Nthimo
25 O nasyo ii nĩ nthimo sya Solomoni, ila aũme ma Esekia mũsumbĩ wa Yuta maandĩkie:*
2 Nĩ ũtheu mũtisu wa Ngai kwia ũndũ kĩmbithĩ,
Na ũkumyo wa asumbĩ nĩ kũkunĩkĩla ũndũ nesa.
3 O tondũ ĩtu yĩthĩawa yĩ ĩũlũ na nthĩ yĩthĩawa yĩ ndiku,
Nowʼo ngoo ya asumbĩ yĩthĩawa ĩtamanthĩka.
4 Umya kĩko vethanĩ,
Na ũkaumĩla wĩ mũtheu vyũ.
5 Vetanga ũla mũthũku mbee wa mũsumbĩ,
Na kĩvĩla kyake kya ũsumbĩ kĩkalũlũmĩĩlwʼa vyũ ũlũngalunĩ.
6 Ndũketaĩe mbee wa mũsumbĩ,
Na ndũkelikye andũnĩ me nguma,
7 Nĩkwĩthĩwa nĩ kavaa we mwene akakwĩa, “Ambata vaa,”
Kwĩ akwĩkĩĩthye nthoni mbee wa mũndũ wa ndaĩa.
8 Ndũkasembee kũtwaa mũtũi waku kotinĩ,
Nũndũ ĩtina ũkeeka ata yĩla ũkakwĩkĩĩthya nthoni?
9 Mina thĩna waku na mũtũi waku,
Ĩndĩ ndũkavuanyʼe kĩla ũnataviwʼe kĩmbithĩnĩ,*
10 Nĩ kana ũla ũkwĩthukĩĩsye ndakakwĩkĩĩthye nthoni
Na ũinyaĩĩkya ũvoo mũthũku* ũtatonya kũũtũnga.
11 O ta maevo ma thaavu me syĩndũnĩ sya kwasa* sya vetha
Nowʼo ndeto ĩla yaneenwa ĩvindanĩ yĩla yaĩlĩte yĩthĩawa ĩilye.
12 O ta mũnaĩ wa thaavu na kĩndũ kya kwĩyanakavya kya thaavu mũseo
Nowʼo mũndũ ũla umasya ũkanyʼo kwa ũĩ wĩthĩawa ailye kũtũnĩ kũla kwĩwi.
13 O ta ũthithu wa ĩa mũthenyanĩ wa ngetha
Nowʼo mũtũmwa mũĩkĩĩku wĩthĩawa ailye kwa ala mamũtũma,
Nũndũ nũvuũkasya vwana wake.*
14 O ta matu na kĩseve ila itaetae mbua
Nowʼo mũndũ ũla wĩkathĩĩaa ĩũlũ wa mũthĩnzĩo ũtanenganĩtwe* wĩthĩawa ailye.
15 Mũũngamĩi esũvawa na wũmĩĩsyo akesũvĩka,
Na ũĩmĩ mwololo* no ũtũle ĩvĩndĩ.
16 Woona ũkĩ wa nzũkĩ, ya o ũla ũkwĩanĩe,
Nĩkwĩthĩwa waya mwingĩ mũno no ũũtavĩke.
17 Ĩkĩĩthya kana ndũnakinyia kũũ kwaku mũsyĩ kwa mũtũi waku kaingĩ,
Nĩ kana ndakanowʼe nue na aikũmena.
18 O ta nzũma ya kaũ na ũvyũ na ĩangi yũĩ
Nowʼo mũndũ ũla umasya ũkũsĩ wa ũvũngũ ĩũlũ wa mũtũi wake wĩthĩawa ailye.
19 O ta ĩeo ĩtũlĩku kana kũũ kwonzu
Nowʼo kwĩkwatya mũndũ ũte wa kwĩkwatwʼa* mavindanĩ ma thĩna kwĩthĩawa kũilye.
20 O ta mũndũ ũla umasya ngũa mũthenya ũla kwĩ mbevo
Na o ta siki yetwa yĩatinĩ
Nowʼo kwĩthĩawa kwa mũndũ ũla winĩaa ngoo yĩmakĩe mbathi.
21 Ethĩwa mũmaitha waku* e na nzaa, mũnenge mũkate aye;
Ethĩwa e na waũni, mũnenge kĩw’ũ anywʼe,
22 Nũndũ ũkeethĩwa ũyũmbĩĩa makaa me mwaki mũtwenĩ wake,*
Na Yeova akaũtuva.
23 Kĩseve kya ngalĩko ya ĩũlũ kĩetae mũoono wa mbua,
Na ũĩmĩ ũla ũsukanaa ũtumaa mũndũ athata.
24 Nĩ kavaa kwĩkala konanĩ ya kĩala
Kwĩ kwĩkala nyũmbanĩ ĩmwe na kĩveti kĩ ĩteta.*
25 O ta kĩw’ũ kĩthithu thayũnĩ* mũnou
Nowʼo livoti nzeo yumĩte nthĩ ya kũasa yĩthĩawa ĩilye.
26 O ta mbuluti yĩ* na ndaka na kĩthima kyananganyʼe
Nowʼo mũndũ mũlũngalu ũla wĩtĩkĩlaa kwĩka kĩla mũndũ mũthũku ũkũmũtavya* wĩthĩawa ailye.
27 Ti ũseo kũya ũkĩ mwingĩ mũno wa nzũkĩ,
O na ti ũseo mũndũ kwĩmanthĩa ũkumyo wake mwene.
28 O ta ndũa ngũta syayo syanangĩtwe,
Nowʼo mũndũ ũla ũtatonya kũsiĩĩa ũthatu wake* wĩthĩawa ailye.