Nthimo
22 Ĩsyĩtwa ĩseo* nĩyo yaĩle kũnyuvwa kwĩ ũthwii mwingĩ;
Kũnengwa ndaĩa kwĩ kavaa kwĩ vetha na thaavu.
2 Mũthwii na ngya mavwʼanene ũndũnĩ ũũ:*
Yeova nĩwe wamombie elĩ.
3 Ũla mũĩ nĩwonaa mũisyo na ayĩvitha,
Ĩndĩ ala mate na ũmanyi maendeeaa kũthi na mbee na maikwatwa nĩ mathĩna.*
4 Kwĩnyivya na kũmũkĩa Yeova
Kũetae ũthwii na ũkumyo na thayũ.
5 Mĩw’a na itei syĩthĩawa kasĩlanĩ ka mũndũ ũla mũthyoeku,
Ĩndĩ mũndũ o na wĩva ũla wonaa thayũ wake wĩ wa vata nũtataa ekale vaasa vyũ nasyo.
7 Mũthwii nĩwe ũsumbĩkaa ngya,
Na ũla wakova ethĩawa ngombo ya ũla wamũkovethya.
8 Mũndũ o na wĩva ũvandaa maũndũ mate ma ũlũngalu akaketha mũisyo,
Na ndata ya ũthilĩku wake ĩkavika mũthya wayo.
9 Mũndũ mũlau* akaathimwa,
Nĩkwĩthĩwa nĩwaĩaa ngya lĩu wake.
11 Ũla wendete ngoo ntheu na wĩ ũneeni wĩ mumo,
Akeethĩwa mũnyanyae wa mũsumbĩ.
12 Metho ma Yeova nĩmasũvĩaa ũmanyi,
Ĩndĩ nũkulumanasya ndeto sya nzeleke.
13 Mũndũ mũtulu aasya: “Ve mũnyambũ nza!
Nĩngũaĩwa katĩkatĩ wa kĩwanza kya ndũa!”
14 Kanyw’a wa aka au* nĩ ĩima ĩliku.
Ũla ũsilĩlwe nĩ Yeova akavalũka vo.
15 Ũtumanu wĩthĩawa woveewe ngoonĩ ya kamwana,*
Ĩndĩ ndata ya kũkalũnga ĩkawumya ĩũtwae vaasa vyũ nako.
16 Ũla ũvenaa ngya na ũkengani nĩ kana ongeleele ũthwii wake
Na ũla ũnengae athwii mĩthĩnzĩo
Mũthya akatwʼĩka ngya.
17 Tea kũtũ kwaku na ũyĩthukĩĩsya ndeto sya ala oĩ,
Nĩ kana ũnengane ngoo yaku ũmanyinĩ wakwa,
18 Nĩkwĩthĩwa nĩ ũndũ wa kwendeesya wie maũndũ asu nthĩnĩ waku,
Nĩ kana maũndũ asu onthe methĩawe ilomonĩ syaku kĩla ĩvinda.
19 Ũmũnthĩ nĩngũũnenga ũtao,
Nĩ kana ũmwĩkwatye Yeova.
20 Yo ndikũandĩkĩe maũndũ maingĩ,
Ndiũnenga ũtao na ũmanyi,
21 Ngũmanyĩsye ndeto sya wʼo na sya kwĩkwatwʼa,
Nĩ kana ũsyokee ũla ũkũtũmĩte wĩ na ũvoo wa w’o?
22 Ndũkavene mũndũ ngya nũndũ nĩ ngya,
Na ndũkatumbatumbĩe mũndũ mũthĩni mũvĩanĩ wa ndũa,
23 Nĩkwĩthĩwa Yeova mwene akaĩkĩĩthya nĩmakwata sila wa katĩ
Na akamina thayũ wa ala mamavenaa na ũkengani.*
24 Ndũkatindanasye na mũndũ ũthataa mũno
O na ndũkekwatanyʼe na mũndũ ũthilĩkaa mĩtũkĩ,
25 Nĩ kana ndũkaaĩse kwĩmanyĩsya nzĩa syake
Na ũyĩlikya* kĩteinĩ.
26 Ndũkethĩwe katĩ wa ala makethanasya manengane ngwatĩlĩlyo,
Ala manenganae ngwatĩlĩlyo kwondũ wa kĩndũ kyakovethwʼa.
27 Ethĩwa ndwĩ na kĩndũ ũĩva,
Kĩtanda kyaku kĩkooswa o ũkĩkomeee!
28 Ndũkakũĩĩsye mũvaka wa tene
Ũla aa-ũmae maku meekĩie.
29 We nĩwonete mũndũ wĩthĩawa na ũtũĩka wĩanĩ wake?
Akaũngama mbee wa asumbĩ;
Ndakaũngama mbee wa andũ mate nguma.