Nthimo
21 Ngoo ya mũsumbĩ no ta tũlũsĩ twa kĩwʼũ kwʼokonĩ kwa Yeova.
Ngai amĩtongoeasya vandũ o na va vala ũkwenda.
2 Nzĩa syonthe sya mũndũ syonekaa syaĩlĩte methonĩ make,
Ĩndĩ Yeova nũthianaa ngoo.*
3 Kwĩka kĩla kyaĩlĩte na kyosanĩte na ũsili wa katĩ
Kũmwendeeasya Yeova mũno kwĩ nthembo.
4 Metho me mĩng’athĩlĩĩlyo na ngoo yĩ mĩyimbyo,
Ila nĩsyo taa ũla ũtongoeasya ala athũku, nĩ naĩ.
5 Vate nzika, mĩvango ya ala me kĩthito ĩtumaa maĩla,*
Ĩndĩ vate ndĩi, onthe ala masembeaa kwĩka maũndũ matwʼĩkaa ngya.
6 Kũkwata ũthwii kwa nzĩa ya ũkengani
Kũilye ta mũumbĩ ũla ũthelaa, na nĩ kĩtei kyũaaa.*
7 Ũngʼendu wa ala athũku ũkamatuta vyũ,
Nĩkwĩthĩwa nĩmaleaa kwĩka maũndũ maatĩĩe ũsili wa katĩ.
8 Nzĩa ya mũndũ wĩ na ĩvĩtyo yĩthĩawa yĩ nthyoeku,
Ĩndĩ maũndũ ma mũndũ mũtheu methĩawa me malũngalu.
9 Nĩ kavaa kwĩkala konanĩ ya kĩala
Kwĩ kwĩkala nyũmbanĩ ĩmwe na kĩveti kĩ ĩteta.*
10 Mũndũ mũthũku ethĩawa endete* mũno maũndũ mathũku;
Ndonasya mũtũi wake ũseo.
11 Ũla wĩ kĩvũthya akanwʼa, ũla ũte na ũmanyi nĩwũĩvaa mũnango,
Na mũndũ mũĩ amanyĩwʼa maũndũ maingangĩ, nũkwataa ũmanyi.*
12 Ũla Mũlũngalu nũsiasya nesa nyũmba ya ũla mũthũku;
Nũngʼuthũlaa ala athũku akamananga.
13 Ũla ũvingaa kũtũ kwake ndakewʼe kĩĩo kya mũthĩni
O nake mwene akeetana na ndakasũngĩwa.
14 Mũthĩnzĩo wa kĩmbithĩ nũminaa ũthatu,
Na ĩvaki ĩvithe* nĩyĩminaa ũthilĩku mwai.
15 Nĩ ũtanu kwa mũndũ mũlũngalu kwĩka maũndũ aatĩĩe ũsili wa katĩ,
Ĩndĩ ũsu nĩ ũndũ mũthũku mũno kwa ala mekaa maũndũ mathũku.
16 Mũndũ ũla ũtiaa nzĩa ya ũmanyi mũliku
Akathũmũa vamwe na ala makwie na mate na ũtonyi o na ũmwe.
17 Ũla wendete kwĩtanĩthya* akatwʼĩka ngya;
Ũla wendete mbinyu na mauta ndakathua.
18 Ũla mũthũku nĩ wovosyo wa ũla mũlũngalu,
Na nzeleke ĩkooswa vandũ va ũla mũlũngalu.
19 Nĩ kavaa kwĩkala weũnĩ
Kwĩ kwĩkala na kĩveti kĩ ĩteta* na kĩthataa mĩtũkĩ.
20 Ũthwii wa vata na mauta syĩthĩawa nyũmbanĩ ya mũndũ ũla mũĩ,
Ĩndĩ ndia yanangaa* kĩla yĩ nakyo.
21 Ũla ũmanthaa ũlũngalu na wendo ũtathelaa
Akakwata thayũ, ũlũngalu, na ũkumyo.
22 Mũndũ mũĩ no alĩse ndũanĩ* ya ala me ũtonyi
Na ayananga vinya ũla mekwatĩtye.
23 Ũla ũsũvĩaa kanyw’a wake na ũĩmĩ wake
Nĩwĩvathanaa* na thĩna.
24 Mwĩkathĩĩi wĩ mĩtũlyo na mĩyimbyo
Nĩwʼo mũndũ ũla wĩkaa maũndũ na mĩtũlyo na ateũkũlya wĩtawa.
25 Kĩla mũndũ mũtulu wĩliĩlaa kĩkamũaa,
Nũndũ moko make nĩmaleaa kũthũkũma.
26 Mũthenya mũima eliĩlaa syĩndũ mbingĩ na ĩtomo,
Ĩndĩ ũla mũlũngalu anenganae ate kũimana kĩndũ.
27 Nthembo ya ũla mũthũku nĩ ũthatyo.
Nĩ mbee mũno wĩana ata yĩla wamyumya e na kĩeleelo kĩthũku!*
28 Ngũsĩ ĩla ĩkenganaa ĩkathela,
Ĩndĩ mũndũ ũla wĩthukĩĩasya akaumya ũkũsĩ ũtonya kũtethya.*
29 Mũndũ mũthũku ethĩawa na ũthyũ ũte nthoni,
Ĩndĩ nzĩa ya ũla mũlũngalu nĩyo yĩthĩawa yĩ ndũmu.*
30 Vai ũĩ, kana ũmanyi, kana ũtao ũtonya kũvĩnga Yeova.
31 Mbalasi yĩthĩawa yũmbanĩw’e mũthenya wa kaũ,
Ĩndĩ ũtangĩĩo nĩ wa Yeova.