũkwatĩkanaa na nzĩa itaĩlĩte nũasavasya thayũ wake.
17 Mũndũ ũla ũitavĩwe nĩ ĩvĩtyo ya kwĩtĩkya nthakame nũndũ wa kũaa mũndũ ũngĩ* akaendeea kũsemba akĩĩte nginya mbũanĩ.*
Ndakatetheewʼe nĩ mũndũ o na ũmwe.
18 Ũla nzĩa syake itatalĩka ĩvĩtyo akatangĩĩwa,
Ĩndĩ ũla nzĩa syake nthyoeku akavalũka atataĩĩe.
19 Ũla ũĩmaa mũũnda wake akeethĩwa na lĩu* mwingĩ,
Ĩndĩ ũla ũatĩanĩaa na maũndũ matatethya akeethĩwa na ũkya mwingĩ.
20 Mũndũ mũĩkĩĩku akakwata moathimo maingĩ,
Ĩndĩ ũla wĩkalaataa athue ndakaema kwĩthĩwa na ĩvĩtyo.
21 Ti ũseo kwonanyʼa kyende;
Ĩndĩ mũndũ no eke ũthũku akwate kĩlungu kya mũkate.
22 Mũndũ wĩ kĩwĩu kyai* ethĩawa na wendi mwingĩ wa kũthua,
Atesĩ kana ũkya ũkamũkwata.
23 Mũndũ o na wĩva ũla ũkanasya ũngĩ, ĩtina akoona ũseo mwingangĩ
Kwĩ mũndũ ũla ũkathĩĩaa angĩ mana na ũĩmĩ wake.
24 Mũndũ o na wĩva ũvenaa ĩthe na inyia na ayasya, “Ti ũthũku,”
Nĩ mũnyanya wa mũndũ ũla ũetae wanangĩko.
26 Mũndũ o na wĩva ũĩkĩĩaa ngoo yake mwene nĩ ndia,
Ĩndĩ ũla ũendaa kwa ũĩ akavonoka.
27 Mũndũ o na wĩva ũnengae ngya ndakaĩwa nĩ kĩndũ o na kĩmwe,
Ĩndĩ ũla ũilalĩasya metho make akakwatwa nĩ iumo mbingĩ.
28 Andũ athũku makwata ũkũmũ, mũndũ nĩwĩvithaa,
Ĩndĩ mathela, ala alũngalu nĩmaingĩvaa.